ಆಕಾಶ್ : ಅದ್ಬುತ್ ಸ್ಲೇಟ್ ಹಿ ...

(NAMAN BALLOK JESU )
ಹೆ ಕಂಪ್ಯೂಟಾರ್ , ಲ್ಯಾಪ್ ಟೊಪ್ ಆಸಾತ್ ಪಳೆ ಇಂಡಿಯಾಂತ್ ಮಧ್ಯಮ್ ವರ್ಗಚಾ ಲೊಕಾಕಡೆ ಪಾವ್ಲ್ಯಾತ್. ಫಕತ್ ಇಂಟರ್ನೆಟಾಕ್ ನ್ಹಂಯ್ , ಇತರ್ ಸಬಾರ್ ರೀತಿನ್ ತೆ ಉಪ್ಕಾರಿ ಜಾಲ್ಯಾತ್. ಹೊ ಡಿಜಿಟಲ್ ಕಾಳ್. ಆಯ್ಚಾ ವಿದ್ಯಾರ್ಥಿಂಕ್ ಗರ್ಜೆಕ್ ಪಡ್ಚಿಂ ಸಬಾರ್ ಶಿಕ್ಪಾ ಸಂಬಂಧಿ ಅಪ್ಲಿಕೇಷನ್ ಸಾಪ್ಟ್ ವೇರಾಂ ಆಸಾತ್. ಏಕಾ ವಿಶಯಾಚೆರ್ ಪ್ರಯೋಗಾತ್ಮಕ್ ಅಧ್ಯಯನ್ ಕರುಂಕ್ ರಾಸ್ ರಾಸ್ ವಿಡಿಯೊ ಟ್ಯೂಟೋರಿಯಾಲ್ ಆಸಾತ್. ಪಯ್ಶೆ ದಿನಾಸ್ತಾಂಚ್ ವಾಚಿಯೆತ್ ಜಾಲ್ಲೆ e-book ಚೊಂ ವಡ್ಲೊ ಪುಂಜೊಚ್ ಆಸಾ. ಲೈಬ್ರೆರಿಂತ್ ವಚುನ್ ಬೂಕ್ ಸೊದೊನ್ ಕಾಡ್ನ್ ವಾಚಿಜೆ ಮ್ಹುಣ್ ನಾ. ಮೊಲಾಕ್ ಯೀ ಘೆಜೆ ಮ್ಹುಣ್ ಗರ್ಜ್ ನಾ. ಆಜ್ ಕಸಲೋಯ್ ಏಕ್ ಬೂಕ್ ಆಸ್ಲ್ಯಾರ್ ತಾಚಿ ಏಕ್ ಪೈರೆಟೆಡ್ ಪ್ರತಿ ಪುಣಿ e-book ರೂಪಾರ್ ಜಾಳಿರ್ ಮೆಳ್ತಾ. ಕಂಪ್ಯೂಟಾರಕ್ ಅಂತರ್ ಜಾಳ್ ಸಂಪರ್ಕ್ ಆಸ್ ಲ್ಯಾರ್ ಮಾಗಿರ್ ಖಂಚಾ ರೀತಿರ್ ಉಪ್ಕಾರಾಕ್ ಪಡ್ತಾ ಮ್ಹುಣ್ ಸಾಂಗ್ಚಿ ಗರ್ಜ್ ಚ್ ನಾ. ವಿದ್ಯಾರ್ಥಿಕ್ಂಕ್ ತಿತ್ಲೆಂ ಉಪ್ಕಾರಿ ಹೆಂ ಕಂಪ್ಯೂಟಾರ್...!

ಇಂಡಿಯಾಂತ್ ಹೆ ಕಂಪ್ಯೂಟಾರ್ , ಲ್ಯಾಪ್ ಟೊಪ್ ಪುರಾ ಗಿರೆಸ್ತ್ ಆನಿಂ ಮಧ್ಯಮ್ ವರ್ಗಚಾ ವಿದ್ಯಾರ್ಥಿಂಕ್ ಕಡೆ ಮಾತ್ರ್ ಆಸ್ಲ್ಯಾರ್ ಪುರೊ ಗೀ ? ಹಾಂಗಾ ಏಕಾ ವಡ್ಲ್ಯಾ ಸಂಖ್ಯಾನ್ ದುಬ್ಳಿಕಾಯೆಚಾ ಫಂಕ್ತೆಚಾ ಸಕಯ್ಲ್ ವಿದ್ಯಾರ್ಥಿ ಸಮುದಾಯ್ ಆಸಾ. ಥೊಡೆ ಪಾವ್ಟಿಂ ಏಕ್ ಜೆವಾಣ್ ಜೇಂವ್ಕ್ ಯೀ ಕಷ್ಟ್ ಜಾಂವ್ಚಾ ಹಾಂಕಾ , ಧಾ, ವೀಸ್ , ತೀಸ್ ಹಜಾರ್ ಮ್ಹುಣ್ ಕಂಪ್ಯೂಟಾರ್ ಘೆಂವ್ಕ್ ಖಂಯ್ ಸಾಧ್ಯ್ ಜಾತಾ ಸಾಂಗಿಯಾ ? . ಪುಣ್ ಆಮ್ಚೊ ಕೇಂದ್ರ್ ಮಾನವ್ ಸಂಪನ್ಮೂಳ್ ಮಂತ್ರಿ ಕಪಿಲ್ ಸಿಬಲ್ ಆಸಾ ಪಳೆ ತಾಕಾ ಏಕ್ ಸಪಣ್ ಆಸ್ ಲ್ಲೆಂ. ಹಳ್ಳೆ ಹಳ್ಳೆಚಾ ದುಬ್ಳ್ಯಾ ಬೊರೇ ಗೌಡಾಂಚಾ ಭುರ್ಗ್ಯಾಂಕ್ ಯೀ ಕಂಪ್ಯೂಟಾರ್ ಮೆಳಾಜೆ ಆನಿಂ ತಾಣಿಂ ಹ್ಯಾ ಡಿಜಿಟಲ್ ಸಂಸಾರಾಚೆ ಭಾಗೀದರ್ ಜಾಯ್ಜೆ ಮ್ಹುಣ್. ತಾಣೆಂ ಹಟ್ಟ್ ಧರ್ನ್ ಮ್ಹುಣ್ ಕೆಲ್ಲ್ಯಾ ಪ್ರಯತ್ನಾ ದ್ವಾರಿಂ ಆತಾಂ ಆಯ್ಲಾಂ ಕಂಪ್ಯೂಟಿಂಗ್ ಮೆಶಿನ್ " ಆಕಾಶ್"...!


ಹೆಂ ಆಕಾಶ್ ಏಕ್ ಟ್ಯಾಬ್ಲೆಟ್ ಕಂಪ್ಯೂಟಾರ್. ವಿದ್ಯಾರ್ಥಿಂಕ್ ಹಾಚೆಂ ಮೋಲ್ ಫಕತ್ ದೇಡ್ ಹಜಾರ್ ರೂಪಾಯ್. ಮಾರ್ಕೆಟಿಂತ್ ಹ್ಯಾ ಟ್ಯಾಬ್ಲೆಟ್ ಕಂಪ್ಯೂಟಾರಕ್ UbiSlate 7 ಮ್ಹುಣ್ತಾತ್. ಸುಮಾರ್ ತೀನ್ ಹಜಾರ್ ರೂಪ್ಯಾಂಕ್ ಹೆಂ ಟ್ಯಾಬ್ಲೆಟ್ ಪುಡ್ಲ್ಯಾ ಮಹಿನ್ಯಾಂತ್ ಮೆಳ್ತೆಲೆಂ. ಹ್ಯಾ ವರ್ಸಾ ಸುಮಾರ್ ಏಕ್ ಮಿಲಿಯಾನ್ ವಿದ್ಯಾರ್ಥಿಂಕ್ ಆಕಾಶ್ ಟ್ಯಾಬ್ಲೆಟ್ ಫಕತ್ ದೇಡ್ ಹಜಾರಾಂಕ್ ದೀಂವ್ಕ್ ಕಪಿಲ್ ಸಿಬಲಾನ್ ಮಾಂಡಾವಳ್ ಗಾಲ್ಯಾ. ಸಾತ್ ಇಂಚಾಚೆಂ ಹೆಂ ಟ್ಯಾಬ್ಲೆಟ್ ಕಂಪ್ಯೂಟಾರ್ ಸಂಪೂರ್ಣ್ ಟಚ್ ಸ್ಕ್ರೀನ್. ಅಂಡ್ರೊಯಿಡ್ 2.2 ಒಪರೆಟಿಂಗ್ ಸಿಸ್ಟಮ್ ಆಧಾರಿತ್ ಜಾಲ್ಯಾನ್ ಹಾಕಾ ಜೋಡಿಂತ್ ಪಡ್ಚಿಂ ಸುಮಾರ್ ದೇಡ್ ಲಾಕ್ ಅಪ್ಲಿಕೇಷಾನಾಂ ಚಲಾವ್ಯೇತ್. ಹಾಂತುಂ ಶಿಕ್ಪಾ ಸಂಬಂಧಿ ಸಾಪ್ಟ್ ವೇರಾಮ್ , ಗೇಮ್ಸ್, ಓಪಿಸ್ ಪ್ರೊಗ್ರಾಮ್ ಪುರಾ ಆಸಾ. DOC, DOCX, PPT, PPTX, XLS, XLSX, ODT, ODP ,PDF ರೂಪಾಚಿಂ ಡೊಕ್ಯೂಮೆಂಟಾಂ ಉಗ್ತೆ ಕರ್ನ್ ವಾಚಿಯೆತ್. MP3, AAC, AC3, WAV, WMA ತಸಲೊ ಆಡಿಯೊ ರೂಪಾ ಸಾಂಗಾತಾ MPEG2, MPEG4, AVI, FLV ರೂಪಾಂಚಾ ವಿಡಿಯೊ ಫೈಲಾಂಕ್ ಯೀ ಸಪೋರ್ಟ್ ಕರ್ತಾ. PNG, JPG, BMP ಆನಿಂ GIF ರೂಪಾಚಿಂ ಪಿಕ್ಚರ್ ಫೈಲಾಂ ಹಾಂತುಮ್ ಉಗ್ತೆ ಕರ್ಯೇತ್.


ಹ್ಯಾ ಟ್ಯಾಬ್ಲೆಟ್ ಕಂಪ್ಯೂಟಾರಾಂತ್ ಹಾರ್ಡ್ ಡಿಸ್ಕ್ ನಾ. ಪುಣ್ 32 GB ಮ್ಹುಣಾಸರ್ ಡಾಟಾ ದಾಸ್ತಾನ್ ಕರುಂಕ್ ಮೆಮೊರಿ ಚಿಪ್ಪ್ ಆಸಾ. 256 MB RAM ಆಸಾ. ದೋನ್ USB ಪೋರ್ಟ್ ಆಸಾತ್. ತಶೆಂ ಜಾಲ್ಯಾನ್ ಪೆನ್ನ್ ಡ್ರೈವ್ ಯಾ ಹಾರ್ಡ್ ಡಿಸ್ಕಾಕ್ ಕನೆಕ್ಟ್ ಕರ್ಯೇತ್. ಸಾಂಗಾತಾ 3.5mm ಆಡಿಯೊ in/out ಜಾಕ್ ಆಸಾ. ಹಾಂತುಂ GPRS ಮೊಡೆಮ್ ಆಸಾ. ತಶೆಂಚ್ WiFi ಯೀ ಆಸಾ. ಹಾಚಿ ಬ್ಯಾಟಾರಿ ಬ್ಯಾಕ್ ಅಪ್ 3 ಗಂಟೆ ಮ್ಹುಣಾಸರ್ ಆಸಾ. ಒಟ್ಟಾರೆ ಸಾಂಗ್ಚೆ ಜಾಲ್ಯಾರ್ ಏಕಾ ಕಂಪ್ಯೂಟಾರಾಂತ್ ವಿದ್ಯಾರ್ಥಿಂಕ್ ಕಿತೆಂ ಜಾಯ್ ಪಳೆ ತೆಂ ಪುರಾ ಹ್ಯಾ ಟ್ಯಾಬ್ಲೆಟ್ ಕಂಪ್ಯೂಟಾರಾಂತ್ ಕರ್ಯೇತ್ .

iPad ತಸಲ್ಯಾ ಗಿರೆಸ್ತಾಂಚಾ ಟ್ಯಾಬ್ಲೆಟ್ ಕಂಪ್ಯೂಟಾರಾಕ್ ಆನಿಂ ಆಕಾಶ್ ಟ್ಯಾಬ್ಲೆಟಾಕ್ ತುಲನ್ ಕರುಂಕ್ ಜಾಯ್ನಾ ವ್ಹಯ್. iPad ಂತ್ ಮಸ್ತ್ ಫಿಚಾರ್ಸ್ ಆಸಾತ್. ಪುಣ್ ತೆಂ ಮ್ಹಾರಗ್. ಮುಕ್ಲ್ಯಾ ವರ್ಸಾನಿಂ ಆಕಾಶ್ ಟ್ಯಾಬ್ಲೆಟಾಕ್ ಫಕತ್ 500 ರೂಪ್ಯಾಂಕ್ ಮೆಳ್ಚಾ ಬರಿ ಕರುಂಕ್ ಚಿಂತ್ಲಾಂ ಸಿಬಲಾನ್. ತಿತ್ಲೆಂಚ್ ನ್ಹಂಯ್ ಸೋಲಾರ್ ಸಕತ್ ವಾಪಾರ್ನ್ಂಚ್ ಹಾಚಿ ಬ್ಯಾಟಾರಿ ರೀಚಾರ್ಜ್ ಕರುಂಕ್ ಜಾಂವ್ಚೆ ಬರಿ ತಾಂತ್ರಿಕಾತಾಯೀ ಹಾಡುಂಕ್ ಚಿಂತುನ್ ಆಸಾತ್. ಕರೆಂಟ್ ಚ್ ನಾತ್ ಲ್ಲಿಂ ದುಬ್ಳಾಂಚಿಂ ಘರಾಂ ಸಬಾರ್ ಆಸಾತ್ ನೆ. ಸಿಬಲಾಚೆಂ ಅನ್ಯೇಕ್ ಪ್ಲ್ಯಾನ್ ಮ್ಹುಳ್ಯಾರ್ ಸಗ್ಳಾ ಇಂಡಿಯಾಕ್ ಚ್ WiFi ಸಂಪರ್ಕ್ ದಿಂವ್ಚೊ. ತಶೆಂ ಕೆಲ್ಯಾರ್ ಇಂಟರ್ನೆಟ್ ಸಂಪರ್ಕ್ ಬಸಲ್ಯಾಡೆಚ್ ಮೆಳ್ತಾ. . ತ್ಯಾ ಅಮೆರಿಕಾಂತ್ ಹೊಟ್ಲಾಕ್ ವೊಸೊನ್ ಏಕ್ ಚಾ ಅನಿಂ ಖಾಣ್ ಕೆಲ್ಯಾರ್ ಏಕ್ 35 ಡಾಲಾರ್ ಜಾತಾತ್. ತಿತ್ಲ್ಯಾಚ್ ಮ್ಹೊಲಾಕ್ ಇಂಡಿಯಾಂತ್ ಅದ್ಬುತ್ ಸ್ಲೇಟ್ ಆಕಾಶ್ ಟ್ಯಾಬ್ಲೆಟ್ ಮೆಳ್ತಾ. ಆಮಿಂ ಸಿಬಲಾಕ್ ಏಕ್ ಸೆಲ್ಯೂಟ್ ದಿಜೆಚ್....!!


*******