Muliculture

ಆಜ್ ಕಾಳ್ ಫಕತ್ ಅಮ್ಚಾ ಇಂಡಿಯಾಂತ್ ಮಾತ್ರ್ ನ್ಹಂಯ್ ಹ್ಯಾ ಸಂಸಾರಾಂತ್ ಭರನ್ ಚರ್ಚೆರ್ ಆಸ್ಚೊ ಸಬ್ದ್ ಮ್ಹುಳ್ಯಾರ್ Multiculturalism. ಇತ್ಲ್ಯಾಕೀ ಹ್ಯಾ ಸಬ್ದಾಕ್ ಮಸ್ತ್ ವ್ಯಾಖ್ಯಾನಾಂ ಆಸಾತ್. ಆಮಿಂ ಹಾಕಾ ಬಹುಸಾಂಸ್ಕೃತಿಕತಾ ಮ್ಹುಣ್ತಾಂವ್. ಬಹುಸಾಂಸ್ಕೃತಿಕತಾ ಏಕ್ ಬಹುಮುಖಿತ್ವ್ ಸಮಾಜೆಚೆಂ ಏಕ್ ರೂಪ್. ಬಹುಸಾಂಸ್ಕೃತಿಕತೆಚಾ ಸಮಾಜೆಂತ್ ವಿಭಿನ್ನ್ ಧರ್ಮಾಚೆ, ಕಾತಿಚೆ, ಭಾಶೆಚೆ , ಸಂಸ್ಕ್ರತಿಚೆ ಲೋಕ್ ಸಹ‌ಅಸ್ಥಿತ್ವಾಂತ್ ರಾವ್ತಾತ್ ಆನಿಂ ಶಾಸನ್ ಚಲಂವ್ಚೆ ತಾಂಚೆ ವಯ್ರ್ ಕಸ್ಲೊ ಯೀ ನಿರ್ಬಂಧ್ ಗಾಲಿನಾಂತ್. ಹೊ Multiculturalism ಮ್ಹುಳ್ಳೊ ಸಬ್ದ್ ಚಡಾವತ್ ಜಾವ್ನ್ ಆಟ್ರಾವ್ಯಾ ತಶೆಂ ಎಕ್ನೀಸಾವೆ ಶೆಕ್ಡಾಂತ್  "ಏಕ್ ರಾಷ್ಟ್ರ್" ಮ್ಹುಳ್ಯಾ ಅಸ್ಮಿತಾಯೆಂತ್ ಆಸ್ ಲ್ಯಾ ಸಬಾರ್ ಅಸ್ತಮೆಚಾ ದೇಶಾಂಕ್ ಲಾಗು ಕರ್ನ್ ವಾಪಾರ್ಚೊ ಆಸ್ ಲ್ಲೊ. ಬಹುಸಾಂಸ್ಕೃತಿಕತಾ ಮ್ಹುಳ್ಳೊ ಪದ್ ಮಾತ್ರ್ ನ್ಹಂಯ್ ತಾಚೆಂ ಕಲ್ಪನ್ ಪಾಸ್ಚಾತ್ಯ್ ದೇಶಾಂ ಥಂಯ್ ಆರಂಭ್ ಜಾಲ್ಲೆಂ ಕೆನಾಡಾ ಥಾವ್ನ್. ಥಂಯ್ 1971 ಇಸ್ವೆಂತ್ Multiculturalism ಪದ್ದತಿ ಯೆಂವ್ಚಾ ಪಯ್ಲೆಂ ಫಕತ್ Biculturalism ಧೋರಣ್ ಆಸ್ ಲ್ಲೆಂ. ಕೆನಾಡಾ ಥಾವ್ನ್ ಆರಂಭ್ ಜಾಲ್ಲಿ ಬಹುಸಾಂಸ್ಕೃತಿಕತೆಚೆಂ ಧೋರಣ್ ಉಪ್ರಾಂತ್ ಆಸ್ಟ್ರೇಲಿಯಾಕ್ ಪಾವ್ ಲ್ಲೆಂ. ಉಪ್ರಾಂತ್ ಯೆರೊಪಾಚೆ ಚಡಾವಾತ್ ದೇಶ್ ಮಾತ್ರ್ ನ್ಹಂಯ್ ಸಂಸಾರಾಚೆ ಸಭಾರ್ ದೇಶಾನಿಂ ಹೆಂ ಧೋರಣ್ ಖಾಯಂ ಜಾಲೆಂ. ಆಜ್ ತುಮ್ಕಾಂ ಯೆರೊಪ್ , ಅಮೇರಿಕಾ , ಆಸ್ಟ್ರೇಲಿಯಾ ಮಾತ್ರ್ ನ್ಹಂಯ್ ಸಂಸಾರಾಚೊ ವಡ್ಲೊ ಮುಸಲ್ಮಾನ್ ದೇಶ್ ಇಂಡೊನೇಶಿಯಾ , ಮಲೇಶಿಯಾ ತಶೆಂ ಥೊಡ್ಯಾ ಮಧ್ಯ್ -ಪ್ರಾಚ್ಯ್ ದೇಶಾಂತ್ ಯೀ Multiculturalism ಪಳೆಂವ್ಕ್ ಮೆಳ್ತಾ....!

                                                                                          ****************

ಪುಣ್ ಅಸ್ತಮೆಚಾ ದೇಶಾನಿಂ ಹೆಂ Multiculturalism ಅತಾಂ ಆರಂಭ್ ಜಾಲ್ಯಾ ರ್ ಯೀ , ಆಮ್ಚಾ ಇಂಡಿಯಾಂತ್ ಹಜಾರೊಂ ವರ್ಸಾಂ ಪಯ್ಲೆಂ ಹೆಂ ಆಸ್ ಲ್ಲೆಂ. ಹಜಾರೊಂ ಭಾಸೊ , ಹಜಾರೊಂ ಜಾತಿ ಕುಳಿಯೊ , ಪಂಗ್ಡಾಂ, ಲಾಕಾನಿಂ ದೇವ್ ಆಸ್ ಲ್ಯಾರಿ ಹ್ಯಾ ದೇಶಾಂತ್ ಆಸ್ ಲ್ಯಾ ಬಹುಸಾಂಸ್ಕೃತಿಕತಾ ಮಧೆಂ  ಎಕ್ವಟ್ ಆಸ್ ಲ್ಲೊ. ಬಿಟಿಷಾನಿಂ ಹಾಂಗಾ ಸುಮಾರ್ ತಿನ್ಶಿ ವರ್ಸಾಂ ರಾಜ್ಯ್ ಕೆಲ್ಲೆಂ. ಬ್ರಿಟಿಷಾಂಚಾ ಕೀ ಪಯ್ಲೆಂ ಯೀ ಹಾಂಗಾ ಸಭಾರ್ ಪರ್ದೇಶಿ ಕುಳಿಯೆನಿಂ ರಾಜ್ಯ್ ಚಲಯ್ಲಾಂ. ತೆ ಪರ್ಷಿಯನ್ ಜಾಂವ್ಕ್ ಪುರೊ , ಮುಂಗೋಲ್ ಜಾಂವ್ಕ್ ಪುರೊ , ಅಪ್ಘನ್ ಜಾಂವ್ಕ್ ಪುರೊ ಯಾ ಅಲೆಕ್ಸಾಂಡಾರ್ ಯಾ ಇತರ್ ಕುಳಿಯೊ ಯೀ ಜಾಂವ್ಕ್ ಪುರೊ. ಹಾಂಗಾಚೊ ಲೋಕ್ ವಿವಿಂಗಡ್ ಭಾವರ್ಥಾಂ ವಿಶಿಂ ಚಡಾವತ್ ಸೊಸ್ಣಿಕ್ ಜಾವ್ನ್ ಆಸ್ ಲ್ಲೊ. ತಶೆಂ ಜಾಲ್ಯಾನ್ ಹಾಂಗಾ ಕ್ರಿಸ್ತಾಂವ್ ಸಾಂ ಥೋಮಾಸಾಚಾ ಕಾಳಾರ್ ಚ್ ಆಸ್ಲೆ. ಜುದೆವ್ , ಪಾರ್ಸಿ ಯೀ ಹಾಂಗಾ ಯೇವ್ನ್ ಸಾಂಗಾತಾ ಜಿಯೆತಲೆ. ಮುಸ್ಲಿಂ ಅಕ್ರಮಣ್ ಹಾಂಗಾ ಜಾವ್ನ್ ಆಸ್ತಾನಾ ,ಹೆಂ ಆಮ್ಚೆಂ ಭಾರತ್ ಏಕ್ ದೇಶ್ ಜಾವ್ನ್ ನಾತ್ ಲ್ಲೆಂ. ಹಾಂಗಾ ವಿವಿಧ್ ದಾಕ್ಟೆ, ವ್ಹಡ್ಲೆ ರಾಯ್ ಪುರಾ ರಾಜ್ವಟ್ಕಿ ಚಲವ್ನ್ ಆಸ್ ಲ್ಲೆ. ಹಿಂದೂ ಮ್ಹುಳ್ಳೆಂ ಧರ್ಮ್ ಂ ಚ್ ನಾತ್ ಲ್ಲೆಂ. ಸನಾತನ್ ಆನಿ ವಿವಿಧ್ ಪ್ರಕಾರ್ ವಿವಿಧ್ ಥರಾನಿಂ , ವಿವಿಧ್ ದೆವಾಂಕ್ , ಮೂರ್ತಿಂಕ್ , ಫತ್ರಾಂಕ್ , ಮನ್ಜಾತಿಂಕ್ ಆರಾಧನ್ ಕರ್ನ್ ಆಸ್ ಲ್ಲೆ ವಿವಿಧ್ ಪಂಗಡ್ ಆಸ್ ಲ್ಲೆ. ಹಿಂದೂ ಮ್ಹುಳ್ಳೊ ಸಬ್ದ್  ಸಂಸ್ಕ್ರತ್ ಸೊಡ್ಯಾಂ ಹ್ಯಾ ಆಮ್ಚಾ ದೇಶಾಚಾ ಇತ್ಲ್ಯಾ ಭಾಶೆಂತ್ ಯೀ ನಾ , ವೇದಂತ್ ಯೀ ನಾ ಯಾ ಹಾಂಗಾಚಾ ಕಂಚಾ ಯೀ ಗ್ರಂಥಂತ್ ಸಯ್ತ್ ನಾತ್ ಲ್ಲೊ. ಹಿಂದೂ ಮ್ಹುಳ್ಳೊ ಸಬ್ದ್ ದಿಲ್ಲೊಚ್ ಪರ್ಷಿಯಗಾರಾನಿಂ. ತಾಂಕಾಂ ಅತಾಂಚಾ ಇಂಡಿಯಾ ಆನಿಂ ಪಾಕಿಸ್ತಾನಾಂತ್ ವ್ಹಾಳೊನ್ ಆಸ್ಚಿ ಸಿಂಧೂ ನಂಯ್ಕ್ ವಾಪಾರ್ಚೊ ಸಬ್ದ್ ಉದ್ಗಾರ್ ಕರುಂಕ್ ಜಾಯ್ನಾಸ್ತಾನಾ , ತಾಣಿಂ ಹಿಂದೂ ಮ್ಹುಣ್ ಆಪಾಯ್ತಾಲೆ. ಆಶೆಂ ಪುಡೆಂ ಹಾಂಗಾ ಆಸ್ ಲ್ಯಾ ವಿವಿಧ್ ಕುಳ್ಯೆಚಾ ಲೊಕಾಕ್ ಒಟ್ಟಾರೆ ಜಾವ್ನ್ ಹಿಂದೂ ಆನಿಂ ಹ್ಯಾ ಸಗ್ಳ್ಯಾ ಪ್ರದೇಶಾಕ್ ಹಿಂದೂಸ್ತಾನ್ ಮ್ಹುಣ್ ನ್ಹಾಂವ್ ದಿಲ್ಲೆಂಚ್ ಹಾಂಗಾ ಆಕ್ರಮಣ್ ಕರುಂಕ್ ಆಯ್ಲ್ಯಾ ಮುಸುಲ್ಮಾನಾನಿಂ..! ಬಹುಮುಖಿತ್ವ್  ಸಾಮಜ್ ಹಾಂಗಾ ಆಸ್ ಲ್ಯಾ ನಿಮ್ತಿ ಹ್ಯಾ ದೇಶಾಂತ್ ದಾಕ್ಲ್ಯಾಕ್ ಪಳಂವ್ಚೆ ಜಾಲ್ಯಾರ್ ಏಕಾ ಕಾಳಾರ್  ಜುನಾಗರ್ ತಸ್ಲೆಂ ಹಿಂದ್ವಾಚೆಂ ಬಹುಸಂಖ್ಯಾತ್ ಸಾಮ್ರಜ್ಯ್ ಮುಸುಲ್ಮಾನಾನಿಂ ಅಧಿಪತ್ಯ್ ಚಲಯ್ಲೆಂ , ತಶೆಂಚ್ ಮುಸ್ಲಿಂ ಚ್ ಬಹುಸಂಖ್ಯಾತ್ ಆಸ್ ಲ್ಲೆಂ ಕಾಶ್ಮೀರಾಚೆಂ ಕಾರ್ಭಾರ್ಪಣ್ ಹಿಂದ್ವಾಚಾ ರಾಯಾನ್ ಚಲಯ್ಲೆ ದಾಕ್ಲೆ ಆಸಾತ್.

ಅಸಲ್ಯಾ ಬಹುಸಾಂಸ್ಕೃತಿಕತೆಚಾ ಸಮಾಜೆಂತ್ ಧರ್ಮಾಂ -ಧರ್ಮಾಂ ಮಧೆಂ ದಂಗ್ವಾಳ್ ಜಾಂವ್ಕ್ ಚಡಾವತ್ ಆರಂಭ್ ಜಾಲ್ಲೊ ಬ್ರಿಟಿಷಾಂಚಾ ಕಾಳಾರ್. ಚಡ್‌ಶೆಂ ಬ್ರಿಟಿಷಾನಿಂ ಹ್ಯಾ ದೇಶಾಂಚಾ ಹಿಂದ್ವಾಂ ಆನಿಂ ಮುಸುಲ್ಮಾನಾಂ ಮಧೆಂ ಝಗ್ಡೆಂ ಹಾಡ್ನ್ ವಾಂಟೆ ಕೆಲ್ಯಾರ್ ರಾಜ್ವಾಟ್ಕಿ ಚಲಂವ್ಕ್ ಸುಲಭ್ ಜಾತಾ ಮ್ಹುಣ್ ಚಿಂತ್ ಲ್ಲೆಂ ಕೊಣ್ಣಾ..! 1809 ಥಾವ್ನ್ 1811 ಮ್ಹುಣಾಸಾರ್ ಹಿಂದ್ವಾ ಆನಿಂ ಮುಸ್ಲಿಂ ಮಧೆಂ ಜಾಲ್ಲಿ ಲಾಟ್- ಬೈರೊ ಧೊಂಭಿ, 1931 ಂತ್ಲೊ ಹಿಂದೂ-ಮುಸ್ಲಿಂ ಬನರಾಸ್ , ಕಾನ್ಪುರ್ ಗಲಾಟೊ, 1946 ಕೊಲ್ಕತಾಂತ್ಲಿ ಹಿಂದೂ-ಮುಸ್ಲಿಂ ಧೊಂಭಿ , 1947 ಇಸ್ವೆಂತ್ ಇಂಡಿಯಾ ವಿಭಜನ್ ಜಾತಾನಾ ಹಿಂದೂ-ಸಿಕ್ಕ್-ಮುಸ್ಲಿಂ ಮಧೆಂ ಜಾಲ್ಲೊ ಗಲಾಟೊ ಅತಾಂ ಯೀಂ ಇತಿಹಾಸಾಂತ್ ಆಸಾ. 1947 ಇಸ್ವೆಂತ್ ಹೊ ದೇಶ್ ವಿಭಜನ್ ಜಾತಾನಾ ಹ್ಯಾ ದೇಶಾಂತ್ ಹಿಂದೂ ಆನಿಂ ಮುಸ್ಲಿಂ ಮಧೆಂ ಆಸ್ಚೊ ಅಂತರ್ ಆನಿಂ ಹಗ್ಗೆಂ ಚಡ್ ಲ್ಲೆಂ.. ತ್ಯಾ ವೆಳಾರ್ ಇಂಡಿಯಾಚಾ ಮುಡ್ಲಾ ಆನಿಂ ಪಡ್ಲಾಂತ್ ಏಕ್ಯೇಕ್ ಪಾಕಿಸ್ತಾನ್ ಆಸ್ ಲ್ಲೆಂ. ಹಿಂದೂ ಬಹುಸಂಖ್ಯಾತ್ ಆಸ್ ಲ್ಲ್ಯಾ ಇಂಡಿಯಾಚೆಂ ಸುಂಕಾಣ್ ಮಹಾತ್ಮಾ ಗಾಂಧಿನ್ ಪಟೇಲಾ ಬದ್ಲಾ ನೆಹರೂಕ್ ಒಪ್ಸುನ್ ದಿಲ್ಲ್ಯಾಚೆಂ ವಡ್ಲೆಂ ಪ್ರೇಜನ್ ಮ್ಹುಳ್ಯಾರ್ ಅಮ್ಚೊ ದೇಶ್ ಸೆಕುಲಾರ್ ಜಾವ್ನ್ ಉರ್ಲೊ. ಹಾಕಾ ಕಾರಾಣ್ ನೆಹರೂಕ್ ಆಸ್ ಲ್ಲೆಂ ಬಹುಮುಖಿತ್ವ್ ಸಮಾಜೆಚೆಂ ಕಲ್ಪನ್. ಆಶೆಂ ನೆಹರೂನ್ ದವರ್ಲ್ಯಾ ಬಲಿಷ್ಟ್ ಸೆಕುಲಾರ್ ಚಿಂತ್ಪಾನ್ ಉದೆಲ್ಲೆಂ ಹ್ಯಾ ದೇಶಾಚೆಂ ಸಂವಿಂಧಾನ್ , ಆನಿಂ ಇತರ್ ಬಹುಸಾಂಸ್ಕೃತಿಕತೆಚಾ ಧೋರಣಾಂ ವರ್ವಿಂ ಆಜ್ ಆಮ್ಚೊ ದೇಶ್ ಆನ್ಯೇಕ್ ಪಾಕಿಸ್ತಾನ್ ಜಾಯ್ನಾಸ್ತಾನಾ ಉರ್ಲೊ..!

                                                                                       **********************

ಅಶೆಂ ಶೆಕ್ದಾಂ ಥಾವ್ನ್ ಬಹುಸಾಂಸ್ಕೃತಿಕ್ ಜಾವ್ನ್ ಆಸ್ ಲ್ಯಾ ಹ್ಯಾ ದೇಶಾಚಾ ಬಹುಮುಖಿತ್ವ್ ಸಮಾಜಾಚಾ ಆಸ್ತಿತ್ವಕ್ ಹಿಂದೂ ರಾಷ್ಟ್ರೀಯವಾದ್ ಮ್ಹುಣ್ ಗೆಲೆತ್ಯಾ ಥೊಡ್ಯಾ ದಾಕ್ಡ್ಯಾಂ ಥಾವ್ನ್ ವ್ಹಡ್ ಮಾಫಾನ್ ಕುರಾಡ್ ಮಾರ್ನ್ ಆಸ್ಚೆಂ ಸಂಘಟನ್ ಮ್ಹುಳ್ಯಾರ್ ರಾಷ್ತೀಯ್ ಸ್ವಯಂ  ಸೇವಕ್ ಸಂಘ್. 1992 ಇಸ್ವೆಂತ್ ಹಾಣಿಂ ಬಾಬ್ರಿ ಪಳ್ಳಿ ಪರ್ತಿಲ್ಯಾ ಉಪ್ರಾಂತ್ ಇಂಡಿಯಾಂತ್ ಹಿಂದೂ ಆನಿಂ ಮುಸ್ಲಿಂ ಮಧೆಂ ವಿಶ್ವಾಸ್ ಚ್ ನಪಂಯ್ಚ್ ಜಾಲಾ. ಹಾಚಾ ಉಪ್ರಾಂತ್ ದೇಶಾಂತ್ ಸಭಾರ್ ಸಂಪ್ರದಾಯಿಕ್ ಝಗ್ಡೆಂ ಚಲೊನ್ ಆಸಾ. 2002 ಇಸ್ವೆಂತ್ ಜಾಲ್ಲೆಂ ಗೋದ್ರಾ ಗಲಾಟೊ, 2008 ಇಸ್ವೆಂತ್ ಓಡಿಶಾಚಾ ಕಂದಮಾಲ್ ತಶೆಂ ಕರ್ನಾಟಕಾಚಾ ಕಿರಿಸ್ತಾಂವಾ ವಯ್ರ್ ಕೆಲ್ಲೊ ಹಲ್ಲೊ , 2013 ಚಿ ಮುಜಫರಬಾದ್ ಧೊಂಬಿ ನಿಮ್ತಿಂ ಹ್ಯಾ ದೇಶಾಚಾ ಜಾತ್ಯಾತೀತ್ ಮೋಲಾಂಕ್ ಚ್ ಸವಾಲ್ ಕರ್ಚಾ ಬರಿ ಜಾಲಾಂ. 2013 ಇಸ್ವೆಂತ್ ಗೊಯಾಂತ್ ಜಾಲ್ಲ್ಯಾ  All India Hindu Convention (AIHC) ಂತ್ ತೆನ್ನಾಚಾ ಗುಜರಾತ್ ಮುಖೆಲ್ ಮಂತ್ರಿ ನರೇಂದ್ರ ಮೋದಿಕ್ ಸಮ್ಮಾನ್ ದವರ್ಲೊ. ತಾಂತುಂ ಮಾಲೆಗಾಂವ್ ತಶೆಂ ಇತರ್ ಕಡೆ ಬಾಂಬ್ ಪುಟಾವ್ನ್ ಸಬಾರ್ ಜೀವ್ ಕಾಡ್ ಲ್ಯಾ , ಪನ್ಸಾರೆ ,ದಭೋಲ್ಕಾರ್ ತಸಲ್ಯಾ ಸೆಕ್ಯುಲಾರ್ ಚಿಂತಕಾಂಚಿ ಹತ್ಯಾ ಕೆಲ್ಲ್ಯೆಂ ಸನಾತನ್ ಸಂಸ್ಥಾ ತಸಲೆಂ ಉಗ್ರವಾದಿ ಸಂಘಟಣಾ ನ್ ಯೀ ಥಂಯ್ ಭಾಗ್ ಗೆತ್ ಲ್ಲೆಂ. ಮೋದಿಚೆಂ ಭಾಷಣ್ ಥಂಯ್ ವಾಚುನ್ ಸಾಂಗ್ ಲ್ಲೆಂ. ತ್ಯಾ ಸಮ್ಮೇಳಾನ್ಚೊ ಉದ್ದೇಶ್ ಶೀಘ್ರ್ ಇಂಡಿಯಾಕ್ ಹಿಂದೂ ರಾಷ್ಟ್ರ್ ಕರ್ಚೆಂ ಮ್ಹುಣ್. ಥೊಡ್ಯಾಚ್ ದಿಸಾಂ ಆದಿಂ ಹ್ಯಾಚ್ ಜುನಾಂತ್ ತಸ್ಲೆಂ ಆನ್ಯೇಕ್ ಸಮಾವೇಶ್ ತ್ಯಾಚ್ ಗೊಯಾಂತ್ ಚಲ್ಲೆಂ. ಹಾಂತುಂ ದೇಶಾಚೆ ಸುಮಾರ್ 150 ಹಿಂದೂ ಸಂಘಟಣಾಂ ನಿಂ ಭಾಗ್ ಗೆತ್ಲೊ. ಹಾಂತುಂ ಘೆತ್ಲೊ ಪ್ರಮುಖ್ ನಿರ್ಧಾರ್ ಮ್ಹುಳ್ಯಾರ್ 2023 ಭಿತರ್ ಇಂಡಿಯಾಕ್ ಸಂಪೂರ್ಣ್ ಹಿಂದೂ ರಾಷ್ತ್ರ್ ಕರ್ಚೆಂ ಮ್ಹುಣ್. ಕಿತ್ಯಾಕ್ ಮ್ಹುಳ್ಯಾರ್ ತಾಣಿಂ 2013 ಇಸ್ವೆಂತ್ ಸಮ್ಮಾನಿತ್ ಕೆಲ್ಲೊ ಗುಜರಾತ್ ಮುಖೆಲ್ ಮಂತ್ರಿ ಅತಾಂ ಹ್ಯಾ ದೇಶಾಚೊ ಪ್ರಧಾನ್ ಮಂತ್ರಿ ..!!

ಆಜ್ ಆಮಿಂ ಸುಟ್ಕೆಚಾ ಸತ್ತರಾವ್ಯಾ ವರ್ಸಾಂತ್ ಆಸಾಂವ್. ಬಹುಸಾಂಸ್ಕೃತಿಕ್ ಆನಿಂ ಸೆಕುಲ್ಯಾರ್ ಜಾವ್ನ್ ಆಸ್ ಲ್ಯಾ ಆಮ್ಚಾ ದೇಶಾಚಿ ಅವಸ್ಥಾ ಪಾಟ್ಲ್ಯಾ ತೀನ್ ವರ್ಸಾಂ ಥಾವ್ನ್ ಪಳೆಯಾ. ಹಾಂಗಾಚೊ ಸರ್ಕಾರ್ ಮುಣ್ತಾ  ಆಮಿಂ ರಾಷ್ತ್ರೀಯಾವಾದಿ ಮ್ಹುಣ್ ಆನಿಂ ಹಾಂಗಾಚೊ ಪ್ರಧಾನಿ ಅಪುಣ್ ಹಿಂದೂ ನ್ಯಾಶಿನಲಿಷ್ಟ್ ಮುಣ್ತಾ. ಹಾಂಚೊ ಧ್ಯೇಯ್ ಎಕ್ ಚ್"2023 ಭಿತರ್ ಇಂಡಿಯಾಕ್ ಸಂಪೂರ್ಣ್ ಹಿಂದೂ ರಾಷ್ತ್ರ್ ಕರ್ಚೆಂ ".! ಆನಿಂ ಶೆಕ್ಡಾಂ ಥಾವ್ನ್ ಹಾಂಗಾ ಆಸ್ಚೆಂ Multiculturalism ನಾಸ್ ಕರ್ಚೆಂ. ಹೆಂ ಸರ್ವ್ ನಿಧಾನ್ ಆನಿಂ ಮಸ್ತ್ ಸುವ್ಯವಸ್ಥಿತ್ ಜಾವ್ನ್ ಚಲ್ನ್ ಆಸಾ. ಹಿಂದೂ ರಾಷ್ತ್ರೀಯವಾದ್ ಮ್ಹುಣ್ ಆಜ್ ಸಗ್ಳ್ಯಾ ದೇಶಾಂತ್ ಗಾಯ್ಚಾ ನಾವಾಂತ್ ಅಲ್ಪಸಂಖ್ಯಾತ್ ತಶೆಂ ದಲಿತಾಂ ವಯ್ರ್ ಹಲ್ಲೊ ಜಾವ್ನ್ ಆಸಾ. ಶೆಕ್ದಾಂ ವರ್ಸಾಂ ಥಾವ್ನ್ ಹ್ಯಾ ಬಹುಸಾಂಸ್ಕೃತಿಕ್ ದೇಶಾಂತ್ ಸಬಾರಾನಿಂ ಕಾಂವ್ಚಾ ಕಾಣಾಂಕ್ ಯೀ ರಾಷ್ರೀಯವಾದ್ ಮ್ಹುಣ್ ನಿರ್ಬಂಧ್ ಗಾಲ್ನ್ ಆಸಾತ್. ಥೋಂಡ್ ಉಗ್ತೆ ಕೆಲ್ಲ್ಯಾ ವಿರೋಧಿಂಕ್ ಪುರಾ ಹ್ಯಾ ದೇಶಾಂಚೊ ಸಂವಿಂಧಾನಿಕ್ ಸಂಸ್ಥ್ಯಾಚೊ ದುರುಪಯೋಗ್ ಕರ್ನ್ ಭೆಷ್ಟವ್ನ್ anti-nationalists ಮ್ಹುಣ್ ಸರ್ಟಿಫಿಕೆಟ್ ವಾಂಟ್ತಾತ್. ಏಕ್ ಸರ್ಕಾರ್ ಅಪ್ಣಾ ವಿರೋಧ್ಯಾಂಕ್ ಲಗಾಮ್ ಗಾಲುಂಕ್ CBI , ED, IT, NIA... ತಸಲ್ಯಾ ಸಂಸ್ಥ್ಯಾಂಕ್ ದುರುಪಯೋಗ್ ಕೆಲ್ಯಾರ್ ಕೋರ್ಟ್ ಆಸಾ, ಮೀಡಿಯಾ ಆಸಾ ಇಲೆಕ್ಷನ್ ಕಮಿಷನ್ ಆಸಾ ಮ್ಹುಣ್ ಪಾತ್ಯೆಂವ್ಚೊ ಕಾಳ್ ಆಸ್ ಲ್ಲೊ. ವಿಪರ್ಯಾಸ್ ಮ್ಹುಳ್ಯಾರ್ ಸುಟ್ಕೆಚಾ ಹ್ಯಾ ಸತ್ತಾರಾವ್ಯಾ ವರ್ಸಾ CBI , ED, IT, NIA ಆನಿಂ ಇತರ್ ಸಂವಿದಾತ್ಮಾಕ್ ಸಂಸ್ಥೆ ಮಾತ್ರ್ ನ್ಹಂಯ್ ನ್ಯಾಯಾಂಗ್ , ಮೀಡಿಯಾ ಆನಿಂ ಇಲೆಕ್ಷನ್ ಕಮಿಷನ್ ಯೀ ಪಿಂಜ್ರ್ಯಾಂತ್ ಆಸ್ ಲ್ಯಾ ಸುಕ್ಣ್ಯಾ ಬರಿಂ ಕೆಲಾಂ. ಥೊಡ್ಯಾ ತೆಂಪಾ ಆದಿಂ ಸುಪ್ರಿಂ ಕೊಡ್ತಿಚೊ ಮಾಲ್ಘಡೊ ಅಡ್ವೊಕೆಟ್ ಪ್ರಶಾಂತ್ ಭೂಶಣಾನಾನ್ ಅಮ್ಚಾ ನ್ಯಾಯಾಂಗ್ ವ್ಯವಸ್ಥೆಂತ್ ಕಸ್ಲೆಂ ಭ್ರಷ್ಟಚಾರ್ ಆಸಾ ಆನಿಂ ಅತಾಂಚಾ ಸುಪ್ರಿಂ ಕೋಡ್ತಿಚೊ ಜಡ್ಜ್ ಅಪ್ಲ್ಯಾ ಪುತಾಕ್ ಮುಖಾರ್ ಗಾಲ್ನ್ ಪಯ್ಶೆ ಘೆವ್ನ್ ಕಶೆಂ ಫಾಯ್ದ್ಯಾಚೆಂ ಫೈಸಲ್ ದಿತಾ ಮ್ಹುಣ್ ವಿವರುನ್ ಏಕ್ ಇಂಗ್ಲಿಷ್ ಪತ್ರಾರ್ ಬರಯ್ಲೆಂ. ಸರ್ಕಾರಾ ವಿರೋಧಿ ಧೋರಣ್ ಘೆತಾ ಮ್ಹುಣ್ ಥೊಡ್ಯಾ ದಿಸಾಂ ಪಯ್ಲೆಂ NDTV ವಯ್ರ್ CBI ಛಾಪೊ ಮಾರ್ತಾನಾ ಜಾಲ್ಯಾ ಪ್ರತಿಭಟನಾ ವೆಳಾರ್ ಮಾಲ್ಘಡೊ ಪತ್ರಕರ್ತ್ ಅರುಣ್ ಶೌರಿ ನ್ ಸರ್ಕಾರಾನ್ ಕಶೆಂ ಸಗ್ಳೆಂ ಮೀಡಿಯಾಕ್ ನಿಯಂತ್ರಣಾರ್ ಘೆತ್ಲಾಂ ಆನಿಂ ಕಶಿಂ ಪ್ರೊಪಗೆಂಡಾ ಪಾತ್ಳಾಂವ್ಕ್ ನ್ಯೂಸ್ ಚಾನೆಲಾಂಕ್ ವಾಪಾರ್ತಾತ್ ಮ್ಹುಣ್ ಸವಿಸ್ತಾರಾಯೆನ್ ಭಾಷಣ್ ದಿಲ್ಲೆಂ. ತಾಚಾ ಕೀ ವ್ಹಡ್ ಭಿರಾಂತೆಚಿ ಗಜಾಲ್ ಮ್ಹುಳ್ಯಾರ್ ಹ್ಯಾ ಸರ್ಕಾರಾಕ್ ಕಳಿತ್ ಆಸ್ಚಿ-ಇಲೆಕ್ಟ್ರೊನಿಕ್ ವೋಟಿಂಗ್ ಯಂತ್ರಾಂಕ್ ವ್ಯವಸ್ಥಿತ್ ಜಾವ್ನ್ ಹ್ಯಾಕ್ ಕರ್ನ್ ಎಲಿಸಾಂವ್ ಜಿಕ್ಚಿ ತಾಕ್ನೀಕ್.. !! ಪ್ರಜಾಪ್ರಭುತ್ವ್ ಆನಿಂ ಬಹುಸಾಂಸ್ಕೃತಿಕತೆಚಾ ಪೆಟೆಕ್ ಮಾರ್ಚೊ ಅಖ್ರೇಚೊ ಖಿಳೊ ತೊ ...!!

                                                                                       *****************

ಆಮ್ಚೊ ದೇಶ್ ಸಮ್ರದ್ದ್ ತಶೆಂ ಸುಸಂಗತ್  ಮಾರ್ಗಾರ್ ವಚಜೆ ಜಾಲ್ಯಾರ್  ಜಾತ್ಯತೀತ್ ಸಿದ್ದಾಂತ್ ಆನಿಂ ಬಹುಸಾಂಸ್ಕೃತಿಕತೆಚೆ ಮೈಲಾ ಫಾತೊರ್ ಆಸಾಜೆ. ಇಂಡಿಯಾ ತಿತ್ಲೊ ಬಹುಸಾಂಸ್ಕೃತಿಕ್ ದೇಶ್ ಸಂಸಾರಾಂತ್ ಆಸ್ಚೆ ಅಪ್ರೂಪ್. ಟ್ರಂಪ್ ತಶೆಂ ಬ್ರೆಕ್ಸಿಟಾಚಾ ಹ್ಯಾ ಕಾಳಾರ್, ಹಿ ಬಹುಸಾಂಸ್ಕೃತಿಕತಾ ಅಮ್ಕಾಂ ದೆಣೆಂ ಜಾಂವ್ಚಾ ಬದ್ಲಾಕ್ ರಾಷ್ರೀಯ್ ವಾದಾಚಾ ನಾವಾಂತ್ ವೀಕ್ ಜಾವ್ನ್ ಪಾವ್ಲಾಂ. ಅಮೇರಿಕಾಂತ್ ಜನಾಂಗೀಯ್ ಝುಜ್ ಜಾಂವ್ಚಾ ವೆಳಾರ್ ಮಾರ್ಟಿನ್ ಲೂಥರ್ ಕಿಂಗ್ ಜೂನಿಯರಾನ್ ಆಶೆಂ ಸಾಂಗ್ ಲ್ಲೆಂ “History will have to record that the greatest tragedy of this period of social transition was not the strident clamor of the bad people, but the appalling silence of the good people...!" ಆಮ್ಚಾ ಬರ‍್ಯಾ ಲೊಕಾಕ್ ಮೌನ್ ಪಣ್ ಸೊಡ್ಚಿ ಬೂದ್ ಕೆನ್ನಾ ಯೆತಾಲಿ ಗೀ ..!!?

                                                                                      **********************************

ಫೇಕ್ ನ್ಯೂಸಾಕ್ ಆಸಾ ಗೀ ಪರಿಹಾರ್ ?

ತುಮ್ಕಾಂ ಖಳಿತ್ ಆಸೊಂಕ್ ಪುರೊ. Fact-check ಮ್ಹುಣ್ ಹ್ಯಾ ಸಂಸಾರಾಂತ್ ಸಬಾರ್ ಕಾಳಾ ಥಾವ್ನ್ ಸರ್ವಾಧಿಕಾರಿ ಸಾಮ್ರಾಜ್ಯಾಂತ್ ಆಸ್ ಲ್ಲೆಂ.  ಕಂಚಾ ಯೀ ಏಕಾ ದೇಶಾಂತ್ ಸರ್ವಾದಿಕಾರಿ , ಅನೈತಿಕ್  ಶಾಸನ್ ಕರ್ನ್ ಆಸೊನ್ ಅಸ್ತಾನಾ ಥಂಯ್ Fact-check  ಕರ್ಚೆ ಸಂಸ್ಥೆ ಜರೂರ್ ಆಸ್ತಾತ್ ಪುಣ್ ಪ್ರಜಾಪ್ರಭುತ್ವಾಂತ್ ನ್ಹಂಯ್.. ಪುಣ್ ಕೆನ್ನಾ ಪ್ರಜಾಪ್ರಭುತ್ವಾಂತ್  Fact-check ಜಾಯ್ ಮ್ಹುಳ್ಯಾರ್ ತಂಯ್ ಸಂಪೂರ್ಣ್ ಡೆಮೊಕ್ರಾಸಿ ನಾ ಮ್ಹುಣ್ ಆರ್ಥ್.ಖಂಚೆ ಸರ್ಕಾರ್ , ಮೀಡಿಯಾ ವಯ್ರ್ ಸಂಪೂರ್ಣ್ ನಿಯಂತ್ರಣ್ ಕರ್ನ್ ಆಸ್ತಾತ್ ಗೀ ತೆನ್ನಾ Fact-check ಜರೂರ್ ಜಾಯ್ ಪಡ್ತಾ.

ಆಯ್ಚೊ ಕಾಳ್ ಹೊ ಡಿಜಿಟಲ್ ಮೀಡಿಯಾಚೊ. ಜಾಳಿರ್ ಸೋಶಿಯಾಲ್ ಮೀಡಿಯಾ ಆನಿಂ ಬ್ಲಾಗಾಂ ದ್ವಾರಿಂ ವ್ಯಾಪಕ್ ಜಾವ್ನ್ ಫೇಕ್ ಖಬ್ರೊ ವಾಳೊನ್ ಆಸ್ತಾತ್. ಹ್ಯೊ ನಕ್ಲಿ ಖಬ್ರೊ ಚ್ ಆಸ್ಲಿ ಮ್ಹುಣ್ ಚಿಂತುನ್ ಸಬಾರ್ ಲೋಕ್ ಕಾತ್ರಿಂತ್ ಸಾಂಪ್ಡಾಡ್ತಾ.  ಹ್ಯಾ ನಕ್ಲಿ ಖಬ್ರೊ ಏಕಾ ದೇಶಾಚಾ ಎಲಿಸಾಂವಾತ್ ಯೀ ಪ್ರಮುಖ್ ಜಾವ್ನ್ ಪಾತ್ರ್ ಘೆತಾತ್. ಗೆಲೆತ್ಯಾ ವರ್ಸಾ ಜಾಲ್ಯಾ ಅಮೇರಿಕಾಚಾ ಅಧ್ಯಕ್ಷೀಯ್ ಎಲಿಸಾಂವಾತ್ , ತಶೆಂ Brexit ಎಲಿಸಾಂವಾತ್ ಹ್ಯಾ ಫೇಕ್ ಖಬ್ರೆ ನಿ ಮಸ್ತ್ ಪರಿಣಾಮ್ ಹಾಡ್ಲಾ. ಆಯ್ಚಾ ಕಾಳಾರ್ Facebook , twitter , WhatsApp  ತಸ್ಲಿಂ ಸೋಶಿಯಾಲ್ ಮೀಡಿಯಾ ತಾಣಾಂ ಕಿತ್ಲಿಂ ಪರಿಣಾಮ್ ಕಾರಿ ಮಾಧ್ಯಮಾಂ ಜಾಂವ್ಕ್ ಪಾಂವ್ ಲ್ಯಾಂತ್ ಗೀ, ಹಾಂತುಂ ನಕ್ಲಿ ಖಬ್ರೊ ಸುಲಾಭಾಯೆನ್ ಪ್ರಸಾರ್ ಕರ್ಯೇತ್. ಹ್ಯಾ ನಕ್ಲಿ ಖಬ್ರ್ಯಾಂಕ್ ಸಂಪೊಡ್ಚೆ ಫಕತ್ ಆಶಿಕ್ಪಿ ಯಾ ಸಾಮಾನ್ಯ್ ಜಣ್ ನ್ಹಂಯ್ , ಪ್ರತಿಶಿಶ್ಟ್ ಮಿಡಿಯಾ ಘರಾಣೆಂ ಯೀ ಸಾಂಪೊಡ್ನ್ ಆಸ್ತಾತ್. ಸೋಶಿಯಾಲ್ ಮೀಡಿಯಾಂತ್ಲ್ಯೊ ನಕ್ಲಿ ಖಬ್ರೊ ಪ್ರಧಾನ್ ವ್ಹಾಳ್ಯಾಚಾ ಮೀಡಿಯಾನಿಂ ಪರ್ಗಟ್ ಯಾ ಪ್ರಸಾರ್ ಕೆಲ್ಯಾರ್ ನಕ್ಲಿ ಖಬ್ರೊ ಸುಲಾಭಾಯೆನ್ ಆಸ್ಲಿ ಜಾತಾತ್.

ಅಸ್ಲ್ಯಾ ನಕ್ಲಿ ಖಬ್ರೆಂ ಥಾವ್ನ್ ಸಾಂಪಾಡ್ನಾಸ್ತಾನ ರಾಂವ್ಚೆಂ ಜಾಲ್ಯಾರೀ ಕಶೆಂ ? ಹಾಕಾ ಪರಿಹಾರ್ ಆಸಾ ಗೀ ? ತುಮ್ಕಾಂ ಖಳಿತ್ ಆಸೊಂಕ್ ಪುರೊ ನಕ್ಲಿ ಖಬ್ರೊ ಪ್ರಮುಖ್ ಜಾವ್ನ್ ಪ್ರಸಾರ್ ಜಾಂವ್ಕ್ ಕಾರಾಣ್ ಜಾಂವ್ಚಿ ದೋನ್ ಪ್ರಮುಖ್ ತಾಣಾಂ ಮ್ಹುಳ್ಯಾರ್ ಏಕ್ Facebook ಆನಿಂ ದುಸ್ರೆಂ Google. ಹ್ಯಾ ನಕ್ಲಿ ಖಬ್ರೆ ಪಿಡೆ ನಿಮ್ತಿಂ ಹ್ಯಾ ಸಂಸ್ಥ್ಯಾಂಕ್ ಮಸ್ತ್ ಠೀಕಾ ಆಯ್ಕೊಂಕ್ ಮೆಳ್ಳ್ಯಾ.  ದೆಕುನ್ ಥೊಡ್ಯಾ ತೆಂಪಾ ಥಾವ್ನ್ ಹ್ಯಾತಾಣಾನಿಂ Fact-check ಹಾತೆರಾಂ ಕ್ ಅಪ್ಣಾಯ್ಲ್ಯಾಂತ್. ಹಿಂ ಕಶಿಂ ಕಾಮ್ ಕರ್ತಾತ್ ? ತುಮಿಂ ಗೂಗಾಲಾಂತ್ ಸೊದ್ನಾಂ ಕರ್ತಾನಾ, ತಾಂಚೆ ಇಂಜಿನ್ ತ್ಯಾ ಸೊದ್ನಾಂ ಸಬ್ದಾಚೆಂ ಸಂಬಂದ್ದಿ ವಿಷಯ್ ಪುರಾ ತುಮ್ಚಾ ಮುಕಾರ್ ಹಾಡ್ತಾ. ಹಾಂತುಂ ಸಬಾರ್ ಫೇಕ್ ಖಬ್ರೊ ಯೀ ಆಸೊಂಕ್ ಪುರೊ. ದೆಕುನ್ ಗೂಗಾಲಾನ್ ಥೊಡ್ಯಾ ತಿಸ್ರ್ಯಾ ಪಾಡ್ತಿ Fact-check ಸಂಸ್ಥ್ಯಾ ಕಡೆ ಸೊಲ್ಲೊ ಕರ್ನ್ , ಏಕೆದಾವಳಾ ಕಂಚೊ ಖಬ್ರೊ ನಕ್ಲಿ ಮ್ಹುಣ್ ತ್ಯಾ Fact-check ಸಂಸ್ಥ್ಯಾಚಾ ತಾಣಾರ್ ನಕ್ಲಿ ಮ್ಹುಣ್ ಪಟ್ಟಿ ಕೆಲ್ಯಾರ್ , ಗೂಗಾಲ್ ತುಮ್ಕಾಂ ತೆಂ ಖಳಯ್ತಾ. Facebook ನ್ ಯಿ ಅಸ್ಲೆಂಚ್ ಹಾತೆರ್ ಹಾಡ್ಲಾಂ. ತುಮಿಂ ಕಂಚೋಯೀ ವಿಷಯ್ Facebook ರ್ share ಕರ್ತಾನಾ , ತೊ ವಿಷಯ್ ಹ್ಯಾ ತಿಸ್ರ್ಯಾ ಪಾಡ್ತಿ Fact-check ಸಂಸ್ಥ್ಯಾಚಾ ಪಟ್ಟೆಂತ್ ನಕ್ಲಿ ಮ್ಹುಣ್ ದಾಕಾಲ್ ಜಾಲ್ಯಾರ್ Facebook  ತುಮ್ಕಾಂ ಏಕ್ ಚತ್ರಾಯೆಚೊ ಸಂದೇಶ್ ದಿತಾ. ಹ್ಯೊ ಸೆವಾ ಥೊಡ್ಯಾ ತೆಂಪಾ ಪಯ್ಲೆಂ ಆರಂಭ್ ಜಾಲ್ಯೊ ಮಾತ್ರ್. ತಶೆಂ ಜಾಲ್ಯಾನ್ ತಿತ್ಲ್ಯೊ ಪರಿಣಾಮ್ ಕಾರಿ ಜಾವ್ನ್ ನಾಂತ್. ನಕ್ಲಿ ಖಬ್ರೊ ಉಣೆಂ ಜಾಂವ್ಕ್ ಯೀ ನಾಂತ್. ಜಾಗತೀಕ್ ಮಟ್ಟಾರ್ ಸಬಾರ್ Fact-check ಸಂಸ್ಥೆ ಆಸಾತ್. ತಾಂತುಂ ಪ್ರಮ್ಹುಖ್ ಜಾವ್ನ್ ಆಸ್ಚೆ ಮ್ಹುಳ್ಯಾರ್  FactCheck.org , PolitiFact.com, OpenSecrets.org, Snopes.com , TruthOrFiction.com, hoax-slayer.com.....

ಮಾಗಿರ್ ಆಮ್ಚಾ ಇಂಡಿಯಾಂತ್ ಕಸ್ಲಿ ಆವಸ್ಥಾ ಆಸಾ ಮ್ಹುಣ್ ತುಮಿಂ ವಿಚಾರ್ತಾತ್ ಗೀ ? ತೊಡ್ಯಾ ತೆಂಪಾ ಆದಿಂ ಜವಾಹಾರ್ ಲಾಲ್ ನೆಹರು ವಿಶಿಂ ಆಸ್ಚೆಂ wikipedia ಲೇಖನ್ ಬದ್ಲುನ್ ತಾಂತುಂ ಥೊಡೆ ವಿವಾದಿತ್ ನಕ್ಲಿ ವಿಶಯ್ ಸೆರ್ವಾಯ್ಲೆ. ತೊ ಖಂಯ್ ಥಾವ್ನ್ ಬದ್ಲಿಲೊ ಮ್ಹುಣ್ IP Address ಚೊ ಪತ್ತೊ ದರ್ನ್ ಗೆಲ್ಯಾರ್ ವಚುನ್ ಡೆಲ್ಲಿಚಾ ಪ್ರಧಾನ್ ಮಂತ್ರಿ ಕಾರ್ಯಾಲಾಯ್ ಮ್ಹುಣಾಸರ್ ಪಾವ್ಲೊ. ತುಮ್ಕಾಂ ವಿಚಿತ್ರ್ ದಿಸ್ಲ್ಯಾರೀ ಹೆಂ ಸತ್. ಆಜ್ ಇಂಡಿಯಾಂತ್  ಪ್ರಮುಖ್ ಜಾವ್ನ್ ಫೇಕ್ ಜಾವ್ನ್ ಉತ್ಪಾದನ್ ಜಾಂವ್ಚೊ ಪ್ರಧಾನಿ ಕಾರ್ಯಾಲಾಯಾಂತ್. ಥಂಯ್ ಎಕ್ಲೊ ಹಿರೆನ್ ಜೋಶಿ ಮ್ಹುಣ್ ಆಸಾ. ಥೊ ಆಮ್ಚಾ ಪ್ರಧಾನಿಚೊ ಸೊಶಿಯಾಲ್ ಮೀಡಿಯಾ ಗುರು. ತಾಚೆಂ ಏಕ್ ವಡ್ಲೆಂ ಟೀಮ್ ಂ ಚ್ ಆಸಾ. ಇಂಡಿಯಾಂತ್ಲಿ ಆಜ್ ದುರಾವಸ್ಥಾ ಮ್ಹುಳ್ಯಾರ್ , ಸರಿಸುಮಾರ್ ಸಕ್ಕಡ್ ಮೀಡಿಯಾ ಆಜ್ ಸರ್ಕಾರಾಚಾ ನಿಯಂತ್ರಣಾಂತ್ ಆಸಾ. ಸರ್ಕಾರಾನ್ ದಿಲ್ಲಿ ಸ್ಕ್ರಿಪ್ಟ್ ಚ್ ಆಜ್ ಆಮ್ಚೊ ಪ್ರಧಾನ್ ವ್ಹಾಳ್ಯಾಚಾ ಮೀಡಿಯಾ ಪ್ರಸಾರ್ ಕರ್ತಾತ್. ಖಂಯ್ ಪುಣೀ ಖಂಚಯ್ ಮೀಡಿಯಾ ಘರಾಣೆಂತ್  ತಿ ಸ್ಕ್ರಿಪ್ಟ್ ಪರ್ಗಟ್ ಕರುಂಕ್ ನಿರಾಕಾರ್ ಕೆಲ್ಯಾರ್ ತಾಂಚೆ ವಯ್ರ್ CBI , IT ಯಾ ED ರೈಡ್ ಜಾತಾ. ತಶೆಂ ಆಜ್ ಕಾಲ್ ಇಂಡಿಯಾಗಾರಾಂಕ್ ಸೋಶಿಯಾಲ್ ಮಿಡಿಯಾ ಸೊಡ್ಯಾಂ, ಪ್ರಧಾನ್ ವ್ಹಾಳ್ಯಾಚಾ ಮೀಡಿಯಾನಿಂ ಮೆಳ್ಚೊ ನ್ಯೂಸ್ ಚಡಾವತ್ ಫೇಕ್.

ತಶೆಂ ಜಾಲ್ಯಾನ್ ಅಮಿಂ ವಾಚ್ ಲ್ಲೊ ಯಾ ಪಳಯ್ಲೊ ನ್ಯೂಸ್ ಅಸ್ಲಿ ಗೀ ಯಾ ನಕ್ಲಿ ಮ್ಹುಣ್ ಕಶೆಂ ಪಾರ್ಕುನ್ ಪಳಂವ್ಚೆ ? ಇಂಡಿಯಾಂತ್ ಚಡ್ ಜಾವ್ನ್ ಸ್ವತ್ರಂತ್ Fact-check ಸಂಸ್ಥೆ ನಾಂತ್. ಪುಣ್ ಥೊಡೆ ಪ್ರಮುಖ್ ಆಸ್ಚೆ ಮ್ಹುಳ್ಯಾರ್ altnews.in, factchecker.in,check4spam.com..... ತುಮಿಂ ಜರೂರ್ ಅಸ್ಲ್ಯಾ ತಾಣಾಂಕ್ ಭೆಟ್ ದೀವ್ನ್ ಆಸಾಜೆ. ತೆನ್ನಾ ತುಮ್ಕಾಂ ಇಲ್ಲೆಶೆಂ ಪುಣೀ ಸತ್ ಕಾಲೆಂ ಫಟ್ ಕಾಲೆಂ ಮ್ಹುಣ್ ಖಳಿತ್ ಜಾತಾ.

                                                                        ******************************

ಯೇವ್ನ್ ಆಸಾ ಬಲೂನ್ ಅಧಾರಿತ್ ಇಂಟರ್ನೆಟ್ ... !!!

Naman Ballok Jesu- July 2013

ತುಮ್ಚೆ ಕಡೆ ಏಕ್ ಲ್ಯಾಪ್ ಟೊಪ್ ಯಾ ಟ್ಯಾಬ್ ಯಾ ಸ್ಮಾರ್ಟ್ ಫೋನ್ ಮ್ಹುಣ್ ಆಸಾ  ಚಿಂತಿಯಾಂ. ಹಿಂ ಮೆಶಿನಾಂ ತುಮ್ಚಾ 2G , 3G ಯಾ ಬ್ರಾಡ್ ಬೆಂಡ್ ನೆಟ್ ವರ್ಕಾಕ್ ಸಂಪರ್ಕ್ ಕೆಲ್ಯಾರ್ ತುಮ್ಕಾಂ ಅಂತರ್ ಜಾಳಿಚೊ ಸಂಪರ್ಕ್ ಜಾತಾ. ಏಕ್ ಪಾವ್ಟಿಂ ಅಂತರ್ ಜಾಳಿಚೊ ಸಂಪರ್ಕ್ ಜಾಲೊ ಮ್ಹುಣ್ ಚಿಂತಿಯಾಂ , ಸಗ್ಳೊ ಸಂಸಾರ್ ಚ್ ತುಮ್ಚಾ ಹಾತಾಂತ್ ಮೆಳ್ಳ್ಯಾ ಬರಿ ಜಾಲೊ. ವಾಸ್ತಾವ್ ಜಾವ್ನ್ ಹೊ ಸಗ್ಳೊ ಸಂಸಾರ್ ಮ್ಹುಳ್ಯಾರ್ ಕಿತ್ಲೊ ಸಂಸಾರ್ ? ತುಮ್ಚೆಂ ಟ್ಯಾಬ್ಲೆಟ್ ಯಾ ಸ್ಮಾರ್ಟ್ ಫೋನ್ ಘೇವ್ನ್ ಪಶ್ಚಿಮ್ ಘಟಾಂಚಾ ಹಳ್ಳೆಕ್ ಗೆಲ್ಯಾರ್ ತುಮ್ಕಾ ಅನಿಕೀ 2G , 3G ಸೊಡ್ಯಾಂ ಮೊಬೈಲಾಕ್ ಚ್ ರೇಂಜ್ ಮೆಳಾನಾ. ತಸಲ್ಯಾ ಹಳ್ಳೆ ಥಾವ್ನ್ ತುಮ್ಕಾಂ ಟ್ವೀಟ್ ಕರುಂಕ್ ಜಾಯ್ನಾ , ಫೇಸ್ ಬುಕ್ಕಾಚೆ update ಪಳೆಂವ್ಕ್ ಜಾಯ್ನಾ , ತುಮ್ಚೆಂ ಇಮೈಲಾಂ ಚಲಾನಾಂತ್  ಯಾ youtube ಕ್ ಏಕ್ ಪಾವ್ಟಿಂ ಮ್ಹುಣಿ ತೀಳ್ನ್ ಪಳೆಯಾಂ ಮ್ಹುಳ್ಯಾರೀ ಜಾಯ್ನಾ. ತಶೆಂ ಮ್ಹುಳ್ಯಾರ್ ಹ್ಯಾ ಸಂಸಾರಾಂತ್ ಇಂಟರ್ನೆಟಾಚಿ ಸೌಲತ್ ವಾಪಾರ್ಚೆಂ ಭಾಗ್ ಸಕ್ಡಾಂಕ್ ನಾ ಮ್ಹುಣ್ ಜಾಲೆಂ. ಹಿ ಸಮಸ್ಸ್ಯಾ ಆಮ್ಚಾ ಪಶ್ಚಿಮ್ ಘಟಾಂಚಾ ಹಳ್ಳೆಂತ್ ಮಾತ್ರ್ ನ್ಹಂಯ್ , ತ್ಯಾ ಅಮೇರಿಕಾ ತಸಲ್ಯಾ ಅಮೇರಿಕಾಂತ್ಲ್ಯಾ ಥೊಡ್ಯಾ ಗ್ರಾಮೀಣ್ ಪ್ರದೇಶಾಂಚಿ ಯೀ ತಿಚ್ ಗತ್ .! ಇತ್ಲ್ಯಾ ಕೀ ಹ್ಯಾ ಸಂಸಾರಾಂತ್ ಆಸ್ಚಾ ಸುಮಾರ್ 7.5 ಬಿಲಿಯಾನ್ ಲೋಕಾ ಮಧೆಂ ಅಂತರ್ ಜಾಳಿಚೊ ಸಂಪರ್ಕ್ ಮೆಳ್ಚೊ ಫಕತ್ 2.5 ಬಿಲಿಯಾನ್ ಲೊಕಾಂಕ್ ಮಾತ್ರ್ . ತಶೆಂ ಮ್ಹುಳ್ಯಾರ್ ಹ್ಯಾ ಸಂಸಾರಾಚಾ ಬರೋಬ್ಬರ್ ಪಾಂಚ್ ಬಿಲಿಯಾನ್ ಲೋಕಾಂಕ್ ಇಂಟರ್ನೆಟ್ ವಾಪಾರ್ಚಾ ಸೌಲತೆ ಥಾವ್ನ್ ವಂಚಿತ್ ಜಾಲ್ಯಾತ್ ..!

ತಶೆಂ ಮ್ಹುಳ್ಯಾರ್ ಹೊ ಪಾಂಚ್ ಬಿಲಿಯಾನ್ ಲೋಕ್ ದುಬ್ಳೊ ಆನಿಂ ತಾಂಕಾಂ ಇಂಟರ್ನೆಟ್ ಘೆಂವ್ಚಿ ಸಕತ್ ನಾಂ ಗೀ ? ತಶೆಂ ಕಾಂಯ್ ನಾ. ತುಮ್ಕಾಂ ಕಳಿತ್ ಆಸಾ . ಹಿ ಆಮ್ಚಿ ಭೂಂಯ್ ಮಸ್ತ್ ಸಂಕೀರ್ಣ್ ಮ್ಹುಣ್ . ಹಾಂಗಾ ಪರ್ವತ್ ಮಯ್ ಜಾವ್ನ್ ಆಸ್ಚೆ ಜಾಗೆ ಆಸಾತ್ , ಎಕ್ಸುರೆ ಕುದ್ರೆ ಆಸಾತ್ , ಗೂಂಡ್ ರಾಣಾಂಚ್ ಆಸ್ಚೆ ಜಾಗೆ ಆಸಾತ್ , ರೆವೆಂತ್ ಆಸ್ ಲ್ಲೆ ದೇಶ್ ಆಸಾತ್ . ಅಸಲ್ಯಾ ಪ್ರದೇಶಾಂತ್ ಆಸ್ಚಾ ಹ್ಯಾ ಲೋಕಾಕ್ ಅಂತರ್ ಜಾಳಿ ಸಂಪರ್ಕ್ ದಿಂವ್ಚೊ ತಿತ್ಲೊ ಸುಲಭ್ ನ್ಹಂಯ್. ಏಕಾ ಪ್ರದೇಶಾಂತ್ ನೆಟವರ್ಕ್ ಸ್ಥಾಪಿತ್ ಕರಿಜೆ ಜಾಲ್ಯಾರ್ , ದರ್ಣಿಂ ಪಂದಾ ಮೈಲಾ ಗಟ್ಲ್ಯಾನ್ ಪೈಬರ್ ಕೇಬಲ್ ಒಡಿಜೆ. ಹಾಕಾ ಮಸ್ತ್ ಕರ್ಚ್ ಪೊಡ್ತಾ . ವೊರೆ ವಿಂಗಡ್ ಆಸ್ಚಾ ದುರ್ಗಮ್ ಪ್ರದೇಶಾಂತ್ ಅಸ್ಲೆಂ ನೆಟ್ ವರ್ಕ್ ಬಾಂದ್ಲ್ಯಾರಿ ಥೊಡೊಚ್ ಜಣಸಂಕೊ ವಿಂಗಡ್ ವಿಂಗಡ್ ವ್ಯಾಪ್ತೆರ್ ಫಸರ್ನ್ ಆಸ್ತಾ. ತಸಲ್ಯಾ ಪ್ರದೇಶಾನಿಂ ನೆಟ್ ವರ್ಕ್ ಭಾಂದ್ಲ್ಯಾರೀ ನಷ್ಟ್ ಚ್ ಚಡ್ . ಮಾಗಿರ್ ಉಪಗ್ರಹ ಥಾವ್ನ್ ಶೀದಾ ಸಂಪರ್ಕ್ ಘೇತ್ಲ್ಯಾರ್ ಮಸ್ತ್ ಮ್ಹುಳ್ಯಾರ್ ಮಸ್ತ್ ಮ್ಹಾರಗ್ . ತಶೆಂ ಜಾಲ್ಯಾನ್ ಅಫ್ರಿಕಾ ತಶಲ್ಯಾ ದೇಶಾನಿಂ ಫಕತ್ 15 % ಲೊಕಾಕ್ ಇಂಟರ್ನೆಟ್ ಮೆಳ್ಯಾರ್ , ತೆನ್ಕಾ ತಶೆಂ , ತೆನ್ಕಾ ಮ್ಹುಡ್ಲಾ ದೆಶಾನಿಂ 28 % ಲೊಕಾಕ್ ಮಾತ್ರ್ ಇಂಟರ್ನೆಟ್ ಮೆಳ್ಳಾಂ. ಲಾತಿನ್ ಅಮೇರಿಕಾಂತ್ ಸುಮಾರ್ 50 % ಲೊಕಾರ್ ಇಂಟರ್ನೆಟ್  ಪಾವ್ಲ್ಯಾರ್ , ತ್ಯಾ ಅಸ್ಟ್ರೇಲಿಯಾಂತ್ 67 % ಲೊಕಾಕ್ ಮಾತ್ರ್ ಅಂತರ್ ಜಾಳಿಚೊ ಸಂಪರ್ಕ್ ಮೆಳ್ತಾ. ಯೆರೊಪಾಚಾ 37 % ಜಾಗ್ಯಾನಿಂ ಆನಿಕೀ ಇಂಟರ್ನೆಟ್ ನಾತ್ಲ್ಯಾರ್ ಅಮೇರಿಕಾಚಾ 22 % ಲೋಕ್ ಯೀ ಇಂಟರ್ನೆಟ್  ವಂಚಿತ್ ಜಾಲಾ... ! 

ಇತ್ಲ್ಯಾ ವ್ಹಡ್ ಪ್ರಮಾಣಾಂತ್ ಇಂಟರ್ನೆಟ್ ವಂಚಿತ್ ಜಾಲ್ಲ್ಯಾ ಲೋಕಾಕ್ ಸುಲಾಭಾಯೆನ್ ಅಂತರ್ ಜಾಳಿಚೊ ಸಂಪರ್ಕ್ ದಿಂವ್ಚೊ ಜಾಲ್ಯಾರೀ ಕಸೊ ? ಹಾಕಾ  ಗರ್ಜೆಚೆಂ ಪರಿಹಾರ್ ಸೊದುಂಕ್ ಹ್ಯಾ ಪಾವ್ಟಿಂ ಗೂಗಾಲ್ ಭರನ್ ಪ್ರಯತ್ನ್ ಕರ್ನ್ ಆಸಾ . ತಾಂಚೆಂ ಮಹತ್ವಾಕಾಂಕ್ಷೆಚೆಂ ತೆಂ ಪ್ರೊಜೆಕ್ಟ್ ಚ್ Project Loon ...!! ಹಿ ಬಲೂನ್ ಆಧಾರಿತ್ ಟೆಕ್ನೊಲೊಜಿ. ಆಯ್ಕಾತಾನಾ ಹಿ ಟೆಕ್ನೊಲೊಜಿ ಮಸ್ತ್ ಸರಳ್ ಆಸ್ ಲ್ಯಾ ಭರಿ ದಿಸ್ತಾ. ತುಮ್ಕಾಂ ಕಳಿತ್ ಅಸೊಂಕ್ ಪುರೊ , ಭುಂಯ್ಚಾ ವೀಸ್ ಕಿ. ಮೀ ವಯ್ರ್ stratosphere ಮ್ಹುಳ್ಳೊ ಏಕ್ ಪದರ್ ಆಸಾ. ಹಾಂಗಾ ಉಣ್ಯಾ ಮಾಪಾಂತ್ ವಾರೆಂ ಆಸ್ತಾ. ಇತ್ಯಾ ವಯ್ರ್  ವೀಶೇಷ್ ಬಲೂನ್ ಸೊಡ್ಚೆ. ತ್ಯಾ ಬಲೂನಾಂತ್ ಏಕ್ ದಾ ಕಿಲ್ಯಾಂಚೊ ಏಕ್ ಬಾಕ್ಸ್ ಆಸ್ತಾ. ತ್ಯಾ ಬಾಕ್ಸಾಂತ್ ಏಕ್ ವೀಜ್ ಸರ್ಕ್ಯೂಟ್ ಬೋರ್ಡ್ ಆಸ್ತಾ. ಮಾಗಿರ್ ರೇಡಿಯೊ ಅಂಟೆನಾ ಆಸ್ತಾತ್. ಹ್ಯಾ ರೇಡಿಯೊ ಅಂಟೆನಾ ಥಾವ್ನ್ ಏಕಾ ಬಲೂನಾ ಥಾವ್ನ್ ಅನ್ಯೇಕ್ ಬಲೂನಾಕ್ ಸಂಪರ್ಕ್ ಜೊಡುಂಕ್ ಜಾತಾ ಮಾತ್ರ್ ನ್ಹಂಯ್ ದರ್ಣಿರ್ ಆಸ್ ಲ್ಯಾ ಇಂಟರ್ನೆಟ್ ಅಂಟೆನಾಕ್ ಸಂಪರ್ಕ್ ಜೊಡ್ಯೇತ್ . ಮಾಗಿರ್ ಹ್ಯಾ ಬಲೂನಾಂತ್ GPS ನ್ಯಾವಿಗೇಟರ್ ಯೀ ಆಸ್ತಾ. ವೀಜ್ ಸಕತ್ ಉತ್ಪನ್ನ್ ಕರುಂಕ್ ಸೋಲಾರ್ ಪ್ಯಾನೆಲಾಂ ಅಸ್ತಾತ್ ಆನಿಂ ತಿ ವೀಜ್ ಸಕತ್ ದಾಸ್ತಾನ್ ಕರುಂಕ್ ಬ್ಯಾಟರಿಯೀ ತಾಂತುಂ ಆಸ್ತಾ. ತುಮ್ಚಾ ಘರಾ ತುಮ್ಕಾಂ ಇಂಟರ್ನೆಟಾಕ್ ಸಂಪರ್ಕ್ ಜಾಯ್ ಜಾಲ್ಯಾರ್ , ಗೂಗಲ್ ಏಕಾ ಬಾಸ್ಕೆಟ್ ಬಾಲಾ ತೆದೆಂ ಏಕ್ ಅಂಟೆನಾ ತುಮ್ಚಾ ಘರಾ ಜೋಡನ್ ಕರ್ತಾ. ತೆಂ ಅಂಟೆನಾಕ್ ಬಲೂನಾ ಥಾವ್ನ್ ಸಿಗ್ನಲ್ ಮೆಳ್ಳಿಚ್ ತುಮ್ಕಾಂ ಅಂತರ್ ಜಾಳಿಚೊ ಸಂಪರ್ಕ್ ಮೆಳ್ತಾ ...!! ಸ್ಪೀಡ್ ಬರೋಬ್ಬರ್ ಅತಾಂಚಾ 3G ನೆಟ್ ವರ್ಕಾ ತಿತ್ಲಿ ಆಸ್ತಾ .  ಗೂಗಾಲಾ ಪ್ರಕಾರ್ ಹ್ಯಾ ಟೆಕ್ನೊಲೊಜಿ ನಿಮ್ತಿಂ ಸಗ್ಳ್ಯಾ ಸಂಸಾರಾಂಕ್ ಉಣ್ಯಾ ಮೊಲಾಕ್ ಅಂತರ್ ಜಾಳ್ ಸಂಪರ್ಕ್ ದಿವ್ಯೇತಾ ..! ತಶೆಂ ಮುಳ್ಯಾರ್ ಹಜಾರೊಂ ಮಯ್ಲಾಂ ಪೋಂಡ್ ಕಾಡ್ನ್ ಪೈಬರ್ ಕೇಬಲ್ ಪುರ್ಚಿ ಗರ್ಜ್ ನಾ ...!!

ಹ್ಯಾ ಪ್ರೊಜೆಕ್ಟಾಚೆಂ ಆರಂಭ್ ಹ್ಯಾಚ್ ಜೂನ್ 14 ತಾರಿಕೆರ್ ನ್ಯೂಜಿಲೆಂಡಾಚಾ ಏಕ್ ಹಳ್ಳೆಂತ್ ಜಾಲೆಂ. ಹೆಂ Google Balloon Internet ಪ್ರೊಜೆಕ್ಟ್ ಆನಿಕೀ ತಪಾಸ್ಣೆ ಹಂತಾರ್ ಆಸಾ. ಸದ್ಯಾಕ್ ಗೂಗಲಾನ್ ತೀಸ್ ಬಲೂನ್ ಅಂತ್ರಾಳಾಕ್ ಸೊಡ್ನ್ ಪನ್ನಾಸ್ ಘರಾಂಕ್ ಹಾಚೊ ಸಂಪರ್ಕ್ ತಪಾಸ್ಣಿ ಕರುಂಕ್ ದಿಲಾ. ತಾಂಚೆ ಸಂಸೊಢ್ ಭರನ್ ಚಲೊಂನ್ ಚ್ ಆಸಾತ್ .! ಹೆಂ ಯಶಸ್ವಿ ಜಾಲ್ಯಾರ್ ಮಾಗಿರ್ ಗೂಗಾಲಾಚೆ ಹಜಾರೊಂ ಬಲೂನ್ ಅಂತ್ರಾಳಾರ್ ಥಾಂಬು ಮಾರ್ನ್ ಭುಂಯ್ಕ್ ಸಂಪೂರ್ಣ್ ಮಾಫನ್ ಅಂತರ್ ಜಾಳಿಚಾ ನೆಟ್ ವರ್ಕಾಕ್ ಹಾಡ್ಲ್ಯಾರ್ ವಿಜ್ಮಿತ್ ನಾ. All the best Google ...!

                 *************************************

'ಘರ್ ವಾಪಸಿಚೊ’ ಂತ್ಲ್ಯೊ ಖುಶಿ ಆನಿಂ ದೊಶಿ ....

NBJ February 2015

ಇಂಡಿಯಾಂತ್ ಆಸ್ಚಾ ಸಬಾರ್ ರಾಜಕೀಯ್ ಪಾಡ್ತಿಂಕ್ ಪಳೆಯ್ತಾನಾ , ಸಾಮಾನ್ಯ್ ಜಾವ್ನ್ ಪಾಡ್ತ್ ಮುಖಾರ್ ಆಸ್ತಾ , ಆನಿಂ ಪಾಡ್ತಿ ಪಾಟ್ಲ್ಯಾನ್  , ಪಾಡ್ತಿ ಸಂಬಂಧಿ ಸಂಘಟನಾಂ ಆಸ್ತಾತ್. ಪುಣ್ ಆಜ್ ಡೆಲ್ಲಿಂತ್ ರಾಜ್ವಾಟ್ಕಿ ಚಲಂವ್ಚಿ ಪಾಡ್ತ್ ಆಸಾ ಪಳೆಯಾ , ತಾಂತುಂ ಸಂಘಟನಾಂ ಮುಕಾರ್ ಆಸಾತ್ ,  ಆನಿಂ ಪಾಡ್ತ್ ಸಂಘಟನಾಂಚೊ ಏಕ್ “ರಾಜಕೀಯ್” ಭಾಗ್ ಮ್ಹುಣಾಸರ್ ಮಾತ್ರ್ ಸೀಮಿತ್ ಜಾವ್ನ್ ಉರ್ಲ್ಯಾ. ಆನಿಂ ತ್ಯಾ ಸಂಘಟನಾಂಕ್ ಅಪ್ಲಿಚ್ ಮ್ಹುಳ್ಳಿಂ ಸಿದ್ದಾಂತಾಂ ಆಸಾತ್ , ರಾಜಕೀಯ್ ಅಜೆಂಡಾ ಆಸಾ.  ತುಮ್ಕಾಂ ಸಕ್ಡಾಂ ಕೀ ಖಳಿತ್ ಆಸ್ಲ್ಯಾ ಪ್ರಕಾರ್ , ಸಂಘ್ ಪರಿವಾರಿಂಚೆಂ ಆನಿಂ ಆಜ್ ಭಾರತಾಚೆಂ ಶಾಸನ್ ಚಲಂವ್ಚಾ ತಾಂಚಾ ರಾಜಕೀಯ್ ವಿಭಾಗಾಚೆ ಪ್ರಮುಖ್ ಅಜೆಂಡಾ  ಮ್ಹುಳ್ಯಾರ್ ಗೊರ್ವಾಂಚಿ ಹತ್ಯಾ ನಿಶೇಧ್ ಕರಿಜೆ , ಅಯೋಧ್ಯಾಂತ್ ರಾಮ್ ಮಂದಿರ್ ಬಾಂಧಿಜೆ , ಯೂನಿಫಾರ್ಮ್ ಸಿವಿಲ್ ಕೋಡ್ ಹಾಡಿಜೆ , ಕಾಶ್ಮಿರಾಕ್ ಮ್ಹುಣ್ ಕೆಲ್ಲೆಂ ಆರ್ಟಿಕಲ್ 370 ನೀಶೇದ್ ಕರಿಜೆ ಆನಿಂ ಪ್ರಮುಖ್ ಜಾವ್ನ್ ಮತಾಂತರ್ ನೀಶೇದ್ ಕರಿಜೆ ಮ್ಹುಣ್ .! ಸಬಾರ್ ದಾಕ್ಡ್ಯಾಂ ಥಾವ್ನ್ ಕಂಚೆ ಯೀಂ ಎಲಿಸಾಂವ್ ಪುಣಿ ಜಾಂವ್ , ತಾಂಚಿ ಪ್ರಮುಖ್ ಕಾರ್ಯಾಸೂಚಿ ಹಿಚ್. ವಾಜ್ ಪೇಯಿ ಕಾಳಾರ್ ತುಮ್ಕಾಂ ಸ ವರ್ಸಾಂ ಅಧಿಕಾರ್ ಮೆಳ್ ಲ್ಲೊ , ತುಮಿಂ ಕಿತ್ಯಾಕ್ ಹಿ ಕಾರ್ಯಾ ವಳೆರಿ ಜಾರಿ ಕರುಂಕ್ ನಾ ಮ್ಹುಳಾರ್ , ತೆ ಮ್ಹುಣಾಲೆ ಆಮ್ಕಾಂ ಪೂರ್ಣ್ ಬಹುಮತ್ ಮೆಳೊಂಕ್ ನಾ . ಪೂರ್ಣ್ ಬಹುಮತ್ ಮೆಳ್ಳ್ಯಾ ಉಪ್ರಾಂತ್ ಆಮಿಂ ತೆಂ ಜಾರಿ ಕರ್ತಾಂವ್ ಮ್ಹುಣ್. ಪೂರ್ಣ್ ಬಹುಮತ್ ಮೆಳ್ತಾ ಮ್ಹುಣ್ ತಾಣಿಂಚ್ ಸೊಪ್ಣಾಂತ್ ಯೀ ಚಿಂತುಂಕ್ ನಾ. ಪುಣ್ 2014 ಎಲಿಸಾಂವಾತ್ ತಾಂಕಾಂ 282 s ಬಸ್ಕಾ ಮೆಳೊನ್ ಪೂರ್ಣ್ ಬಹುಮತ್ ಯೀ ಜೊಡ್ಲೊ. ಮುಕ್ಲ್ಯಾ ಪಾನಾನಿಂ “ವಿಕಾಸ್” ಮ್ಹುಣ್ ತಾಣಿಂ ಸಾಂಗ್ಲ್ಯಾರ್ ಯೀ ಪಾಟ್ಲ್ಯಾ ಪಾನಾನಿಂ ತಾಂಚೊ ಹ್ಯೊ ಪುರಾ ಕಾರ್ಯಾಸೂಚಿ ಆಸ್ ಲ್ಲ್ಯೊ. ಅಚಾನಕ್ ಜಾವ್ನ್ ಪೂರ್ಣ್ ಬಹುಮತ್  ಮೆಳ್ಳ್ಯಾ ಉಪ್ರಾಂತ್ ,ತಾಣಿಂ ಅತಾಂ ತ್ಯೊ ಪುರಾ ಕಾರ್ಯಾಸೂಚಿ ಜಾರಿ ಕರುಂಕ್ ನಾತ್ಲ್ಯಾರ್ 2019 ಇಸ್ವೆಚಾ ಎಲಿಸಾಂವಾತ್ ಆಪ್ಲ್ಯಾ ಸಂಪ್ರಾದಾಯಿಕ್ ವೋಟ್ ಬ್ಯಾಂಕಾಂಕ್ ಥೋಂಡ್ ದಾಕಾಂವ್ಕ್ ಜಾಯ್ನಾ ಮ್ಹುಣ್ ತಾಂಕಾಂ ಕಳ್ಳೆಂ . ಮುಕ್ಲ್ಯಾ ಪಾಂಚ್ ವರ್ಸಾಂ ಭಿತಾರ್ ಹ್ಯೊ ಕಾರ್ಯಾಸೂಚಿ , ಕಶೆಂ ಪುರಾ ಜಾರಿ ಕರ್ಯೇತ್ ಮ್ಹುಣ್ ನಾಗ್ಪೂರಾಚಾ ತಾಂಚಾ ಹೆಡ್ಡ್ ಒಫಿಸಾಂತ್ ತಾಣಿಂ ಸಬಾರ್ ಯೋಜನಾಂ ಕರುಂಕ್ ತಾಣಿಂ ಆರಂಭ್ ಕೆಲಿಂ . ತಾಂತ್ಲೆಂ ಏಕ್ ಯೋಜನ್ , “ಘರ್ ವಾಪ್ಸಿ” ..!

ಕಿತೆಂ ಆನಿಂ ಕಿತ್ಯಾಕ್ ಹೆಂ ಘರ್ ವಾಪ್ಸಿ ?

282  ಬಸ್ಕಾ ಮೆಳ್ಳ್ಯಾತ್ ಮ್ಹುಣ್ ಏಕ್ ಚ್ ಪಾವ್ಟಿಂ ಶೀದಾ ಮತಾಂತರ್ ನಿಶೇಧ್ ಕಾನೂನು ಹಾಡುಂಕ್ ಜಾತಾ ವೇ ? ಇತ್ಲ್ಯಾ ಕೀ ಪ್ರಧಾನಿ ಪಟ್ಟರ್ ಬಸ್ಚಾ ಪಯ್ಲೆಂ “ಸಾಹೇಬಾ” ನ್ ಸಾಂಗ್ ಲ್ಲೆಂ ಆಸಾ ನೇ ? ಸಬ್ ಕೇ ಸಾಥ್ , ಸಬ್ ಕಾ ವಿಕಾಸ್ ಮ್ಹುಣ್ ..! ದೆಕುನ್ ಹಾಕಾ ಏಕ್ ಪರ್ಯಾಯ್ ರೀತಿಚಿ ಗರ್ಜ್ ಪಡ್ಲಿ. ಚಾಣಾಕ್ಯಾಚೆಂ ಸಾಮ , ದಾನ ಉಪಾಯ್ ಪುರಾ ಹಾಂಗಾ ಕಾಮಕ್ ಯೆನಾಂತ್ ಮ್ಹುಣ್ ತಾಂಕಾಂ ಕಳ್ಳೆಂ. ಮಾಗಿರ್ ಆಸ್ ಲ್ಲೆ ಬೇದ ಆನಿಂ ದಂಡ ಉಪಾಯಾಂಕ್ ಪ್ರಯತ್ನ್ ಕೆಲ್ಯಾರ್ ಯೀ , ವಡ್ಲೊ ವಿವಾದ್ ಜಾವ್ನ್ ಸಾಹೇಬಾಚಾ ವರ್ಚಸ್ವೆಕ್ ದಕ್ಕೊ ಆಯ್ಲ್ಯಾರ್ ಅನ್ಯೇಕ್ ವಡ್ಲೊ ಸಮಸ್ಸೊ ನೇ? ಇತ್ಲ್ಯಾ ಕೀ ಮನಮೋಹನ್ ಸಿಂಗಾಚಾ ಕಾಳಾರ್ ಕಂದಮಾಲ್ ತಶೆಂ ಮಂಗ್ಳೂರಾಂತ್  ಕಿರಿಸ್ತಾವಾಂ ವಯ್ರ್ ಬೇದ ಆನಿಂ ದಂಡ ವಾಪಾರ್ಲ್ಯಾ ವೇಳಾರ್ ತೊ ಅಂತರಾಷ್ರೀಯ್ ಮಟ್ಟಾರ್ ವಡ್ಲೊ ವಿಷಯ್ ಜಾಲ್ಲೊ. ನ್ಯೂಕ್ಲಿಯರ್ ವ್ಯವಹಾರಕ್ ಮ್ಹುಣ್ ಪ್ರಾನ್ಸಕ್ ಗೆಲ್ಲ್ಯಾ ಮನಮೋಹನ್ ಸಿಂಗಾಕ್ , ತೆನ್ನಾಚೊ ಫ್ರೆಂಚ್ ಅಧ್ಯಕ್ಷ್ ತಶೆಂ ಯೆರೋಪಿಯಾನ್ ಎಕ್ವೊಟಾಚೊ ಮುಖೆಲಿ ಜಾವ್ನ್ ಆಸ್ ಲ್ಯಾ ನಿಕೊಲಾಸ್ ಸಾರ್ಕೊಜಿನ್  ಸೊಲ್ಲ್ಯಾಕ್ ದಸ್ಕತ್ ಗಲ್ಚಾ ಪಯ್ಲೆಂ “stop massacre of Christians in India” ಮ್ಹುಣ್ ಉಗ್ತ್ಯಾನ್ ಸಾಂಗ್ ಲ್ಲೆಂ ಆನಿಂ ಮನಮೋಹನ್ ಸಿಂಗ್ ಹಿಂ ಘಡಿತಾಂ “acts of national shame” ಮ್ಹುಣ್ ಒಪ್ವೊನ್ ಗಾವಾಕ್ ಪಾಟಿಂ ಆಯಿಲ್ಲೊ.

ಅಮ್ಚೊ ಸಾಹೇಬ್ ಸಾತ್ವ್ಯಾ ರೇಸ್ ಕೋರ್ಸಾಚಾ ಆಪ್ಲ್ಯಾ ದಪ್ತಾರಾಕ್ ಗೆಲ್ಲ್ಯಾ ಉಪ್ರಾಂ ಹೆಣೆಂ –ತೆಣೆಂ ಮ್ಹುಣ್ ವಿದೇಶಾಂಕ್ ಪಯ್ಣ್ ಕರ್ನ್ ಂಚ್ ಆಸ್ತಾ. ಥಂಯ್ ಭಾಷಣಾಂ ದೀವ್ನ್ ಆಸ್ತಾ , ಉದ್ಯಮಿಂ ಚಿ ಭೇಟ್ ಕರ್ನ್ ಆಸ್ತಾ ಆನಿಂ “ಮೇಕ್ ಇನ್ ಇಂಡಿಯಾ” ಮ್ಹುಣ್ ದೋಲ್ ಬಡವ್ನ್ ಯೀ ಆಸ್ತಾ. ತಸ್ಲ್ಯಾ ವೇಳಾರ್ “stop massacre of Christians in India” ಮ್ಹುಣ್ ತಾಂಚೆಂ ಮಧೆಂ ಕೊಣೆಂ ಯೀ ಸಾಂಗ್ಲ್ಯಾ ಸಾಹೇಬಾಚಿ ಮರ್ಯಾದ್ ಚಲ್ತಾ ನೇ. ದೆಕುನ್ ಹೆ ಪುರಾ ಚಾಣಕ್ಯಾಚೆ ಉಪಾಯ್ ನಾಕಾತ್ , ತಾಚಾ ಬದ್ಲಾ ದುಸ್ತ್ರೊ ಚ್ ಏಕ್ ಉಪಾಯ್ ಚತುರಾಯೆನ್ ಜಾರಿ ಕರುಂಕ್ ತಾಂಣಿಂ ಏಕ್  ಯೋಜನ್ ಗಾಲೆಂ. ತೆಂಚ್ ಹೆಂ ಘರ್ ವಾಪ್ಸಿ ..!!!

ಇತ್ಲ್ಯಾ ಕೀ ಹೆಂ ’ ಘರ್ ವಾಪ್ಸಿ’ ಮ್ಹುಳ್ಯಾರ್ ಯೀ ಕಿತೆಂ ? ಸಂಘ್ ಪರಿವಾರಾಂಚಾಂ ಸಂಘಟನಾಂ ಪ್ರಕಾರ್ , ಹಿಂದೂ ಧರ್ಮ್ ಸಾಂಡುನ್ , ಕಿರಿಸ್ತಾವಾಂಕ್ ತಶೆಂ ಮುಸ್ಲಿಮ್ ಧರ್ಮಾಂಕ್ ಕನ್ವೆಡ್ತಾರ್ ಜಾಲ್ಲ್ಯಾಂಕ್ , ತಾಂಚೆ ಖುಶೆ ಪ್ರಕಾರ್ ಮೂಳ್ ಧರ್ಮಾಕ್ ಪಾಟಿಂ ಹಾಡ್ಚಿ ಪ್ರಕ್ರಿಯಾ ಆನಿಂ ತ್ಯಾ ಉದ್ದೇಶಾಕ್ ಮ್ಹುಣ್ ಕರ್ಚಿ ಧಾರ್ಮೀಕ್ ವಿಧಿ ರೀತ್. ಮುಸ್ಲಿಮ್ ತಶೆ೦ ಕಿರಿಸ್ತಾಂವ್ ಮ್ಹುಣ್ ತಾಣಿಂ ಮ್ಹುಳ್ಯಾರ್ ಯೀ , ಹ್ಯಾ ಯೋಜಾನಾಚೆ ಪ್ರಮುಖ್ ನಿಶಾನಿ ಕಿರಿಸ್ತಾಂವಾಂ ವಯ್ರ್ ಮ್ಹುಳ್ಳೆಂ ತೆಂ ಖರೆಂ. ಉತ್ತರ್ ಪ್ರದೇಶಾಂಚಾ ಅಗ್ರಾಂತ್ ಥಾವ್ನ್ ಆರಂಭ್ ಜಾಲ್ಲೆಂ ಹೆಂ ಕಾರ್ಯೆಂ ಉತ್ತರ್ ಭಾರತಾಂಚಾ ಸಬಾರ್ ರಾಜ್ಯಂತ್ ತಶೆಂ ದಕ್ಷಿಣ್ ಭಾರತಾಚಾ ಕರ್ನಾಟಕ್ ತಶೆಂ ಕೇರಳ್ ರಾಜ್ಯಾಂತ್ ಯೆದೊಳ್ ಚ್ ಜ್ಯಾರಿ  ಜಾಲಾಂ ಆನಿಂ ಪುಡ್ಲ್ಯಾ ದಿಸಾನಿಂ ಸಗ್ಳ್ಯಾ ಭಾರತಾಂತ್ ಹೆಂ ಚಾಲು ಆಸ್ತೆಲೆಂ ಮ್ಹುಣ್ ಸಂಘಟಕನಿಂ ಕಳಯ್ಲ್ಯಾಂ.

ಪುಣ್ ತಿತ್ಲೆಂಚ್ ಜಾಲೆಂ ಜಾಲ್ಯಾರ್ ಯೀ ವ್ಹಡ್ ವಿವಾದ್ ಜಾತೊ ನಾ. ಘರಾ ಪಾಟಿಂ ಆಯ್ಲ್ಯಾಂಕ್ ಆದಾರ್ ಕಾರ್ಡ್ , ಬಿಪಿಎಲ್ ಕಾರ್ಡ್ ಪುರಾ ದಿತಾ ಮಾತ್ರ್ ನ್ಹಂಯ್ ಕಿರಿಸ್ತಾವಾನಿಂ ಘರಾ ಪಾಟಿಂ ಆಯ್ಲ್ಯಾರ್ ದೋನ್ ಲಾಕ್ ಆನಿಂ ಮುಸ್ಲಿಮಾನಿಂ ಪಾಟಿಂ ಆಯ್ಲ್ಯಾರ್ ಪಾಂಚ್ ಲಾಕ್ ದಿತಾ ಮ್ಹುಣ್ ಭುಲವ್ಣಿ ಪರ್ಯಾಂತ್ ದೀಂವ್ಕ್ ಲಾಗ್ಲ್ಯಾತ್. ಹಾಚೊ ಪ್ರಮುಖ್ ಉದ್ದೇಶ್ ರಾಷ್ಟ್ರ್ ಮಟ್ಟಾರ್ ಏಕ್ ದಾಕ್ಟೊ ವಿವಾದ್ ಕರಿಜೆ , ಹಾಚಾ ವಯ್ರ್ ಚರ್ಚಾ ಚಲಿಜೆ. ಮಾಗಿರ್ ಬಳ್ವಂತ್ ತಶೆಂ ಭುಲವ್ಣಿ ದೀವ್ನ್ ಸಂಘ್ ಪರಿವಾರಿಚೆ ಮತಾಂತರ್ ಕರ್ತಾತ್ ಮ್ಹುಣ್ ಕಿರಿಸ್ತಾವಾನಿಂ , ವಿರೋದ್ ಪಾಡ್ತಿನಿಂ ಬೊಬೊ ಘಾಲಿಜೆ. ಆಶೆಂ ಏಕ್ ಉಜೊ ಪೆಟಾವ್ನ್ ಆಸಾತ್ ತೆ. ಅತಾಂ ಉಜೊ ಪೆಟಾವ್ನ್ ಆಸಾತ್ ಮಾತ್ರ್. ಪುಣ್ ಹೊ ಉಜೊ ಫಾಲ್ವೊಂಕ್ ಯೀ ಪರಿಹಾರ್ ತಾಂಚೆ ಕಡೆ ಚ್ ಆಸಾ. ತೊ ಮ್ಹುಳ್ಯಾರ್ ಮತಾಂತರ್ ನಿಶೇಧ್ ಕಾನೂನ್ .  ಅಖ್ರೇಕ್ ತಾಣಿಂ ಸಾಂಗ್ಚೆಂ ,ಹೊ ವಿವಾದ್ ಪುರಾ ಕಿತ್ಯಾಕ್ ? ಆಮಿಂ ಏಕ್ ಮಜ್ಬೂತ್ ಮತಾಂತರ್ ನಿಶೇಧ್ ಕಾನೂನ್ ಹಾಡ್ಯಾಂ. ಅಮಿಂ ಯೀಂ ಕೊಣಾಯ್ಕೀ “ಘರಾ ಪಾಟಿಂ” ಹಾಡಿನಾ ಆನಿಂ ತುಮಿ ಯೀಂ ಮತಾಂತರ್ ಕರಿನಾಕತ್ . ಮಾಗಿರ್ ಸಮಸ್ಸ್ಯೆ ಚ್ ಆಸ್ಚೆ ನಾಂತ್ ..! ಏಕಾಚ್ಚ್ ಫಾತ್ರಾಂತ್ ದೋನ್ ಸುಕ್ಣಿಂ ಮಾರ್ಚಿ ಮಾಸ್ಟರ್ ಐಡಿಯಾ ತಾಂಚಿ ..!!

ಚಡ್ಲೊ ಗೀ ಭಾರತಾಂತ್ ಕಿರಿಸ್ತಾಂವ್ ಜಣ್ ಸಂಖೊ ಆನಿಂ ಉಣೆಂ ಜಾಲೊ ಹಿಂದ್ವಾಂಚೊ ?

ಆಜ್ ಕಾಳ್ ಇಂಡಿಯಾಂತ್ ಸಂಘ್ ಪರಿವಾರಾಚೆ ಮುಖೆಲಿ ತಶೆಂ ತಾಂಕಾಂ ಸಂಬಂದ್ದಿ ಜಾಲ್ಲೆ ಸೊಮ್ಗುಳ್ ,  ಹಿಂದ್ವಾಂಚೊ ಸಂಖೊ ದಿಸಾನ್ ದೀಸ್ ಉಣೊಂ ಜಾತಾ , ದೆಕುನ್ ಹರ್ಯೇಕಾ ಹಿಂದ್ವಾಚಾಂ ಸ್ತ್ರಿಯೆನಿಂ , ಚಾರ್ , ಪಾಂಚ್ , ಧಾ ಭುರ್ಗಿಂ ಜಲ್ಮಾಯ್ಜೆ ಮ್ಹುಣ್ ಹುಕುಮ್ ದೀವ್ನ್ ಆಸಾತ್. ಪಾಪಾ ಪ್ರಾನ್ಸಿಸ್ಕೋ  ಕಥೊಲಿಕಾಂಕ್ ಮ್ಹುಣ್ತಾ , ತುಮಿಂ ಸಂಸ್ಯಾಚಾ ಪಿಲಾಂ ಬರಿಂ ಭುರ್ಗಿಂ ಜಲ್ಮಯ್ನಾಕಾ ಮ್ಹುಣ್ . ತುಮ್ಕಾಂ ಖಳಿತ್ ಆಸೊಂಕ್ ಪುರೊ , ಪಾಪಾ ಪ್ರಾನ್ಸಿಸ್ಕೋ ಶೆಂಭರಾಂಚಾ ಕೀ ಚಡ್ ರಾಷ್ಟ್ರಂತ್ಲ್ಯಾ ಕಥೊಲಿಕ್ ಸಭೆಚೊ ಅದಿಫತಿ. ಶೆಂಬೊರಾಂ ಕೀ ಚಡ್ ರಾಷ್ಟ್ರನಿಂ ಆಸ್ಚೆ ಕಥೊಲಿಕಾಂಚೊ ಸಂಖೊ ಆನಿಂ ಫಕತ್ ಇಂಡಿಯಾಂತ್ ಆಸ್ಚಾ ಹಿಂದ್ವಾಂಚೊ ಸಂಖೊ ಉಣ್ಯಾರ್ ಉಣೆಂ ಸಾಮ್ಕ್ಯಾ ಪ್ರಮಾಣಾರ್ ಆಸಾ. ಆಜ್ ಫಕತ್ ಇಂಡಿಯಾಂತ್ ಏಕ್ ಬಿಲಿಯಾನ್ ವಯ್ರ್ ಹಿಂದೂ ಧರ್ಮ್ ಪಾಳ್ಚೆ ಆಸಾತ್ . ತುಮಿಂ 2011 ಚೆಂ ಜಣಗಣತಿಕ್ ತುಲನ್ ಕೆಲ್ಯಾರ್ , ಹಿಂದ್ವಾಚೊ ಸಂಖೊ , 80 ಠಕ್ಕ್ಯಾಚಾ ಕೀ ಚಡ್ ಆಸಾ. ಕಿರಿಸ್ತಾಂವ್ ಸಂಖೊ ಫಕತ್ 2.3 % ಚಾ ಕೀ ಉಣೊ. ಅಮ್ಕಾಂ ಸ್ವಾತಂತ್ರ್ಯ್ ಮೆಳ್ಳ್ಯಾ ಉಪ್ರಾಂತ್ ಗೆಲೆತ್ಯಾ ವರ್ಸಾನಿಂ ಕಿರಿಸ್ತಾಂವ್ ಜಣ್ ಸಂಖ್ಯಾಚೊ ಪ್ರಮಾಣ್ ಉಣೊಂ ಜಾವ್ನ್ಂ ಚ್ ಆಸಾ.

ಹಿಂದ್ವಾಚೊಂ  ಸಂಖೊ ಉಣೆಂ ಜಾತಾ ಮ್ಹುಣ್ ಕೋಣೆ ಯೀಂ ಸಾಂಗ್ಲ್ಯಾರ್ ಆನಿಂ ಕೋಣೆ ಯೀಂ ತೆಂ ಪಾತ್ಯೆಲ್ಯಾರ್ ತೊ ಹ್ಯಾ ಸಂಸಾರಾಚೊ ವಡ್ಲೊ ಏಕ್ ಜೋಕ್. ! ಕಿತ್ಯಾಕ್ ಮ್ಹುಣ್ ತುಮ್ಕಾಂ ಸಾಂಗ್ತಾಂ . ತುಮ್ಕಾಂ ಇಂಡಿಯಾ ಆನಿಂ ಆಸ್ಟ್ರೇಲಿಯಾಚೊ ವಿಸ್ತಾರ್ ಕಿತ್ಲೊ ಅಸಾ ಮ್ಹುಣ್ ಖಳಿತ್ ಅಸಾ ಗೀ ? ವಿಸ್ತಾರಾಯೆಚಾ ಪ್ರಕಾರ್ ಪಳೆಯ್ಲ್ಯಾರ್ , ಆಸ್ಟ್ರೇಲಿಯಾ ಆಮ್ಚಾ ಕೀ ಲಗ್ಭಗ್ ತೀನ್ ವಾಂಟೆ ವ್ಹಡ್ ಅಸಾ . ಇತ್ಲ್ಯಾ ವಡ್ಲ್ಯಾ ಆಸ್ಟ್ರೇಲಿಯಾಂತ್ ಆಸ್ಲ್ಯಾ ಸಗ್ಳ್ಯಾ ಜಣ್ ಸಂಖ್ಯಾಚಾ ಕೀ ಚಡ್ , ಜಣ್ ಸಂಖ್ಯಾಚೆಂ ಉತ್ಪಾದಾನ್ ಹರ್ಯೇಕಾ ವರ್ಸಾ ಇಂಡಿಯಾ ಚಾ ಫಕತ್ ಹಿಂದ್ವಾ ಥಾವ್ನ್ ಜಾತಾ ಮ್ಹುಣ್ ತುಮಿ ಪಾತ್ಯೆತಾತ್ ಗೀ ..!!??

 ಘರ್ ವಾಪ್ಸಿ ಕ್ ಆಮಿಂ ಬಿಯವ್ನ್ ರಾವಾಜೆ ಗಿ ?

ಬಿಯೆಂವ್ಚಿ ಖಂಡಿತ್ ಗರ್ಜ್ ಮ್ಹಕಾ ದಿಸಾನಾ. ತಿ ತಾಂಚಿಂ ಏಕ್ ರಣನೀತಿ . ಚಾಣಾಕ್ಯಾಚೆಂ ದಂಡ ಆನಿಂ ಭೇಧ ಪರತ್ ಪರತ್ ಅಮ್ಚೆ ವಯ್ರ್ ಪ್ರಯೋಗ್ ಕೆಲ್ಯಾರ್ ಆಮಿಂ ಜರೂರ್ ಪ್ರತಿಭಟನ್ ಕರ್ಯೇತ್. ಸಾಂಗ್ ಲ್ಯಾ ಬರಿ ಘರಾ ಪಾಟಿಂ ಚಲ್ಚೆಂ ಜಾಲ್ಯಾ ರೀ ಕೊಣೆಂ ?

ಅಮಿಂ ಬೈಬಲ್ ವಾಚ್ ಲ್ಯಾರ್ ಸಾಂ ಸ್ತೇಪಾನಾಕ್ ಕಶೆಂ ಮಾಡ್ತಿರ್ ಮಾರ್ಲೆಂ ಮ್ಹುಣ್ ಅಮ್ಕಾಂ ಜರೂರ್ ಖಳಿತ್ ಆಸಾ. ಸುರ್ವಿರ್ಲ್ಯಾ ಪವಿತ್ರ್ ಸಭೆಂತ್ ಜೆಜುಚಾ ಶಿಸಾಂಕ್ ಭಿರಾಂಕುಳ್ ರೀತಿನ್ ಮಾಡ್ತಿರ್ ಮಾರ್ ಲ್ಲೆಂ . ತೆ ಪುರಾ ಅದಿಕ್ರತ್ ಮಾಡ್ತಿರ್. ತರೀ ದೋನ್ ಹಜಾರ್ ವರ್ಸಾಂ ಉಪ್ರಾಂತ್ ಯೀ  ಸಬಾರ್ ಖರೆ ಕ್ರಿಸ್ತಾಚೆ ಪಾಟ್ಲಾವ್ದಾರಿ ಆಸಾತ್. ತುಮಿಂ ಇರಾಕ್ -ಸಿರಿಯಾಂತ್  ಆಸ್ ಲ್ಯಾ ತ್ಯಾ ISIS ಉಗ್ರಾನಿಂ ಕಿತ್ಲೆಂ ದಗ್ದಿಲ್ಯಾ ಯೀ , ಕಿರಿಸ್ತಾಚಾ ಕೀ ಚಡ್ ಹಿಂಸಾ ದೀವ್ನ್ ಖುರ್ಸಾಯ್ಲ್ಯಾ ರೀ ಧರ್ಮ್ ಸೊಡಿನಾತ್ಲೆ ಅನಧಿಕ್ರತ್ ಮಾಡ್ತಿರ್ ಆಮ್ಚೆ ಮದೆಂ ಸಬಾರ್ ಆಸಾತ್.  ಪಯ್ಸ್ ಚಲ್ಚೆಂ ಕಿತ್ಯಾಕ್ ? ಟಿಪ್ಪು ಚಾ ಕಾಳಾರ್ ಯೀ , ಕಿತ್ಲ್ಯೊ ಹಿಂಸಾ ದಿಲ್ಯಾರ್ ಯೀ ಆಮ್ಚಾ ಚಡಾವತ್ ಮಾಲ್ಘಡ್ಯಾನಿಂ ಕ್ರಿಸ್ತಾಕ್ ಸಾಂಡುಂಕ್ ನಾ ನೇ ? ಮ್ಹುಳ್ಯಾ ರ್ ತುಕಾ ದೋನ್ ಲಾಕ್ ನ್ಹಂಯ್ ಚಾಳಿಸ್ ಕೊರೊಡ್ ದಿಲ್ಯಾರ್ ಯೀ  ಯಾ ಕಿತ್ಲಿ ಹಿಂಸಾ ದೀವ್ನ್ ದಗ್ದಿಯ್ಲ್ಯಾರ್ ಯೀ ನೀಜ್ ಕಿಸ್ತಾಚೆ ಪಾಟ್ಲಾವ್ದಾರಿ ಧರ್ಮ್ ಸೊಡಿನಾಂತ್. ಸವಾಲ್ ಮ್ಹುಳ್ಯಾರ್ ಅಮಿಂ ತಾಂಕಾಂ ಸುಲಾಭಾಯೆನ್ ಧಗ್ದುಂಕ್ ಸೊಡಿಂಕ್ ನುಜೊ ...!! ತಿತ್ಲೆಂಚ್ ..!!

ಅಖೇರ್ ಕರ್ಚಾ ಪುಡೆಂ ತುಮ್ಕಾಂ , ICDS ಫೈನಾನ್ಸ್ ಆನಿಂ ICICI ಬ್ಯಾಂಕಾಚೆಂ ಏಕ್ ಸ್ವಾರಸ್ಯ್ ಕಾರಿ ಘಡಿತ್ ಸಾಂಗ್ತಾಂ . ಥೊಡ್ಯಾ ವರ್ಸಾಂ ಆದಿಂ ಮಹಾರಾಷ್ಟ್ರ ಫೈನಾನ್ಸ್ ಬುಡ್ತಾನಾ , ಲೋಕ್ ICDS ಫೈನಾನ್ಸ್ಂತ್ ಆಸ್ ಲ್ಲೆ ಪಯ್ಸೆ ಪುರಾ ಪಾಟಿಂ ಕಾಡುಂಕ್ ಲೈನ್ ರಾವ್ ಲ್ಲೊ. ಹೆಂ ಟ್ರೆಂಡ್ ಮುಕಾರ್ ತಾಂಕಾಂ ನಿಯಂತ್ರಣ್ ಕರುಂಕ್ ಜಾಯ್ನಾಸ್ತಾನಾ , ತೆಂ ಯೀ ಬುಡ್ಲೆಂ ..!

2003 ಇಸ್ವೆಂತ್ ICICI ಬ್ಯಾಂಕ್ ದಿವಾಳಿ ಜಾಲಾಂ ಗುಜ್ರಾತಾಚಾ ಸೂರಾತ್ , ರಾಜ್ ಕೋಟಾಂ ಏಕ್ ರಾತಿಂ ಗಾಬ್ ಪ್ರಸಾರ್ ಜಾಲ್ಲಿ. ತ್ಯಾ ರಾತಿಂ ಲೊಕಾನಿಂ ಆಸ್ ಲ್ಯಾ ATM ಥಾವ್ನ್ ICICI ಬ್ಯಾಂಕಾಂತ್ ಆಸ್ ಲ್ಲೆ ಪಯ್ಸೆ ಪುರಾ ಪಾಟಿಂ ಕಾಡುಂಕ್ ಆರಂಭ್ ಕೆಲ್ಲೆಂ. ದುಸ್ತ್ರ್ಯಾ ದಿಸಾ ಥಾವ್ನ್ ಸಗ್ಳ್ಯಾ ತ್ಯಾ ಬ್ಯಾಂಕಾಚಾ ಬ್ರಾಂಚಾನಿಂ  ಲೋಕ್ ಪಯ್ಸೆ ಪಾಟಿಂ ಕಾಡುಂಕ್ ಲೈನಿರ್ ರಾವ್ ಲ್ಲೊ. ಅಚಾನಾಕ್ ಆಯ್ಲ್ಯಾ ಒತ್ತಡಾಂತ್ , ಥೊಡೆ ಕಡೆ ಕ್ಯಾಷ್ ಪಾಟಿಂ ದೀಂವ್ಕ್ ಬ್ಯಾಂಕಾಕ್ ಕಷ್ಟ್ ಜಾಲಿ. ತ್ಯಾ ವೆಳಾರ್ ತಿ ಗಾಬ್ , ಸಗ್ಳ್ಯಾ ದೇಶಾಂತ್ ಪ್ರಸಾರ್ ಜಾವ್ನ್ , ಲೋಕ್ ಸಕ್ಕಡಿ ICICI ಬ್ಯಾಂಕಾ ಥಾವ್ನ್ ಪಯ್ಸೆ ಪಾಟಿಂ ಕಾಡುಂಕ್ ಸನ್ನದ್ ಜಾಲೊ . ತಕ್ಷಣ್ ಬ್ಯಾಂಕಾನ್ , ಅಮಿಂ ಬುಡಾಂವ್ಕ್ ನಾಂವ್ , ತುಮ್ಚೆ ಪಯ್ಸೆ ಕೆನ್ನಾಯ್ ಪಾಟಿಂ ಕಾಡ್ಯೇತ್ ಮ್ಹುಣ್ ಸಗ್ಳ್ಯಾ ಬ್ಯಾಂಕಾನಿಂ ಆನಿಂ ATM 0ಂತ್ ಜಾಯ್ ತಿತ್ಲೆ ಕ್ಯಾಷ್  ತುರ್ತಾನ್ ಮೆಳ್ಚಾ ಬರಿ ಕೆಲೆ. ಕೋಣ್ ಪುರಾ ಪಯ್ಸೆ ಪಾಟಿಂ ಕಾಡುಂಕ್ ಆಯ್ಲೆ ಪಳೆ , ತಾಂಕಾಂ ಪುರಾ ಪಯ್ಸೆ ಸುಲಾಭಾಯೆನ್ ಮೆಳ್ಳೆ. ತಶೆಂ ಜಾವ್ನ್ ಲೋಕಾಕ್ ಬ್ಯಾಂಕಾ ವಯ್ರ್ ಪಾತ್ಯೆಣಿ ಆಯ್ಲಿ. ಬ್ಯಾಂಕ್ ಸುರಕ್ಷಿತ್ ಜಾವ್ನ್ ಉರ್ಲೆಂ . ಅತಾಂ ತೆಂ ಇಂಡಿಯಾಂತ್ ಖಾಸ್ಗಿ ಕ್ಶೇತ್ರಾಂತೆಂ ಪ್ರಮುಖ್ ಬ್ಯಾಂಕ್ ..!

ಘರ್ ವಾಪ್ಸಿ ವಿಷ್ಯಾಂತ್ ಯೆತಾನಾ , ಆಮ್ಚಿ ರಣನೀತಿ ಕೆನ್ನಾಂಯ್ ICICI ಬ್ಯಾಂಕಾ ಬರಿ ಜಾಯ್ಜೆ. ಖಂಯ್ ಪುಣೀ ಅಮಿಂ ICDS ಫೈನಾನ್ಸಾಂ ಬರಿ ಕೆಲ್ಯಾರ್ , ಮಾಗಿರ್ ಅಮ್ಚೊ ದೆಸ್ವಾಟ್ ಜಾಂವ್ಚೊ ಖಂಡಿತ್ ..!!

     
 ******************************************************

ಫೇಸ್‌ಬುಕ್ ಅಫ್ರಾದ್ ಆನಿ ಅಡ್ತಿಗ್ 66 A

www.kittall.com

                    ಹೆಂ ಲೇಖನ್ ವಾಚುಂಕ್ ಹಾಂಗಾ ಕ್ಲಿಕ್ ಕರಾ ....

Ice cream Sandwich , Jelly Bean ಸವೆಂ ಅಂಡ್ರೊಯಿಡಾಚಿ ಗೊಡ್ಸಾಣ್ ...!!

Naman Ballok Jesu- June 2013

ಗೆಲೆತ್ಯಾ ಥೊಡ್ಯಾ ದಿಸಾಂ ಆದಿಂ International Data Corporation (IDC) ನ್ ಹ್ಯಾ ವರ್ಸಾಚಾ ಪಯ್ಲ್ಯಾ ತೀನ್ ಮಹಿನೆ ಆವ್ದೆಂತ್ ವಿಕೊನ್ ಗೆಲ್ಲ್ಯಾ ಮೊಬೈಲ್ ಪೊನಾಂ ವಿಶಿಂ ಏಕ್ ವರ್ದಿ ದಿಲ್ಲಿ. ಹಿ ವರ್ದೆ ಪ್ರಕಾರ್ , ಹ್ಯಾ ಕಾಳಾರ್ 162 .1 ಮಿಲಿಯಾನ್ ಅಂಡ್ರೊಯಿಡ್ ಫೊನಾಂ, 37 .4 ಮಿಲಿಯಾನ್ iOS ಫೊನಾಂ ವಿಕೊನ್ ಗೆಲಿಂ. Windows ಫೊನಾಂ , ಬ್ಲ್ಯಾಕ್ ಬೆರಿ, Symbian ಫೊನಾಂಚೆಂ ಅಂಡ್ರೊಯಿಡಾ ಮುಖಾರ್ ಕಾಂಯ್ ಚಲೊಂಕ್ ಚ್ ನಾ. ಶೆಂಬರ್ ಫೊನಾಂತ್ 75 ಅಂಡ್ರೊಯಿಡ್ ವಿಕ್ರ್ಯಾಪ್ ಜಾಲ್ಯಾರ್ 17 .3% iOS ಫೊನಾಂ ವಿಕೊನ್ ಗೆಲಿಂ. ಹ್ಯಾ ದೊನೀಂ ಫೊನಾಂಚೊ ಮಾರ್ಕೆಟ್ ವಾಂಟೊ 92.3 % ..! ತಶೆಂ ಮ್ಹುಳ್ಯಾರ್ ಸ್ಮಾರ್ಟ್ ಫೋನಾಚಾ ಮಾರ್ಕೆಟೆಂತ್ ಅಂಡ್ರೊಯಿಡ್ ಚ್ ಲೀಡರ್ ... ಇತ್ಲ್ಯಾಕೀ ಹ್ಯಾ ಅಂಡ್ರೊಯಿಡ್  ಮ್ಹುಳ್ಯಾರ್ ಕಿತೆಂ ಆನಿಂ ಹಾಂತುಂ ಕಾಲೆಂ ಆಸಾ. ಕಿತ್ಯಾಕ್ ಇತ್ಲ್ಯಾ ಉಣ್ಯಾ ಕಾಳಾರ್ ಹೆಂ ಇತ್ಲೆಂ ಲೊಕಾಮೊಗಾಳ್ ಜಾಲೆಂ ...?

ಆಜ್ ತುಮ್ಚಾ ಸಬಾರಾಂ ಕಡೆ ಅಂಡ್ರೊಯಿಡ್ ಸ್ಮಾರ್ಟ್ ಫೊನಾಂ ಆಸೊಂಕ್ ಪುರೊ. ಅಂಡ್ರೊಯಿಡ್  ಏಕ್ ಫಕತ್ ಏಕ್ ಒಫರೇಟಿಂಗ್ ಸಿಸ್ಟಮ್. ಹೆಂ ಗೂಗಲಾಚೆಂ ಉತ್ಪನ್ನ್. ಆಜ್ ತುಮ್ಚಾ Samsung , Sony , HTC ...ತಸಲ್ಯಾ ಫೊನಾನಿಂ ಚಡಾವತ್ ಜಾವ್ನ್ ಅಂಡ್ರೊಯಿಡ್ ಆಸ್ತಾ. ಹೆಂ ಇತ್ಲೆಂ ಲೊಕಾಮೊಗಾಳ್ ಜಾಂವ್ಕ್ ಪಯ್ಲೆಂ ಕಾರಣ್ ಮ್ಹುಳ್ಯಾರ್ ಹೆಂ ಪುಂಕ್ಯಾಕ್ ಮೆಳ್ತಾ . ತಿತ್ಲೆಂ ಚ್ ನ್ಹಂಯ್ ಹೆಂ open source .! ತಶೆಂ ಜಾಲ್ಯಾನ್ ಹಾರ್ಡ್ ವೇರ್ ಕಂಪ್ಣೆಂಕ್ ಉಣ್ಯಾ ಮೊಲಾಕ್ ಸ್ಮಾರ್ಟ್ ಫೋನಾಂ ಉತ್ಪನ್ನ್ ಕರುಂಕ್ ಸಾಧ್ಯ್ ಜಾತಾ. ಹಾಚೊ ಭರ್ಪೂರ್ ಫಾಯ್ದೊ ಉಟಾಯ್ಲೊ Samsung ಕಂಪ್ಣೆನ್ . ಹಾಂಚಿಂ ಅಂಡ್ರೊಯಿಡ್ ಫೊನಾಂಚಿ ಏಕ್ ಸಾಂಕಾಳ್ ಆಯ್ಲಿ ಪಳೆ, ಫಕತ್ ತಾಂಚಿಂ ಫೊನಾಂ ಮಾತ್ರ್ ಲೊಕಾಮೊಗಾಳ್ ಜಾಂವ್ಕ್ ನಾಂತ್ , ಅಂಡ್ರೊಯಿಡಾ ಕ್ ಯೀ ಲೊಕಾಮೊಗಾಳ್ ಕೆಲೆಂ. ಆಜ್ ಅಂಡ್ರೊಯಿಡ್ ಫೊನಾಂಕ್ Samsung ಚ್ ಲೀಡರ್. ಅಂಡ್ರೊಯಿಡಾ ವರ್ವಿಂ Windows ಫೊನಾಂ , ಬ್ಲ್ಯಾಕ್ ಬೆರಿ, Symbian ಫೊನಾಂಕ್ ವಡ್ಲೊ ಮಾರ್ ಪಡ್ಲೊ. Apple ಚಾ iPhone ಮಾರ್ಕೆಟ್ ಯೀ ಅಂಡ್ರೊಯಿಡಾ ಮುಖಾರ್  ದಿಸಾನ್ ದೀಸ್ ದೆವುಂನ್ ಯೇವ್ನ್ ಆಸಾ ...!

ಅಂಡ್ರೊಯಿಡ್ open source ಜಾಲ್ಲೆ ನಿಮ್ತಿಂ , ಸಬಾರ್ ಅಪ್ಲಿಕೇಷನಾಂ ವಿಕಾಸ್ ಜಾಲ್ಯಾಂತ್ . ಆಜ್ ಗೂಗಾಲಾಚಿ ಅದಿಕ್ರತ್ ಅಂಡ್ರೊಯಿಡ್ ಅಂಗಡ್ Google Play ಂತ್ ಲಗ್ಬಗ್ ಮಿಲಿಯನ್ ಗಟ್ಲೆ ಅಪ್ಲಿಕೇಷನಾಂ ಡೌನ್ ಲೋಡ್ ಕರುಂಕ್ ಮೆಳ್ತಾತ್ . ಥೊಡಿಂ ಮೊಲಾಚಿಂ ಆನಿಂ ಥೊಡಿಂ ಪುಂಕ್ಯಾಕ್. ತುಮ್ಕಾಂ ಚ್ ಅಂಡ್ರೊಯಿಡ್ ಅಪ್ಲಿಕೇಷನಾಂ ವಿಕಾಸ್ ಕರ್ಚಿ ಸೌಲತ್ ಯೀ ಗೂಗಲ್ ದೀವ್ನ್ ಆಸಾ. ಕಶೆಂ ಯೀಂ open source ನೇ ? ತಶೆಂ ಜಾಲ್ಯಾನ್ ತುಮ್ಕಾಂ ತುಮ್ಚಾಚ್ ಅಂಡ್ರೊಯಿಡ್ ಅಪ್ಲಿಕೇಷನಾಂ ವಿಕಾಸಾ ವಯ್ರ್ ಯೀ ಏಕ್ ಹಾತ್ ಪಳವ್ಯೇತ್ . iOS ವಯ್ರ್ ಅಂಡ್ರೊಯಿಡಾ ಕ್ ವಡ್ಲೊ ಫಾಯ್ದೊ ಮ್ಹುಳ್ಯಾರ್ , iOS Apple  ಚಾ ಉತ್ಪನ್ನಾಂಕ್ ಮಾತ್ರ್ ಸೀಮಿತ್ . ಮಾಗಿರ್ ಹೆಂ ಮ್ಹಾರಗ್ ಮಾತ್ರ್ ನ್ಹಂಯ್ ಹಾಚಿಂ ಅಪ್ಲಿಕೇಷನಾಂ ಯೀ ಮ್ಹಾರಗ್ . ಪುಣ್ ಅಂಡ್ರೊಯಿಡ್ ತಶೆಂ ನ್ಹಂಯ್ .. . Samsung, HTC, Sony, Motorola, LG, Huawei, ZTE ಅನಿಂ ಇತರ್ ಸಬಾರ್ ಫೊನಾಂತ್ ಯೀ ಅಂಡ್ರೊಯಿಡ್ ಕಾಮ್ ಕರ್ತಾ. ತಶೆಂ ಜಾಲ್ಯಾನ್ ತುಜೆಂ ಮನ್‌ಜೊಕ್ಚೆಂ ಫೋನ್ ಕಾಣ್ಘೆಂವ್ಕ್ ತುಕಾ ಸ್ವಾತಂತ್ರ್ಯ್ ಆಸಾ. 
ಅಂಡ್ರೊಯಿಡಾಚೆಂ ಆರಂಭ್ ಜಾಲ್ಲೆಂ 2003 ಇಸ್ವೆಂತ್ ಅಮೆರಿಕಾಚಾ ಕ್ಯಾಲಿಪೋರ್ನಿಯಾಂತ್ .  Android, Inc. ಮ್ಹುಳ್ಳಿ ಕಂಪ್ಣಿ ಆರಂಭ್ ಕೆಲ್ಲಿ ಏಕ್ ಚಾರ್ ಜಣ್ ಹವ್ಯಾಸಿ ಐಟಿ ಜಾಣ್ತ್ಯಾನಿಂ ಕ್ಯಾಮೆರಾಕ್ ಏಕ್ ಒಫರೇಟಿಂಗ್ ಸಿಸ್ಟಮ್ ಸೊಧುನ್ ಕಾಡುಂಕ್ ಮ್ಹುಣ್ . ಪುಣ್ ತಾಂತುಂ ತಿತ್ಲೊ ಲಾಭ್ ತಾಂಕಾಂ ದಿಸೊಂಕ್ ನಾ. ದೆಕುನ್ ತಾಣಿಂ ಮೊಬೈಲ್   ಒಫರೇಟಿಂಗ್ ಸಿಸ್ಟಮ್ ಸೊಧುನ್ ಕಾಡುಂಕ್ ಚಡ್ ಗುಮಾನ್ ದಿಲೆಂ . 2005 ಇಸ್ವೆಂತ್ ಗೂಗಲಾನ್ Android, Inc.ಕ್ ಜಾಪ್ಸಾಲ್ದಾರಿ ಜಾವ್ನ್ ಘೆತ್ಲಿ. ತಾಚಾ ಉಪ್ರಾಂತ್ ಚ್ ಅಂಡ್ರೊಯಿಡಾಚಿ ಏಕ್ ವಡ್ಲಿ ಕ್ರಾಂತ್ ಮ್ಹುಣ್ ಆರಂಭ್ ಜಾಲಿ. ಅಂಡ್ರೊಯಿಡಾಚೆಂ ಪಯ್ಲೆಂ ಫೋನ್ ಮಾರ್ಕೆಟಿಕ್ ಆಯಿಲ್ಲೆಂ HTC Dream(G1) . ತಾಂತುಂ ಅಂಡ್ರೊಯಿಡಾಚೆಂ ಪಯ್ಲೆಂ ವರ್ಶನ್ 1.5 ಆಸ್ ಲ್ಲೆಂ .  ಹಾಂತುಂ ಏಕ್ ಸ್ವಾರಶ್ಯ್ ಸಂಗತ್ ಆಸಾ .ಗೂಗಲಾ ಗೊಡ್ ಖಾಣಾಚೆಂ ನಾಂವ್ ವರ್ಶನ್ 1.5 ಕ್ ದಿಲೆಂ . Cupcake ಮ್ಹುಣೊನ್ . ಹಾಚಾ ಉಪ್ರಾಂತ್ಯ್ಲ್ಯಾ ವರ್ಶನಾಂಕ್ , ಇಂಗ್ಲಿಷ್ ಅಲ್ಫಾಬೆಟಿ ಪ್ರಕಾರ್ ಗೊಡ್ ಖಾಣಾಚೆಂ ನಾಂವ್ ದವರ್ಚಿ ಸಂಪ್ರದಾಯ್ ಆರಂಭ್ ಜಾಲೊ. Donut, Eclair, Froyo, Gingerbread , Honeycomb, Ice cream Sandwich .... ಅತಾಂಚೆಂ ಪ್ರಸ್ತುತ್ ಅಂಡ್ರೊಯಿಡ್ ವರ್ಶನ್ 4.1 ಚೆಂ ನಾಂವ್ Jelly Bean ...! 

ಸಾಂಗ್ ಲ್ಯಾ ಬರಿ ಹ್ಯಾ ದಿಸಾನಿಂ ಅಂಡ್ರೊಯಿಡ್ ಒಫರೇಟಿಂಗ್ ಸಿಸ್ಟಮ್ ಫಕತ್ ಸ್ಮಾರ್ಟ್ ಪೋನಾಂಕ್ ಆನಿಂ ಟ್ಯಾಬ್ಲೆಟಾಂಕ್ ಮಾತ್ರ್ ಸೀಮಿತ್ ಜಾಂವ್ಕ್ ರಾವೊಂಕ್ ನಾ. ಲ್ಯಾಪ್ ಟೊಪ್, ನೋಟ್ ಬುಕ್ , ಸ್ಮಾರ್ಟ್ ಟಿವಿ, ಕ್ಯಾಮೆರಾಂತ್ ಯೀ ಅಂಡ್ರೊಯಿಡ್ ಯೇಂವ್ಕ್ ಸುರು ಜಾಲಾಂ. ತಿತ್ಲೆಂಚ್ ನ್ಹಂಯ್ ಗೂಗಲಾಚಾ ಸ್ಮಾರ್ಟ್ ಗ್ಲಾಸಾಂತ್ , ವಾಚಾನಿಂ ,ಹೆಡ್ ಫೊನಾನಿಂ ,ಕಾರ್ DVD ಪ್ಲೇಯಾರಾಂತ್ ... ಅಶೆಂ ಸಭಾರ್ ಡಿಜಿಟಲ್ ಯಂತ್ರಾನಿಂ ಅಂಡ್ರೊಯಿಡಾಚೊ ಉಪ್ಯೋಗ್ ಚಲ್ನ್ ಆಸಾ. Ice cream Sandwich , Jelly Bean ಸವೆಂ ಅಂಡ್ರೊಯಿಡಾಚಿ ಗೊಡ್ಸಾಣ್ ಸಂಸಾರ್ ಭರ್ ಲೋಕ್ ಚಾಕೊನ್ಂತ್ ಆಸಾ...!!! 
      **************************************

IP ಕ್ಯಾಮೆರಾ : ತುಮ್ಕಾಂ ಹೊ ಕಿತ್ಲೊ ಉಪ್ಯೋಗ್ ?

Naman Ballok Jesu May 2013

CCTV ಕ್ಯಾಮೆರಾ ಟೆಕ್ನೊಲೊಜಿ ತುಮ್ಕಾಂ ಖಳಿತ್ ಆಸಾ ಮ್ಹುಣ್ ಚಿಂತಾ . ಕ್ಲೋಸ್ಡ್ ಸರ್ಕ್ಯೂಟ್ ಟಿವಿ ಕ್ಯಾಮೆರಾ ಚಡಾವತ್ ಅನಲೊಗ್ ಟೆಕ್ನೊಲೊಜಿ ವಾಪಾರ್ನ್ , ಏಕಾ ಜಾಗ್ಯಾಕ್ ಸಿಮೀತ್ ಜಾವ್ನ್ ಆಸ್ತಾತ್ . ಪುಣ್ IP ಕ್ಯಾಮೆರಾ ಟೆಕ್ನೊಲೊಜಿ  ಅಸಾ ಪಳೆ ಸಂಪೂರ್ಣ್ ಡಿಜಿಟಲ್. ಇಂಟರ್ನೆಟ್ ಪ್ರೊಟೊಕೊಲ್  ಕ್ಯಾಮೆರಾ ದ್ವಾರಿಂ ಎಕಾ ಜಾಗ್ಯಾರ್ ನಿಗಾ ದವರ್ಲ್ಯಾರ್ , ದತ್ತಾಂಶ್ ಅಂತರ್ ಜಾಳಿ ಮುಖಾಂತ್ರ್ ಆನ್ಯೇಕಾ ಜಾಗ್ಯಾರ್ ಪಾವೊಂಕ್ ಸಾಧ್ಯ್ ಜಾತಾ. ಮ್ಹುಳ್ಯಾರ್ , ಕದಿರಾನೆ ಹಳ್ಳೆಚಾ ತುಮ್ಚಾ ಘರಾಂತ್ IP ಕ್ಯಾಮೆರಾ ದವರ್ಲ್ಯಾರ್ , ತುಮ್ಚಾ ಘರಾ ಕಿತೆಂ ಘಡ್ತಾ ಮ್ಹುಣ್ ಕಜಕಿಸ್ತಾನಾ ಥಾವ್ನ್ ತುಮ್ಕಾಂ ಪಳೆಂವ್ಕ್ ಜಾತಾ ...!

ದೋನ್ ನಮೂನೆಚ್ IP ಕ್ಯಾಮೆರಾ ಆಸಾತ್. ಕೇಂದ್ರಿತ್ ಆನಿಂ ಆಕೇಂದ್ರಿತ್ IP ಕ್ಯಾಮೆರಾ . ಕೇಂದ್ರಿತ್ ಕ್ಯಾಮೆರಾಂಕ್ central Network Video Recorder (NVR) ಮ್ಹುಳ್ಳಿ ಟೆಕ್ನೊಲೊಜಿ ಜಾಯ್ಜೆ. ತುಮ್ಚಾ ಕ್ಯಾಮೆರಾಂ ಥಾವ್ನ್ ಗೆಲ್ಲೊ ದತ್ತಾಂಶ್ ಪುರಾ ಏಕ್ ಕೇಂದ್ರ್ ಸರ್ವರಾರ್ ದಾಸ್ತಾನ್ ಜಾವ್ನ್ , ಥಂಯ್ ಥಾವ್ನ್ remote ಜಾಗ್ಯಾಂ ಥಾವ್ನ್ ತೊ ದತ್ತಾಂಶಾ ವಯ್ರ್ ನಿಗಾ ದವರ್ಯೇತ್ . ಪುಣ್ ಆಕೇಂದ್ರಿತ್ IP ಕ್ಯಾಮೆರಾ ಆಸಾತ್ ಪಳೆ , ತಾಕಾ NVR ತಾಂತ್ರಿಕತಾಚಿ ಗರ್ಜ್ ನಾ. ತ್ಯಾ ಕ್ಯಾಮೆರಾನಿಂಚ್ ದತ್ತಾಂಶ್ ದಾಸ್ತಾನ್ ಕರ್ನ್ , ಅಂತರ್ಜಾಳಿ ಮುಖಾಂತ್ರ್ ಸಂಸಾರಾಚಾ ಕಂಚಾಯ್ ಮುಲ್ಯಾಕ್ ಪಾವೊಂಕ್ ಸಾದ್ಯ್ ಜಾತಾ.


ಸಾಂಗ್ ಲ್ಯಾ ಬರಿ ಹಿ IP ಕ್ಯಾಮೆರಾ ಟೆಕ್ನೊಲೊಜಿ ಆರಂಭ್ ಜಾಲ್ಲಿ 1996 ಇಸ್ವೆಂತ್ . AXIS ಕಮ್ಯೂನಿಕೇಷನ್ ಕಂಪೆನಿನ್ ಆರಂಭ್ ಕೆಲ್ಲಿ. ಪಯ್ಲೆ ಪಾವ್ಟಿಂ ಕೇಂದ್ರಿತ್ ತಾಂತ್ರಿಕಾತಾ ಮಾತ್ರ್ ಉಪಲಬ್ದ್ ಆಸ್ ಲ್ಲಿ. ಆಕೇಂದ್ರಿತ್ IP ಕ್ಯಾಮೆರಾ ಪಯ್ಲೆಂ ಪಾವ್ಟಿಂ ಸುರು ಕೆಲ್ಲಿ Mobotix ಕಂಪ್ಣೆನ್ . ಪುಣ್ ಆಯ್ಚಾ ಬರಿ ಹಿ ತಾಂತ್ರಿಕಾತಾ ಅಭಿವ್ರದ್ದಿತ್ ಜಾವ್ನ್ ನಾತ್ ಲ್ಲಿ. ಪುಣ್ ಆಜ್ ಹಿ ಟೆಕ್ನೊಲೊಜಿ ಮಸ್ತ್ ವಾಡ್ಲ್ಯಾ . ಆಜ್ 29 ಮೆಗಾ ಪಿಕ್ಸೆಲ್ ತಿತ್ಲ್ಯಾ ವ್ಹಡ್ ರಿಸೊಲ್ಯೂಶನಾಂತ್ ಏಕಾ ಜಾಗ್ಯಾರ್ ನಿಗಾ ದವರ್ನ್ , ತಿ ಅಂತರ್ ಜಾಳಿ ಮುಖಾಂತ್ರ್ ಆನ್ಯೇಕಾ ಜಾಗ್ಯಾರ್ ಪಾವಾವ್ಯೇತ್. ಏಕಾ ನೆಟ್ ವರ್ಕ್ ಕೆಬಲಾ ಮುಖಾಂತ್ರ್ ಚ್ ದೋನ್ ವಾಟೆನ್ ಯೀ ಅಡಿಯೋ ಸಂಪರ್ಕ್ ಕರುಂಕ್ ಸಾಧ್ಯ್ ಜಾತಾ.remote ಜಾಗ್ಯಾಂ ಥಾವ್ನ್ಂಚ್ ಕ್ಯಾಮೆರಾ ಚೊ zoom , ರೇಗ್ರ್ ಬದ್ಲಾವಣ್ ಕರ್ಯೇತಾ. ರಿಮೋಟ್ ಜಾಗ್ಯಾ ಥಾವ್ನ್ಂ ಚ್ live ವಿಡಿಯೊ ಫಕತ್ ಕಂಪ್ಯೂಟರಾಂತ್ ಮಾತ್ರ್ ನ್ಹಂಯ್ ಸ್ಮಾರ್ಟ್ ಫೋನಾಂ ದ್ವಾರಿಂ ಯೀಂ ಪಳವ್ಯೇತಾ. ತಿತ್ಲೆಂಚ್ ನ್ಹಂಯ್ wireless ನೆಟವರ್ಕಾರ್ ಯೀ ಹೆ ಕ್ಯಾಮೆರಾ ಕಾಮ್ ಕರ್ತಾತ್. ತಿತ್ಲೆಂಚ್ ನ್ಹಂಯ್ ಅಬ್ಬಾಬ್ಬಾ ಮ್ಹುಣ್ಚೆ ತಸಲೆ ಆನಿಕೀ ಮಸ್ತ್ ಸೌಲತ್ ಆಸ್ ಲ್ಲೆ ಕ್ಯಾಮೆರಾ ಯೀ ಆಜ್ ಮಾರ್ಕೆಟಿಂತ್ ಆಸಾತ್. 

ತರ್ ತುಮ್ಕಾಂ ಯೀ ಅಸಲೊ ಏಕ್ ಕ್ಯಾಮೆರಾ ಜಾಯ್ಗಿ. ಆಜ್ ಇಂಡಿಯಾಂತ್ ಸುಮಾರ್ ಚಾರ್ ಹಜಾರಾ ಥಾವ್ನ್ ಹ್ಯಾ ಕ್ಯಾಮೆರಾಚೆಂ ಮೋಲ್ ಆರಂಭ್ ಜಾತಾ. ಅತಾಂ ಅತಾಂ ಚೈನಾಚೆ , ಕೊರಿಯಾಚೆ ಮ್ಹುಣ್ ದಾಕ್ಟೆ ದಾಕ್ಟೆ wireless ಕ್ಯಾಮೆರಾ ಆಯ್ಲ್ಯಾತ್. ತುಮ್ಚಾ ಘರ್ಚಾ ಏಕ್ ಕುಡಾಂತ್ ತೆ ಶಿರ್ಕೊನ್ ದವರ್ಯೇತ್. ತಾಂತುಂ ಅಡಿಯೋ ಸೌಲತ್ತ್ ಯೀ ಆಸ್ತಾ. ಮಾಗಿರ್ ತುಮ್ಚೆ ಕಡೆ ಅಂತರ್ ಜಾಳಿಚೊ ಸಂಪರ್ಕ್ ಆಸಾಜೆ. Wi- Fi ರೌಟರ್ ಆಸ್ ಲ್ಯಾರ್ ಬರೆಂ . ತುಮ್ಚೊ ಕ್ಯಾಮೆರಾ ಜಾಳಿಕ್ ಸಂಪರ್ಕ್ ಜಾವ್ನ್ live ವಿಡಿಯೊ ತುಮಿಂ ಸಂಸಾರಾಚಾ ಕಂಚಾಯೀ ದೇಶಾ ಥಾವ್ನ್ ಮೊಬೈಲಾ ಥಾವ್ನ್ ಯಾ ಕಂಪ್ಯೂಟರ್ ಮುಖಾಂತ್ರ್ ಪಳೆಂವ್ಕ್ ಜಾತಾ. ಅಡಿಯೊ ದ್ವಾರಿಂ ಸಂಭಾಷಣ್ ಯೀಂ ಕರ್ಯೇತ್. ಥೊಡೆ ಕಮಾಂಡ್ ದೀವ್ನ್ ಕ್ಯಾಮೆರಾಚೆಂ ಪೋಕಸ್ , zoom , ರೇಗ್ರ್ ಬದ್ಲಾವಣ್ ಕರ್ಯೇತ್. 

ತುಮ್ಕಾಂ ಏಕ್ ಘೆಂವ್ಕ್ ಆಸಾಗೀ ? ತರ್ Ebay ಕ್ ಏಕ್ ಭೆಟ್ ದೀವ್ನ್ ಪಳೆಯಾ. ಸಾಂಗ್ ಲ್ಯಾ ಬರಿ ತುಮ್ಚಾ ಇಂಟರ್ನೆಟ್ ಸ್ಪೀಡ್ ಕಿತ್ಲೊ ಮ್ಹುಣ್ ಪಯ್ಲೆಂಚ್ ಸಮ್ಜೊನ್ ಘೆಯಾ. ಚಡಿತ್ ಸ್ಪೀಡಾಚಾ ಸ್ಟ್ರೀಮಿಂಗಾಕ್ ಚಡಿತ್ ಬ್ಯಾಂಡ್ ವಿಡ್ತ್ ಜಾಯ್ಜೆ ಮ್ಹುಣ್ ವಿಸ್ತ್ರನಾಕಾತ್ ...!!!

                *******

ಡೊಮೈನ್ ನಾಂವ್ ಪುರಾಣ್....

This summary is not available. Please click here to view the post.