ಈಶ್ಯಾಪ್ಪಾ .... ಈಶ್ವರಪ್ಪಾ ...!!! (Bhognam)

ಭೊಗ್ಣಾಂ:


ಸುಣೆಂ ಆಪ್‌ಲ್ಲೆಂ ವೊಂಕ್ ಲ್ಲೆಂ ಖಾತಾ, ಹಾಣಿಂ ದುಲ್ಲೊ ದುಕೊರ್ ಪರತ್ ಕೊಂಡಾತ್ ಲೊಳ್ತಾ... ಸಾಂ ಪೆದ್ರುಂಚಾ ಪತ್ರಾಂತ್ ಆಸ್ಚಿ ಹಿ ಸಾಂಗ್ಣಿ ಹ್ಯಾ ಕಾಳಾರ್ ಖಂಯ್ ಪುಣೀ ಸಮಾ ಜಾತಾ ಮ್ಹುಳ್ಯಾರ್ ತಿ ಕೆ.ಎಸ್. ಈಶ್ವರಪ್ಪಾಕ್ ..!! ಹೊ ‘ಮಾನೆಸ್ತ್’ ಕೋಣ್ ಮ್ಹುಣ್ ಚಿಂತಾತ್ ಗೀ ? ತೊ ಆಮ್ಚ್ಯಾ ಕರ್ನಾಟಕಾಚಾ ಬಿಜೆಪಿಚೊ ಅದ್ಯಕ್ಷ್ .. ಕುರ್‍ಬ್ಯಾಂಚೊ ಜಾಲ್ಯಾರೀ ಅತಾಂ ಬಾಮ್ಣಾಂಚಾ party with difference ಕ್ ತೊಚ್ ಗೊವ್ಳಿ..!!

ಈಶ್ವರಪ್ಪಾ ಕರ್ನಾಟಕಾಂತ್ ಕಾಲ್ಯಾಕ್ ಪುಣೀ famous ಮ್ಹುಣ್ ಆಸ್‌ಲ್ಯಾರ್ ತಾಚಾ ಹಾಡ್ ನಾತ್‌ಲ್ಲ್ಯಾ ಜೀಬೆಕ್ ..!! ತ್ಯಾ ಜೀಬೆ ಥಾವ್ನ್ ಯೆದೊಳ್ ಮ್ಹುಣಾಸರ್ ಏಕ್ ಬರೆಂ ಉತಾರ್ ಆಯ್ಲಾಂ ಗೀ ಯಾ ನಾಂ ಗೀ ಮ್ಹುಣ್ ಮ್ಹಕಾ ಖಳಿತ್ ನಾ ಪುಣ್ ತ್ಯಾ ಜೀಬೆ ಥಾವ್ನ್ ಪಾರ್ಲಿಮೆಂಟಾಂತ್ ಏಕ್ ಯೀ ಸಂಸಧೀಯ್ ಸಬ್ದ್ ಯೇಂವ್ಕ್ ನಾ ಮ್ಹುಳ್ಳೆಂ ಖಚಿತ್. ಪೋಯ್ರ್ ವಿರೋಧ್ ಪಾಡ್ತೆಚೆ ಕರ್ನಾಟಕಾಚಾ ಪಾರ್ಲಿಮೆಂಟಾಂತ್ ಹೆಲ್ಮೆಟ್ ದವರ್ನ್ ಆಯ್ಲ್ಯಾ ಸಂಧರ್ಭರ್ ತಾಂಕಾಂ ‘ಜೀತಾದಾಳು’ ಮ್ಹುಣ್ ನಕ್ಲಾಂ ಕೆಲ್ಲ್ಯಾಕ್ ಸ್ಪೀಕರಾನ್ಂಚ್ ಬೂದ್ ಸಾಂಗಿಜೆ ಪಡ್ಲಿ..!! ನ್ಹಂಯ್ ಸಾಯ್ಬಾ ... ಯೆದ್ಯಾ ವಡ್ಲ್ಯಾ ಪಾಡ್ತಿಚಾ ಪ್ರೆಸಿಡೆಂಟಾಕ್ ಗಡಾಂಗಾಂತ್ ಕಾಲೆಂ ಉಲಾಂವ್ಚೆ ಯಾ ಪಾರ್ಲಿಮೆಂಟಾಂತ್ ಕಾಲೆಂ ಉಲಾಂವ್ಚೆ ಮ್ಹುಳ್ಳೆಂ ಇಲ್ಲೆಂಯೀ ಕೋಮಾನ್ ಸೆನ್ಸ್ ನಾಂ ಗೀ ..!! ??( ಹಾಚೆ ಬರಿಚ್ ಉಲಾಂವ್ಚ್ಯಾ ನಿತಿನ್ ಗಡ್ಕರಿಚೊ ಬಾಪಯ್ ಹೊಚ್ ಕೊಣ್ಣಾ ಮ್ಹುಣ್ ಥೊಡ್ಯಾಂಕ್ ದುಬಾವ್...!! ಪುಣ್ ತಿ ಗಜಾಲ್ ದುಸ್ರಿ ಮ್ಹುಣ್ಯಾಂ ..!! ). ತಶೆಂ ಹೊ ಮನಿಸ್ ಅವ್ಕಾಸ್ ಮೆಳ್ಯಾರ್ ಬರಾಕ್ ಒಬಾಮಾ ಥಾವ್ನ್ ಐವಾನ್ ಡಿ’ಸೊಜಾ ಮ್ಹುಣಾಸರ್ ಗಾಳಿ ದಿತಾ !!! ತ್ಯಾ ಜೀಬೆಚಿ ಮಹಿಮಾಂಚ್ ತಿ ..!!!


ಹೊ ಮನಿಸ್ ಬಿಜೆಪಿಚೊ ಅದ್ಯಕ್ಷ್ ಜಾಂವ್ಚ್ಯಾ ಪಯ್ಲೆಂ ಕರ್ನಾಟಕಾಚೊ ಕರೆಂಟ್ ಮಂತ್ರಿ ಜಾವ್ನ್ ಆಸ್‌ಲ್ಲೊ. ಹಾಕಾ ಹೊ ಖಾತೊ ಜಾಯ್-ಜಾಯ್ ಮ್ಹುಣ್ಂಚ್ ಯಡಿಯೂರಪ್ಪಾನ್ ದಿಲ್ಲೊ ಮ್ಹುಣ್ತಾತ್. ಕರೆಂಟ್ ಮಂತ್ರಿ ಜಾಂವ್ಕ್ ಹಾಕಾ ಚೂರ್‌ಯೀ ಮನ್ ನಾತ್‌ಲ್ಲೆಂ. ಕಿತ್ಯಾಕ್ ದುಸ್ರ್ಯಾ ಖಾತ್ಯಾಂತ್ ಕಾಂವ್ಕ್ ಜಾಂವ್ಚ್ಯಾ ತಿತ್ಲೆಂ ಹ್ಯಾ ಖಾತ್ಯಾಂತ್ ಕಾಂವ್ಕ್ ಜಾಯ್ನಾ ನೇ ..!! ಏಕಾ ಕಾಳಾರ್ ಹೊ ಯಡಿಯೂರಪ್ಪಾ ಆನಿಂ ಈಶ್ವರಪ್ಪಾ ಶಿವಮೊಗ್ಗಾಂತ್ ಭಾರಿ ಚಡ್ಡಿ ದೋಸ್ತ್. ಪುಣ್ ಹಾತಾಂ ಏಕ್ಲ್ಯಾಕ್ ಪಳೆಯ್ಲಾರ್ ಅನ್ಯೇಕ್ಲ್ಯಾಕ್ ಜಾಯ್ನಾ. ತ್ಯಾ ದಿಸಾನಿಂ ಹೆ ದೋಗ್ ಯೀ ಚಡ್ಡಿ ಗಾಲ್ನ್ ಸಾಂಗಾತಾ ಆರ್‌ಎಸ್‌ಎಸ್ ಚಾ ಶಾಖ್ಯಾಕ್ ಯೆತಾಲೆ . (ಪಾಪ್ ತ್ಯಾ ಕಾಳಾರ್ ತಾಂಕಾ ಪ್ಯಾಂಟ್ ಶಿವೊಂಕ್ ಜಾಂವ್ಚಿ ಯೀ ಗತ್ ನಾತ್ ಲ್ಲಿ..!!). ಪುಣ್ ಹೆ ದೋಗಿ ಬಿಜೆಪಿಂತ್ ವಾಡ್ಲ್ಯಾ ಉಪ್ರಾಂತ್ ಹಾಂಚೆಂ ಮಧೆಂ ಸ್ಪರ್ಧೊ ಸಡ್ಲೊ. ಗೌಡಾ ಆನಿಂ ತಾಚಾ ಪುತಾನಿಂ ಮ್ಹಕಾ ಆನ್ಯಾಯ್ ಕೆಲೊ ಮ್ಹುಣ್ ಬೊಬೊ ಗಾಲ್ನ್ ಆಧಿಕಾರಾಕ್ ಆಯಿಲ್ಲ್ಯಾ ಯಡಿಯೂರಪ್ಪಾಕ್ , ಖಂಯ್ ಪುಣೀ ಆಪ್ಲ್ಯಾ ವಾಟೆಕ್ ಮ್ಹುಕಾರ್ ಆಡ್ ಯೆತಾ ಮ್ಹುಣ್ ಹ್ಯಾ ಈಶ್ವರಪ್ಪಾಕ್ ಕರೆಂಟ್ ಮಂತ್ರಿ ಕರ್ನ್ ಎಕಾಚ್ ಫಾತ್ರಾರ್ ದೋನ್ ಸುಕ್ಣಿಂ ಮಾರುಂಕ್ ಪಳಯ್ಲಿಂ. ಪಯ್ಲೆಂ ಕಾಂವ್ಕ್ ಮೆಳ್ಚೆಂ ಉಣೆಂ .. ಮಾಗಿರ್ ಯಡಿಯೂರಪ್ಪಾನ್ ರಯ್ತಾಂಕ್ ಧರ್ಮಾರ್ತ್ ಕರೆಂಟ್ ದಿತಾ ಮ್ಹುಣ್ ವೊಟಾ ಪಯ್ಲೆಂ ಆಶ್ವಾಸನ್ ದಿಲ್ಲೆಂ ನೆ ? ಧರ್ಮಾಕ್ ಸೊಡ್... ಪಯ್ಸೆ ದಿತಾ ಮ್ಹುಳಾರೀ ಕರ್ನಾಟಕಾಂತ್ ಕರೆಂಟ್ ಖಂಯ್ ಮೆಳ್ತಾ ..!! ಆಶೆಂ ಲೊಕಾಚೊ ರಾಗ್ ಪೂರಾ ಈಶ್ವರಪ್ಪಾ ವಯ್ರ್ ಚಲ್ತಾ ನೆ ..!!?? ಯಡ್ಡಿಚಿ ಐಡಿಯಾ ತಿ .. !! . ತಿತ್ಲೆಂಚ್ ನ್ಹಂಯ್ ಶಿವಮೊಗ್ಗಾಂತ್ ಈಶ್ವರಪ್ಪಾಚೆಂ ಕಾಂಯ್ ಚಲಾನಸೆಂ ಕರುಂಕ್ ಕಾಲೆಂ ಪುರಾ ಜಾತಾ ಪಳೆ ತೆಂ ಪುರಾ ಯಾಡ್ಡಿನ್ ಕೆಲೆಂ. ಕರ್ನಾಟಕಕ್ ಕರೆಂಟ್ ಹಾಡುಂಕ್ ಮ್ಹುಣ್ ಚತ್ತೀಸ್‌ಗಡ್ ಸರ್ಕಾರ ಕಡೆ ಕೆಲ್ಲ್ಯಾ ಡೀಲಾಚೆಂ ಕಮಿಶನ್ ಸಯ್ತ್ ಅಪ್ಣಾಕ್ ಮೆಳ್ಚೆಂ ಯಡಿಯೂರಪ್ಪಾಚಾ ಪೂತಾಂಕ್ ಸಲ್ಚೆಂ ಪಳೆವ್ನ್ ಖುಬಾಳುನ್ ಗೆಲೊ ಹೊ ಈಶ್ವರಪ್ಪಾ !॒!


ಈಶ್ವರಪ್ಪಾ ರಾಜಕೀಯಾ ಆಯ್ಲೊಚ್ ಸಂಘಚಾ ದಯೆನ್ . ದುರ್ಬಳ್ಯಾ ಕುಟ್ಮಾಂತ್ ಜಲ್ಮಾಲ್ಲೊ ಹೊ. ಕುರ್‍ಬ್ಯಾಂ ಜಾತಿಚೊ. ಆವಯ್-ಬಾಪಾಯ್ ಕೂಲಿ ಕಾಮ್ ಕರ್ನ್ ಆಸ್‌ಲ್ಲಿಂ. ತ್ಯಾ ದಿಸಾನಿಂ ಹಾಚಿ ಜೀಬ್ ವಾಳ್ಚಿ ಪಳೆವ್ನ್ ಸಂಘಚಾ ಥೊಡ್ಯಾನಿಂ ಹಾಕಾ ಶಾಖಾಕ್ ಭರ್ತಿ ಕೆಲೊ. ಆಶೆಂ ಹೊ ಕೊಲೆಜಿಕ್ ಸೆರ್ವಾಲೊ. ABVP ಚೊ ಕಾರ್ಯಾಳ್ ಸಾಂದೊ ಜಾವ್ನ್ ಆಸ್‌ಲ್ಲೊ. ಉಪ್ರಾಂತ್ ಜನಸಂಘಾಂತ್, ತುರ್ತ್ ಪರಿಸ್ಥಿತೆ ತೆದಾಳಾ ಜಯ್ಲಾಂತ್, ಉಪ್ರಾಂತ್ ಬಿಜೆಪಿ ಕ್, ಮಾಗಿರ್ ಎಮ್.ಎಲ್.ಎ, ಮಾಗಿರ್ ಮಂತ್ರಿ .. ಆಶಿ ಚಲೂನ್ ಆಯ್ಲೆಂ ಹಾಚೆಂ ಜೀವನ್.. ಏಕಾ ಕಾಳಾರ್ ಹಾಚೆ ಕಡೆ ಏಕ್ ಗುಜಿರಿ ಸ್ಕೂಟಾರ್ ಆಸ್‌ಲ್ಲೆಂ. ತ್ಯಾ ಸ್ಕೂಟಾರಾಚಾ ಪಾಟ್ಲ್ಯಾ ಸಿಟೆರ್ ಬಸೊಂನ್‌ಚ್ ಆಜ್ ಯಡಿಯೂರಪ್ಪಾ ಕರ್ನಾಟಕಚೊ ಮುಖೆಲ್ ಮಂತ್ರಿ ಜಾಲೊ ..!! (ಯಡಿಯೂರಪ್ಪಾಕ್ ಸೈಕಲ್ ಸೊಡುಂಕ್ ಶಿಕಯ್ಲೆಂಚ್ ಈಶ್ವರಪ್ಪಾನ್ ಮ್ಹುಣ್ತಾತ್ ಥೊಡೆ ..!) . ಪುಣ್ ಆಜ್ ಈಶ್ವರಪ್ಪಾ ಭಾರಿ ಅನ್ಕೂಲ್‌ವಂತ್. ಬೆಂಗ್ಳೂರ್, ಶಿವಮೊಗ್ಗಾಂತ್ ಜಾಯ್ತೆ ಬಂಗ್ಲೆ ಆಸಾತ್. ಕಾರಾಂ , ನೌಕರಾಂ ಹೆಂ ಪುರಾ ಆಸಾ ... ತಿತ್ಲ್ಯಾ ಮಟ್ಟಾಕ್ ಮ್ಹುಣಾಸರ್ ಬದಲ್ಲಾ ಹೊ ಈಶ್ವರಪ್ಪಾ .. ಪುಣ್ ಬದ್ಲೊಂಕ್ ನಾತ್ಲೆಂ ದೋನ್ ಮಾತ್ರ್. ಏಕ್ ತಾಚಿ ಜೀಬ್ ಆನಿಂ ಸಂಘ ವಯ್ಲಿ ತಾಚಿ ನಿಷ್ಠಾ ..!!


ಕದಡ್ಲ್ಯಾ ಉದ್ಕಾಂತ್ ಮಾಸ್ಳಿ ದರ್ಚಾಂತ್ ಈಶ್ವರಪ್ಪಾ ನಿಸ್ಸೀಮ್ .. ಥೊಡ್ಯಾ ಮಹಿನ್ಯಾ ಆದಿಂ ಶಿವಮೊಗ್ಗಾಂತ್ ಏಕ್ ಇಗರ್ಜ್ ಉದ್ಘಾಟನ್ ಕರುಂಕ್ ಆಯ್ಲೊ. ಮುಸ್ಲಿಂ, ಲವ್ ಜೆಹಾದ್ ಕರ್ನ್ ಕಿರಿಸ್ತಾಂವ್ ಆನಿಂ ಹಿದ್ವಾಂಚಾ ಚೆಡ್ವಾಂಕ್ ಮತಾಂತರ್ ಕರ್ತಾತ್ ಮ್ಹುಣಾಲೊ ತೊ. ಆನಿಂ ಕಿರಿಸ್ತಾಂವಾನಿ, ಹಿಂದ್ವಾಂ ಸಾಂಗಾತಾ ಮೆಳೊನ್ ಹೆಂ ಜೆಹಾದ್ ನಿರ್ನಾಮ್ ಕರಿಜೆ ಮ್ಹುಣಾಲೊ ..! ಪೋಯ್ರ್ ಎಮ್.ಪಿ. ಪ್ರಕಾಶಾಕ್ ಸನ್ಮಾನ್ ಕರ್ಚೆಂ ಕಾರ್ಯೆಂ ಬೆಂಗ್ಳೂರಾಂತ್ ಜಾಲ್ಲೆಂ. ಸಕ್ಕಡೀ ಪಾಡ್ತಿಚೆ ಸಾಂದೆ ತಾಂತುಂ ಹಾಜರ್ ಆಸ್‌ಲ್ಲೆ. ಕುಮಾರಸ್ವಾಮಿನ್ ಭಾಶಣ್ ಕರ್ತಾನಾ ಹಿಂದೂ ಭಯೋತ್ಪದನಾ ವಿಶಿಂ ಉಲ್ಲೇಖ್ ಕೆಲೊ. ಹೆಂ ಜಿರ್ವೊಂಕ್ ಜಾಯ್ನಾಸ್ತಾನ , ಸ್ಟೇಜಿ ಥಾವ್ನ್ಂಚ್ ಉಟೊನ್ ಗೆಲೊ ಹೊ ಈಶ್ವರಪ್ಪಾ ..!!


ಅತಾಂ ಈಶ್ವರಪ್ಪಾ ಕಡೆ ಆಸ್ಚೊ ಅಜೆಂಡಾ ಏಕ್‌ಚ್ .. ತಾಕಾ ಕರ್ನಾಟಕಚೊ ಮುಖೆಲ್ ಮಂತ್ರಿ ಜಾಯ್ಜೆ. ಸದ್ದ್ಯಾಕ್ ರೆಡ್ಡಿ ಭಾವ್ ಆನಿಂ ಲಿಂಗಾಯಾತಾಂ ವರ್ವಿಂ ಸರ್ಕಾರ್ ಚಲೊನ್ ಆಸ್ಲ್ಯಾನ್ ಹೆ ಪಾವ್ಟಿಂ ಸಾದ್ಯ್ ನಾ ಮ್ಹುಣ್ ತಾಕಾ ಖಳಿತ್ ಆಸಾ. ಪುಣ್ ಪುಡ್ಲ್ಯಾ ಎಲಿಸಾಂವಾಂತ್ ಕಾಲೆಂ ಪುಣೀ ಗಿಮಿಕ್ ಕರಿಜೆಚ್ ಮ್ಹುಳ್ಳ್ಯಾ ಹಟ್ಟಾಕ್ ಪಡ್ಲಾ. ಹಾಕಾ ಅತಾಂ urgent ಜಾವ್ನ್ ಪಾಟಿಂ ಆಸ್‌ಲ್ಲ್ಯಾ ಪಂಗ್ಡಾಚೊ ಲೀಡಾರ್ ಜಾಯ್ಜೆ .. ಅತಾಂ ಕಾಲೆಂ ಮ್ಹುಳ್ಯಾರೀ ಸಿದ್ದರಾಮಾಯ್ಯಾಚ್ ಪಾಟಿಂ ಆಸ್‌ಲ್ಲ್ಯಾ ಪಂಗ್ಡಾಚೊ ಲೀಡಾರ್ . ಪುಣ್ ಭಾರಿ ಪ್ರಮಾಣಾಂತ್ ಪಾಟಿಂ ಆಸ್‌ಲ್ಲ್ಯಾ ಪಂಗ್ಡಾಚೊ ವೋಟ್ ಆಸ್‌ಲ್ಲ್ಯಾನ್ , ಹಾಂಚೆ ವಯ್ರ್ ಈಶ್ವರಪ್ಪಾಕ್ ಆನಿಂ ಬಿಜೆಪಿಕ್ ದೊಳೊ ಪಡ್ಲಾ . ಅಪುಣ್ ಕುರ್‍ಬೊ ಜಾವ್ನ್ ಆಸ್‌ಲ್ಲ್ಯಾರೀ ಯೆದೊಳ್ ಮ್ಹುಣಾಸರ್ ಹಾಣೆಂ ಜನಿವಾರಾಧಾರಿಂಚಿಂ ಸೆವಾ ಕೆಲ್ಲಿ. (ಉಡ್ಪಿಚಾ ಕ್ರಷ್ಣ ದಿವ್ಳಾಚೊ ಕನಕ ಗೋಪುರಾ ಕೊಸ್ಳಾಯ್ತಾನಾ ಹ್ಯಾ ಈಶ್ವರಪ್ಪಾನ್, ಕುರ್‍ಬ್ಯಾಂ ವಿರೋದ್ ಪೇಜಾವರ್ ಸೊಮ್ಗೊಳಾಕ್ support ಕೆಲ್ಲೊ ..!) ಪುಣ್ ಕಿತ್ಯಾಕ್ ಗೀ ಅತಾಂ ಹ್ಯಾ ಲೊಕಾಚೆರ್ ತಾಕಾ ಮೋಗ್ ಆಯ್ಲಾ ..!! . ತಾಂಕಾ ಚಡಿತ್ reservation ದಿಜೆ ಕಂಯ್ ..!! (ವಿ ಪಿ ಸಿಂಗಾನ್ ಮಂಡಳ್ ರಿಪೋರ್ಟ್ ಜಾರಿ ಕರುಂಕ್ ಯೆತಾನಾ, ತಾಚೆ ವಿರೋದ್ ತೆನ್ನಾ ಹ್ಯಾ ಈಶ್ವರಪ್ಪಾನ್ ಗಾಲ್‌ಲಿ ಬೊಬಾಟ್ ಕಿತ್ಲಿ..!!, ಆನಿಂ ಕೇಂದ್ರಾಚಾ ಬಿಜೆಪಿ ಮುಕೆಲ್ಯಾನಿಂ ಹ್ಯಾಚ್ ಕಾರಣಾಕ್ ವಿ ಪಿ ಸಿಂಗಾಕ್ ದೆವಯ್ಲೆಂ ಆಜ್ ತಾಂಕಾಂ ಉಡಾಸ್ ನಾಂ ಗೀ ಮ್ಹುಣ್ ..!!). ಹಾಚೆ ಖಾತಿರ್ ಬಿಜೆಪಿನ್ ಥೊಡ್ಯಾ ದಿಸಾಂ ಆದಿಂ ಬೆಂಗ್ಳೂರ್ಚಾ ಪ್ಯಾಲೇಸ್ ಗ್ರೌಂಡಾಂತ್ ಪಾಟಿಂ ಆಸ್‌ಲ್ಲ್ಯಾ ಪಂಗ್ಡಾಚೊ ಏಕ್ ವಡ್ಲೊ ಸಮವೇಶ್ ಕೆಲ್ಲೊ . ಪಾಟಿಂ ಆಸ್‌ಲ್ಲ್ಯಾ ಪಂಗ್ಡಾಂಕ್ ನ್ಯಾಯ್ ಆನಿಂ ಸವ್ಲತ್ತೊ ದೀಂವ್ಕ್ ಕಂಯ್ ..! ಹ್ಯಾ ಸಮವೇಶಾಂತ್ ಈಶ್ವರಪ್ಪಾಕ್ ಅಪುಣ್ ಪಾಟಿಂ ಆಸ್‌ಲ್ಲ್ಯಾ ಪಂಗ್ಡಾಂಚೊ ಚಾಂಪಿಯಾನ್ ಮ್ಹುಣ್ ಕೊಚ್ಚುಂಕ್ ಲಾಗ್ಲೊ. ಪುಣ್ ಸಂಘ್ ಪರಿವಾರಾಚೊ ಉದ್ದೇಶ್ ದುಸ್ರೊಚ್ ಆಸ್ಲೊ ..! ರಂಗನಾಥ್ ಮಿಶ್ರಾ ಅಯೋಗಾಚಿ ವರ್ದಿ ಕೇಂದ್ರ್ ಸರ್ಕಾರಾನ್ ಜಾರಿ ಕರುಂಕ್ ನುಜೊ ಮ್ಹುಣ್ .! ( ರಂಗನಾಥ್ ಮಿಶ್ರಾ ಅಯೋಗಾನ್ ಉಣ್ಯಾ ಸಂಕ್ಯಾಚಾ ಲೋಕಾಕ್ ಯೀ reservation ದಿಜೆ ಮ್ಹುಣ್ ಶಿಪಾರಾಸ್ ಕೆಲ್ಲ್ಯಾ ). ಆಶೆಂ ಪಾಟಿಂ ಆಸ್‌ಲ್ಲ್ಯಾ ಪಂಗ್ಡಾಂಚಾ ಲೋಕಾಕ್ ಮುಕಾರ್ ಗಾಲ್ನ್ ಅಪ್ಲೆಂ ಅಜೆಂಡಾ ಕಾರ್ಯಾಗತ್ ಕರ್ಚೆಂ ಶಿಂತ್ರ್ಯೊ ಸಂಘಚೊ ...!!

ಹೊ ಸಮವೇಶ್ ಜಾಲ್ಲ್ಯಾ ತ್ಯಾ ಆಯ್ತಾರಾ ಹಾಂವ್ ಹೆಬ್ಬಾಳಾಕ್ ಮ್ಹುಣ್ ವಚುನ್ ಆಸ್‌ಲ್ಲೊಂ. ಪುಣ್ ಹಾಂಚಾ ಸಮವೇಶಾ ನಿಮ್ತಿಂ ಟ್ರಾಪಿಕ್ ಜ್ಯಾಮ್ ಜಾವ್ನ್ ದೋನ್ ಗಂಟೆ ಭರ್ ಮೇಖ್ರಿ ಸರ್ಕಲಾ ಕಡೆ ಶಿರ್ಕಲೊಂ. ತ್ಯಾ ದೀಸ್ ಖಂಯ್ ಪಳೆಯ್ಲಾರೀ ಈಶ್ವರಪ್ಪಾಚಿಂ ಬ್ಯಾನಾರಾಂ ಆನಿ ಕಟೌಟಾಂ ... ಹೆಂ ಕಟೌಟ್ ಪಳೆವ್ನ್ ತ್ಯಾ ಟ್ರಾಪಿಕಾಂತ್ ಮ್ಹುಜಾ ಬಗ್ಲೆಂತ್ ರಾವ್‌ಲ್ಲ್ಯಾ ಏಕಾ ಕಾರಾಂತ್ ಥಾವ್ನ್ ಏಕ್ ಭುರ್‍ಗೆಂ ಬೋಬ್ ಮಾರ್ನ್ ಸಾಂಗೊನ್ ಆಸ್‌ಲ್ಲೆಂ..... “ಮಮ್ಮೀ ಮಮ್ಮೀ.. ಗೊಂಗೊ ಪಳೆ ಮ್ಹುಣ್ ” ...!!!!

****************************************************

_ಪ್ರಮೋದ್ ರೊಡ್ರಿಗಸ್ , ಹೊಸ್ಪೆಟ್