ಹ್ಯಾ 25ವರ್ಸಾನಿಂ ಇಸ್ರೊನ್ ಪನ್ನಾಸಾ ವಯ್ರ್ ಉಪಗ್ರಹ್ ವಿನ್ಯಾಸ್ ಕರ್ನ್ ಉಡಾವನ್ ಕೆಲ್ಯಾಂತ್. ಹಾಚೆ ವರ್ವಿಂ ಟಿವಿ, ಮೊಬೈಲ್ ಕಮ್ಯೂನಿಕೇಷನ್, DTH ಸರ್ವಿಸ್, ಟೆಲಿ ಮೆಡಿಸಿನ್, ಹವಾಮಾನ್ ಶಾಸ್ತಿರ್, ರೇಡಿಯೊ ನೆಟ್‌ವರ್ಕಿಂಗ್,ಅವ್ಘಾಡ್-ಚತ್ರಾಯ್ ಆಶೆಂ ಸಬಾರ್ ಕ್ಷೇತ್ರಾಂತ್ ಹಿಂ ಉಪಗ್ರಹಾಂ ಉಪ್ಯೋಗಾಕ್ ಪಡ್ಲ್ಯಾಂತ್. ಆಜ್ ಇಸ್ರೊ ಕಡೆ ಪ್ರಮುಖ್ ಜಾವ್ನ್ ದೋನ್ ರಿತಿಂಚಿ ಉಪಗ್ರಹ್ ಮಾಂಡಾವಾಳ್ ಆಸಾ. ಏಕ್ INSAT (Indian National Satellite System) ಆನಿಂ IRS (Indian Remote Sensing Satellite). ಹಾಚೆ ಸಾಂಗಾತಾ ಥೊಡೆ ಸಂಸೋಧ್ ಉಪಗ್ರಹ್‌ಯೀ ಆಸಾತ್. ಹೆ INSAT ಉಪಗ್ರಹ್ ಭೂಂಯ್-ಸ್ಥಿರ್ ಕಕ್ಷೆಂತ್ ಸ್ಥಿತ್ ಜಾಲ್ಯಾತ್. ಮ್ಹುಳ್ಯಾರ್ ಭೂಂಯ್ಚಾ 36,000 ಕಿ.ಮಿ. ವಯ್ರ್ ಥಾವ್ನ್ ಹೆ ಭೂಂಯ್ಕ್ ಭೊಂವಾರಿ ಮಾರುನ್ ಆಸಾತ್. INSAT ಚೆ ಹೆ ಉಪಗ್ರಹ್ ಪ್ರಮುಖ್ ಜಾವ್ನ್ ಟಿಲಿವಿಷನ್ ಕಮ್ಯೂನಿಕೇಷನ್ ಆನಿಂ ಹವಾಮಾನ್ ಅಧ್ಯಯಾನ್ ಕರುಂಕ್ ವಾಪಾರ್ನ್ ಆಸಾತ್. 1983ಇಸ್ವೆಂತ್ INSAT ಉ ಥಾವ್ನ್ ಆರಂಭ್ ಜಾಲ್ಯಾ ಹ್ಯಾ ಶ್ರೇಣಿಂತ್ ಯೆದೊಳ್ ಮ್ಹುಣಾಸರ್ 21 ಉಪಗ್ರಹಾಮ್ ಉಡಾವಣ್ ಕೆಲ್ಯಾಂತ್. ಹಾ೦ತ್ಲಿಂ 11 ಉಪಗ್ರಹಾಂ ಆಜೂನೀ ಸೆವೆರ್ ಆಸಾತ್. ಹ್ಯಾ INSAT ಮಾಂಡಾವಾಳಿಂತ್ ಆಸ್ಚಾ C, extended C ಆನಿಂ Ku band ಚೆಸುಮಾರ್ 211 ಟ್ರಾನ್ಸ್‌ಫಾಂಡಾರಾಚೊ ಉಪ್ಯೋಗ್ ಸಬಾರ್ ಕರ್ನ್ ಆಸಾತ್. ಏಶಿಯಾ ಫೆಸಿಪಿಕ್ ಪ್ರಾಂತ್ಯಾಂತ್ INSAT ಚ್ ವಡ್ಲೆಂ ಸಂಪರ್ಕ್ ಉಪಗ್ರಹಾಚೆಂ ನೆಟ್‌ವರ್ಕ್. ಏಕ್ ಟನ್ ಥಾವ್ನ್ ತೀನ್ ಟನ್ ಮ್ಹುಣಾಸರ್ , ಪಯ್ಲ್ಯಾಥಾವ್ನ್ ಚವ್ತ್ಯಾ ಶ್ರೇಣಿ ಮ್ಹುಣಾಸರ್ INSAT ಉಪಗ್ರಹ್ ಯೆದೊಳ್ ತಯಾರ್ ಜಾಲ್ಯಾತ್.
ಇಸ್ರೊಚಿ ದುಸ್ರಿ ಪ್ರಮುಖ್ ಉಪಗ್ರಹ್ ಮಾಂಡವಾಳ್‌ಚ್ IRS. ಹ್ಯಾ ಶ್ರೇಣಿಚಾ ಉಪಗ್ರಹಾಂಕ್ ಭೂಂಯ್ಚೆರ್ ಆನಿಂ ಧರ್ಯಾಚೆರ್ ಗಿದಾ ನದರ್ ದವರ್ಚಿ ಸಕತ್ ಆಸಾ. ಕ್ರಷಿ ಕ್ಷೇತ್ರಾಂತ್, ಖನಿಜ್ ಶಾಸ್ತಿರಾಂತ್, ರಾಣ್ ಸರ್ವೆ ಕರುಂಕ್ ,ಧರ್ಯಾಚೆರ್ ಸಂಸೋಧ್ ಕರುಂಕ್ ಹಿಂ ಉಪಗ್ರಹಾಂ ಕುಮೊಕ್ ಕರ್ನ್ ಆಸಾತ್. ಆಜ್ ಇಂಡಿಯಾಚಿಂ ಹಿಂ Remote Sensing ಉಪಗ್ರಹಾಚಿಂ ಶ್ರೇಣ್ ಸಂಸಾರಾಚಿ ವಡ್ಲಿ ಆನಿ ಶ್ರೇಷ್ಟ್ ಮ್ಹುಳ್ಯಾ ಖ್ಯಾತೆಕ್ ಪಾವ್ಲ್ಯಾ. ಹ್ಯಾ ಶ್ರೇಣಿಂತ್ ಕಾರ್ಟೊಸ್ಯಾಟ್, ಒಶಿಯಾನ್‌ಸ್ಯಾಟ್ ತಸಲೆ ಅಧುನಿಕ್ ಉಪಗ್ರಹ್ ಆಸಾತ್. ಸಾಂಗಾತಾ ಇಸ್ರೊನ್ ಗೆಲೆತ್ಯಾ ವರ್ಸಾ RISAT -2 ಮ್ಹುಳ್ಳೊ ಮಿಲಿಟ್ರಿ ಉಪಗ್ರಹ್ ಯೀ ಉಡಾವಣ್ ಕೆಲಾ. ಇಸ್ರಾಯೆಲಿಚಾ ಕುಮ್ಕೆನ್ ತಯಾರ್ ಕೆಲ್ಯಾ ಹ್ಯಾ ಉಪಗ್ರಹಾಕ್ ಚೈನಾ ಅನಿಂ ಪಾಕಿಸ್ತಾನಾಚೆರ್ ಲಾಗ್ಸಿಲ್ಯಾನ್ ದೀಷ್ಟ್ ಗಾಲುಂಕ್ ಸಾಧ್ಯ್ ಜಾತಾ. ಹಾ೦ತ್ಲ್ಯಾ ಚಡ್ ರೆಸೊಲ್ಯೂಷನಾಂಚಾ ಕೆಮೆರಾಂಕ್ ಥಾವ್ನ್ ಏಕ್ ಮೀಟರ್ ವಯ್ರ್ ಥಾವ್ನ್ ಧರ್ಣಿಲ್ಯೊ ವಸ್ತು ದಿಸ್ತಾತ್..!!
IRS ಶ್ರೇಣಿಚೆ ಉಪಗ್ರಹ್ ಭುಂಯ್ಚಾ ಥೊಡ್ಯಾಚ್ ಶೆಂಬರ್ ಕಿ.ಮೀ. ವಯ್ರ್ ಆಸ್ತಾತ್. ತಶೆಂ ತೆಂ ಉಡಾವಣ್ ಕರುಂಕ್ Polar Satellite Launch Vehicle (PSLV) ಮ್ಹುಳ್ಳೆಂ ವಾಹಾನ್ ಉಪ್ಯೋಗ್ ಕರ್‍ತಾತ್. ಹೆಂ PSLV ವಾಪರ್ನ್ ಇಸ್ರೊನ್ ಸಬಾರ್ ವಿದೇಶಿ ಉಪಗ್ರಹಾಂಯೀ ಉಡಾವಣ್ ಕೆಲ್ಯಾಂತ್. ಏಕ್‌ಚ್ ಪಾವ್ಟಿಂ ಧಾ ಉಪಗ್ರಹಾಂ ದಾಡ್ನ್ ದಾಕ್ಲೊಯೀ ರಚ್ಲಾ. ಪುಣ್ INSAT ತಸಲ್ಯಾ ಉಪಗ್ರಹಾಂಕ್ ಭೂಂಯ್-ಸ್ಥಿರ್ ಕಕ್ಷೆಂತ್ ಪಾವಾಯ್ಜೆ. ತಿತ್ಲ್ಯಾ ವ್ಹಡ್ ಉಪಗ್ರಹಾಕ್ ತಿತ್ಲ್ಯಾ ಪಯ್ಸ್ ಪಾವಾಯ್ಜೆ ಜಾಲ್ಯಾರ್ ಏಕ್ ವ್ಹಡ್ ರಾಕೆಟ್ ಜಾಯ್ಜೆ. ತಸಲೆಂ ತಂತ್ರಗ್ಯಾನ್ ಯೆದೊಳ್ ಮ್ಹುಣಾಸರ್ ಇಂಡಿಯಾಂತ್ ಸಂಪೂರ್ಣ್ ಯಶಸ್ವಿ ಜಾಂವ್ಕ್ ನಾತ್ ಲ್ಲೆಂ. ಹ್ಯಾ ಖಾತಿರ್ INSAT ಶ್ರೇಣಿಚಿಂ ಸಬಾರ್ ಉಪಗ್ರಹಾಂ ಉಡಾವಣ್ ಕೆಲ್ಲಿಂ ವಿದೇಶಾ ಥಾವ್ನ್ಂಚ್. ವಿದೇಶಾ ಥಾವ್ನ್ ಉಡಾವನ್ ಕೆಲ್ಯಾರ್ ಉಪಗ್ರಹಾಚಾಕೀ ಚಡ್ ಖರ್ಚ್ ತೆಂ ದಾಡುಂಕ್‌ಚ್ ಜಾತಾ. ಹೆಂ ಆಡಾಂವ್ಚ್ಯಾಕ್ ಇಸ್ರೊನ್ ಮಸ್ತ್ ಸಾಧಮ್ ಕರ್ನ್ Geosynchronous Satellite Launch Vehicle (GSLV) ಮ್ಹುಳ್ಳೆಂ ವಾಹಾನ್ ನಿರ್ಮಾಣ್ ಕೆಲಾಂ. ಅತಾಂಚಿಂ ಪುರಾ INSAT ಉಪಗ್ರಹಾಂಕ್ ಹೆಂ GSLV ಚ್ ವರ್ತಾ. ಪುಣ್ ಹೆಂ GSLV ಅನಿಕೀ ಅಭಿವ್ರದ್ದೆಚಾ ಹಂತಾರ್ ಚ್ ಆಸಾ. ತೆಂ ಏಕ್ ಸಂಪೂರ್ಣ್ ಜಾಲ್ಯಾರ್ ಮಾಗಿರ್ ಇಸ್ರೊಚ್ king. !! ಆನಿಂ ಕಾಂಯ್ ಚಡ್ ವರ್ಸಾಂ ನಾಕಾತ್ ತಾಕಾ. !!!
********************************************
-ಪ್ರಮೋದ್ ರೊಡ್ರಿಗ್ಸ್, ಹೊಸ್ಫೆಟ್
pramrods@gmail.com
