IP ಕ್ಯಾಮೆರಾ : ತುಮ್ಕಾಂ ಹೊ ಕಿತ್ಲೊ ಉಪ್ಯೋಗ್ ?

Naman Ballok Jesu May 2013

CCTV ಕ್ಯಾಮೆರಾ ಟೆಕ್ನೊಲೊಜಿ ತುಮ್ಕಾಂ ಖಳಿತ್ ಆಸಾ ಮ್ಹುಣ್ ಚಿಂತಾ . ಕ್ಲೋಸ್ಡ್ ಸರ್ಕ್ಯೂಟ್ ಟಿವಿ ಕ್ಯಾಮೆರಾ ಚಡಾವತ್ ಅನಲೊಗ್ ಟೆಕ್ನೊಲೊಜಿ ವಾಪಾರ್ನ್ , ಏಕಾ ಜಾಗ್ಯಾಕ್ ಸಿಮೀತ್ ಜಾವ್ನ್ ಆಸ್ತಾತ್ . ಪುಣ್ IP ಕ್ಯಾಮೆರಾ ಟೆಕ್ನೊಲೊಜಿ  ಅಸಾ ಪಳೆ ಸಂಪೂರ್ಣ್ ಡಿಜಿಟಲ್. ಇಂಟರ್ನೆಟ್ ಪ್ರೊಟೊಕೊಲ್  ಕ್ಯಾಮೆರಾ ದ್ವಾರಿಂ ಎಕಾ ಜಾಗ್ಯಾರ್ ನಿಗಾ ದವರ್ಲ್ಯಾರ್ , ದತ್ತಾಂಶ್ ಅಂತರ್ ಜಾಳಿ ಮುಖಾಂತ್ರ್ ಆನ್ಯೇಕಾ ಜಾಗ್ಯಾರ್ ಪಾವೊಂಕ್ ಸಾಧ್ಯ್ ಜಾತಾ. ಮ್ಹುಳ್ಯಾರ್ , ಕದಿರಾನೆ ಹಳ್ಳೆಚಾ ತುಮ್ಚಾ ಘರಾಂತ್ IP ಕ್ಯಾಮೆರಾ ದವರ್ಲ್ಯಾರ್ , ತುಮ್ಚಾ ಘರಾ ಕಿತೆಂ ಘಡ್ತಾ ಮ್ಹುಣ್ ಕಜಕಿಸ್ತಾನಾ ಥಾವ್ನ್ ತುಮ್ಕಾಂ ಪಳೆಂವ್ಕ್ ಜಾತಾ ...!

ದೋನ್ ನಮೂನೆಚ್ IP ಕ್ಯಾಮೆರಾ ಆಸಾತ್. ಕೇಂದ್ರಿತ್ ಆನಿಂ ಆಕೇಂದ್ರಿತ್ IP ಕ್ಯಾಮೆರಾ . ಕೇಂದ್ರಿತ್ ಕ್ಯಾಮೆರಾಂಕ್ central Network Video Recorder (NVR) ಮ್ಹುಳ್ಳಿ ಟೆಕ್ನೊಲೊಜಿ ಜಾಯ್ಜೆ. ತುಮ್ಚಾ ಕ್ಯಾಮೆರಾಂ ಥಾವ್ನ್ ಗೆಲ್ಲೊ ದತ್ತಾಂಶ್ ಪುರಾ ಏಕ್ ಕೇಂದ್ರ್ ಸರ್ವರಾರ್ ದಾಸ್ತಾನ್ ಜಾವ್ನ್ , ಥಂಯ್ ಥಾವ್ನ್ remote ಜಾಗ್ಯಾಂ ಥಾವ್ನ್ ತೊ ದತ್ತಾಂಶಾ ವಯ್ರ್ ನಿಗಾ ದವರ್ಯೇತ್ . ಪುಣ್ ಆಕೇಂದ್ರಿತ್ IP ಕ್ಯಾಮೆರಾ ಆಸಾತ್ ಪಳೆ , ತಾಕಾ NVR ತಾಂತ್ರಿಕತಾಚಿ ಗರ್ಜ್ ನಾ. ತ್ಯಾ ಕ್ಯಾಮೆರಾನಿಂಚ್ ದತ್ತಾಂಶ್ ದಾಸ್ತಾನ್ ಕರ್ನ್ , ಅಂತರ್ಜಾಳಿ ಮುಖಾಂತ್ರ್ ಸಂಸಾರಾಚಾ ಕಂಚಾಯ್ ಮುಲ್ಯಾಕ್ ಪಾವೊಂಕ್ ಸಾದ್ಯ್ ಜಾತಾ.


ಸಾಂಗ್ ಲ್ಯಾ ಬರಿ ಹಿ IP ಕ್ಯಾಮೆರಾ ಟೆಕ್ನೊಲೊಜಿ ಆರಂಭ್ ಜಾಲ್ಲಿ 1996 ಇಸ್ವೆಂತ್ . AXIS ಕಮ್ಯೂನಿಕೇಷನ್ ಕಂಪೆನಿನ್ ಆರಂಭ್ ಕೆಲ್ಲಿ. ಪಯ್ಲೆ ಪಾವ್ಟಿಂ ಕೇಂದ್ರಿತ್ ತಾಂತ್ರಿಕಾತಾ ಮಾತ್ರ್ ಉಪಲಬ್ದ್ ಆಸ್ ಲ್ಲಿ. ಆಕೇಂದ್ರಿತ್ IP ಕ್ಯಾಮೆರಾ ಪಯ್ಲೆಂ ಪಾವ್ಟಿಂ ಸುರು ಕೆಲ್ಲಿ Mobotix ಕಂಪ್ಣೆನ್ . ಪುಣ್ ಆಯ್ಚಾ ಬರಿ ಹಿ ತಾಂತ್ರಿಕಾತಾ ಅಭಿವ್ರದ್ದಿತ್ ಜಾವ್ನ್ ನಾತ್ ಲ್ಲಿ. ಪುಣ್ ಆಜ್ ಹಿ ಟೆಕ್ನೊಲೊಜಿ ಮಸ್ತ್ ವಾಡ್ಲ್ಯಾ . ಆಜ್ 29 ಮೆಗಾ ಪಿಕ್ಸೆಲ್ ತಿತ್ಲ್ಯಾ ವ್ಹಡ್ ರಿಸೊಲ್ಯೂಶನಾಂತ್ ಏಕಾ ಜಾಗ್ಯಾರ್ ನಿಗಾ ದವರ್ನ್ , ತಿ ಅಂತರ್ ಜಾಳಿ ಮುಖಾಂತ್ರ್ ಆನ್ಯೇಕಾ ಜಾಗ್ಯಾರ್ ಪಾವಾವ್ಯೇತ್. ಏಕಾ ನೆಟ್ ವರ್ಕ್ ಕೆಬಲಾ ಮುಖಾಂತ್ರ್ ಚ್ ದೋನ್ ವಾಟೆನ್ ಯೀ ಅಡಿಯೋ ಸಂಪರ್ಕ್ ಕರುಂಕ್ ಸಾಧ್ಯ್ ಜಾತಾ.remote ಜಾಗ್ಯಾಂ ಥಾವ್ನ್ಂಚ್ ಕ್ಯಾಮೆರಾ ಚೊ zoom , ರೇಗ್ರ್ ಬದ್ಲಾವಣ್ ಕರ್ಯೇತಾ. ರಿಮೋಟ್ ಜಾಗ್ಯಾ ಥಾವ್ನ್ಂ ಚ್ live ವಿಡಿಯೊ ಫಕತ್ ಕಂಪ್ಯೂಟರಾಂತ್ ಮಾತ್ರ್ ನ್ಹಂಯ್ ಸ್ಮಾರ್ಟ್ ಫೋನಾಂ ದ್ವಾರಿಂ ಯೀಂ ಪಳವ್ಯೇತಾ. ತಿತ್ಲೆಂಚ್ ನ್ಹಂಯ್ wireless ನೆಟವರ್ಕಾರ್ ಯೀ ಹೆ ಕ್ಯಾಮೆರಾ ಕಾಮ್ ಕರ್ತಾತ್. ತಿತ್ಲೆಂಚ್ ನ್ಹಂಯ್ ಅಬ್ಬಾಬ್ಬಾ ಮ್ಹುಣ್ಚೆ ತಸಲೆ ಆನಿಕೀ ಮಸ್ತ್ ಸೌಲತ್ ಆಸ್ ಲ್ಲೆ ಕ್ಯಾಮೆರಾ ಯೀ ಆಜ್ ಮಾರ್ಕೆಟಿಂತ್ ಆಸಾತ್. 

ತರ್ ತುಮ್ಕಾಂ ಯೀ ಅಸಲೊ ಏಕ್ ಕ್ಯಾಮೆರಾ ಜಾಯ್ಗಿ. ಆಜ್ ಇಂಡಿಯಾಂತ್ ಸುಮಾರ್ ಚಾರ್ ಹಜಾರಾ ಥಾವ್ನ್ ಹ್ಯಾ ಕ್ಯಾಮೆರಾಚೆಂ ಮೋಲ್ ಆರಂಭ್ ಜಾತಾ. ಅತಾಂ ಅತಾಂ ಚೈನಾಚೆ , ಕೊರಿಯಾಚೆ ಮ್ಹುಣ್ ದಾಕ್ಟೆ ದಾಕ್ಟೆ wireless ಕ್ಯಾಮೆರಾ ಆಯ್ಲ್ಯಾತ್. ತುಮ್ಚಾ ಘರ್ಚಾ ಏಕ್ ಕುಡಾಂತ್ ತೆ ಶಿರ್ಕೊನ್ ದವರ್ಯೇತ್. ತಾಂತುಂ ಅಡಿಯೋ ಸೌಲತ್ತ್ ಯೀ ಆಸ್ತಾ. ಮಾಗಿರ್ ತುಮ್ಚೆ ಕಡೆ ಅಂತರ್ ಜಾಳಿಚೊ ಸಂಪರ್ಕ್ ಆಸಾಜೆ. Wi- Fi ರೌಟರ್ ಆಸ್ ಲ್ಯಾರ್ ಬರೆಂ . ತುಮ್ಚೊ ಕ್ಯಾಮೆರಾ ಜಾಳಿಕ್ ಸಂಪರ್ಕ್ ಜಾವ್ನ್ live ವಿಡಿಯೊ ತುಮಿಂ ಸಂಸಾರಾಚಾ ಕಂಚಾಯೀ ದೇಶಾ ಥಾವ್ನ್ ಮೊಬೈಲಾ ಥಾವ್ನ್ ಯಾ ಕಂಪ್ಯೂಟರ್ ಮುಖಾಂತ್ರ್ ಪಳೆಂವ್ಕ್ ಜಾತಾ. ಅಡಿಯೊ ದ್ವಾರಿಂ ಸಂಭಾಷಣ್ ಯೀಂ ಕರ್ಯೇತ್. ಥೊಡೆ ಕಮಾಂಡ್ ದೀವ್ನ್ ಕ್ಯಾಮೆರಾಚೆಂ ಪೋಕಸ್ , zoom , ರೇಗ್ರ್ ಬದ್ಲಾವಣ್ ಕರ್ಯೇತ್. 

ತುಮ್ಕಾಂ ಏಕ್ ಘೆಂವ್ಕ್ ಆಸಾಗೀ ? ತರ್ Ebay ಕ್ ಏಕ್ ಭೆಟ್ ದೀವ್ನ್ ಪಳೆಯಾ. ಸಾಂಗ್ ಲ್ಯಾ ಬರಿ ತುಮ್ಚಾ ಇಂಟರ್ನೆಟ್ ಸ್ಪೀಡ್ ಕಿತ್ಲೊ ಮ್ಹುಣ್ ಪಯ್ಲೆಂಚ್ ಸಮ್ಜೊನ್ ಘೆಯಾ. ಚಡಿತ್ ಸ್ಪೀಡಾಚಾ ಸ್ಟ್ರೀಮಿಂಗಾಕ್ ಚಡಿತ್ ಬ್ಯಾಂಡ್ ವಿಡ್ತ್ ಜಾಯ್ಜೆ ಮ್ಹುಣ್ ವಿಸ್ತ್ರನಾಕಾತ್ ...!!!

                *******

ಡೊಮೈನ್ ನಾಂವ್ ಪುರಾಣ್....

This summary is not available. Please click here to view the post.

ಜಾಳಿರ್ ಲಿಂಕ್ ಕ್ಲಿಕ್ ಕರ್ಚಾ ಪಯ್ಲೆಂ ...!!

Naman Ballok Jesu March 2013

ಆಯ್ಚಾ ಸಂಸಾರಾಂತ್ ಸುರಕ್ಷಿತ್ ಮ್ಹುಳ್ಳಿ ಕಸಲಿಚ್ ವಸ್ತ್ ನಾ. ಅಂತರ್ ಜಾಳಿಚಿ ಸ್ಥಿತಿ ಯೀ ತಿಚ್. ಜಾಳಿರ್ ತುಮ್ಚೆಂ ಏಕ್ ಕ್ಲಿಕ್ ತುಮ್ಕಾಂ ಸಗ್ಳೊ ಸಂಸಾರ್ ಚ್ ಬಗ್ಲೆಕ್ ಹಾಡುಂಕ್ ಸಕ್ತಾ , ಪುಣ್ ಏಕ್ ಅಸುರಕ್ಷಿತ್ ಲಿಂಕ್ ತುಮ್ಚೊ ಬೊಂಗೊಸ್ತುಳ್ ಕರುಂಕ್ ಯೀ ಸಕ್ತಾ..! ತುಮ್ಕಾಂ ಖಳಿತ್ ಆಸೊಂಕ್ ಪುರೊ , ಆಮಿ ಹರ್ಯೇಕ್ ದೀಸ್ ಇಂಟರ್ನೆಟ್ ವಾಪಾರ್ತಾನಾ , ಸಬಾರ್ ಶಾಭಿತ್ ನಾತ್ ಲ್ಲ್ಯಾ ಲಿಂಕಾಂಚಾ ಜಾಳಿಂಕ್ ಆಮಿಂ ಸಂಪೊಡ್ನ್ ಪಡ್ತಾಂವ್. ಅಸುರಕ್ಷಿತ್ ಲಿಂಕ್ ಕ್ಲಿಕ್ ಕೆಲ್ಯಾರ್ ಅಮ್ಚಾ ಕಂಪ್ಯೂಟರಾಂತ್ಲ್ಯಾ ಸೂಕ್ಷ್ ದತ್ತಾಂಶಾಚಿ ಚೊರಿ ಮಾತ್ರ್ ನ್ಹಂಯ್ ಆಮ್ಚಾ ಖಾಸ್ಗಿ ಮಾಹೆತಿಚೆರ್ ಯೀ ಆಮಿಂ ರಾಜಿ ಕರ್ಚಿ ಅನಿವಾರ್ಯಾತಾಯೀ ಯೇಂವ್ಕ್ ಪುರೊ. ಆಜ್-ಕಾಲ್ ಹಿಂ ಅಸುರಕ್ಷಿತ್ ಲಿಂಕಾಂಯೀ ಶಾಭಿತ್ ಲಿಂಕಾಂ ಬರಿ ದಿಸ್ತಾತ್.ಜಾಳಿರ್ ಅಮ್ಕಾಂ ಅಸುರಕ್ಷಿತ್ ಲಿಂಕ್ ಮ್ಹುಣ್ ದುಬಾವ್ ಆಯ್ಲ್ಯಾರ್ ಆಮಿಂ ತೆಂ ಉಗ್ತೆ ಕರ್ಚಾ ಪಯ್ಲೆಂ ಅಮಿಂ ಜಾಗ್ರೂತ್ ಜಾಯ್ಜೆ ಪಡ್ತಾ. ನಾತ್ ಲ್ಯಾರ್ ಶೆಳ್ಯೆ ರೂಪಾರ್ ಯೆಂವ್ಚಾ, ಬೊಲ್ಪ್ಯಾಂಚಾ ಜಾಳಿಕ್ ತುಮಿಂ ಶಿರ್ಕೊನ್ ಪಡ್ಚೆಂ ಅವ್ಕಾಸ್ ಆಸ್ತಾ ..!!

ಇತ್ಲ್ಯಾಕೀ ಹ್ಯಾ ಅಸುರಕ್ಷಿತ್ ಲಿಂಕಾಂಚಾ ಜಾಳಿಕ್ ಆಮಿಂ ಚಡಾವತ್ ಕೆನ್ನಾ ಸಂಪೊಡ್ನ್ ಪಡ್ತಾಂವ್ ? Facebook ತಸಲ್ಯಾ ಸಮಾಜಿಕ್ ತಾಣಾನಿಂ ತುಮ್ಕಾಂ ತಾಳ್ಣಿಂ ಹಾಡ್ಚೆ ತಸಲಿಂ ತಸ್ವಿರ್ಯೊ ದಾಕಾವ್ನ್ , ತುಮ್ಕಾಂ ತೆಂ ಕ್ಲಿಕ್ ಕರ್ಚಾ ಬರಿ ವೊಡ್ಣ್ಯೊ  ದಿತಾತ್. ತಿತ್ಲೆಂಚ್ ನ್ಹಂಯ್ ಇಮೈಲಾರ್ , ಇತರ್ ಜಾಳಿಜಾಗ್ಯಾನಿಂ ಆಸ್ಚಿಂ ಜಾಹಿರಾತಾಂ, instant ಮೆಸೆಜಾನಿಂ ಯೆಂವ್ಚಿಂ ಲಿಂಕಾಂ ತುಮ್ಚೆಂ ಕಂಪ್ಯೂಟರಾಕ್ ಹೈಜಾಕ್ ಕರುಂಕ್ ಸಕ್ತಾತ್ ಮಾತ್ರ್ ನ್ಹಂಯ್ ,ತುಮ್ಚಾ ನಾವಾಂತ್ ತುಜ್ಯಾ address ಬೂಕಾಂತ್ ಆಸ್ ಲ್ಯಾ ಸಗ್ಳ್ಯಾಂಕ್ spam ಸಂದೇಶ್ ದಾಡ್ನ್ ತಾಂಕಾಂ ಯೀ ಫಸಂವ್ಕ್ ಪಳೆಯ್ತಾತ್ ..!

ಹೆಂ ಅಡಾಂವ್ಕ್ ಆಮಿಂ ಕಸಲಿಂ ಪುರಾ ಸುರಕ್ಷಿತ್ ವಿಧಾನಾಂ ಜಾಳಿರ್ ಆಪ್ಣಾವ್ಯೇತಾ ? . ಅಂತರ್ ಜಾಳಿ ವಾಪಾರ್ಯಾಂಕ್ ಏಕ್ ವಡ್ಲೊ ಉಪದೇಸ್ ಆಸಾ . "ಒಳೊಕ್ ನಾತ್ ಲ್ಯಾ , ಅನಾಮಿಕ್ ಲಿಂಕಾಂಕ್ ಕ್ಲಿಕ್ ಕರಿನಕಾತ್ ". ಹೊ ಉಪದೇಸ್ ಪಾಳುಂಕ್ ತುಮ್ಕಾಂ ಜಾಯ್ನಾಂ ಜಾಲ್ಯಾರ್ ತುಮಿಂ ಉಗ್ತೆ ಕರ್ಚಾ ಲಿಂಕಾ ವಯ್ರ್ ಇಲ್ಲೊಸೊ ಸಂಸೋಧ್ ಕರ್ಯೇತಾ. ಏಕ್ ಲಿಂಕ್ ಉಗ್ತೆ ಕರ್ಚಾ ಪಯ್ಲೆಂ , ತಾಚೆರ್ ತುಮಿಂ cursor ದವರ್ಲ್ಯಾರ್ ತುಮ್ಚಾ ಬ್ರೌಸರಾಚಾ ಸಕಯ್ಲ್ಯಾ ಕುಶಿಂತ್ , ತೆಂ ಲಿಂಕ್ ತುಮ್ಕಾಂ ಖಂಯ್ ಅಪಾವ್ನ್ ವರ್ತಾ ಮ್ಹುಳ್ಳೊ ಸಂಪೂರ್ಣ್ ವಿಳಾಸ್ ಆಸ್ತಾ. ತ್ಯಾ ವಿಳಾಸಾಚೆರ್ ತುಮ್ಕಾಂ ಇಲ್ಲೊಸೊ ದುಬಾವ್ ಆಯ್ಲ್ಯಾರ್ ತುಮಿಂ ತೆಂ ಲಿಂಕ್ ಕ್ಲಿಕ್ ಕರ್ಚೆಂ ಭಿಲ್ಕುಲ್ ಸರ್ಕೆಂ ಜಾಯ್ನಾ. ತುಮ್ಕಾಂ ತೆಂ ಖಂಯ್ ಪುಣೀ ಉಗ್ತೆ ಕರಿಜೆಚ್ ಜಾಲ್ಲ್ಯಾರ್ ತೆಂ ಲಿಂಕ್ ತುಮಿಂ ಪಯ್ಲೆಂ ಸ್ಕ್ಯಾನ್ ಕರಿಜೆ. ಹಿಂ ಲಿಂಕಾಂ ಸ್ಕ್ಯಾನ್ ಕರ್ಚೆಂ ಜಾಲ್ಯಾರ್ ಯೀ ಕಶೆಂ . ? ಹಾಕಾಚ್ ಮ್ಹುಣ್ Link Scanner ಅಪ್ಲಿಕೇಶಾನಾಂ ತುಮ್ಕಾಂ ಜಾಳಿರ್ ಪುಂಕ್ಯಾಕ್ ಮೆಳ್ತಾತ್.  ಥೊಡಿಂ ಫಾಮಾದ್ ಮ್ಹುಳ್ಯಾರ್  Zulu URL Risk Analyzer (http://zulu.zscaler.com) ,URLVoid (www.urlvoid.com) , Sucuri (http://sitecheck.sucuri.net/scanner) ತಸಲಿಂ ಸಬಾರ್ ಜಾಳಿ ಜಾಗೆ ಆಸಾತ್. ತಾಂತುಂ ತುಮ್ಚೆಂ ಲಿಂಕ್ ಪೇಸ್ಟ್ ಕರ್ನ್ ತೆಂ ಲಿಂಕ್ ಬರೆಂ ಗೀ ಯಾ ವಾಯ್ಟ್ ಮ್ಹುಣ್ ವಿವರಿತ್ ವರ್ದಿ ಘೆವ್ಯೇತ್ . ತುಮ್ಚೆ ಕಡೆ  Norton , McAfee ತಸಲಿಂ Antivirus ಸಾಪ್ಟ್ ವೇರಾಂ ಆಸ್ ಲ್ಯಾರ್ Norton Safe Web , McAfee SiteAdvisor ತುಮ್ಚಾ ಬ್ರೌಸರಾಂತ್ Norton Safe Web , McAfee SiteAdvisor ತಸಲೆ pluggins ಅಸ್ತಾತ್. ತುಮ್ಕಾಂ ಶೀದಾ ಥಂಯ್ ವಚುನ್ ತುಮ್ಚಾ ಲಿಂಕಾ ವಿಶಿಂ ಮಾಹೆತ್ ಘೆವ್ಯೇತ್. ಹೆ ಪುರಾ ಟೂಲ್ಸ್ ಅಸಾತ್ ಪಳೆ ತುಮಿಂ ತೆಂ ಲಿಂಕ್ ಉಗ್ತೆ ಕರ್ಚೆಮ್ ಸುರಕ್ಷಿತ್ ಗೀ ಯಾ ನ್ಹಂಯ್ ಗೀ ಮ್ಹುಣ್ ಮಾಹೆತ್ ದಿತಾತ್. 

ಹ್ಯಾ ದಿಸಾನಿಂ ಆಮಿಂ ಚಡಾವತ್ ವಡ್ಲಿಂ ಲಿಂಕಾಂ ಮೊಟ್ವಿಂ ಕರ್ನ್ ದಿಂವ್ಚಿ ಸೆವಾ ಮೆಳ್ತಾ. ದಾಕ್ಲ್ಯಾಕ್  bit.ly , goo.gl , Owl.ly , Deck.ly , Su.pr .... ಅಸಲಿಂ ಡಜನಾಂ ಗಟ್ಲ್ಯಾನ್ ಜಾಳಿ ಜಾಗೆ ಲಿಂಕ್ ಮಟ್ವೆಂ ಕರ್ನ್ ದಿತಾತ್. ಥೊಡೆ ಪಾವ್ಟಿಂ ವಡ್ಲಿ ಸಮಸ್ಸ್ಯಾ ಮ್ಹುಳ್ಯಾರ್ Link Scanner ಅಸಾತ್ ಪಳೆ , ಹಿಂ ಮಟ್ವಿಂ ಕೆಲ್ಲ್ಯಾ ಲಿಂಕಾಂಕ್ ಸ್ಕ್ಯಾನ್ ಕರುಂಕ್ ವಿಫಲ್ ಜಾತಾತ್. ಚಡಾವತ್ ಟ್ವಿಟರಾಂತ್ ಚಡಿತ್ ಉಪ್ಯೋಗ್ ಜಾವ್ನ್ ಆಸ್ಚಾ ಅಸಲ್ಯಾ ಲಿಂಕಾಂ ವಯ್ರ್ ಚಡಿತ್ ನಿಗಾ ದವರ್ಚಿ ಗರ್ಜೆಚಿ. ತುಮ್ಕಾಂ ಕಂಯ್ ಪುಣೀ ಮಟ್ವಿಂ URL ಉಗ್ತೆ ಕರುಂಕ್ ಆಸ್ ಲ್ಯಾರ್ ತಿಂ ಪಾಸ್ರಾವ್ನ್ ಪಳೆಂವ್ಚಿ ಗರ್ಜ್ ಆಸಾ. longurl.org ತಸಲೆ ಜಾಳಿಜಾಗೆ ಮಟ್ವಿಂ ಲಿಂಕಾಂ ಪಾಸ್ರಾವ್ನ್ ದಿತಾತ್. 

ವಯ್ಲೆ ಕ್ರಮ್ ಅಪ್ಣಾವ್ನ್ ಯೀಂ ತುಮ್ಕಾಂ ಪರತ್ ಥೊಡೆ ಲಿಂಕ್ ಉಗ್ತೆ ಕರ್ಯೇತ್ ಗೀ ಮ್ಹುಣ್ ದುಸ್ರೆಂ ಚಿಂತಾಪ್ ಆಸ್ಲ್ಯಾರ್ ತುಮಿಂ ತ್ಯಾ ಲಿಂಕಾಚಾ domain ನಾಂವಾಂಚಿ ಪ್ರಾಯ್ ಪಳವ್ಯೇತ್. ಹೆ phising, spam ತಶೆಂ ಗೋಲ್ ಮಾಲ್ ಕರ್ಚೆ ಜಾಳಿ ಜಾಗೆ ಚಡ್ ತೆಂಪ್ ತ್ಯಾಚ್ ನಾಂವಾರ್ ಆಸಾನಾಂತ್. ಏಕ್ domain ನಾಂವ್ ಸಬಾರ್ ತೇಂಪ್ ಅಸ್ಲ್ಯಾರ್ ತಾಚೆ ವಯ್ರ್ ಪಾತ್ಯೆಣಿ ದವರ್ಯೇತ್. Domain ನಾಂವಾಂಚಿ ಪ್ರಾಯ್ ಪಳೆಂವ್ಕ್ ತುಮಿ  http://www.webconfs.com/domain-age.php ಮ್ಹುಳ್ಳೊ ಜಾಳಿ ಜಾಗೊ ವಾಪಾರ್ಯೇತ್. ತಿತ್ಲೆಂಚ್ ನ್ಹಂಯ್ https://www.virustotal.com ತಸಲೆ ಜಾಳಿಜಾಗೆ ವಾಪಾರ್ನ್ ತ್ಯಾ ಲಿಂಕಾಂತ್ ವೈರಸ್ ಪುಣೀ ಅಸಾ ಗೀ ಮ್ಹುಣ್ ತಪಾಸ್ ಕರ್ನ್ ಪಳವ್ಯೇತ್. ತುಮ್ಕಾಂ ಕಂಯ್ ಪುಣೀ ಕಂಚಾಯೀ ಜಾಳಿಜಾಗ್ಯಾಚಿ ನಾಮ್ಣಿಕಾಯ್ ಆನಿಂ ತ್ಯಾ ಜಾಳಿಜಾಗ್ಯಾವಿಶಿಂ ಅಭಿಪ್ರಾಯ್ ಜಾಯ್ಜೆ ಜಾಲ್ಯಾರ್ Web of Trust (https://www.mywot.com) ಸಾಯ್ಟಿಕ್ ಭೆಟ್ ದೀವ್ನ್ ಮಾಹೆತ್ ಘೆವ್ಯೇತ್...!

ಆಶೆಂ ಅಸುರಕ್ಷಿತ್ URL ಸಂಪೊಡ್ನ್ ಪಡಿನಾಸ್ತಾನಾ ರಾವೊಂಕ್ ಮಸ್ತ್ ವಿಧಾನ್ ಆಸಾತ್. ಗರ್ಜೆಚೆಂ ಮ್ಹುಳ್ಯಾರ್ ದುಬಾವ್ ಆಸ್ ಲ್ಯಾ ಕಡೆ ಕ್ಲಿಕ್ ಕರುಂಕ್ ನುಜೊ. ಹೆ ಬೊಲ್ಪೆ ಆಸಾತ್ ಪಳೆ , ಫಕತ್ ಶೆಳಿಯಾಂಚೊ ವೇಸ್ ಗಾಲ್ನ್ ಮಾತ್ರ್ ಯೇನಾಂತ್ , ತಪಸ್ಯಾ ಕರುಂಕ್ ಬಸ್ ಲ್ಲ್ಯಾ ವಿಶ್ವಮಿತ್ರಾಕ್ ನಾಡುಂಕ್ ಆಯ್ಲ್ಯಾ ಮೇನಾಕ ಬರಿ ಯೀ ಯೆತಾತ್. ತಶೆಂ ಜಾವ್ನ್ ವೊಡ್ನ್ಯಾಂಕ್ ಬಲಿ ಜಾವ್ನ್ ಕಿತೆಂಯೀಂ ಉಗ್ತೆ ಕರ್ಚಾ ಪಯ್ಲೆಂ ಏಕ್ ದುಸ್ತ್ರೆಂ ಚಿಂತಾಪ್ ಆಟಾಂವ್ಚೆಂ ಬರೆಂ ...!!!

   ******************

ಮೊಬೈಲ್ ಬ್ಯಾಟರಿ ಆನಿಂ ಪವರ್ ಬ್ಯಾಂಕ್ ....

Naman Ballok Jesu Feb 2013

ಆಯ್ಚಾ ಸಂಸಾರಾಂತ್ ಮೊಬೈಲ್ ಮೆಶಿನಾನಿಂ ಕೆಲ್ಲಿ ಕ್ರಾಂತ್ ತುಮ್ಕಾಂ ಖಳಿತ್ ಆಸಾ. ಹಿಂ ಅಮ್ಚಾ ಸದಾಂಚಾ ಜಿವಿತಾಂತ್ ಅವಿಭಾಜ್ಯ್ ಅಂಗ್ ಜಾವ್ನ್ ಗೆಲ್ಯಾಂತ್. ಫಕತ್ ಸಂಪರ್ಕ್ ಮಾಧ್ಯಮಾಂತ್ ಮಾತ್ರ್ ನ್ಹಂಯ್ , ಅಮ್ಚಾ ಹರ್ಯೆಕಾ ಇತರ್ ಕಾರ್ಯಾನಿ ಯೀಂ ಹಿ ಉಪಕರಣಾಂ ಗರ್ಜೆಚಿಂ ಜಾಂವ್ಕ್ ಪಾವ್ಲ್ಯಾಂತ್ . ಹಿಂ ಐಪೆಡಾಂ, ಟ್ಯಾಬ್ಲೆಟಾಂ , ಸ್ಮಾರ್ಟ್ ಫೊನಾಂ ಪುರಾ ಆಸಾತ್ ಪಳೆ ಕಿತೆಂ ಕಿತೆಂ ಕರುಂಕ್ ಸಕನಾಂತ್ ? ಫಕತ್ ಫೊನಾಂ ಜಾವ್ನ್ ಮಾತ್ರ್ ನ್ಹಂಯ್ , ತುಜ್ಯಾ ಇಂಟರ್ನೆಟ್ ಗರ್ಜಾಂಕ್ , ತುಜೆಂ ಮ್ಯೂಸಿಕ್ ಪ್ಲೇಯಾರ್ ಜಾವ್ನ್ ,ತುಜೆಂ ವಿಡಿಯೊ ಪ್ಲೇಯಾರ್ ಜಾವ್ನ್ ತುಜೆಂ ಕ್ಯಾಮೆರಾ ಜಾವ್ನ್ , ತುಜೊ  ರೆಡಿಯೊ ಜಾವ್ನ್ ,ತುಜಿ TV ಜಾವ್ನ್ , ತುಜೆಂ MODEM ಜಾವ್ನ್ , ತುಜೆಂ ಮೆಮೊರಿ ಡ್ರೈವ್ ಜಾವ್ನ್ , ತುಜೆಂ GPS ಯಂತ್ರ್ ಜಾವ್ನ್ ಸೊಡಾ ಆಜ್ ಕಾಲ್ ಪ್ರೊಜೆಕ್ಟರ್ ಜಾವ್ನ್ ಯೀಂ ಹ್ಯಾ ದಾಕ್ಟುಲ್ಯಾ ಮೆಶಿನಾಂಕ್ ವಾಪಾರ್ಯೇತಾ . ಹಿಂ ಸಕ್ಕಡಿ ಕಾಮ್ ಕರಿಜೆ ಜಾಲ್ಯಾರ್ ಹ್ಯಾ ಯಂತ್ರಾಂಕ್  ವೀಜ್ ಪ್ರವಾಹ್ ಜಾಯ್ . ಹೊ ವೀಜ್ ಪ್ರವಾಹ್ ಮೆಳ್ಚೊ ಬ್ಯಾಟರಿ ದ್ವಾರಿಂ.

ಆಯ್ಚಾ ಸಬಾರ್ ಸ್ಮಾರ್ಟ್ ಫೊನಾಂ , ಟ್ಯಾಬ್ಲೆಟಾಂತ್ ವಾಪಾರ್ಚಿ ಬ್ಯಾಟರಿ ಮ್ಹುಳ್ಯಾರ್ ಲೀಥಿಯಾಮ್ ಐಯಾನ್ ಪೊಲಿಮಾರ್ ಬ್ಯಾಟರಿ . ರಿಚಾರ್ಜ್ ಕರುಂಕ್ ಸಕ್ಚಾ ಹ್ಯಾ ಬ್ಯಾಟರೆಂತ್ , ಬ್ಯಾಟರೆಚೊ  ವಾಪಾರ್ವಿ ಕರ್ತಾನಾ, ಲಿಥಿಯಾಮ್ ಐಯಾನ್ಸ್ ಆಸಾತ್ ಪಳೆ ರುಣಾತ್ಮಕ್ ಇಲೆಕ್ಟ್ರೋಡ್ ಥಾವ್ನ್ ಧನಾತ್ಮಕ್ ಇಲೆಕ್ಟ್ರೋಡಾಕ್ ಪಾಶಾರ್ ಜಾತಾತ್. ಬ್ಯಾಟರಿ ಪರತ್ ಚಾರ್ಜ್ ಕರ್ತಾನಾ ಜಾಂವ್ಚಿ ಹ್ಯಾ ಪ್ರಕ್ರಿಯಾಚಿ ಉಲ್ಟಾ ಪ್ರತಿಕ್ರಿಯಾ. ವಿಪರ್ಯಾಸ್ ಮ್ಹುಳ್ಯಾರ್ ಹಿ ಬ್ಯಾಟರಿ ಟೆಕ್ನೊಲೊಜಿ ಆಸಾ ಪಳೆ ಸುಮಾರ್ ಪಂದ್ರಾ ವರ್ಸಾಂ ಆದ್ಲಿ. ತುಮ್ಕಾಂ ಕಳಿತ್ ಆಸೊಂಕ್ ಪುರೊ , ಮಹಿನ್ಯಾ ಮಹಿನ್ಯಾ ಕ್ ಹ್ಯಾ ಸ್ಮಾರ್ಟ್ ಫೊನಾಂ , ಟ್ಯಾಬ್ಲೆಟಾಂತ್ ತಾಂತ್ರಿಕ್ ಉನ್ನತಿ ಜಾವ್ನ್ಂಚ್ ಆಸ್ತಾ. ಚಡಿತ್ ಪ್ರೊಸೆಸಿಂಗ್ ಪವರ್ , ಉಂಚ್ಲೆಂ ಗ್ರಾಫಿಕ್ಸ್, ಚಡಿತ್ ರೆಸೊಲ್ಯೂಶನಾಚಿ ವ್ಹಡ್ ಸ್ಕ್ರೀನ್ , ಚಡಿತ್ ವೇಗಾಚಿ 3G/4G ಟೆಕ್ನೊಲೊಜಿ , ಊಂಚ್ ರೆಸೊಲ್ಯೂಶನಾಚೆ ಕೆಮಾರಾ ಅಶೆಂ ಮ್ಹುಣ್ ತಾಂತ್ರಿಕ್ ವಾಡವಳ್ ಜಾವ್ನ್ ಆಸ್ತಾನಾ , ಬ್ಯಾಟರಿ ಟೆಕ್ನೊಲೊಜಿ ಮಸ್ತ್ ಪಾಟಿಂ ಪಡ್ಲ್ಯಾ. ಭಿರಂತೆಚಿ ಗಜಾಲ್ ಮ್ಹುಳ್ಯಾರ್ ಮೊಬೈಲ್ ಕ್ಷ್ರೇತ್ರಾಂತ್ ಜಾಂವ್ಚಾ ಹ್ಯಾ ಹರ್ಯೇಕಾ ನವ್ಯಾ ತಾಂತ್ರಿಕ್ ಉನ್ನತೆಕ್ ಬ್ಯಾಟರಿ ಪಿಯೆಂವ್ಚಿ ತಾನ್ ..!! ಆಶೆಂ ಜಾಲ್ಲ್ಯಾನ್ ಆಮ್ಚಾ ನವ್ಯಾ ಸ್ಮಾರ್ಟ್ ಫೊನಾಂ , ಟ್ಯಾಬ್ಲೆಟಾಂತ್ ಆಸ್ಚಾ ಬ್ಯಾಟರಿಚೊ ಜಿವೀತ್ ಕಾಳ್ ಮಸ್ತ್ ಉಣೆಂ ...! 

ತುಮಿಂ ಖಂಯ್ ಪುಣೀ ಪ್ರಯಾಣ್ ಕರ್ನ್ ಆಸ್ ಲ್ಯಾರ್ , ತುಮ್ಚಾ ಸ್ಮಾರ್ಟ್ ಫೊನಾಂ ಯಾ ಟ್ಯಾಬ್ಲೆಟಾಂಚೊ ಭರನ್ ವಾಪಾರ್ಣಿ ಕೆಲ್ಯಾರ್ ಥೊಡ್ಯಾಚ್ ಗಂಟ್ಯಾನಿಂ ಬ್ಯಾಟರಿ ಚೊ ಚಾರ್ಜ್ ಪುರಾ ಖಾಲಿ. ಪಯ್ಣಾರ್ ಆಸ್ತಾನಾ ಪುಣೀ ತುಮ್ಚಾ ಮೊಬೈಲಾಚೊ ಪವರ್ ಖಾಲಿ ಜಾಲ್ಯಾರ್ ತುಮಿ ಪವರ್ ಲೆಸ್ ಜಾಲ್ಲ್ಯಾ ಬರಿ. ಮಾಗಿರ್ ತುಮಿಂ ತುಮ್ಚೆಂ ಮೆಶಿನ್ ಚಾರ್ಜ್ ಕರುಂಕ್ ಖಂಯ್ ಪುಣೀ ಅವ್ಕಾಸ್ ಮೆಳ್ತಾಗಿ ಮ್ಹುಣ್ ತಪಾಸ್ಣಿ ಕರಿಜೆ ಪಡ್ತಾ. ಹಿ ಏಕ್ ವಿರಾರಾಯೆಚಿ ಪಿಡಾ. ತುಮಿಂ ಖಂಯ್ ಪುಣಿ ಕಾರಾರ್ ಆಸ್ಲ್ಯಾರ್ ಭಿಯೆಂವ್ಚಿ ಗರ್ಜ್ ನಾ, ಪುಣ್ ಬಸ್ಸಾರ್ ದೀರ್ಘ್ ಪ್ರಯಾಣ್ ಪುಣಿ ಕೆಲ್ಯಾರ್ ವಡ್ಲಿ ಸಮಸ್ಯಾ. ತುಮ್ಚೆಂ ಫೋನ್ ಚಾರ್ಜ್ ಕರುಂಕ್ ಖಂಯ್ ದಾಂವ್ಚೆಂ ? ಹ್ಯಾ ಸಮಸ್ಯಾಕ್ ಏಕ್ ಪರಿಹಾರ್ ಮ್ಹುಳ್ಯಾರ್ ಪವರ್ ಬ್ಯಾಂಕ್ ...!!

ತುಮಿಂ ಪವರ್ ಬ್ಯಾಂಕಾಂ ವಿಶಿಂ ಖಂಯ್ ಪುಣೀ ಆಯ್ಕಾಲಾಂ ಗೀ ? . ಹೆಂ ಪವರ್ ಬ್ಯಾಂಕ್ ಆಸಾ ಪಳೆ ಏಕಾ ನಮೂನೆಚಿ ಬ್ಯಾಕಪ್ ಬ್ಯಾಟರಿ. ತುಮಿಂ ತುಮ್ಚಿಂ ಸ್ಮಾರ್ಟ್ ಫೊನಾಂ , ಟ್ಯಾಬ್ಲೆಟಾಂ ಮಾತ್ರ್ ನ್ಹಂಯ್ ಮೈಕ್ರೊ USB ಕ್ ದಿಗೊ ದಿವ್ಚಿಂ ಕ್ಯಾಮೆರಾ, ಐಪೊಡ್ ತಸಲ್ಯಾ ಮೆಶಿನಾಂಕ್ ಸಗ್ಳ್ಯಾನಿತ್ಲ್ಯಾನ್ ಜಾಯ್ ಜಾಲ್ಲ್ಯಾ ವೇಳಾರ್ ಚಾರ್ಜ್ ಕರುಂಕ್ ಜಾತಾ. ಮಸ್ತ್ ಪಾವ್ಟಿಂ ಪಯ್ಣ್ ಕರುಂಕ್  ಆಸ್ಲ್ಯಾಂಕ್ ಪವರ್ ಬ್ಯಾಂಕ್ ಏಕ್ ಮಸ್ತ್ ಉಪ್ಯೋಗಾಕ್ ಪಡ್ಚೆಂ ಯಂತ್ರ್ . ಆಜ್ ಮಾರ್ಕೆಟೆಂತ್  , ಸಬಾರ್ ವಿನ್ಯಾಸಾಚಿಂ , ಸಬಾರ್ ಕ್ಯಾಪೆಸಿಟಿಚಿಂ , ಉಣ್ಯಾ ಮೊಲಾಚಿಂ , ಚಡ್ ಮೊಲಾಚಿಂ ಮ್ಹುಣ್ ಡಜನ್ ನಮೂನೆಚಿಂ ಪವರ್ ಬ್ಯಾಂಕಾಂ ಮೆಳ್ತಾತ್. ಸುಮಾರ್ ಪಾಂಯ್ಶಿ ರೂಪ್ಯಾಂ ಥಾವ್ನ್ ಪಾಂಚ್ ಹಜಾರ್ ರೂಪ್ಯಾಂ ಮ್ಹುಣಾಸರ್ ಆಸ್ಚಿಂ ಪವರ್ ಬ್ಯಾಂಕಾ ಮಾರ್ಕೆಟಿಂತ್ ಆಸಾತ್.  ವಿವಿಧ್ ಕ್ಯಾಪೆಸಿಟಿ ಪರ್ಮಾಣೆ ಚಾರ್ಜ್ ದಾಸ್ತಾನ್ ಕರುಂಕ್ ಸಮರ್ಥ್ ಆಸ್ಚಿಂ, 1600mAh, 1800mAh, 2600mAh, 3000mAh, 5200mAh, 5600mAh, 5800mAh, 6000mAh,  8000mAh, 9000mAh ಸಮರ್ಥೆಚಿಂ ಪವರ್ ಬ್ಯಾಂಕಾಂ ಆಜ್ ಮಾರ್ಕೆಟೆತ್ ಉಪಲಬ್ದ್ ಆಸಾ. ಹಾಚೆಂ ಮೋಲ್ ಚಾರ್ಜ್ ದಾಸ್ತಾನ್ ಕರ್ಚೆ ಸಮರ್ಥೆಂತ್ ಮಾತ್ರ್ ನ್ಹಂಯ್ ಆಕರ್ಷಕ್ ವಿನ್ಯಾಸ್, ಆನಿಂ ಇತರ್ features ಚೆರ್ ಹೊಂದೊನ್ ಆಸಾ. ಹಾಂತುಂ ಆಮಿಂ ಫಕತ್ ವೀಜ್ ಸಕ್ತೆ ಥಾವ್ನ್ ಮಾತ್ರ್ ಚಾರ್ಜ್ ಭರುಂಕ್ ಸಾಧ್ಯ್ ಜಾಂವ್ಚೆಂ ತಸಲಿಂ ನ್ಹಂಯ್ ಅತಾಂ ಸೊಲಾರ್ ಸಕತ್ ವಾಪಾರ್ನ್ ಚಾರ್ಜ್ ಉತ್ಪನ್ನ್ ಕರ್ಚಿಂ ಪವರ್ ಬ್ಯಾಂಕಾಂ ಯೀಂ ಆಯ್ಲಾಂತ್...!!

ತುಮಿಂ ಖಂಯ್ ಪುಣಿ ಪವರ್ ಬ್ಯಾಂಕ್ ಘೆಂವ್ಕ್ ಚಿಂತ್ಲಾಂ ಗೀ ? ತರ್ ಥೊಡೆ ಗರ್ಜೆಚಿ ಹಿಶಾರೆ ಮತಿಂತ್ ದವರಿಜೆ ಪಡ್ತಾ. ಉಣ್ಯಾ ಮೊಲಾಚೆಂ ಪವರ್ ಬ್ಯಾಂಕ್ ಘೆಂವ್ಕ್ ಗೆಲ್ಯಾರ್ , ತಾಂತುಂ ಥೊಡೆ ಪಾವ್ಟಿಂ ಉಣ್ಯಾ ದರ್ಜೆಚಿ ಬ್ಯಾಟರಿ ಆಸ್ತಾ. ಇಲ್ಲೆಶೆಂ ಮ್ಹೋಲ್ ಚಡ್ ಆಸ್ಲ್ಯಾರ್ ಯೀ ವಾರಾಂಟಿ ಆಸ್ ಲ್ಲೆಂ ಪವರ್ ಬ್ಯಾಂಕ್ ಘೆತ್ಲ್ಯಾರ್ ಬರೆಂ . ಸಬಾರ್ ಪವರ್ ಬ್ಯಾಂಕಾನಿಂ , ಸಬಾರ್ ನಮೂನೆಚೆ ಕನೆಕ್ಟರ್ ಯೆತಾತ್. ಥೊಡೆ ಪಾವ್ಟಿಂ ಹೆ ಕೀಳ್ ದರ್ಜೆಚೆ ಜಾವ್ನ್ ಆಸ್ತಾತ್. ಹ್ಯಾ ವರ್ವಿಂ ಶೊರ್ಟ್ ಸರ್ಕ್ಯೂಟ್ ಜಾವ್ನ್ ತುಮ್ಚೆಂ ಮೊಬೈಲ್ ಯಂತ್ರ್ ಉಲ್ಪಾಂವ್ಚೆಂ ಸಂಧರ್ಭ್ ಯೇಂವ್ಕ್ ಯೀ ಪುರೊ . 

ಗೆಲೆತ್ಯಾ ಮಹಿನ್ಯಾಂತ್ ಹಾವೆಂ Microware ಕಂಪ್ಣೆಚೆಂ Oyama Solar Tablet Charger ಮ್ಹುಳ್ಳೆಂ ಪವರ್ ಬ್ಯಾಂಕ್ ಘೆತ್ ಲ್ಲೆಂ. ಹಾಚಿ ವಿಶೇಷಾತ ಪಳೆಯಾ . ಸಬಾರ್ ನಮೂನೆಚೆಂ ಇಲೆಕ್ಟ್ರಿಕ್ ಗೆಜೆಟಾಂಕ್ ಹಾಂತುಂ USB ದ್ವಾರಿಂ ಚಾರ್ಜ್ ಕರ್ಯೇತಾ. ಹಾಕಾ ಚಾರ್ಜ್ ಭರುಂಕ್ , ಫಕತ್ ಕರೆಂಟಾಚಿ ಗರ್ಜ್ ನಾ. ಹಾಂತ್ಲೆಂ ಸೊಲಾರ್ ಪ್ಯಾನೆಲ್ ವೊತಾಕ್ ಚ್ ಚಾರ್ಜ್ ಉತ್ಪನ್ನ್ ಕರ್ತಾ ...!! ಕರೆಂಟ್ ನಾತ್ ಲ್ಲ್ಯಾ ಕರ್ನಾಟಕ ಮಟ್ಟಾಕ್ ಹೆಂ ಏಕ್ ಬರೆಂ ಯಂತ್ರ್...!!!
  *************************