ಮೆಟ್ರೊ....!!!!!

             RAKNNO

ಬೆಂಗ್ಳೂರಾಂತ್ ನಮ್ಮ ಮೆಟ್ರೊ ಆಕೇರಿಕ್ ಯೀ ಸುಟ್ ಲ್ಲೆಂ ಪಳೆವ್ನ್ ತುಮಿ ಸಂತೊಸ್ ಪಾವೊಂಕ್ ಪುರೊ. ಸುಮಾರ್ ದೋನ್ ದಾಕ್ಡ್ಯಾ ಥಾವ್ನ್ ವೊದ್ದಾಡುನ್ , ನಿಮಾಣೆಂ ಪುಣೀ ಏಕ್ ಸಾತ್ ಕಿ.ಮೀ ಮ್ಹುಣಾಸರ್ ಮೆಟ್ರೊ ರೈಲಾನ್ ಅಪ್ಲಿ ಯಾತ್ರಾ ಸುರು ಕೆಲ್ಯಾ. ಥೊಡ್ಯಾ ವರ್ಸಾಂ ಆದಿಂ ಥಾವ್ನ್ ಡೆಲ್ಲಿ ಮೆಟ್ರೊನ್ ವಡ್ಲೆಂ ನಾಂವ್ ಕೆಲ್ಲೆಂ ತುಮ್ಕಾಂ ಖಳಿತ್ ಆಸೊಂಕ್ ಪುರೊ. ಇತ್ಲ್ಯಾಕೀ ಹೆಂ ಮೆಟ್ರೊ ರೈಲ್ ಆಮ್ಕಾಂ ನವೆಂಸಾಂವ್ ಜಾಲ್ಯಾ ರ್ ಯೀ ಹಾಕಾ ಸುಮಾರ್ ದೆಡ್ಶೆಂ ವರ್ಸಾಂ ಆದ್ಲೊ ಇತಿಹಾಸ್ ಆಸಾ. ಬೆಂಗ್ಳೂರಾಂತ್ ಮೆಟ್ರೊ ಆರಂಭ್ ಜಾಂವ್ಚಾ ಪಯ್ಲೆಂ ಚ್ ಸಂಸಾರಾಚಾ ಸುಮಾರ್ 160 ಶಹರಾನಿಂ ಹೊ ಮೆಟ್ರೊ ಆಸ್ ಲ್ಲೊ. ಲಂಡನ್ ಅಂಡರ್ ಗ್ರೌಂಡ್ ಮೆಟ್ರೊ 1963 ಂತ್ ಚ್ ಆರಂಭ್ ಜಾಲ್ಲೊ. ತವಳ್ ಚಾ ಉಭೆಚಾ ದುವ್ರ್ಯಾ ಗಾಡ್ಯೆ ಥಾವ್ನ್ (steam locomotives) ಥಾವ್ನ್ ಆತಾಂಚಾ ಇಲೆಕ್ಟ್ರಿಕ್ ಚಲೊವ್ಪ್ಯಾ ರಹಿತ್ ಗಾಡ್ಯೆ ಮ್ಹುಣಾಸರ್ ತಾಂತ್ರಿಕ್ ಬದ್ಲಾವಣ್ ಜಾಲ್ಯಾ. ಹೈಟೆಕ್ ಸೌಲತ್ ಅಯ್ಲ್ಯಾ. ವಡ್ಲ್ಯಾ ವಡ್ಲ್ಯಾ ಶಹರಾಂಕ್ ಮೆಟ್ರೊ ಫಕತ್ ಮುಕುಟ್ ಮಾತ್ರ್ ನ್ಹಂಯ್ ಸಂಚಾರ್ ವ್ಯವಸ್ಥಾ ಸುಲಭ್ ಕರ್ಚೆಂ ಏಕ್ ವಾಟ್ ಜಾಂವ್ಕ್ ಪಾವ್ಲ್ಯಾ.

ಕಿತೆಂ ಹೆಂ ಮೆಟ್ರೊ ರೈಲ್ ?

ವಡ್ಲ್ಯಾ ವಡ್ಲ್ಯಾ ಶಹರಾಂ ಭಿತರ್ , ಸಂಚಾರ್ ವ್ಯವಸ್ಥೆ ಖಾತಿರ್ ವಾಪಾರ್ಚೆಂ ರೈಲ್ವೆ ಮಾಂಡಾವಳ್ ಚ್ Rapid Transit System. ಸಾಮಾನ್ಯ್ ಜಾವ್ನ್ ಹಾಕಾ ಆಮಿಂ ಮೆಟ್ರೊ ಮ್ಹುಣ್ ಅಪಾಯ್ತಾಂವ್. ಹೆಂ Rapid Transit ಯಾ ಮೆಟ್ರೊ ಧರ್ಣಿ ಪಂದಾ ಸುರಂಗಾಂತ್ ಯಾ ದರ್ಣಿ ವಯ್ರ್ ಉಭಾರ್ ಲ್ಯಾ ಟ್ರ್ಯಾಕಾರ್ ಮಾತ್ರ್ ಆಸ್ತಾ. ಥೊಡ್ಯಾಚ್ ವೆಳಾನ್, ಚಡಿತ್ ಲೊಕಾಕ್ ಉಣ್ಯಾ ಅಂತರಾಂಚಾ ಜಾಗ್ಯಾಂಕ್ , ಉಣೊ ಜಾಗೊ ವಾಪಾರ್ನ್ ಪಾಂವೊಂವ್ಚಿ ಚ್ ಮೆಟ್ರೊಚಿ ವಿಶೇಷಾತಾ. ಥೊಡ್ಯಾ ದೇಶಾನಿಂ ಮೆಟ್ರೊ ಸ್ಟೇಷಾನಾ ಥಾವ್ನ್ ಇತರ್ ಜಾಗ್ಯಾಂಕ್ ಪಯ್ಣ್ ಕರುಂಕ್ ಮೋನೊ ರೈಲಾಚಿ ಸೌಲತ್ ಯೀ ಆಸ್ತಾ. ಮೆಟ್ರೊ ರೈಲ್ ಸಕ್ಕಡ್ ರೀತೆನ್ ಯೀ ಸ್ವಯಂಚಾಲಿತ್. ಟಿಕೆಟಿ ಥಾವ್ನ್ ಧರ್ನ್ ದೆಂವ್ತಾ ಮ್ಹುಣಾಸರ್ ಮೆಳ್ಚಿ ಆಧುನಿಕ್ ಹೈಟೆಕ್ ವ್ಯವಸ್ಥಾ. ಸಗ್ಳ್ಯಾ ಟ್ರೈನಾಂ ಆನಿಂ ಸ್ಟೇಷನಾಂ ನಿಯಂತ್ರಿತ್ ಕರುಂಕ್ ಏಕ್ ಕಂಟ್ರೋಲ್ ಸೆಂಟರ್ ಆಸ್ತಾ. CCTV ದ್ರಶ್ಯ್ ತಶೆಂ voice ತಾಂತ್ರಿಕಾತೆ ವರ್ವಿಂ ಇಂಚ್ ಇಂಚ್ ಜಾಗೊ ತಶೆಂ ಘಡಿತಾಂ ವಯ್ರ್ ನಿಗಾ ದವರುಂಕ್ ಜಾತಾ. ಹ್ಯಾ ಟ್ರೈನಾಂತ್ Wi Fi ಸವ್ಲತ್ ಆಸ್ ಲ್ಯಾನ್ , ಲ್ಯಾಪ್ ಟೊಪ್ , ಟ್ಯಾಬ್ಲೆಟ್ ತಶೆಂ ಮೊಬೈಲ್ ವಾಪಾರ್ನ್ ಅಂತರ್ ಜಾಳಿಚೊ ಸಂಪರ್ಕ್ ಅಪ್ಣಾಯೆತ್. ತುರ್ತ್ ಪರಿಸ್ಥಿತೆ ವೆಳಾರ್ ಪಯ್ಣಾರ್ಯಾಂಕ್ ಟ್ರೈನ್ ಸಿಬ್ಬಂದೆ ಕಡೆ ಉಲಾಂವ್ಕ್ ಸಾದ್ಯ್ ಜಾಂವ್ಚೆ ಬಟ್ಟನ್ ಟ್ರೈನಾರ್ ಆಸ್ತಾತ್. ಆಶೆಂ ಸಭಾರ್ ಅದ್ಬುತ್ ಟೆಕ್ನೊಲೊಜಿ ಆಸಾ ಹ್ಯಾ ಟ್ರೈನಾನಿಂ..!


ಮೆಟ್ರೊಕ್ ಚಾಲೆಂಜಾಂ..

 Tunnel boring machines (TBM)

ಅಮ್ಕಾಂ ಖಳಿತ್ ಆಸ್ ಲ್ಯಾ ಬರಿ ಮೆಟ್ರೊ ಏಕ್ ಚ್ ಧರ್ಣಿ ಪಂದಾ ಯಾ ದರ್ಣಿ ವಯ್ರ್ ಅಸ್ತಾ. ಧರ್ಣಿ ವಯ್ರ್ elevated ಟ್ರ್ಯಾಕ್ ಕರುಂಕ್ ತಿತ್ಲೆ ಕಷ್ಟ್ ನಾಂತ್ . ಪುಣ್ ವಡ್ಲೊ ಸಮಸ್ಸೊ ಮ್ಹುಳ್ಯಾರ್ ಧರ್ಣಿ ಭಿತರ್ ಸುರಂಗ್ ಖೊಂಡ್ಚೆಂ. ಶಹರಾಂತ್ ಆಸ್ಚೊ ಜಾಗೊಚ್ ಇಕ್ಕಟ್ಟ್. ಮಾಗಿರ್ ಧರ್ಣಿ ಭಿತರ್ ಉದ್ಕಾಚೆ ಪೈಪ್, ಡ್ರೈನೆಜ್ , ಒಪ್ಟಿಕಲ್ ಕೆಬಲಾಂ ಅಶೆಂ ತಶೆಂ ಮ್ಹುಣ್ ಸಬಾರ್ ವಸ್ತು ಆಸ್ತಾತ್. ತಾಕಾ ಪಯ್ಲೆಂ ಪರ್ಯಾಯ್ ವ್ಯವಸ್ಥಾ ಕರಿಜೆ. ಸುರಂಗ್ ಖೊಂಡ್ತಾನಾ ಬಗ್ಲೆಚಾ ಬಿಲ್ಡಿಂಗಾಂಕ್ ಕಾಂಯ್ ಅಪಾಯ್ ಜಾಮ್ವ್ಕ್ ನ್ಹುಜೊ. ಐತಿಹಾಸಿಕ್ ಬಿಲ್ಡಿಂಗಾ ಪುಣಿ ಜಾಲ್ಯಾರ್ ಚಡಿತ್ ಗುಮಾನ್ ಆನಿಂ ಜಾಗ್ವಾಣ್ ಘೆಜೆ ಪಡ್ತಾ. ಅಸಲೆ ಸುರಂಗ್ ಕಾಡುಂಕ್ tunnel boring machines (TBM) ಮ್ಹುಳ್ಳಿಂ ವಡ್ಲಿಂ ಯಂತ್ರಾ ಆಸಾತ್. ಸುರಂಗ್ ಜಾಲ್ಯಾ ಉಪ್ರಾಂತ್ ರೈಲಾಚೆ ಪಾಟೆ ತಾಂತುಂ ಬಸಂವ್ಕ್ ಆಸ್ತಾತ್. ಧರ್ಣಿ ವಯ್ರ್ ರೈಲಾಚೆ ಪಾಟೆ ಸಂಪ್ರಾದಾಯಿಕ್ ತಶೆ ಸ್ಟ್ಯಾಂಡಾರ್ಡ್ ಗೇಜ್ ಜಾವ್ನ್ ಆಸ್ತಾತ್. ಪುಣ್ ಸುರಂಗಾಂ ಭಿತರ್ ವಿಶೇಷ್ ಪಾಟೆ ಜಾಯ್ಜೆ. ಅತಾಂಚಿಂ ರೈಲಾಂ ಪುರಾ ವೀಜ್ ಸಕತ್ ವಾಪಾರ್ನ್ ದಾಂವ್ಚಿ ಮ್ಹುಣ್ ತುಮ್ಕಾಂ ಖಳಿತ್ ಆಸಾ. ಹ್ಯಾ ಮೆಟ್ರೊ ರೈಲಾಂಕ್ ವೀಜ್ ಸಕತ್ ದೀವ್ನ್ ಚಾರ್ಜ್ ಕರುಂಕ್ third rail ಮ್ಹುಳ್ಳಿ ಏಕ್ ತಾಂತ್ರಿಕಾತಾ ಸಾಮಾನ್ಯ್ ಜಾವ್ನ್ ವಾಪಾರ್ತಾತ್. ಏಕ್ ಕಡಕ್ಕ್ ವಾಹಾಕ್ ಪಾಟ್ಯಾ ಬಗ್ಲೆಕ್ ದವರ್ನ್ ರೈಲಾಂಕ್ ಕರೆಂಟ್ ದೀಂವ್ಚೊ ವಿಧಾನ್ ತೆಂ. ಮೆಟ್ರೊ ಸ್ಟೇಷನ್ ರೂಪಿತ್ ಕರ್ಚೆಂ ಯೀ ಕ್ಲಿಷ್ಟ್ ಕಾಮ್. ಸ್ಟೇಷನಾಚೊ ವಿನ್ಯಾಸ್ ಧರ್ನ್ , ತಾಂತ್ಲ್ಯೊ ಸ್ವಯಂಚಾಲಿತ್ ತಶೆಂ ಇತರ್ ಸವ್ಲತ್ಯೊ ಪುರಾ ಅಂತರಾಷ್ರೀಯ್ ದರ್ಜೆರ್ ಆಸಾಜೆ.


ಸಂಸಾರಾಚೆ ಥೊಡೆ ಪ್ರಖ್ಯಾರ್ ಮೆಟ್ರೊ


ಲಂಡನ್ ಅಂಡರ್ ಗ್ರೌಂಡ್ :

ಸಕ್ಕಡೀ ಮೆಟ್ರೊಚೊ ಬಾಪಯ್ ಚ್ ಲಂಡನ್ ಅಂಡರ್ ಗ್ರೌಂಡ್ ಮೆಟ್ರೊ. ಲಂಡನ್ ಗಾರ್ ಹಾಕಾ the tube ಮ್ಹುಣ್ ಆಪಾಯ್ತಾತ್. ಹೊ ಆರಂಭ್ ಜಾಲ್ಲೊ 1863 ಇಸ್ವೆಂತ್ ..! ಉಭೆಚಾ ದುವ್ರ್ಯಾ ಗಾಡ್ಯೆ ಥಾವ್ನ್ ಆರಂಭ್ ಜಾಲ್ಲೊ ಹೊ ಮೆಟ್ರೊ. 1890 ಂತ್ ವೀಜ್ ಸಕ್ತೆಚೊ ಗಾಡಿಯೊ ಆರಂಭ್ ಜಾಲ್ಲ್ಯೊ ಸಂಸಾರಾಚೊ ಪಯ್ಲೊ ಮೆಟ್ರೊ ಮ್ಹುಳ್ಳೆಂ ನಾಂವ್ ಯೀ ಹಾಕಾ ಆಸಾ. 402 ಕಿ. ಮೀ ಲಾಂಬಾಯೆಚಿ ರೈಲ್ವೆ ಪಟ್ಟಿ ಹ್ಯಾ ಮೆಟ್ರೊಕ್ ಆಸಾ. 270 ಸ್ಟೇಷಾನಾಂ ಆಸಾತ್. ಇಕ್ರಾ ರೂಟ್ ಆಸಾತ್. ಸದಾಂಯ್ ಏಕ್ 35 ಲಾಕ್ ಲೋಕ್ ಹೊ ಮೆಟ್ರೊ ವಾಪಾರ್ನ್ ಆಸಾತ್. ಥೊಡೆ ಪಾವ್ಟಿಂ ಲಂಡನಾಕ್ ಗೆಲ್ಯಾರ್ , ಹಾಂಗಾ ಕಾಲೆಂ ಕರ್ಫ್ಯೂ ಗಲಾ ಗೀ ಮ್ಹುಣ್ ಚಿಂತಿಜೆ. ಪುಣ್ ಚಲ್ಚೊ ವ್ಯವಹಾರ್ ಪುರಾ ಧರ್ಣಿ ಪಂದಾ ...

ನ್ಯೂಯಾರ್ಕ್ ಸಿಟಿ ಸಬ್ ವೇ ..

ಧರ್ಣಿ ಪಂದಾ ಆನಿಂ ಧರ್ಣಿ ವಯ್ರ್ ಆಸ್ಚೊ ಹೊ ಮೆಟ್ರೊ ಯೀ ಶೆಕ್ಡಾಂ ವರ್ಸಾಂ ತಿತ್ಲೊ ಪುರಾತನ್.ಸಂಸಾರಾಚೊ busy ಮೆಟ್ರೊಂತ್ ನ್ಯೂಯಾರ್ಕ್ ಸಿಟಿ ಸಬ್ ವೇ ಯೀ ಏಕ್. ಸಂಸಾರಾಂತ್ ಚ್ ಅಧಿಕ್ ಚಡ್ ರೂಟ್ ಆಸ್ಚೆ ಯೀ ಖ್ಯಾತ್ ಹ್ಯಾ ಮೆಟ್ರೊಚಿ. ಹಾಂತುಂ 24 ರೂಟ್ ಆಸಾತ್. ! 468 ಸ್ಟೇಷಾನಾಂ ಆಸಾತ್. 337 ಕಿ. ಮೀ ಲಾಂಬಾಯೆಚಿ ರೈಲ್ವೆ ಪಟ್ಟಿ ಆಸಾ. ಸುಮಾರ್ 45 ಲಾಕ್ ಲೋಕ್ ಸದಾಂಯ್ ಹೊ ಮೆಟ್ರೊ ವಾಪಾರ್ನ್ ಆಸ್ತಾತ್.


ಷಾಂಗಾಯ್ ಮೆಟ್ರೊ :

ಸಂಸಾರಾಚೊ ವಡ್ಲೊ ಮೆಟ್ರೊ ಬಾಂದ್ ಲ್ಲಿ ಕೀರ್ತ್ ಚಿನ್ಕಾರಾಂಚಿ ..! 434 ಕಿ. ಮೀ ಲಾಂಬಾಯೆಚಿ ರೈಲ್ವೆ ಪಟ್ಟಿ ಹಾಂತುಂ ಆಸಾ. 277 ಸ್ಟೇಷಾನಾಂ ಆಸಾತ್. ಉಣ್ಯಾರ್ ಉಣೆಂ ಮ್ಹುಳ್ಯಾರ್ 55 ಲಾಕ್ ಲೋಕ್ ಹೊ ಮೆಟ್ರೊ ಸದಾಂನಿಚ್ ವಾಪಾರ್ನ್ ಆಸಾತ್. ಹೊ ಆರಂಭ್ ಜಾಲ್ಲೊ 1995 ಂತ್ ..!


ಟೋಕಿಯೊ ಸಬ್ ವೇ ..

ಜಪಾನೀಸ್ ಟೆಕ್ನೊಲೊಜಿ ಚ್ ಅದ್ಬುತ್.! ತಸೊ ಬಾಂದ್ಲಾ ಹೊ ಮೆಟ್ರೊ ! 1927 ಇಸ್ವೆಂತ್ ಚ್ ಹೊ ಆಸ್ತಿತ್ವಕ್ ಆಯಿಲ್ಲೊ. 328 ಕಿ. ಮೀ ಲಾಂಬಾಯೆಚಿ ಟ್ರ್ಯಾಕ್ ಆಸಾ ಟೋಕಿಯೊ ಸವ್ ವೇ ಂ ತ್. 282 ಸ್ಟೇಷಾನಾಂ ಆಸಾತ್. ಕಾಂಯ್ ನಾ ಕಾಂಯ್ ನಾ ಮ್ಹುಳ್ಯಾರೀ 87 ಲಾಕ್ ಲೋಕ್ ಸದಾಂಯ್ ಹ್ಯಾ ಮೆಟ್ರೊರ್ ಪಯ್ಣ್ ಕರ್ತಾ


ಟ್ರಾಫಿಕಾಚಿ ಕಿರಿಕಿರಿ ನಿವಾರುಂಕ್ ಊಣೊ ಜಾಗೊ ವಾಪಾರ್ನ್ ಕಶೆಂ ಮೆಟ್ರೊ ವಾಪಾರಿಜೆ ಮ್ಹುಣ್ ದಾಕಾವ್ನ್ ದಿಲ್ಲಿ ಹೆ ಫಕತ್ ಚಾರ್ ಮೆಟ್ರೊ ನ್ಹಂಯ್. ಆಜ್ ಸಂಸಾರಾಂತ್ ಆಸ್ಚೆ ಸಕ್ಕಡೀ 160 ಮೆಟ್ರೊ ಯೀ ಬಾರಿ ಉಪ್ಕಾರಿ ಜಾಂವ್ಕ್ ಪಡ್ಲ್ಯಾತ್ . ಅನ್ಯೇಕ್ 25 ಮೆಟ್ರೊ ಯೀ ವೆಗ್ಗಿಂಚ್ ಯೆಂವ್ಚಾರ್ ಆಸಾತ್. ಉಣೊ ಕರ್ಚ್ , ವೇಳಾಚೊ ವಿಬಾಡ್ ನಾ, ಪರಿಸರ್ ಮಾಲಿನ್ಯ್ ನಾ... ಆಶೆಂ ಡಜನಾ ಗಟ್ಲ್ಯಾನ್ ಉಪ್ಕಾರ್ ಆಸಾತ್ ಹ್ಯಾ ಮೆಟ್ರೊ ಥಾವ್ನ್. ಪೆಟ್ರೊಲಿಯಾಂ ಚೊ ವಿಬಾಡ್ ಉರಾಂವ್ಕ್ ಮೆಟ್ರೊ ಏಕ್ ಉತ್ತೀಮ್ ಮಾರ್ಗ್ ಮಾತ್ರ್ ನ್ಹಂಯ್ ಪುಡ್ಲ್ಯಾ ದಿಸಾನಿಂ ತೊ ಅನಿವಾರ್ಯ್ ಜಾಂವ್ಕ್ ಯೀ ಪುರೊ ..!!

                                    ***************



ಇಂಡಿಯಾಂತ್ ಮೆಟ್ರೊ :

ಡೆಲ್ಲಿ ಮೆಟ್ರೊ

ಇಂಡಿಯಾಂತ್ ವಡ್ಲೆಂ ನಾಂವ್ ಆಸ್ಚೆಂ ಡೆಲ್ಲಿ ಮೆಟ್ರೊಕ್ . ಅಂತರಾಷ್ಟ್ರೀಯ್ ಮಟ್ಟಾರ್ ತಾಕಾ ಏಕ್ ನಾಂವ್ ಆಸಾ. 189 ಕಿ. ಮೀ ಲಾಂಬಾಯೆಚಿ ರೈಲ್ವೆ ಪಟ್ಟಿ ಹಾಂತುಂ ಆಸಾ. ದಿಸಾಕ್ ಉಣ್ಯಾರ್ ಉಣೆಂ ಮ್ಹುಳ್ಯಾರೀ 18 ಲಾಕ್ ಲೊಕಾಂಕ್ ಹೊ ಮೆಟ್ರೊ ಉಪ್ಕಾರಿ ಜಾಲಾ. 2002 ಹೊ ಆರಂಭ್ ಜಾಲ್ಲೊ. ತಶೆಂ ಮ್ಹುಳ್ಯಾರ್ ಹೊ ಕಾಂಯ್ ಇಂಡಿಯಾಚೊ ಪಯ್ಲೊ ಮೆಟ್ರೊ ನ್ಹಂಯ್ . 1984 ಂತ್ ಚ್ ಕೊಲ್ಕೊತ್ತಾಂತ್ ಇಂಡಿಯಾಚೊ ಪಯ್ಲೊ ಮೆಟ್ರೊ ಆರಂಭ್ ಜಾಲ್ಲೊ, ಪೋಯ್ರ್ ನಮ್ಮ ಮೆಟ್ರೊ ಯೀ ಬೆಂಗ್ಳೂರಾಂತ್ ಆರಂಭ್ ಜಾಲಾ. ಸುಮಾರ್ ಏಕ್ ಡಜನ್ ಇತರ್ ಶಹಾರಾಂತ್ ಯೀ ಮೆಟ್ರೊ ಕ್ಜಾಯ್ ಮ್ಹುಣ್ ಪ್ರೊಪೋಸಲ್ ಹಾಡ್ನ್ ಬಸ್ಲ್ಯಾತ್.

ಬೆಂಗ್ಳೂರಾಂತ್ಲೆಂ ಟ್ರಾಫಿಕ್....

ಸಂಸಾರಾಂತ್ ಖಂಯ್ ಪುಣಿ ಮೆಟ್ರೊ ಚಿ ಗರ್ಜ್ ಮ್ಹುಣ್ ಆಸ್ ಲ್ಯಾರ್ ತೆಂ ಇಂಡಿಯಾಚಾ ಶಹರಾನಿಂ . ಯೆರೊಪಾಚಾ ಎಕ್ಯೇಕ್ ದೇಶಾನಿಂ ಆಸ್ಚಾ ಜಣ್ ಸಂಖೊ ಹಾಂಗಾ ಏಕಾ ಏಕಾ ಶೆಹಾರಾಂತ್ ಚ್ ಆಸ್ತಾ. ಇತ್ಲ್ಯಾ ಲೊಕಾಕ್ , ಇತ್ಲೆಚೆ ದಾಕ್ಟೆ ರಸ್ತೆ.ರಿಯಲ್ ಎಸ್ಟೆಟ್ ಮ್ಹುಣ್ ಮಾರೊಗ್ ಕರುಂಕ್ ಯೀ ಜಾಗೊ ನಾ. ಸಗ್ಳೊ ದೀಸ್ ಟ್ರಾಫಿ ಜ್ಯಾಮ್. ಪೆಟ್ರೊಲಾಕ್ ಮೋಲ್ ಚಡ್ಲ್ಯಾರ್ ಮಾಗಿರ್ ಹಾಂಗಾ ಬೊಬಾಟೊ..! ಹಾಕಾ ಉತ್ತೀಮ್ ಪರಿಹಾರ್ ಚ್ ಮೆಟ್ರೊ ರೈಲ್.

ಪುಣ್ ಹಾಂಗಾ ಮೆಟ್ರೊ ಕರ್ಚಿ ಇಚ್ಚಾ ಸಕತ್ ಕೊಣಾಯ್ಕಿ ನಾ. ಕೊಡ್ಯಾಳಾಚಾ ನಂತೂರಾಂತ್ 2020 ಂ ಏಕ್ ಫೈವ್ ಒವರ್ ಬಾದುಂಕ್ ಆಸ್ಲ್ಯಾರ್ , 2005 ಂತ್ ಚ್ ಪಿಲ್ಲಾರ್ ಗಲ್ಚೊ ದೇಶ್ ಹೊ. ಫಕತ್ ಥೊಡಾಂತ್ ಮಾತ್ರ್ ತೈಲ್ ಸೊಡ್ಚಾ ಹ್ಯಾ ದೇಶಾಂತ್ ಇ. ಶ್ರೀಧರನ್ ಮ್ಹುಳ್ಯಾ ಮಾನೆಸ್ತಾನ್ ಕಸೊ ಡೆಲ್ಲಿ ಮೆಟ್ರೊ ಜೊಕ್ತ್ಯಾ ವೇಳಾ ಭಿತರ್ ಅಂತರಾಷ್ಟ್ರೀಯ್ ಮಟ್ಟಾರ್ ಬಾಂದ್ ಲ್ಲೆಂ ಘಡಿತ್ ಅಮ್ಚಾ ದೇಶಾಚೆಂ ಅದ್ಬುತ್. " ಡೆಲ್ಲಿ ಮೆಟ್ರೊರ್ ಚೊವೀಸ್ ವೊರಾಂ" ಮ್ಹುಣ್ Discovery ಚಾನೆಲಾರ್ ಹಾಚಾ ವಿಶ್ಯಾಂತ್ ಏಕ್ ಡೊಕ್ಯೊಮೆಂಟಾರಿಚ್ ಪ್ರಸಾರ್ ಜಾಲ್ಲಿ.


ಇ. ಶ್ರೀಧರನ್

ಮಾಗಿರ್ ಇತ್ಲಿಂ ವರ್ಸಾಂ ರಾಕೊನ್ , ಬೆಂಗ್ಳೂರಾಂತ್ ನಮ್ಮ ಮೆಟ್ರೊ ಫಕತ್ ಸಾತ್ ಕೀ. ಮೀ ಮ್ಹುಣಾಸಾರ್ ಮಾತ್ರ್ ಆರಂಭ್ ಜಾಲಾ. ತೊ ಲೊಕಾಕ್ ಉಪ್ಕಾರಿ ಪಡ್ಚಾ ಬದ್ಲಾ , ಅತಾಂ MG ರೋಡಾ ಥಾವ್ನ್ ಬೈಯಪ್ಪನಾ ಹಳ್ಳೆ ಮ್ಹುಣಾಸರ್ ಜಾಲಿ ರೈಡ್ ಘೆಂವ್ಕ್ ಏಕ್ ಪಿಕ್ನಿಕ್ ಸ್ಪಾಟ್ ಜಾಂವ್ಕ್ ಪಡ್ಲಾ. ನಮ್ಮ ಮೆಟ್ರೊ ಸಕ್ಕಡಿ ಸಂಪೂರ್ಣ್ ಜಾಂವ್ಕ್ ಆನಿ ಕಿತ್ಲೆ ದಾಕ್ಟೆ ಜಾಯ್ ಕೊಣ್ಣಾ ..!!

ಹೊ ಶೆಂಬಾರಾವೊ ಪೋಸ್ಟ್ ಮ್ಹುಜೊ .... ಹ್ಯಾ ಬ್ಲಾಗಾರ್ ..!!!

ಬಿಂದಾಸ್ ಗಜಾಲಿ

ತಶೆಂ ಮ್ಹುಣ್ ಕಾಂಯ್ ಸಂಭ್ರಮ್ ನ್ಹಂಯ್ ಮ್ಹಕಾ. ತಿತ್ಲ್ಯಾ ಕೀ ಏಕಾ ಬ್ಲಾಗಾರ್ ಶೆಂಬರ್ ಪೋಸ್ಟ್ ಬರಂವ್ಚೆಂ ಕಾಂಯ್ ವ್ಹಡ್ ವಿಶಯ್ ನ್ಹಂಯ್ .ಪುಣ್ ಮ್ಹುಜಿ ಭಾಸ್ , ವಿಂಚ್ ಲ್ಲೆ ವಿಷಯ್ ,ಆಸ್ಚೊ ಸಿಮೀತ್ ಜಣಾಸಂಕೊ , ಮಾಗಿರ್ ತ್ಯಾ ಜಣಾಸಂಕ್ಯಾರ್ ಕೊಂಕ್ಣಿ ವಾಚುಂಕ್ ಉರ್ಭಾ ಆಸ್ಚಿ limited ಪರ್ಜಾ , ಉರ್ಭಾ ಆಸ್ಲ್ಯಾರೀ ಮಾಗಿರ್ ಥೊಡ್ಯಾಂಕ್ ಯೆಂವ್ಚಿ ಲಿಪಿ ಸಮಸ್ಯೆ...... ಹೆಂ ಪುರಾ ತುಲನ್ ಕರ್ತಾನಾ ಮ್ಹಕಾ ಮಸ್ತ್ ಸಮಧಾನ್. ಪಾಟ್ಲ್ಯಾ ದೋನ್ ವರ್ಸಾನಿಂ ತುಮಿಂ , ಮ್ಹಕಾ ದಿಲ್ಲ್ಯಾ ಪ್ರೋತ್ಸಾಹಾಕ್ ತುಮ್ಕಾಂ ಮಸ್ತ್ thanks... !!

                                    ********

ಥೊಡ್ಯಾ ವರ್ಸಾಂ ಆದಿಂ ಕಂಪ್ಯೂಟಾರಾಂತ್ ಕಾನಾಡಿ ಭಾಶೆಚೊ ವಡ್ಲೊ ಸಂಸೋಧ್ ಕಾರ್ ಡಾ ಯು .ಬಿ. ಪವನಜನ್ ವಿಶ್ವಕನ್ನಡ ಡಾಟ್ ಕಾಮ್ ಮ್ಹುಳೊ ಕಾನಾಡಿ ಭಾಶೆಚೆಂ ಪಯ್ಲೆಂ Unicode ವೆಬ್ ಸಾಯ್ಟ್ ಆರಂಭ್ ಕರ್ತಾನಾ ಮ್ಹಕಾಯ್ Unicode ಂತ್ ಏಕ್ ಕೊಂಕ್ಣಿ ಬ್ಲಾಗ್ ಕಾಡಿಜೆ ಮ್ಹುಣ್ ಏಕ್ ಸಪಣ್ ಆಸ್ ಲ್ಲೆಂ.ತುಜೊ ಬ್ಲಾಗ್ ಜಾಂವ್ದಿ ಯಾ ಜಾಳಿಜಾಗೊ ಜಾಂವ್ದಿ ತೊ ಯುನಿಕೊಡಾಂತ್ ಆಸ್ಲ್ಯಾರ್ ತಾಕಾ ಜಾಗಾತಿಕ್ ಮಾನ್ಯಾತಾ ಆಸಾ ಮ್ಹುಣ್ ಆರ್ಥ್. Google, Bing, Yahoo ...ಯಾ ಇತರ್ ಕಸಲಿಂ ಯೀಂ search engine ಆಸಾತ್ ಪಳೆ ತಾಂಚಾ ಜಾಳಿಕ್ ತುಮ್ಚೊ ಬ್ಲಾಗ್ ಯಾ website ಸಂಪಡ್ಚಿ ಸಕತ್ ಕೆನ್ನಾ ಯೆತಾ ಮ್ಹುಳ್ಯಾರ್ ತೊ Unicode ಂತ್ ಆಸ್ಲ್ಯಾರ್ ಮಾತ್ರ್. ಹೊ ಮ್ಹುಜೊ ಕೊಂಕ್ಣಿ ಬ್ಲಾಗ್ 2007 ರ್ "ಮ್ಹುಜೊ ವಿಚಿತ್ರ್ ಸಂಸಾರ್" ಮ್ಹುಣ್ ಆರಂಭಾರ್ ಚಾರ್ ಲೇಖನಾಂ ಗಾಲ್ನ್ ಯುನಿಕೊಡಾಂತ್ experiment ಕರ್ತಾನಾ , ಕೊಂಕ್ಣೆಂತ್ ತೆನ್ನಾ ಮ್ಹುಣಾಸರ್ ಕಸಲೆಯೀ Unicode ಂತ್ ಆಸ್ ಲ್ಲೆ ಜಾಳಿಜಾಗೆ ಮ್ಹುಜಾ ನದ್ರೆಕ್ ಪಡಂವ್ಕ್ ನಾಂತ್ .ತೆನ್ನಾ ಆಸ್ ಲ್ಲೆ ಇತರ್ ಜಾಳಿಜಾಗೆ "ಇತರ್" ತಂತ್ರಾಗ್ನ್ಯ್ ವಾಪಾರ್ನ್ ಆಸ್ ಲ್ಲೆ.."ಇತರ್" ತಂತ್ರಾಗ್ನ್ಯ್ ವಾಪಾರ್ಲ್ಯಾರ್ ವಡ್ಲಿ ಸಮಸ್ಲ್ಯಾ ಮ್ಹುಳ್ಯಾರ್ "ಆಮ್ಕಾಂ ವಾಚಿಜೆ ಜಾಲ್ಯಾರ್ ಆಮ್ಚೊ "font" download ಕರಾ " ಮ್ಹುಳ್ಳೆಂ ಖರಾರ್. ವಿಪರ್ಯಾಸ್ ಪಳೆಯಾ... ಸಬಾರ್ ಕೊಂಕ್ಣಿ ಲೋಕಾಕ್ ಕೊಂಕ್ಣಿ ವಾಚುಂಕ್ ಚ್ ಪುರ್ಸೊತ್ ನಾ .. ಮಾಗಿರ್ font download ಕರ್ಚೆಂ patience ಆಸ್ತಾ ಗೀ ? ಪುಣ್ ತೆನ್ನಾ unicode ಂತ್ ಮಸ್ತ್ bug ಆಸ್ ಲ್ಲೆ. ಅತಾಂಯೀಂ ಥೊಡೆ ಆಸಾತ್ ಪುಣ್ ಮಸ್ತ್ ಸುದಾರ್ಲಾಂ. ತ್ಯಾ ಬಿಲ್ ಗೇಟ್ಸಾಕ್ ಕಾನಾಡಿ ಭಾಷೆಕ್ ಪ್ರಾಮುಖ್ಯಾತ ದಿಜೆಚ್ ಪಡ್ಲಿ.

2003 ಇಸ್ವೆಂತ್ ಜಾಲ್ಲ್ಯಾ ಕನ್ನಡ ಸಾಹಿತ್ಯ ಸಮ್ಮೇಳನಾಂತ್ "ಗಣಕದಲ್ಲಿ ಕನ್ನಡ" ಮ್ಹುಳ್ಯಾ ವಿಚಾರ್ ಗೋಷ್ಟಿಂತ್ ಡಾ. ಯು. ಬಿ. ಪವನಜ ಸಾಂಗಾತಾ ಹಾಂವ್ ..

ಕಿತ್ಯಾಕ್ ಮ್ಹುಳ್ಯಾರ್ so called ಅಂತರಾಷ್ರೀಯ್ ಭಾಸ್ ಮ್ಹುಣ್ ಆಸ್ಚಾ ಕೀ ಚಡ್ ಲೋಕ್ ಇಂಡಿಯಾಂತ್ ಏಕಾ ಏಕಾ stateಂತ್ ಚ್ ಉತ್ಪನ್ನ್ ಜಾತಾ. Six crores Kannadigas ಮ್ಹುಳ್ಯಾರ್ ಅತಾಂ microsoft ಕ್ ಏಕ್ ವಡ್ಲೆಂ ನಂಬರ್..! ಸುಮಾರ್ ದೋನ್ ವರ್ಸಾಂ ಆದಿಂ ಥಾವ್ನ್ ಸಕ್ರೀಯ್ ಜಾವ್ನ್ ಹ್ಯಾ ಬ್ಲಾಗ್ ಉರೊಂಕ್ ಕಾರಣ್ ಮ್ಹುಳ್ಯಾರ್ ಕಾನಾಡಿ unicode ಂತ್ ಜಾಲ್ಲೆಂ ಮಸ್ತ್ ಸುದ್ರಾಪ್. ಸಾಂಗಾತಾಚ್ ANSI ತಂತ್ರಾಗ್ನ್ಯ್ ವಾಪಾರ್ನ್ ಬರಂವ್ಚಿ ಮ್ಹುಜಾ ಲೇಖನಾಂ Unicode ಕ್ ಪರಿವರ್ತನ್ ಕರುಂಕ್ ಡಾ.ಪವನಜನ್ ದಿಲ್ಲೆ tips. ಅತಾಂ ಕಾಳ್ ವೆಗ್ಗಿಂ ಬದಲ್ಲಾ. ಸಾಂಪ್ರಾದಯಿಕ್ font ಸೊಡ್ನ್ ಯೀ Unicode ತಾಂತ್ರಿಕತಾ ವಾಪಾರ್ನ್ ಆಸ್ಚೆ ಮಸ್ತ್ ಜಾಳಿಜಾಗೆ ಕೊಂಕ್ಣೆಂತ್ ಆಸಾತ್. ತಾಂತ್ಲೆ ಥೊಡೆ ಬೋವ್ ಲೊಕಾಮೊಗಾಳ್ ಮಾತ್ರ್ ನ್ಹಂಯ್ , ಕ್ರಾಂತ್ ಕರ್ಚೆ ಮ್ಹುಣಾಸರ್ ಪಾವ್ಲ್ಯಾತ್. ಆಜ್ ಸಬಾರ್ ಆಮ್ಚೊ ಲೋಕ್ ಯುನಿಕೊಡಾಂತ್ ಕಾನಾಡಿ ಲಿಪ್ಯೆಂತ್ ಬರಂವ್ಕೀ ಶಿಕ್ಲಾ. ಕೊಂಕ್ಣೆಕ್ ಏಕ್ ಬರಿ ಖಬರ್ ತಿ...

                                     ********

ಸಾಂಗ್ ಲ್ಯಾ ಬರಿ ಹೊ www.konkaniblog.com ಫಕತ್ ಏಕ್ ಬ್ಲಾಗ್. ಹಿ ಕೊಂಕ್ಣಿ ವೆಬ್ ಸಾಯ್ಟ್ ಖಂಡಿತ್ ನ್ಹಂಯ್ .ಏಕ್ ವೆಬ್ ಸಾಯ್ಟ್ ಜಾಯ್ಜೆ ಜಾಲ್ಯಾರ್ ತಾಂಕಾಂ ಸಾಮಾಜಿಕ್ ಧೋರಣಾಂ ಆಸ್ತಾತ್. ಮಾಧ್ಯಮಾಚೆ ethics ಪಾಳಿಜೆ ಪಡ್ತಾತ್. ಪುಣ್ ಬ್ಲಾಗಾರಾಂಕ್ ಮನ್ ಆಸ್ಲ್ಯಾರ್ ಸ್ವಯಂ ನಿಯಂತ್ರಿತ್ ethics ಪಾಳ್ಯೇತ್ .ಅಪ್ಣಾಕ್ ಖುಶಿ ಆಸ್ಚೆಂ ಸಾಂಗೊಂಕ್ ಬ್ಲಾಗಾರಾಂಕ್ ಹಕ್ಕ್ ಆಸಾ. ಇಂಡಿಯಾಂತ್ ಕಪಿಲ್ ಸಿಬಲಾನ್ ಮುಕ್ತ್ ಇಂಟರ್ನೆಟಾಕ್ ಲಗಾಮ್ ಗಾಲುಂಕ್ ಚಿಂತ್ ಲ್ಯಾರೀ ಯೆದೊಳ್ ಮ್ಹುಣಾಸರ್ ಏಕ್ ನಿರ್ಣಯ್ ಭಯ್ರ್ ಯೇಂವ್ಕ್ ನಾ. So ತವಳ್ ಮ್ಹುಣಾಸರ್ ಹಾಂವ್ free..! ಥೊಡೆ ಪಾವ್ಟಿಂ ಥೊಡ್ಯಾನಿಂ ಹಾಂವೆಂ ವಾಪಾರ್ಚಾ ಭಾಶೆ ವಿಶಿಂ ಬೂದ್ ಬಾಳ್ ಮ್ಹಕಾ ಸಾಂಗ್ಲ್ಯಾ . ಪುಣ್ ಹಾವೆಂ ಹ್ಯಾ ಬ್ಲಾಗಾಕ್ ಚ್ ಮ್ಹುಣ್ ಬರಯ್ಲ್ಯಾ ಥೊಡ್ಯಾ ಪೋಸ್ಟಾಂತ್ ಮಾತ್ರ್ ಥೊಡೆ ಪಾವ್ಟಿಂ extreme ಮ್ಹುಳ್ಳಿ ತಸಲಿ ಭಾಸ್ ವಾಪಾರ್ಲ್ಯಾರ್ ಯೀ ಇತರ್ ಕಡೆ ಬರಂವ್ಚಾ ಕಡೆ ಶಿಸ್ತ್ ಸಾಂಬಾಳ್ಯಾ.

ಮಾಗಿರ್ ಹ್ಯಾ ಬ್ಲಾಗಾಚಾ domain ನಾಂವಾಕ್ ಮ್ಹುಣ್ ಸೊಡ್ಲ್ಯಾರ್ ಹಾವೆಂ ಕಾಂಯ್ ಪಯ್ಸೆ ಖರ್ಚ್ ಕರುಂಕ್ ನಾಂತ್. ಗೂಗಾಲಾನ್ ದಿಂವ್ಚೆಂ ಪುಂಕ್ಯಾಚೆಂ server ಅನಿಂ ಜಾಳಿರ್ ಮೆಳ್ ಲ್ಲೆಂ ಥೊಡೊ ವಿನ್ಯಾಸ್ ಬದ್ಲುನ್ ಆಪ್ಣಾಯ್ಲೆಂ ಏಕ್ ಸಾದೆಂ template. ಮ್ಹಕಾ ಚಡ್ ಫಿಕಿರ್ ಆಸ್ಚಿ ಬ್ಲಾಗಾಚಾ ಸೊಭಾಯೆಚಾಕೀ ಚಡ್ ತಾಂತ್ಲ್ಯಾ content ಚಿ. ತುವೆಂ ಏಕ್ ವಡ್ಲೆಂ AC ಹೋಟೆಲ್ ಬಾಂದುನ್ , ಬಸೊಂಕ್ ಸೊಭಿತ್ ಕದೆಲಾಂಯೀ ದವರುನ್ ನಿಟ್ಟ್ ಏಕ್ ಬರಿ ಚಾ ಕರುಂಕ್ ಗೊತ್ತುನಾತ್ಲ್ಯಾರ್ ಲೋಕ್ ತ್ಯಾ ರುಕಾ ಮುಳಾಚಾ ಗುಡಾಂಗಡ್ ಗಾರ್, ಬರಿ ಚಾ ಕರ್ನ್ ದಿತಾ ಜಾಲ್ಯಾರ್ ಥಂಯ್ಚ್ ಉಭೆ ರಾವೊನ್ ಜಾಲ್ಯಾರ್ ಯೀ ಪಿಯೆತಾ. ಥೊಡೆ ಪಾವ್ಟಿಂ ಫಾವೊತೆಂ research ನಾಸ್ತಾನಾ ಸಂಪಾದಾಕಾಂಚಾಂ ದಾಕ್ಷೆಣೆಕ್ ಅಂತಿಮ್ ಕ್ಷಣಾರ್ ಬರಯ್ಲ್ಯಾ ಮ್ಹುಜಾ ಲೇಖನಾಂ ವಯ್ರ್ ಮ್ಹಕಾಚ್ ತ್ರಪ್ತಿ ನಾ.ಪುಣ್ ಲೇಖಾನಾಂಕ್ ಇಲ್ಲೊಸೊ ಮ್ಹುಣಿ ನ್ಯಾಯ್ ದೀಂವ್ಕ್ ಥೊಡೆ ಪಾವ್ಟಿಂ ರಾತಿಚಿ ನೀದ್, ಥೊಡೆ ಪಾವ್ಟಿಂ ವಿಕೆಂಡಾಂತ್ ಪಿಗ್ಗ್ ಆನಿಂ ಪೆಗ್ಗ್ ಸಾಕ್ರಿಫಿಸ್ ಯೀ ಕೆಲಾ..! . ಪುಣ್ ಚಡಾವತ್ ಲೇಕಾನಾಂ ಬರಯ್ತಾನಾ ವಿವಿಧ್ ನಮೂನೆಚಿ ಜಾಣ್ವಾಯ್ ವಿವಿಧ್ ಮುಳಾ ಥಾವ್ನ್ ಘೆತಾಂ. ತುಕಾ ಏಕ್ ಪೇಜ್ ಲೇಖನ್ ಬರಂವ್ಕ್ ಆಸ್ ಲ್ಯಾರ್ ಉಣ್ಯಾರ್ ಉಣೆಂ ಮ್ಹುಳ್ಯಾರ್ ಶೆಂಭರ್ ಪೇಜಿಂಚಿ ಜಾಣ್ವಾಯ್ ಆಸಾಜೆ. ನಾತ್ಲ್ಯಾರ್ ತೆಂ scrap ಜಾತಾ...!

                                       ********

ಹ್ಯಾ ಸಂಸಾರಾಂತ್ ಥೊಡೆ ವಿಚಿತ್ರ್ ಆರ್ಥ್ ಜಾಯ್ನಾತ್ಲೆ ಮಿಸ್ತೆರ್ ಆಸಾತ್ ಮ್ಹುಣ್ ತುಮಿಂ ಜಾಣಾಂತ್ . ಹ್ಯಾ ಸಂಬಂಧಿ ವಿವಿಧ್ ಡೊಕ್ಯೂಮೆಂಟಾರಿ ಆನಿಂ ಇತರ್ ಮಾಹೆತ್ ಸಂಗ್ರಹ್ ಕರ್ನ್ , ಅಭ್ಯಾಸ್ ಕರ್ನ್ ಆಸಾಂ . ಮಸ್ತ್ ಇಂಟರೆಸ್ಟಿಂಗ್ ಆಸಾತ್ ತೆ. ಥೊಡ್ಯಾ ತೆಂಪಾ ಉಪ್ರಾಂತ್ ಹ್ಯಾ ವಿಚಿತ್ರಾಂ ವಿಶಿಂ ಸಾಂಕಾಳ್ ಲೇಖನಾಂ ಕೊಂಕ್ಣೆಂತ್ ಬರಯ್ಜೆ ಮ್ಹುಣ್ ಚಿಂತ್ಲಾಂ. ಹ್ಯಾ ಚ್ ಬ್ಲಾಗಾರ್ ಬರಯ್ಜೆ ಗೀ ಯಾ ದುಸ್ರ್ಯಾ ಜಾಳಿಜಾಗ್ಯಾರ್ ಯಾ ಪತ್ರಾರ್ ಬರಯ್ಜೆ ಗೀ ಮ್ಹುಣೊನ್ ಆನಿಕೀ ನಿರ್ಧಾರ್ ಘೆಂವ್ಕ್ ನಾ ...

Hopefully I will come up with some interesting things very soon...

ತುಮ್ಕಾಂ ವೇಳ್ ಆಸ್ತಾನಾಂ ಹೊ ಬ್ಲಾಗ್ ತೀಳ್ನ್ ವಚುಂಕ್ ವಿಸ್ರನಾಂತ್ ನೇ ..?

********

-ಪ್ರಮೋದ್ ರೊಡ್ರಿಗಸ್ , ಹೊಸ್ಪೆಟ್

ಲ್ಯಾಪ್ ಟೊಪ್ ಘೆಂವ್ಕ್ ಆಸಾ ಗೀ…. ?

(NAMAN BALLOK JESU)

ಏಕ್ ಟಿವಿ ಘೆಂವ್ಕ್ ಆಸ್ ಲ್ಯಾರ್ ಕಸ್ಲಿ ಘೆಂವ್ಚಿ ಮ್ಹುಣೊನ್ ಚಡ್ ಮಾಂಡೊ ಹುನ್ ಕರಿಜೆ ಮ್ಹುಣ್ ಗರ್ಜ್ ನಾ. ಅಮ್ಕಾಂ ಚಡಾವತ್ ಏಕ್ ಐಡಿಯಾ ಆಸ್ತಾ. ಬೈಕ್ ಯಾ ಕಾರ್ ಘೆಂವ್ಕ್ ಆಸ್ ಲ್ಯಾರ್ ಯೀ ಖಂಚೆಂ ಘೆಂವ್ಚೆ ಮ್ಹುಣ್ ನಿರ್ಣಯ್ ಕರುಂಕ್ ಕಷ್ಟ್ ಜಾಯ್ನಾಂತ್ . ಪುಣ್ ಲ್ಯಾಪ್ ಟೊಪ್ ಘೆತಾನಾ , ಸಬಾರಾಂಕ್ ಖಂಚೊ ಘೆಂವ್ಚೊ ಮ್ಹುಣ್ ನಿರ್ಣಯ್ ಕರುಂಕ್ ಕಷ್ಟ್ ಜಾತಾ. ಮಹಿನ್ಯಾಕ್ ಏಕ್ ನವಿ ತಾಂತ್ರಿಕಾತಾ, ವಿವಿಧ್ ವಿನ್ಯಾಸ್ ತಶೆಂ ನಮೂನೊ, ನವೆ features ದಿಂವ್ಚೊ ಡಜನ್ ಗಟ್ಲೆ ಲ್ಯಾಪ್ ಟೊಪ್ ಉತ್ಪಾದಕ್ ಕಂಪ್ಣ್ಯೊ ... ಹೆಂ ಪುರಾ ಪಳೆತಾನಾ ಲ್ಯಾಪ್ ಟೊಪ್ ಖರೀದ್ ಕರ್ಚೆಂ ಏಕ್ ಸಂಕೀರ್ಣ್ ಕಾಮ್ಂ ಚ್ ವ್ಹಯ್ .

ಲ್ಯಾಪ್ ಟೊಪ್ ಘೆಂವ್ಕ್ ಆಸಾ ಗೀ ? ತರ್ ಪಯ್ಲ್ಯಾನ್ ತುಕಾ ದೋನ್ ವಿಶಯ್ ಮತಿಂತ್ ದವರಿಜೆ. ತುಕಾ ಲ್ಯಾಪ್ ಟೊಪ್ ಕಿತ್ಯಾಕ್ ? ಆನಿಂ ತುಜಿ ಬಜೆಟ್ ಕಿತ್ಲಿ ? ಆಜ್ ತುಕಾ ಏಕ್ ಪಂದ್ರಾ ಹಜಾರ್ ಥಾವ್ನ್ ಲಾಕಾಂ ರೂಪ್ಯಾಚೆ ಲ್ಯಾಪ್ ಟೊಪ್ ಮೆಳ್ತಾತ್. ಲ್ಯಾಪ್ ಟೊಪ್ ಘೆತಾನಾ , ಪುಡ್ಲಿ ದೀಷ್ಟ್ ಗೆಜೆ ಮ್ಹುಣ್ ಗರ್ಜ್ ನಾ. ಕಿತ್ಯಾಕ್ ಮ್ಹುಳ್ಯಾರ್ ಹ್ಯಾ ವರ್ಸಾ ಕಾಣ್ಘೆಲ್ಲೆಂ ಲ್ಯಾಪ್ ಟೊಪ್ ಅನ್ಯೇಕಾ ವರ್ಸಾ ಚಾ ಟೆಕ್ನೊಲೊಜಿಕ್ ಪಳೆಯ್ಲಾರ್ ನಗಣ್ಯ್ ಜಾತಾ. ತುಕಾ ಲ್ಯಾಪ್ ಟೊಪಾಚಿ ಗರ್ಜ್ ಕಿತ್ಯಾಕ್ ? ಇಂಟರ್ ನೆಟ್ ಕರ್ನ್ , ಇಲ್ಲೆಶೆಂ ಒಫಿಸ್ ಸಾಪ್ಟ್ ವೆರಾಂತ್ ಕಾಮ್ ಕರ್ನ್ ಮಾಗಿರ್ ಮ್ಯೂಸಿಕ್ ಆಯ್ಕೊಂಕ್ ಆಸ್ ಲ್ಯಾರ್ ತುಮಿಂ Notebook ಕಂಪ್ಯೂಟಾರ್ ಘೆಂವ್ಚೆಂ ಬರೆಂ. ಹೆಂ ಬಾರಿ ಹಾಳೂ ಆಸ್ತಾ. ದಾಕ್ಟಿ ಸ್ಕ್ರೀನ್ ಮಾಗಿರ್ ಹೆಣೆಂ ತೆಣೆಂ ವರುಂಕ್ ಯೀ ಸುಲಭ್. ಬ್ಯಾಟರಿ ಲೈಫ್ ಯೀ ಬರೊ ಮೆಳ್ತಾ. ಪಂದ್ರಾ ಥಾವ್ನ್ 23 ಹಜಾರ್ ರೂಪ್ಯಾಂಕ್ ತುಮಿಂ ಹೆಂ ಕಂಪ್ಯೂಟಾರ್ ಘೆವ್ಯೇತ್. ಹ್ಯಾ ಕಪ್ಯೂಂಟಾರಾಂತ್ ಚಡಾವತ್ ಇಂಟೆಲ್ ಅಟೊಮ್ ಪ್ರಾಸೆಸಾರ್ ಆಸ್ತಾ. ಹಾಂತುಂ ತುಮ್ಕಾಂ ಅತಾಂಚಾ ದರ್ಜೆಚೆಂ ಕಂಚೆ ಯೀಂ Windows ಒಫರೆಟಿಂಗ್ ಸಿಸ್ಟಮ್ ತಶೆಂ ಅಪ್ಲಿಕೇಶನಾಂ ಇನ್ಸ್ಟಾಲ್ ಕರ್ಯೇತ್ .ಪುಣ್ ತಿಂ ತಿತ್ಲ್ಯಾ ವೇಗಾನ್ ಕಾಮ್ ಕರ್ಚಿಂ ನಾಂತ್. ತುಮ್ಕಾಂ ಹಾಂತುಂ ಏಕ್ ಯಾ ದೋನ್ GB ಮ್ಹುಣಾಸರ್ RAM ಆಸ್ತಾ. ಸಾಮಾನ್ಯ್ ಉಪ್ಯೋಗಾಕ್ ಹೆಂ ಕಂಪ್ಯೂಟಾರ್ ಕಿತ್ಲ್ಯಾಕ್ ಯೀ ಪುರೊ.ತುಮ್ಚೊ ಕಂಪ್ಯೂಟಾರ್ ಉಪ್ಯೋಗ್ ಏಕಾ ಮಟ್ಟಾರ್ ಸೀಮಿತ್ ಆಸ್ ಲ್ಯಾರ್ , high end ಲ್ಯಾಪ್ ಟೊಪ್ ಘೆಂವ್ಚಾ ಬದ್ಲಾ , Notebook ಕಂಪ್ಯೂಟಾರ್ ಘೆಂವ್ಚೆಂ ಬುದ್ವಂತ್ ನಿರ್ಧಾರ್. ಕಿತ್ಯಾಕ್ ಮ್ಹುಳ್ಯಾರ್ ಹ್ಯಾ ಕಂಪ್ಯೂಟಿಂಗ್ ಹಾತೆರಾಂಕ್ ಚಡಿತ್ ದುಡು ಗಾಲ್ಚೊ ವಿಭಾಡ್. ಪೂತ್ ಅತಾಂ ಹೈಸ್ಕೊಲಾಂತ್ ಆಸಾ ,ಆನಿಂ ಪಾಂಚ್ ವರ್ಸಾನಿಂ ಕೊಲೆಜಿಕ್ ಪಾವ್ತಾ ದೆಕುನ್ ಅತಾಂಚ್ ಏಕ್ ಬರೊ ಪನ್ನಾಸ್ ಹಜಾರಾಂಚೊ ಲ್ಯಾಪ್ ಟೊಪ್ ಖರೀದ್ ಕರ್ತಾಂ ಮ್ಹುಣ್ಚೊ ಏಕ್ ಮೂರ್ಖ್ಪಣಾಚೆಂ ನಿರ್ಧಾರ್ ಜಾತಾ. ಪಾಂಚ್ ವರ್ಸಾಂ ಉಪ್ರಾಂತ್ ತೆಂ ಲ್ಯಾಪ್ ಟೊಪ್ ಚಾಲಿಂತ್ ಆಸಾನಾ. ಮಾಗಿರ್ ತ್ಯಾ ಹೈಸ್ಕೂಲಾಚಾ ಭುರ್ಗಾಕ್ ಗೇಮ್ ಕೆಳ್ಚೆಂ ಸೊಡ್ಲ್ಯಾರ್ ತ್ಯಾ high end ಲ್ಯಾಪ್ ಟೊಪಾಂತ್ ಕಾಲೆಂ ಕರುಂಕ್ ಆಸ್ತಾ? . ಜಾಣ್ವಾಯೆಚೊ ನಿರ್ಧಾರ್ ಮ್ಹುಳ್ಯಾರ್ , ತ್ಯಾ ಹೈಸ್ಕೂಲಾಚಾ ಭುರ್ಗ್ಯಾಕ್ ವೀಸ್ ಹಜಾರಾಚೆಂ ಏಕ್ ಡೆಸ್ಕ್ ಟೊಪ್ ಯಾ Notebook ದೀವ್ನ್ , ತ್ಯಾ ತೀಸ್ ಹಜಾರಾಚೆಂ ಭಾಂಗಾರ್ ಘೆತ್ಲ್ಯಾರ್ , ಪಾಂಚ್ ವರ್ಸಾಂ ಉಪ್ರಾಂತ್ ನವೆಂ ಚ್ high end ಲ್ಯಾಪ್ ಟೊಪ್ ಘೆವ್ಯೇತ್....!

ತರ್ high end ಲ್ಯಾಪ್ ಟೊಪ್ ಕೆನ್ನಾ ಗರ್ಜ್ ಪಡ್ತಾ ತ್? ತುಕಾ ಖಂಯ್ ಪುಣಿ ವಡ್ಲೆ ವಡ್ಲೆ ಗೇಮ್ಸ್ ಕೆಳೊಂಕ್ ಆಸಾ ಗೀ ? ಯಾ ವಿಡಿಯೊ edit ಕರುಂಕ್ ಆಸಾ ಗೀ ? DOT NET ಇನ್ಸ್ಟಾಲ್ ಕರ್ನ್ SQL server ರನ್ನ್ ಕರುಂಕ್ ಆಸಾಗಿ? ಯಾ ಇತರ್ ನವಿಂ ಸಂಕೀರ್ಣ್ ಅಪ್ಲಿಕೇಶಾನಾಂ ತ್ ಕಾಮ್ ಕರುಂಕ್ ಆಸಾ ಗೀ ? ತರ್ ತುಕಾ high end ಲ್ಯಾಪ್ ಟೊಪಾಚಿ ಗರ್ಜ್ ಆಸಾ. ಹ್ಯಾ ಲ್ಯಾಪ್ ಟೊಪಾಂತ್ ತುಕಾ ಚಾರ್ ಜಿಬಿ ಮ್ಹುಣಾಸರ್ RAM ಆಸ್ತಾ. 520 GB ಥಾವ್ನ್ 1 TB ತಿತ್ಲೆಂ ಹಾರ್ಡ್ ಡಿಸ್ಕ್ ಆಸ್ತಾ. ಡ್ಯುಯಾಲ್ ಕೋರ್, ಕ್ವಾಡ್ ಕೋರ್ , ಇಂಟೆಲಾಚೆ Core i3, Core i5 .... ತಸಲೆ ವಡ್ಲೆ ಪ್ರೊಸೆಸಾರ್ ಆಸ್ತಾತ್. ಇಂಟಿಗ್ರೆಟೆಡ್ ಗ್ರಾಪಿಕ್ಸ್ ಕಾರ್ಡಾ ಸವೆಂ ಹಾಂತುಂ discrete GPU (graphics processing unit) ಯೆತಾ. ತಶೆಂ ಜಾಲ್ಲ್ಯಾನ್ ಹೈ ಡೆಪಿನಿಶನ್ ವಿಡಿಯೊ ಪಳೆಂವ್ಕ್ ತಶೆಂ 3-D ಗೇಮ್ ಕೆಳೊಂಕ್ ಸಾದ್ಯ್ ಜಾತಾ. ಆಶೆಂ ಸಭಾರ್ ಗರ್ಜೆವಂತ್ features ಮೆಳ್ತಾತ್ . ಮ್ಹೋಲ್ 35 ಹಜಾರಾ ಥಾವ್ನ್ ದೇಡ್ ಲಾಕ್ ರೂಪಯ್ ಮ್ಹುಣಾಸರ್ ಆಸ್ತಾ..!
ಖಂಚಾ ಕಂಪ್ಣೆಚೆಂ ಲ್ಯಾಪ್ ಟೊಪ್ ಬರೆಂ ? ತುಮ್ಕಾಂ ಏಕ್ ಡಜನ್ option ಆಸಾತ್. ತುಮಿಂ high end ಲ್ಯಾಪ್ ಟೊಪ್ ಘೆಂವ್ಕ್ ಆಸ್ ಲ್ಯಾರ್ ತೆಂ ಕಿತ್ಲೆಂ heat ಜಾತಾ ಮ್ಹುಣ್ ಪಳಯ್ಜೆ. ಕಂಚಯೀಂ ಏಕ್ ಮೊಡೆಲ್ ತುಮ್ಕಾಂ ಪಸಂದ್ ಜಾಲ್ಯಾರ್ , ತುಮಿಂ ಶೋ ರೂಮಾಂತ್ ಚ್ ಏಕ್ ಅರ್ಧೊ ಗಂಟೊ ತಪಾಸ್ಣಿ ಕೆಲ್ಯಾರ್ ಬರೆಂ. ಬ್ಯಾಟಾರಿ ಬ್ಯಾಕಾಪ್ ಯೀ ಕಿತ್ಲಿ ಮೆಳ್ತಾ ಮ್ಹುಣ್ ತುಮ್ಕಾಂ ಕಳ್ತಾ. Core i3, Core i5 ಯಾ ಕ್ವಾಡ್ ಕೋರ್ Core i7 ತಸಲೆ ವಡ್ಲೆ ಪ್ರಾಸೆಸಾರ್ ಆಸ್ ಲ್ಲೆಂ ಲ್ಯಾಪ್ ಟೊಪ್ ಘೆತ್ಲ್ಯಾರ್ performance ಬರೆಂ ಆಸ್ತಾ. ಮೋಲ್ ಯೀ ಚಡ್ . ವಡ್ಲೆ ವಡ್ಲೆ ಪ್ರೊಸೆಸಾರ್ ಆಸ್ ಲ್ಯಾರ್ ಬ್ಯಾಟಾರಿ ಬ್ಯಾಕಾಪ್ ಉಣೆಂ.

ಚಡಾವಾತ್ ಲ್ಯಾಪ್ ಟೊಪಾಂತ್ Windows 7 Home Basic ಒಫರೆಟಿಂಗ್ ಸಿಸ್ಟಮ್ ಆಸ್ತಾ. ಹಾಕಾ ಚಾರ್ ಹಜಾರ್ ಮ್ಹುಣಾಸರ್ ಮ್ಹೋಲ್ ಆಸಾ. ಇಂಜಿನಿಯಾರಿಂಗ್ ಸ್ಟೂಡೆಂಟಾಂಕ್ Windows 7 Professional ಯಾ Ultimate edition ಒಫರೆಟಿಂಗ್ ಸಿಸ್ಟಮ್ ಗರ್ಜ್. ಹಾಕಾ ಆಟ್ ಥಾವ್ನ್ ದಾ ಹಜಾರ್ ರೂಪಯ್ ಮ್ಹುಣಾಸಾರ್ ಮೋಲ್ ಆಸ್ತಾ. ಇಂಡಿಯಾಂತ್ ಸಬಾರಾನಿಂ ಪೈರೆಟೆಡ್ Windows ಚ್ ವಾಪಾರ್ಚೆಂ. high end ಲ್ಯಾಪ್ ಟೊಪ್ ಉಣ್ಯಾ ಮೊಲಾಕ್ ಘೆಂವ್ಚೆಂ ಏಕ್ ಟಿಪ್ ಪಳೆಯಾ. Windows ನಾತ್ ಲ್ಲೆಂ ಲ್ಯಾಪ್ ಟೊಪ್ ಘೆಂವ್ಚೆಂ . ತಾಂತುಂ ಚಡಾವತ್ DOS ಯಾ LINUX ಆಸ್ತಾ. ತಿಂ ಪುಂಕ್ಯಾಕ್ ಮೆಳ್ಚಿಂ ಒಫರೆಟಿಂಗ್ ಸಿಸ್ಟಮಾಂ. ಮಾಗಿರ್ ಘರಾ ಯೇವ್ನ್ ತಿಂ ಕಾಡ್ಚೆಂ ಆನಿಂ ಪೈರೆಟೆಡ್ Windows 7 Ultimate ಇನ್ಸ್ಟಾಲ್ ಕರ್ಚೆಂ ..! ಲ್ಯಾಪ್ ಟೊಪಾಚೆಂ ಮೋಲ್ ಯೀ ಉಣೆಂ ಜಾತಾ ಮಾಗಿರ್ Windows 7 Ultimate ತಸಲ್ಯಾ ಒಫರೆಟಿಂಗ್ ಸಿಸ್ಟಮಾಂತ್ ಕಾಮ್ ಕರ್ಚೆಂ ಸೌಭಾಗ್ಯ್ ಮೆಳ್ತಾ ...!!!


********