ವೆಗ್ಗಿಂಚ್ ಆಮ್ಚೆ ವಯ್ರ್ ಪರತ್ ಆನ್ಯೇಕ್ ಸಪ್ತೆಂಬರ್ 14 ????

ಗೆಲೆತ್ಯಾ ಥೊಡ್ಯಾ ದಿಸಾಂ ಆದಿಂ ಹಾವೆಂ ಹ್ಯಾಚ್ ಅಂಕಣಾಂತ್ ಕಿರಿಸ್ತಾವಾನಿಂ ಕರ್ಚಿ ಸೆವಾ ಸರ್ಪಾಕ್ ವೊತ್ ಲ್ಯಾ  ದೂದಾ ಬರಿ ಜಾವ್ನ್ ಆಸಾ ಆನಿಂ ಸರೊಪ್ ಆಮ್ಕಾಂ ಚಾಬೊಂಕ್ ಆಂವ್ಡೆವ್ನ್ ಆಸಾ ಮ್ಹುಣ್ ಬರಯ್ಲೆಂ. ತಾಚಾ ಉಪ್ರಾಂತ್ ಜಾಲ್ಲಿಂ ಚಾರ್ ಘಡಿತಾಂ ಪಳೆಯಾ.ಮತಾಂತರ್ ಕರ್ತಾತ್ ಮ್ಹುಣ್ ಭಜರಂಗಿನಿ೦,  ಅಮ್ಚಾನಿಂ ಚಲವ್ನ್ ವರ್ಚಾ ಥೊಡ್ಯಾ ಸಂಸ್ತ್ಯಾ ವಯ್ರ್ ತಶೆಂ ವ್ಯಕ್ತಿ ವಯ್ರ್ ಪೊಡ್ಕಿರೊ ಅಪ್ರಾಧ್ ಮಾಂಡುನ್ ಸರ್ಕಾರಿ ಯಂತ್ರಾ ಸಮೇತ್ ಅಕ್ರಮಣಾಂ ಕೆಲ್ಲಿಂ ಆಮಿಂ ವಾಚುನ್೦ತ್ ಆಸಾಂವ್.ಪರತ್ ಕಿತ್ಯಾಕ್ ಆಶೆಂ ಘಡ್ತಾ ಮ್ಹುಣ್ ಚಿಂತುನ್ ಆಸಾತ್ ಗೀ ? ಯಾ ಆಚಾನಕ್ ಘಡಿತಾಂಕ್ so called ದೇಶ್ ಭಕ್ತಾನಿಂ ದಾಕಾಯ್ಲಿ ತಕ್ಷಣಾಂಚಿ  ಪ್ರತಿಕ್ರಿಯಾ ಹಿ ಮ್ಹುಣ್ ಚಿಂತುನ್ ಆಸಾತ್ ? ಖಂಡಿತ್ ನ್ಹಂಯ್... ತರ್ ಕಿತೆಂ ?
            
ಹ್ಯಾ ಕರವಾಳಿಂತ್ ಕೇಸರ್ ರಾಜ್ಯ್ ಆಯ್ಲ್ಯಾ ಉಪ್ರಾಂತ್ ಅಮಿಂ ಕರ್ಚಾ ಪ್ರತಿಭಟನಾಂಕ್ challenge ಕರ್ನ್ ಪರ್ಯಾಯ್ ಪ್ರತಿಭಟನ್ ಚಲಂವ್ಚೆಂ trend ಗೆಲೆತ್ಯಾ ದಿಸಾನಿಂ ಚಡ್ಡೆಗಾರಾನಿಂ ಭರನ್ ಚಲೊನ್ ವೆಲಾಂ. ತುಮ್ಕಾಂ ಉಡಾಸ್ ಆಸೊಂಕ್ ಪುರೊ , ಕುಂದಾಪುರಾಂತ್ ದೋನ್ ವರ್ಸಾಂ ಆದಿಂ ಆಮ್ಚಾ ಏಕಾ ಯಜಾಕಾಕ್ ಮತಾಂತರ್ ಕರ್ತಾ ಮ್ಹುಣ್ ಹಲ್ಲೊ ಕರ್ನ್  ಪೋಲಿಸಾಂಕ್ ದಿಲ್ಲ್ಯಾ ವಿರುದ್ದ್ ಥಂಯ್ಚಾ ಶಾಸ್ತ್ರಿ ಸರ್ಕಲಾ ಕಡೆ ಆಮಿಂ ಚಲಯ್ಲ್ಯಾ ಪ್ರತಿಭಟನ್ ಜಾಲ್ಲ್ಯಾ ದೋನ್೦ಚ್ ದೀಸಾ ಉಪ್ರಾಂತ್  ಚಡ್ಡೆಗಾರಾನಿಂ ಆಮ್ಚ್ಯಾ ವಿರುದ್ದ್ ವಡ್ಲೆಂ ಪ್ರತಿಭಟನ್ ಥ೦ಯ್ಚ್ ಕೆಲ್ಲೆಂ.  ಮಂಗ್ಳೂರಾಂತ್ ಕಿರಿಸ್ತಾವಾನಿಂ ಚಲಂವ್ಛಾ ಆಶಿರ್ವಾದ್ ಮ್ಹುಳ್ಳ್ಯಾ ಹೋಟೆಲಾಂತ್ ಭಿಪಾ ಮಾಸ್ ವಿಕ್ತಾತ್ ಮ್ಹುಣ್ ತಾಚೆರ್ ಅಕ್ರಮಣ್ ಕೆಲ್ಲ್ಯಾ ಭಜರಂಗಿ ವಿರುದ್ದ್ ಆಮಿಂ ಕೆಲ್ಯಾ ಪ್ರತಿಭಟನಾಕ್ ಯೀ  ದೋನ್೦ಚ್ ದಿಸಾಂ ಭಿತರ್ ಪರ್ಯಾಯ್ ಪ್ರತಿಭಟನ್ ಕರ್ನ್ ಅಮ್ಚೆರ್ ಏಕ್ ಸಂಕೇತ್ ದಿಂವ್ಚೊ ಪ್ರಯತ್ನ್ ಕೆಲೆಂ ಫ್ಯಾಸಿಸ್ಟ್ ಗಾರನಿಂ. ಪುಣ್ ಪೋಯ್ರ್ ಮಂಗ್ಳೂರಾಂತ್ ಸೋಮಾಶೇಖರ್ ವರ್ದೆ ವಿರೋಧ್ ಕಿರಿಸ್ತಾವಾನಿಂ ಕೆಲ್ಲ್ಯಾ ಇತ್ಲ್ಯಾ ವ್ಹಡ್ ಪ್ರತಿಭಟನಕ್ ಪರ್ಯಾಯ್ ಜಾವ್ನ್ ಚಡ್ಡೆಗಾರಾನಿಂ ಸಮಾವೇಶ್ ಕರುಂಕ್ ನಾ. ತಿತ್ಲ್ಯಾಕೀ ತೆ ವಗೆ‍‍ಚ್ ಬಸ್ಲ್ಯಾತ್ ಮ್ಹುಣ್ ತುಮಿ ಚಿಂತುನ್ ಆಸಾತ್ ಗೀ ? ಆಸಾಧ್ಯ್ ತೆಂ. ತುಕಾ ಏಕಾ ಹಿಟ್ಲರಾಕ್ ಪುಣೀ ಇಲ್ಲಿಶಿ ಬೂದ್ ಸಾಂಗೊನ್ ಸಮಾ ಕರ್ಯೇತ್, ಪುಣ್ ಕಲ್ಲಡ್ಕ ಪ್ರಭಾಕರ್ ಭಟ್ಟಾಕ್ ನ್ಹಂಯ್. ಇತ್ಲ್ಯಾಕೀ ಹ್ಯಾ ಕೆನಾರಾಕ್ ಇತ್ಲೆಂ ವಡ್ಲೆಂ communal lab ಕೆಲ್ಲೆಂ credit ಪುರಾ ಹ್ಯಾ ಭೊಟಾಕ್ ವೆತಾ. ಅರ್ದೆಂ ಶಿಕೊವ್ನ್ ಆಸ್ ಲ್ಲ್ಯಾ ಲೊಕಾಂಕ್ ಕಶೆಂ misguide ಕರ್ನ್ ಉಣ್ಯಾಂ ಸಂಖ್ಯಾಚಾ ಲೋಕಾ ವಯ್ರ್ ಬಾಂಧುನ್ ದಿವ್ಯೇತ್ ಆನಿಂ ತಶೆಂ ಕೆಲ್ಲ್ಯಾನಿಮ್ತಿಂ ಕಸೊ ರಾಜಕೀಯ್ ಲಾಭ್ ಘೆವ್ಯೇತ್ ಮ್ಹುಣ್ ಇಂಡಿಯಾಂತ್ ಪ್ರಥಮ್ ಯಶಸ್ವಿ ಪ್ರಯೋಗ್ ಕೆಲ್ಲೊಚ್ ಹಾಣೆಂ. ಹ್ಯಾ ಖಾತಿರ್ ಹಾಕಾ ಏಕ್ PhD ದಿಲ್ಯಾರ್ ಯೀ ಉಣೆಂಚ್.!

ಅಸಲೊ ಕಲ್ಲಡ್ಕಾಚೊ ಭೊಟ್  ಕ್ರೀಸ್ತಿ ಪ್ರತಿಭಟನ್ ಯಶಸ್ವಿ ಜಾತಾನಾ ನಿದೊನ್ ಪಡ್ತಾ ಮ್ಹುಣ್ ತುಮಿ ಚಿತುಂನ್ ಆಸಾತ್ ಗೀ? ತಾಚಾ ಹರ್ಯೇಕಾ ಶಿರಾನಿಂ ಕ್ರೀಸ್ತಿ ವಿರೋಧ್ ನಂಜಿ ವ್ಹಾಳೊನ್ ಆಸಾ. ತಶೆಂ ಮ್ಹುಣ್ ಹ್ಯಾ ಪಾವ್ಟಿಂ ಕಾಂಯ್ ಏಕ್ ಚ್ ಪಾವ್ಟಿಂ reaction ದೀಂವ್ಕ್ ತೊ ವಚುಂಕ್ ನಾ. ಹ್ಯಾ ಪಾವ್ಟಿಂ ಥೊಡೆ  calculated ಮಾಫ್ ಕಾಣ್ಛೆವ್ನ್ ವ್ಯವಸ್ತಿತ್ ಜಾವ್ನ್ ಕಿರಿಸ್ತಾಂವಾಂ ವಯ್ರ್ ಮತಾಂತರಾಚೊ ಅಫ್ರಾದ್ ಮಾಂಡುನ್ ಆಮ್ಚಾ ಸಂಸ್ಥ್ಯಾಂಕ್ demoralise ಕರ್ಚಾ ಕ್ರತ್ಯಾಂಕ್ ತೊ ಭಯ್ರ್ ಸರ್ಲಾ. ತಾಚೊ ಪಯ್ಲೊ ವಾಂಟೊಚ್ ಮಂಗ್ಳೂರಾಂತ್  ಗೆಲೆತ್ಯಾ ಮಹಿನ್ಯಾ ಥಾವ್ನ್ ಗಡ್ಚಿಂ ಘಡಿತಾಂ..!!


2008 ಚಾ ಸಪ್ತೆಂಬರ್ 14 ತಾರಿಕೆರ್ ಆಮ್ಚ್ಯಾ ಇಗರ್ಜೆರ್ ಹಲ್ಲೊ ಜಾಂವ್ಚಾ ಥೊಡ್ಯಾ ದಿಸಾಂ ಪಯ್ಲೆಂ ಅಸಲಿಂ ಸಬಾರ್ ಘಡಿತಾಂ ಗಡ್ ಲ್ಲಿಂ. ಕುಂದಾಪುರಾಂತ್ ಯಜಾಕಾ ವಯ್ರ್ ಹಲ್ಲೊ ಚಲ್ ಲ್ಲೊ. ಆಶಿರ್ವಾದ್ ಹೋಟೆಲ್ ಪಿಟೊ ಕೆಲ್ಲೆಂ. ಬೊಂದೆಲ್ಛಾ ಕುರ್ಸಾ ಗುಡ್ಯಾರ್ ಆಸ್ ಲ್ಲೊ ಗ್ರೊಟ್ಟೊ ದೆಸ್ವಾಟ್ ಕೆಲ್ಲೊ. ಕಂಕ್ನಾಡಿ ಆಸ್ಪತೆಕ್ ಯೀ ದಾಡ್ ಘಾಲ್ಲಿ. ಶಿಕ್ಷಣ್ ಮಂತ್ರಿ ಕಾಗೇರಿಕ್ ಘೇರಾವ್ ಕರುಂಕ್ ಮ್ಹುಣ್ ಗೆಲ್ಲ್ಯಾ ಅಮ್ಚಾ ಜಣಾಂಕ್ ಕುಡಾಯ್ಲೆಂ...  ಮ್ಹುಳ್ಯಾರ್ ಏಕಾ ನಮೂನೆಚೊ experiment ಕರ್ನ್ ಕಸಲೆಂ reaction ಯೆತಾ ಮ್ಹುಣ್ ಪಳೆಂವ್ಚೊ ಏಕ್ ವಿಕ್ರತ್ ಮನೋಭವ್ ಜಾವ್ನ್ ಆಸ್ ಲ್ಲೊ ಹ್ಯಾ ಕೋಮುವಾದಿಂಚೊ. ಕೆನ್ನಾಯ್ ಶಾಂತ್ ರೀತಿನ್ ಪ್ರತಿಭಟನ್ ಕರ್ಚಾ ಕಿರಿಸ್ತಾವಾನಿಂ ತ್ಯಾ ದಿಸಾ ಪೋಲಿಸಾಂ ವಿರೋಧ್ ಫಾತೊರ್ ಕಾಣ್ಘೆಂವ್ಕ್ ತಿತ್ಲಿಂ ಘಡಿತಾಂ ಪುರೊ ಆಸ್ ಲ್ಲಿಂ ..!!!


ಹಿಂ ಫ್ಯಾಸಿಸ್ಟ್ ಸಂಘಟಾನಂ ಪರತ್ ಏಕ್ ಸಪ್ತೆಂಬರ್ 14 ತಸಲೆಂ ಘಡಿತ್ ಪುನರಾವರ್ತನ್ ಕರುಂಕ್ ತಾಲೀಮ್ ಕರ್ನ್ ಆಸಾತ್ ಗೀ ? ಅಸಲೊ ಏಕ್ ವಡ್ಲೊ ದುಬಾವ್ ಅತಾಂ ಯೇವ್ನ್ ಆಸಾ. ತಾಕಾ ಪರಿಸ್ಥಿಯೀ ಅತಾಂ ಮಸ್ತ್ ಅನ್ಕೂಲ್ ಜಾವ್ನ್ ಆಸಾ.ಕರ್ನಾಟಕಾಂತ್ ಆಸ್ಚೊ ಸರ್ಕಾರ್ ತಾಂಚೊಚ್. ಪ್ರಮುಖ್ ಇಲಾಖ್ಯಾಂಕ್ ಅಪ್ಣಾಕ್ ಜಾಯ್ ಜಾಲ್ಲ್ಯಾ ಅಧಿಕಾರಿಂಕ್ ಬಸಯ್ಲಾಂ. ಮಾಗಿರ್ ಹಾಂಗಾಚಾ ಪೋಲಿಸಾನಿಂ ಚಡ್ಡಿ ಘಾಲ್ನ್ ಸಬಾರ್ ವರ್ಸಾಂ ಜಾಲ್ಯಾಂತ್. ಜಾಯ್ ಪಡ್ಲಾರ್ ಕೊಡ್ತಿಂಚಾ ಜಡ್ಜಾಂಕ್ ಮೊಲಾಕ್ ಘೆಂವ್ಚೆಂ confidence ಯೀ ಕಲ್ಲಡ್ಕಚಾ ಹೈಕಮಾಂಡ್ ಕ್ ಆಸಾ. ಮಂಗ್ಳೂರ್ಚೆಂ ಕಾಂಗ್ರೆಸ್ ಯೆದೊಳ್ ಚ್ ಮೆಲಾಂ. ಭ್ರಷ್ಟಚಾರ್ ಅರೋಪ್ ಆಸ್ ಲ್ಲ್ಯಾನ್ ಸಧ್ಯಕ್ ಕೇಂದ್ರ್ ಸರ್ಕಾರಾಕ್ ಯೀ ಆರ್ ಮಾರ್ಲ್ಯಾ. ಆನ್ಯೇಖ್ ಪ್ರಮುಖ್ ಕಾರಾಣ್ ಮ್ಹುಳ್ಯಾರ್ ಕಿರಿಸ್ತಾಂವ್ 2008 ಬರಿ ಖಂಡಿತ್ react ಕರಿನಾಂತ್  ಮ್ಹುಣ್ ತಾಂಕಾಂ sure ಜಾಲಾಂ. ಕಿತ್ಯಾಕ್ ಮ್ಹುಳ್ಯಾರ್ 2008 ಂತ್ ಆಮ್ಚಾ ತರ್ನಾಟ್ಯಾಂ ವಯ್ರ್  ಗಾಲ್ಲ್ಯೊ ಕೇಸಿ ತಾಂಚಾಚ್ ಪಾಂಯಾಂಕ್ ಪಡೊನ್ ಪಾಟಿಂ ಕಾಡಾ ಮ್ಹುಣ್ ಆಮ್ಚೊ ನಿರಂತರ್ ಮನವಿ ಪಳೆವ್ನ್ ಮಿಶಿಯಾಂ ಭಿತರ್ ಚ್ ಹಾಸೊನ್ ವಿಕ್ರತ್ ಸಂತೊಸ್ ಪಾವೊನ್ ಆಸಾತ್ ತೆ ಕೇಶವ ಕ್ರಪಾಚೆ ಮ್ಹಾತಾರೆ. ಆನಿಂ ಜಲ್ಮಾಕ್ ಯೀ "ಪರ್ಬುಲ್ ನಕುಲು ಕಲ್ಲ್ ದಕ್ಕುಜೆರ್ " ಮ್ಹುಣ್ ತಾಂಚೊ ಉಂಚ್ಲೊ ಭರ್ವಸೊ..!!


ಹ್ಯಾ ಕ್ಲಿಷ್ಟ್ ಪರಿಸ್ಥಿತೆಂತ್ ಜಾಗ್ರುತ್ಕಾಯೆನ್ ಆನಿಂ ಏಕ್ವಟಾಂತ್ ರಾವಾಜೆ ಜಾಲ್ಲೆಂ ಸರ್ವ್ ಕಿರಿಸ್ತಾವಾಚಿಂ ವಡ್ಲಿ ಆಧ್ಯತಾ ಜಾವ್ನ್ ಆಸಾ. ಕರಾಚಿಂತ್ ಆಸ್ ಲ್ಲ್ಯಾ ಕಿರಿಸ್ತಾವಾಂಕ್ ಯೇಂವ್ಚಿ ಗತ್ ಮುಖ್ಲ್ಯಾ ದಿಸಾನಿಂ ಅಮ್ಕಾಂ ಆಯ್ಲ್ಯಾರ್ ಅಜ್ಯಾಪ್ ನಾ. ಅಸಲ್ಯಾ ಸಂದರ್ಬಾರ್ ಯೀ ಫಿರ್ಗಜೆಚೊ ಅಂತರಿಕ್ ವಿಶಯ್ ಕಾಣ್ಘೆವ್ನ್ ಥೊಡ್ಯಾ ಫಿರ್ಗಜಾನಿಂ ಥೊಡಿಂ ಸಂಘಟಾನಾಂ ಮಾರ್ಗಾರ್ ಪ್ರತಿಭಟನಕ್ ಬಸ್ತಾತ್ ನೇ ..ಹಾಚ್ಯಾಕೀ ವಡ್ಲೊ ವಿಪರ್ಯಾಸ್ ಆಸಾ ಗೀ ..!!??  ಛೆ ..!!!


         ********
ಪ್ರಮೋದ್ ಹೊಸ್ಪೆಟ್