SPAM ಆನಿಂ CAPTCHA .... !!!

                                    Naman Ballok Jesu December 2012

SPAM ಮ್ಹುಳ್ಳೊ ಸಬ್ದ್ ತುಮಿಂ ಹ್ಯಾ ಡಿಜಿಟಲ್ ಸಂಸಾರಾಂತ್ ತುಮಿಂ ಭರನ್ ಆಯ್ಕಾಲಾ ಜಾಂವ್ಕ್ ಪುರೊ . ತುಮ್ಚಾ ಇಮೈಲಾಚಾ inbox ಂತ್ ಸದಾನಿಂಚ್ spam ಪತ್ರಾಂ ಯೇವ್ನ್ಂ ಚ್ ಆಸ್ತಾತ್ .ತುಮ್ಚಾ ಮೊಬೈಲಾಕ್ ಯೀ spam ಸಂದೇಶ್ ಯೇವ್ನ್ ಆಸಾತ್. ಹಿ spam ಪಿಡಾ facebook ತಶೆಂ ಇತರ್ ಸಾಮಾಜಿಕ್ ಮಾಧ್ಯಮಾಂತ್ ಯೀ ಆಸಾ.  ಇತ್ಯ್ಲಾಕೀ ಹೆಂ spam ಮ್ಹುಣ್ ಆಸಾ ನೇ ತುಮಿ ಕಶೆಂ define ಕರ್ತಾತ್ ... ? "Spam is the use of electronic messaging systems to send unsolicited bulk messages, especially advertising, indiscriminately. While the most widely recognized form of spam is e-mail spam, the term is applied to similar abuses in other media".ತುಮ್ಕಾಂ ಕಳ್ಳೆಂ ನೇ  ವಡ್ಲ್ಯಾ ಪ್ರಮಾಣಾನ್ spam ಯೆಂವ್ಚೆಂ ಇಮೈಲಾ ದ್ವಾರಿಂ. ತುಮ್ಕಾಂ ಗೆಲೆತ್ಯಾ ಥೊಡ್ಯಾ ದಿಸಾಂ ಆದಿಂ sms ದ್ವಾರಿಂ ಜಾಲ್ಲಿಂ ಅವ್ಘಾಡಾಂ ಖಳಿತ್ ಆಸೊಂಕ್ ಪುರೊ . ಏಕಾ ನಂಬ್ರಾ ಥಾವ್ನ್ ಮಸ್ತ್ ಭಿರಂತ್ ಸ್ರಷ್ಟಿ ಕರ್ಚೆ ಸಂದೇಶ್ ಪ್ರಸಾರ್ ಜಾಲ್ಲ್ಯಾನ್ ಥೊಡ್ಯಾ ದಿಸಾಂ ಆದಿಂ North East ಲೋಕ್ ಬೆಂಗ್ಳೂರಾ ಥಾವ್ನ್  ಭಿಯಾನ್ ದಾವ್ ಲ್ಲೊ. ಮಂಗ್ಳೂರಾಂತ್ ಯೀ ಕೋಮು ಆಧಾರಿತ್ ಗಲಾಟೊ ಜಾತಾನಾ , ಹ್ಯಾಚ್ spam ಯಾ bulk ಸಂದೇಶಾನಿಂ ಲೊಕಾಚೊ mood ಪಾಡ್ ಕೆಲ್ಲೊ .!!. 

ಅತಾಂ ತುಮ್ಕಾಂ ಗೊತ್ತು ಆಸೊಂಕ್ ಪುರೊ . " unsolicited bulk messages" ದಾಡುಂಕ್ TRAI ನ್ ಮಸ್ತ್ ನಿರ್ಬಂಧ್ ಗಾಲಾ. ಇತ್ಲ್ಯಾ ಕೀ ಅಸಲೊ ಸಂದೇಶ್ ಮೊಬೈಲಾ ದ್ವಾರಿಂ ದಾಡ್ಲ್ಯಾರ್ ತುಮ್ಚೆಂ ಮೊಬೈಲ್ ನಂಬ್ರಾಚೊ ಪತ್ತೊ ಕರುಂಕ್ ತಾಂಕಾಂ ಚಡ್ ಕಷ್ಟ್ ಜಾಯ್ನಾ. ಪುಣ್ ಇಮೈಲಾ ದ್ವಾರಿಂ spam ಕರ್ತಾತ್ ನೇ ? ತಾಂಕಾಂ ಧರುಂಕ್ ತಿತ್ಲೆಂ ಸುಲಭ್ ನ್ಹಂಯ್ . ಜಾಳಿರ್ IP address ಲಿಪವ್ನ್ ಕಾಮ್ ಕರುಂಕ್ so called "professional "  ಜಣಾಂಕ್ ಆಸಾದ್ಯ್ ನ್ಹಂಯ್.

ತುಮ್ಕಾಂ ಖಳಿತ್ ಆಸೊಂಕ್ ಪುರೊ . ಜಾಳಿರ್ ಜಾಹೀರಾತ್ ಆಧಾರಿತ್ spam ಮಸ್ತ್ ಪ್ರಸಾರ್ ಜಾವ್ನ್ ಆಸ್ತಾತ್. ಏಕಾ ಲೇಖಾನ್ ತ್ಯಾ spammer ಂಕ್ ತೆಂ ಲಾಭಾದಾಯೆಕ್ . ತುಮ್ಕಾಂ ಕಸಲ್ಯೊ ಕಸೊಲ್ಯೊ ಇಮೈಲ್ ದಾಡುನ್ ತುಮ್ಕಾಂ ಘುಸ್ಪಾಡಾಂವ್ಕ್ ತೆ ಪ್ರಯತ್ನ್ ಕರ್ತಾತ್. ಮೊಬೈಲಾರ್ spammer ಂಕ್ ಸುಲಭಾಯೆನ್ ಧರ್ಯೇತಾ. ಪುಣ್ ಜಾಳಿರ್ ಆಸ್ಚೆ spammer ಆಸಾತ್ ನೇ ? ತೆ ಮಸ್ತ್ professional . ತುಮಿಂ ಹ್ಯಾ ವಿಶಿಂ ಮಸ್ತ್ ಜಾಣಾಂ . Yahoo , Gmail ರ್ ತುಮ್ಕಾಂ ಖಂಯ್ ಪುಣೀ spam ಆಯ್ಲ್ಯಾರ್ ತೆಂ junk ಫೊಲ್ಡಾರಾಕ್ ಯೆತಾ. ಪ್ರಖ್ಯಾತ್ ಇಮೈಲ್ ಸೆವಾ ದೀಂವ್ಚಾ ಕಂಪ್ಣೆಚಿಂ junk ಪ್ರೊಗ್ರಾಮ್ ಆನಿಂ ಸೆವಾ ಯೀ ದರಬಸ್ತ್ ಆಸ್ತಾ. ಪುಣ್ ಹೆ spammer ಆಸಾತ್ ನೇ , ಹರ್ಯೇಕ್ ದೀಸ್ ಬಸವ್ನ್ ತಾಣಿಂ ಕಸಲೆಂ ತಂತ್ರಾಗ್ನ್ಯಾನ್ ವಾಪಾರ್ಲಾಂ ಮ್ಹುಣ್ ನಿಗಾ ದವರ್ನ್ ತೆಂ ಕಶೆಂ  bypass ಕರ್ಯೇತ್ ಮ್ಹುಣ್  ಚಿಂತುಂಚ್ ಆಸಾತ್. ತುಮ್ಕಾಂ ಅಜ್ಯಾಪ್ ಜಾಂವ್ಕ್ ಪುರೊ . ಹೆ spammer ಆಸಾತ್ ನೇ ? ತೆ ಏಕ್ bot ಕರ್ತಾತ್. ತಿ  bot ಮ್ಹುಳ್ಯಾರ್ , spam ದಾಡುಂಕ್ ಸಬಾರ್ ಪಾವ್ಟಿಂ ತೆ ತುಮ್ಚೆ ಖಾಸ್ಗಿ ಮಾಹೆತ್ ವಾಪಾರ್ತಾತ್. ತುಮ್ಚಾ ನಾವಾಂತ್ , ತುಮ್ಹಾ ಇಮೈಲ್ ಆಡ್ರೆಸಾಂತ್ ಚ್ ತೆ ತುಮ್ಚಾ ಇಷ್ಟಾಂಕ್ ತಶೆಂ ಇತರಾಂಕ್ ಜಾಳಿ ಸಂದೇಶ್ ದಾಡ್ತಾತ್. ಅಸಲ್ಯಾ IP bypass ಕರ್ಚಿ ಟೆಕ್ನೋಲಾಜಿ ತಾಂಕಾಂ ಕಳಿತ್ ಆಸಾ. ತೆ ಕಾಲೆಂ ಕರ್ತಾತ್ ಮ್ಹುಳ್ಯಾರ್ ಕಂಯ್ ಪುಣಿಂ ತಾಂಚೆಂ ಇಮೈಲ್ ತುಮಿಂ ಚುಕೊನ್ ಪುಣಿ ಉಗ್ತೆ ಕೆಲ್ಯಾರ್ ಮಾಗಿರ್ ತುಮ್ಚಾ ನಾವಾಂತ್ ಚ್ ಅನಿಂ ತುಮ್ಚಾ IP ಂತ್ ಚ್ ಮಾಗಿರ್ ಆಸಲ್ಯಾ ಇಮೈಲಾಂಚೊ ಪ್ರಸಾರ್ ಜಾತಾ. 

ಹ್ಯಾ ಪ್ರಕ್ರಿಯಾಕ್ ನಿರ್ಭಂದ್ ಕರ್ಚೊ ಜಾಲ್ಯಾ ರ್ ಯೀ ಕಸೊ ? ಹ್ಯಾಕಾರ್ಸ್ ಆನಿಂ ಇಂಜಿನಿಯಾರ್ಸ್ ಮಧೆಂ ಹ್ಯಾ ವಿಶಿಂ ಝಾಗ್ಡೆಂ ಜಾವ್ನ್ಂ ಚ್ ಆಸ್ತಾ. ತುಮ್ಕಾಂ CAPTCHA ಖಳಿತ್ ಆಸಾನೇ ?CAPTCHA   ಮ್ಹುಳ್ಯಾರ್ "Completely Automated Public Turing test to tell Computers and Humans Apart". ತೆಂ ಕಂಪ್ಯೂಟರ್ ಆಸಾ ನೇ ಏಕ್ ವಿಚಿತ್ರ್ ನಮೂನೆಚೊ ಏಕ್ code  ಉತ್ಪನ್ನ್ ಕರ್ತಾ . ತೆಂ ಕೋಡ್ ಸುಪಾರ್ ಕಂಪ್ಯೂಟರ್ ನ್ಹಂಯ್ ಮನ್ಶ್ಯಾಂಚಾ ಮೆಂದ್ವಾಕ್ ಮಾತ್ರ್ ವಿಶ್ಲೇಷಣ್ ಕರ್ಚಿ ಸಕತ್ ಆಸ್ತಾ. ತುಮ್ಕಾಂ ಏಕ್ ಸುಲಾಭ್ ಉದಾಹರಣ್ ದಿತಾಂ . ತುಮಿಂ www.daijiworld.com ಕ್ ಭೆಟ್ ದಿತಾತ್ ನೇ ? ತುಮ್ಕಾಂ ಥಂಯ್ ಆಸ್ಚೆಂ ಏಕಾ ಲೇಖನಾವಿಶಿಂ ಪ್ರತಿಕ್ರಿಯಾ ದಿಜೆ ಜಾಲ್ಲ್ಯಾರ್ ತುಮ್ಕಾಂ ಏಕ್ code ವಿಚಾರ್ತಾ, ತುಮ್ಚೆ ದೊಳೆ ನೀಟ್ಟ್ ಕರ್ನ್ ತುಮಿ ತೊ code ಗಾಲಿಜೆ. ತೆನ್ನಾ ಮಾತ್ರ್ ತುಮ್ಚೊ ಸಂದೇಶ್ ತಾಂಕಾಂ ಪಾವ್ತಾ. ಖಂಯ್ ಪುಣೀ code ಸುಕ್ಲ್ಯಾರ್ ತುಮ್ಚೊ ಸಂದೇಶ್ ತಾಂಕಾಂ ಪಾವೊಂಕ್ ಚ್ ಜಾಯ್ನಾ. ಫಕತ್ ಆಮಿಂ daijiworld.com ಉದಾಹಾರಣ್ ಘೆಂವ್ಯಾಂ . ತಾಂಚೆಂ ಕಡೆ ತೆಂ CAPTCHA ನಾತ್ ಲ್ಯಾರ್ ಕೊಣೆಂ ಯೀ ಏಕ್  bot ಕರ್ನ್ ನಾಕಾ ಜಾಲ್ಲಿ ಪ್ರತಿಕ್ರಿಯಾ ಮಿನುಟಾಕ್ ಲಾಕಾ ಗಟ್ಲ್ಯಾನ್ ದೀವ್ನ್ ತಾಂಚೆಂ server ಚ್ ನಿರ್ನಾಮ್ ಕರ್ಯೇತ್ . daijiworld.com ದಿಲ್ಲೆಂ ಏಕ್ ದಾಕ್ಟೆಂ ಉದಾಹರಣ್. ತಾಣಿಂ ವಾಪಾರ್ಚೊ CAPTCHA ಬಹುತ್ ಸುಲಭ್. ಹ್ಯಾ CAPTCHA ಖಾತಿರ್ ಚ್ ಮ್ಹುಣ್ ಹ್ಯಾಕಾರ್ಸ್ ಕಸ್ಲಿ ಕಸ್ಲಿ ಟೆಕ್ನೊಲೊಜಿ ವಾಪಾರ್ನ್ ಆಸಾತ್.  ಖಂಯ್ ಪುಣೀ daijiworld.com ಚಿ CAPTCHA  bypass ಕರಿಜೆ ಜಾಲ್ಯಾರ್ ಫಕತ್ OCR ಟೆಕ್ನೊಲೊಜಿ ಪುರೊ ... ! Daiji  ಚ್ crash ಜಾತಾ.

ಇತ್ಲ್ಯಾ ಕೀ ಹಾವೆಂ spam ವಿಶಿಂ ಹ್ಯಾ ಪಾವ್ಟಿಂ ಬರಂವ್ಕ್ ಏಕ್ ಕಾರಾಣ್ ಆಸಾ. IBM's “X-Force 2012 Mid-Year Trend and Risk Report”. ಹಾಣೆಂ ದಿಲ್ಲ್ಯಾ ವರ್ದೆ ಪ್ರಕಾರ್ 2012 ಇಸ್ವೆಂತ್ ಪಯ್ಲೆ ಪಾವ್ಟಿಂ ಭಾರತೀಯಾನ್  ಅಮೇರಿಕಾಕ್ ಚಲ್ವಾಯ್ಲಾಂ . 2012 ಇಸ್ವೆಂತ್ ಅಧಿಕ್ spam ಉತ್ಪನ್ನ್ ಕೆಲ್ಲಿ ಖ್ಯಾತ್ ( ಕುಖ್ಯಾತ್) ಆಮ್ಚಿ ಜಾಲಿ. ಜಾಳಿರ್ ಗೋಲ್ ಮಾಲ್ ಕರ್ಚಾ ಅಮೇರಿಕಾಚಾಕೀ ಆಮಿಂ ಮುಕಾರ್ ಪಾವ್ಲ್ಯಾಂವ್ ...!! ಯೆದೊಳ್ ಮ್ಹುಣಾಸರ್ ಆಮಿಂ ಸಗ್ಳ್ಯಾ ಆಸ್ಟ್ರೇಲಿಯಾಂತ್ ಆಸ್ ಲ್ಯಾ ತಿತ್ಲ್ಯಾ ಜಣಾಂಕ್ ಏಕಚ್ ವರ್ಸಾನ್ ಉತ್ಪನ್ನ್ ಕರ್ನ್ ದಾಕ್ಲೊ ಕರ್ನ್ ಆಸ್ಲ್ಯಾಂವ್ ..! ಹ್ಯಾ ವರ್ಸಾ ಆಮಿಂ spam ಚೊ ಯೀ ದಾಕ್ಲೊ ಮೊಡ್ಲೊ ... !

**********

Skylon : ಯೇವ್ನ್ ಆಸಾ ಪಳೆಯಾ ಅತ್ಯಾಧುನಿಕ್ ಅಂತ್ರಾಳ್ ವಿಮಾನ್ .........

RAKNNO - July 2013

ಅಂತ್ರಾಳ್ ವಿಗ್ಯಾನಾಂತ್, ಗೆಲೆತ್ಯಾ ಹಪ್ತ್ಯಾಂತ್ ಏಕ್ ಮಹತ್ವಾಕಾಂಕ್ಷಿ ಯೋಜನಾಕ್ ಚಾಲಾನ್ ಮೆಳ್ಳಾಂ. ತುಮಿಂ SABRE (Synergistic Air-Breathing Rocket Engine) ಮ್ಹುಳ್ಳಾ ರಾಕೆಟ್ ಇಂಜಿನಾ ವಿಶಿಂ ಆಯ್ಕಾಲಾಂ ಗೀ ? ಹೆಂ Reaction Engines Limited (REL) ಮ್ಹುಳ್ಳಾ ಬ್ರಿಟಿಷ್ ಎರೊಸ್ಫೇಸ್ ಕಂಪೆನಿಚೆಂ ಮಹತ್ವಾಕಾಂಕ್ಷಿ ಪ್ರೊಜೆಕ್ಟ್. SABRE ಇಂಜಿನಾಕ್ ಕಿತ್ಲಿ ಸಕತ್ ಆಸಾ ಮ್ಹುಳ್ಯಾರ್ ಸಬ್ದಚಾಕೀ ಪಾಂಚ್ ವಾಂಟೆ ವೇಗಾಂತ್ ದಾವೊಂಕ್ ಚಲ್ತಾ. ಗಂಟ್ಯಾಕ್ ಬರೊಬ್ಬರ್ 31,000 ಕಿ. ಮೀ ವೇಗಾಂತ್ ಚಲ್ತಾ ಜಲ್ಲ್ಯಾನ್ ಅಂತ್ರಾಳಾಚಾ Stratosphere ಕ್ ಪಾವೊಂಕ್ ಫಕತ್ ಪಂದ್ರಾ ಮಿನುಟಾಯಿಂ ನಾಕಾತ್. ಹೆಂ ಇಂಜಿನ್ ಅಪುಣ್ ಸಂಸೋಧ್ ಕರ್ನ್ ಆಸ್ಚಾ Skylon  ಮ್ಹುಳ್ಯಾ ಅಂತ್ರಾಳ್ ವಿಮಾನಾಕ್ (Spaceplane) ಕ್ ಬಸವ್ನ್ ಎಕಾಚ್ ಹಂತಾರ್ ಭೂಂಯ್ಚಾ ಕಕ್ಷೆರ್ ಚಲ್ಚೆ ತಸಲೆಂ ವಾಹಾನ್ ಕರ್ಚಾ ಉರ್ಭೆಂತ್ ಆಸ್ ಲ್ಯಾ Reaction Engines Limited  ಸಂಸ್ಥ್ಯಾಕ್ ಗೆಲೆತ್ಯಾ ಹಪ್ತ್ಯಾಂತ್ ಬ್ರಿಟಿಷ್ ಸರ್ಕಾರಾನ್ 114 ಮಿಲಿಯಾನ್ ಡಾಲಾರಾಚಿ ಕುಮೊಕ್ ಬಾಸಾಯ್ಲ್ಯಾ. ಅಂತ್ರಾಳ್ ವಿಗ್ಯಾನಾಂತ್ ಏಕ್ ಮಹತ್ವಚೆಂ ಘಟನ್ ಹೆಂ ...!

ಅಂತ್ರಾಳಾರ್ ಸ್ಫೀಡ್ ಕಿತ್ಯಾಕ್ ?

ಅಂತ್ರಾಳಾಚಿ ವಿಸ್ತಾರಾಯ್ ಪಳೆತಾನಾ , ಅಂತ್ರಾಳಾರ್ ಸಂಚಾರ್ ಕರುಂಕ್ ಆಸ್ಚಿ ಟೆಕ್ನೊಲೊಜಿ , ಕಾಂಯ್ ಚ್ ಲೆಕಾಕ್ ಯೆನಾ. ಅಮಿಂ  ಬಾಂಯ್ತ್ ಆಸ್ ಲ್ಲ್ಯಾ ಮಾಣ್ಕ್ಯಾ ಬರಿಂಚ್ ಆಸಾಂವ್. ಆಮ್ಚಿಂ ರೊಕೆಟಾಂ ಗಂಟ್ಯಾಕ್ ಥೊಡಿಂಚ್ ಹಜಾರ್ ಕಿ.ಮೀ ದಾಂವ್ತಾತ್. ಅಂತ್ರಾಳಾರ್ ಗಂಟ್ಯಾಚೊ  ಸ್ಫೀಡ್ ಸೊಡ್ಯಾಂ , ಸೆಕುಂಡಾ ಲೇಕಾನ್ ಮೆಜ್ಲಾರೀ ಆಮ್ಕಾಂ ತೆಂ ಪಾವೊಂಕ್ ಜಾಯ್ನಾತ್ಲೆಂ ತಿತ್ಲೆಂ , ಚಿಂತುಕ್ ಜಾಯ್ನಾ ತಿತ್ಲೆಂ ಅಗಾಧ್. ಕಂಯ್ ಪುಣೀ ಆಮ್ಚಿಂ ರೊಕೆಟಾಂ ಸೆಕುಂಡಾಕ್ 3 ಲಾಕ್ ಕಿ. ಮೀ ವೇಗಾಂತ್ ದಾಂವ್ತಾತ್ ಮ್ಹುಣ್ ಚಿಂತಿಯಾಂ . ಅಮ್ಕಾಂ ಚಂದ್ರಾಕ್ ಪಾವೊಂಕ್ ಪುಣೀ ದೇಡ್ ಸೆಕುಂಡಾಂ ಪುರೊ. ಪುಣ್ ಸುರ್ಯಾಕ್ ಪಾವಾಜೆ ಜಾಲ್ಯಾರ್ 8 ಮಿನುಟಾಂ ಮ್ಹುಣಿ ಜಾಯ್ಜೆ. ಅಮ್ಕಾಂ ಲಾಗ್ಗಿಂ ಆಸ್ಚೆಂ ನೆಕೆತ್ರ್ ಪ್ರಾಕ್ಸಿಮಾ ಸೆಂಟಾರಿಕ್ ಪಾವಾಜೆ ಜಾಲ್ಯಾರ್ 4.2 ವರ್ಸಾಂ ಜಾಯ್ಜೆ. ಆಮ್ಚಿ ಸೆಜಾರಿ ಗ್ಯಾಲಾಕ್ಸಿ ಅಂಡ್ರೋಮಿಡಾಕ್ ಪಾವಾಜೆ ಜಾಲ್ಯಾರ್ 2 ಮಿಲಿಯಾನ್ ವರ್ಸಾಂ ಜಾಯ್ಜೆ...!!! ಪುಣ್ ಅಮ್ಚೆರ್ ಸೆಕುಂಡಾಕ್ 3 ಲಾಕ್ ವೇಗಾಂತ್ ಚಲ್ಚಿ ಟೆಕ್ನೊಲೊಜಿ ಸೊಡಿಯಾಂ ಆಮ್ಚಿಂ ರೊಕೆಟಾಂ ಸೆಕುಂಡಾಕ್ ದಾ ಗೀ ಯಾ ಬಾರಾ ಕಿ.ಮೀ ಸ್ಪೀಡಾಚಾ ವ್ಯಾಪ್ತೆರ್ ಚ್ ಆಸಾತ್. ತಶೆಂ ಜಾಲ್ಲ್ಯಾನ್ ಅಂತ್ರಾಳಾರ್ ಉಬೊಂಕ್ ಸಪಣ್ ದೆಕ್ಚಾ ಮನ್ಸ್ಯಾಕ್ ವಿಶ್ವಚಾ ಅನ್ಯೇಕ್ ಕುಶಿಕ್ ಪಾವಾಜೆ ಜಾಲ್ಯಾರ್ ಅಂತ್ರಾಳ್ ವಾಹಾನಾಂಚಿ ತಾಂತ್ರಿಕತ ವಾಡಾಯ್ಜೆ ಮ್ಹುಣ್ ಖಳಿತ್ ಜಾಲ್ಲೆಂ ಪಯ್ಲೆಂ ಸತ್. ಪುಣ್ ಅತಾಂಚಿ ತಾಂತ್ರಿಕತ ಸುದ್ರಾಂವ್ಚಿ ಮ್ಹುಳ್ಯಾರ್ ಫಕತ್ ಸ್ಪೀಡ್ ಚಡ್ ಕರ್ಚಿ ಮಾತ್ರ್ ನ್ಹಂಯ್ , ಸಾಂಪ್ರದಾಯಿಕ್ ರೊಕೆಟಾಂ ಚೆಂ ಅವ್ಗಣ್ ನಿವಾರ್ಚೆ ಯೀ ಪ್ರಮುಖ್ ಜಾವ್ನ್ ಆಸಾ. Reaction Engines Limited ಕರ್ಚೆಂ ಯೀ ತೆಂಚ್  ..! ತಾಣಿಂ ಕರ್ಚಿ ಸುದ್ರಾಪಾಚೊ ವಡ್ಲೊ ವಾಂಟೊಚ್ SSTO...!!

 SSTO ಮುಳ್ಯಾರ್ ಕಿತೆಂ ಅನಿಂ ಕಿತ್ಯಾಕ್ ?

single-stage-to-orbit ಯಾ ಆಮಿಂ SSTO ಮ್ಹುಣ್ತಾಂವ್ ಪಳೆ ಅತಾಂಚಾ ಪರಿಸ್ಥಿತೆರ್  ಅಂತ್ರಾಳ್ ವಿಗ್ಯಾನಾಕ್ ಜಾಯ್ ಜಾಯ್ಜೆ ತಸಲಿ ಟೆಕ್ನೊಲೊಜಿ. ಏಕಾ ಜಾಗ್ಯಾ ಥಾವ್ನ್ ಆನ್ಯೇಕಾ ಜಾಗ್ಯಾಕ್ ಏಕ್ ವಾಹಾನ್ ಅಪ್ಲ್ಯಾ ಘಟ್ಸಾಣೆಚೊ ವಾಂಟೊ ನಿಕ್ಳಾಯ್ನಾಸ್ತಾನಾ ಯಾ ಉಡಾಯ್ನಾಸ್ತಾನಾ ಪಾವ್ತಾ ಜಾಲ್ಯಾರ್ ಆಮಿಂ SSTO ಮ್ಹುಣ್ತಾಂವ್. ಅಮ್ಚಿ ಅತಾಂಚಿ ರೊಕೆಟ್ ಟೆಕ್ನೊಲೊಜಿ ಪುರಾ ಚಲ್ಚಿ ನ್ಯೂಟನಾಚಾ "For every reaction there is equal and opposit reaction" ಮ್ಹುಳ್ಳ್ಯಾ ಸಿದ್ದಾಂತ ದ್ವಾರಿಂ. ಅಮ್ಚಿಂ ಅತಾಂಚಿಂ ರೊಕೆಟಾಂ ಪುರಾ ಬಹು ಹಂತಾಚಿಂ. ಘನ್ ಯಾ ದ್ರವ್ ಇಂಧನ್ ಘೆವ್ನ್ ಮಲ್ಟಿ ಸ್ಟೇಜಿಚಿಂ ಹಿಂ ರಾಕೆಟಾಂ ನ್ಯೂಟನಾಚಾ ತಿಸ್ರ್ಯಾ ನಿಯಮ ಪ್ರಕಾರ್ ಸಕತ್ ಏಕಾ ದಿಶಾಂತ್ ಮೊಕ್ಳಿಕ್ ಕರ್ತಾನಾ ಅನ್ಯೇಕಾ ದಿಶಾಂತ್ ಮುಕಾರ್ ಯೆತಾತ್. ಆಶೆಂ ಅಪ್ಲ್ಯಾ ವಾಟೆರ್ ಎಕ್ಯೇಕ್ ಹಂತ್ ನಿಕ್ಳಾವ್ನ್ಂ ಚ್ ಚಲ್ತಾತ್. ಶಟಲಾ ತಸಲ್ಯಾ ಥೊಡ್ಯಾ ವಾಹಾನಾಂಕ್ ಸೊಡ್ಲ್ಯಾರ್ ಬಾಕಿಂಚಾ ರೊಕೆಟಾನಿಂ ನಿಕ್ಳಾಯ್ಲೆ ಭಾಗ್ ಪರತ್ ವಾಪಾರುಂಕ್ ಜಾಯ್ನಾಂತ್ . ಆಶೆಂ ಜಾಲ್ಲ್ಯಾನ್ ಬಹು ಹಂತಾಚಿ ಅಂತ್ರಾಳ್ ವಾಹಾನಾಂ ಉಭೊಂಕ್ ಮಸ್ತ್ ಕರ್ಚ್ ಜಾಯ್ ತಶೆಂಚ್ ಸಂಪನ್ಮೂಲಾಚೊ ವಿಬ್ಡಾಯ್ ಜಾತಾ. ಭೂಂಯ್ಚೆರ್ ಯೆದೊಳ್ ಮ್ಹುಣಾಸರ್ SSTO ಪ್ರಯೋಗ್ ಯಶಸ್ವಿ ಜಾವ್ನಾಂತ್ . ಪುಣ್ ಚಂದ್ರಾರ್ ಹೆ ಪ್ರಯೋಗ್ ಯಶಸ್ವಿ ಜಾಲ್ಯಾತ್ . ಹಾಕಾ ಕಾರಣ್ ಭೂಂಯ್ಚೆ ರ್ ಆಸ್ಚಿ ವಡ್ಲಿ ಗುರುತ್ವಾಕರ್ಷಣ್ ಸಕತ್. ಹ್ಯಾ ಸಕ್ತೆ ವಿರುದ್ದ್ ನಿಕಾಳ್ಜೆ ಜಾಲ್ಯಾರ್ , ಪಯ್ಲ್ಯಾನ್ ಇತ್ಲೊಚ್ ಮ್ಹುಣ್ ವೇಗ್ ಆಸಾಜೆ ಮಾಗಿರ್ ತೊ ವೇಗ್ ಅಪ್ಣಾಂವ್ಕ್ ಅಪಾರ್ ಪ್ರಮಾಣಾಚೆಂ ಇಂಧನ್ ಉಲ್ಪಯ್ಜೆ. ಪುಣ್ ಚಂದ್ರಾಚಿ ಗುರುತ್ವಾಕರ್ಷಣ್ ಸಕತ್ ಭೂಂಯ್ಚಾ 1/6 ಮಾತ್ರ್. ತಶೆಂ ಜಾಲ್ಯಾನ್ ಇಲ್ಲೆಶೆಂ ಇಂಧನ್ ವಾಪಾರ್ನ್ ಏಕಾಚ್ ಹಂತಾರ್ ಕಕ್ಷೆರ್ ಪಾವ್ಯೇತಾ. ಪುಣ್ Reaction Engines Limited ಭೂಂಯ್ಚೆರ್ ಯೀ ಏಕಾಚ್ ಹಂತಾರ್ ಕಕ್ಷೆರ್ ಪಾಂವ್ಚೆ ತಸಲೆಂ ವಾಹಾನ್ ತಯಾರ್ ಕರ್ನ್ ಆಸಾ. ತೆಂ ಚ್ ಸ್ಕೈಲೊನ್ (Skylon ) ..!!

ಕಿತೆಂ ಹೆಂ Skylon ?

ತುಮ್ಕಾಂ aircraft ಆನಿಂ spacecraft ಮ್ಹುಳ್ಯಾರ್ ಕಿತೆಂ ಮ್ಹುಣ್ ಸಾಂಗ್ಚಿ ಗರ್ಜ್ ನಾ. ಪುಣ್ ಅನ್ಯೇಕ್ ಆಸಾ . ತೆಂ Spaceplane . ಹೆ ಅಂತ್ರಾಳಾರ್ ವಿಮಾನಾ ಬರಿ ಉಬ್ತಾ , ನಿರ್ವಾತಾರ್ ರೊಕೆಟಾ ಬರಿ ಚಲ್ತಾ. ಅಸಲೆಂ ಏಕ್ ಅಂತ್ರಾಳ್ ವಿಮಾನ್ ತಯಾರ್ ಕರ್ಚಾರ್ ಪಡ್ಲ್ಯಾ ಬ್ರಿಟಿಷ್ ಕಂಪ್ಣಿ Reaction Engines Limited   ..!  ಹೆಂ ಕಶೆಂ ಆಸ್ತಾ ಮ್ಹುಳ್ಯಾರ್ ಭುಂಯ್ಚಾ ಕಂಚಾ ಯೀ ರನ್ ವೇ ಥಾವ್ನ್ ಉಭೊಂಕ್ ಯಾ ದೆವೊಂಕ್ ಸಕ್ತಾ. ಹ್ಯಾ ಅಂತ್ರಾಳ್ ವಿಮಾನಾಕ್ ಚ್ ಮ್ಹುಣೊನ್ ತಾಣಿಂ SABRE ಇಂಜಿನ್ ವಿಕಾಸ್ ಕೆಲಾಂ. ಆಶೆಂ ಜಾಲ್ಯಾನ್ ಹೆಂ ಅಂತ್ರಾಳ್ ವಿಮಾನ್ ಸುಮಾರ್ ದೊನ್ಸ್ಯಿ ಪಾವ್ಟಿಂ ಪುನರ್ ವಾಪಾರ್ಯೆತ್. ತಶೆಂ ಜಾಲ್ಲ್ಯಾನ್ ಅಂತ್ರಾಳ್ ಯಾತ್ರಾಂಚೊ ಕರ್ಚ್ ಭಾರಿ ಪ್ರಮಾಣಾಂತ್ ದೆವೊಂಕ್ ಸಾದ್ಯ್ ಜಾತಾ. ಹೆಂ ವಿಮಾನ್ ಪಂದ್ರಾ ಹಜಾರ್ ಕೆ.ಜಿ. ವಜನ್ ವಾವೊಂಕ್ ಸಕ್ತಾ. ಯಾತ್ರೆಕಾರ್ ವಿನ್ಯಾಸ್ ಕೆಲ್ಲ್ಯಾರ್ ಸುಮಾರ್ ತೀಸ್ ಜಣಾಂಕ್ ಹಾಂತುಂ ಪಯ್ಣ್ ಕರ್ಯೇತ್ ಖಂಯ್. ಹೆಂ 83.3 ಮೀಟರ್ ಲಾಂಬ್ ಆಸ್ತೆಲೆಂ.  ಹ್ಯಾ SABRE ಇಂಜಿನಾಚಿ ವಿಶೇಷತಾ ಮ್ಹುಳ್ಯಾರ್ ತಾಚಾ ನಾವಾಂತ್ ಚ್ ಆಸ್ ಲ್ಯಾ ಬರಿ ಭುಂಯ್ಚಾ ವಾತಾವಾರಣಾಂತ್ ಚಲ್ತಾನಾ ಬಾಯ್ಲೆಂ ವಾರ್ಯಾಚೊ ಉಸ್ವಾಸ್ ಗೆವ್ನ್ ದ್ರವ್ ಹೈಡ್ರೊಜನ್ ಉಲ್ಪೊಂವ್ಕ್ ಕುಮೊಕ್ ಕರ್ತಾ. ತಶೆಂ ಜಾಲ್ಲ್ಯಾನ್ ನಿರ್ವಾತಾಕ್ ಪಾಂವ್ತಾನಾ ಮಾತ್ರ್ ಹೈಡ್ರೊಜನ್ ಉಲ್ಪಂವ್ಕ್ ದ್ರವ್ ಒಕ್ಸಿಜನಾಚೊ ಟಾಂಕಿ ಉಗ್ತೆ ಕೆಲ್ಯಾರ್ ಜಾಲ್ಯೊ ...!! ಆಶೆಂ ಜಾಲ್ಲ್ಯಾನ್ ಪಯ್ಣ್ ಕರ್ತಾನಾ ವ್ಹಡ್ ಪ್ರಮಾಣಾರ್ ಇಂಧನ್ ಘೆವ್ನ್ ಚಲ್ಚಿ ಗರ್ಜ್ ನಾ .
ಸಕ್ಕಡ್ ಚಿಂತ್ ಲ್ಯಾ ಬರಿಚ್ ಜಾಲ್ಯಾರ್ ಯೂರಿ ಗಗರಿನ್ , ಸುನಿತಾ ವಿಲಿಯಾಮ್ಸ್ ಅಸಲೆ ಪುರಾ ಅಂತ್ರಾಳ್ ಯಾತ್ರಿನಿಂ ಮಾತ್ರ್ ಗೆಲ್ಲ್ಯಾ ಜಾಗ್ಯಾರ್ ಏಕಾ ಸಾಂಜೆರ್ ಆಮಿಂ ಬಜ್ಪ್ಯಾಂಚಾ  ಗುಡಾ ಅಂಗ್ಡೆಂತ್ ಏಕ್ ಚಾ ಪಿಯೆವ್ನ್ ಮಾಗಿರ್ ಮಂಗ್ಳೂರ್ ಇಂಟರ್ ನ್ಯಾಷಿನಲ್ ಏರ್ ಪೋರ್ಟಾ ಥಾವ್ನ್ ಭೂಂಯ್ಚಾ ಕಕ್ಷೆರ್ ಥೊಡ್ಯಾ ವೇಳಾಕ್ ಪುಣಿಂ ಪಿಕ್ನಿಕಾಕ್ ಮ್ಹುಣ್ ಉಡ್ಕಾಣಾಂ ಮಾರ್ಚೆ ದೀಸ್ ಚಡ್ ಪಯ್ಸ್ ಆಸ್ಚೆ ನಾಂತ್ ...!!
    ********************************

ಅಂತರ್ ಜಾಳಿರ್ ಅನಾಮಿಕ್ ಬೊಂವ್ಡಿ....!

Naman Ballok November  2012 

ತುಮ್ಚಾ ಘರ್ಚಾ ಭಿತರ್ಲ್ಯಾ ಕೂಡಾಂತ್ ಬಸವ್ನ್ , ಅಂತರ್ ಜಾಳಿರ್ ಕಾಮ್ ಕೆಲ್ಲಾರ್ ಭಯ್ರ್ ಆಸ್ ಲ್ಯಾ ಸಂಸಾರಾಂತ್ ಅನಾಮಿಕ್ ಜಾವ್ನ್ ರಾವೊಂಕ್ ಜಾತಾ ಗಿ ? . ಕಾಳಿ ಹೆಲ್ಮೆಟ್ ಗಾಲ್ನ್ ,  ವಾಟೆರ್ ಚಲ್ಚಾ ಸ್ತ್ರಿಯೆಚಿ ಭಾಂಗಾರಾಚಿ ಚೈನ್ ವೊಡ್ನ್ ವರ್ನ್ ಮ್ಹುಜಿ ಕೋಣಿ ವೊಳೊಕ್ ಧರುನಾ ನೇ ಮ್ಹುಣ್ ಇಲ್ಲೆಂ ಪುಣೀ ಸಮಾಧನ್ ಬೊಗ್ಯೇತ್. ತಸಲ್ಲಿಚ್ ಚೊರಿ ಅಂತರ್ ಜಾಳಿರ್ ಕರುಂಕ್ ಗೆಲ್ಯಾರ್ ತೆಂ ಸಮಧಾನ್ ಭೊಗ್ಯೇತ್ ಗೀ ? ಖಂಡಿತ್ ನಾ ...! ತುಮಿಂ ತುಮ್ಚಾ ಕಂಪ್ಯೂಟರಾ ಥಾವ್ನ್ ಇಂಟರ್ನೆಟಾಕ್ connect ಜಾಲ್ಲ್ಯಾ ಉಪ್ರಾಂತ್ , ತುಮಿಂ ಖಂಚಿಂ ಜಾಳಿ ತಾಣಾಂ ಕ್ ಭೆಟ್ ದಿತಾತ್ ? ಕೊಣಾಕ್ ಇಮೈಲ್ ದಾಡ್ತಾತ್ ? ತುಮಿಂ ಅಂತರ್ ಜಾಳಿ ಥಾವ್ನ್ ಕಾಲೆಂ shopping ಕೆಲೆಂ ? ಕೊಣಾ ಕಡೆ ಕೆನ್ನಾ , ಕಿತ್ಲೆ ವೇಳ್ ಗಪ್ಪೆ ಮಾರ್ಲೆ ?, Youtube ಥಾವ್ನ್ ಕಸಲೊ ವಿಡಿಯೊ ಪಳಯ್ಲೊ ... ? ,ಕಂಚೊ ಗೇಮ್ ಕೆಳ್ಳೊಯ್ ... ಹಿ ಪುರಾ ಮಾಹೆತ್ ಪುರಾ ಭಯ್ಲಾ ಸಂಸಾರಾಕ್ ಸುಲಾಭನ್  ಘೆವ್ಯೇತ್ .ತುಮ್ಚೆಂ ಕಂಪ್ಯೂಟರ್ , ಅಂತರ್ ಜಾಳಿಕ್ connect ಜಾತಾನಾ, ತುಮ್ಚೊ ಇಂಟರ್ನೆಟ್ ಸರ್ವಿಸ್ ಪ್ರೊವೈಡರ್ ತುಮ್ಕಾಂ ಏಕ್ ಖಾಸ್ IP Address ದಿತಾ. ತಿ IP Address ಘೆವ್ನ್ ಜಾಳಿರ್ ಬೊಂವ್ತಾನಾ , ವಯ್ಲಿ ಖಾಸ್ಗಿ ಮಾಹೆತ್ ಮಾತ್ರ್ ನ್ಹಂಯ್ , ತುಜೆಂ ಒಪರೇಟಿಂಗ್ ಸಿಸ್ಟಮ್ ಕಸಲೆಂ? ತುಂ ಖಂಚೆಂ ಬ್ರೌಸರ್ ವಾಪಾರ್ತಾಯ್ ? ಕಂಚೆಂ ವರ್ಶನ್ ........? ಅಸಲಿ ಪೂರಾ ಮಾಹೆತ್ ಯೀ ಸುಲಾಭಾಯೆನ್ ಘೆವ್ಯೇತ್ ...! 

ಅಶೆಂ ಜಾಲ್ಲ್ಯಾನ್ ಜಾಳಿರ್ ವ್ಯವಹಾರ್ ಕರ್ಚೆಂ ಸಕ್ಕಡೀ ಸುರಕ್ಷಿತ್ ನ್ಹಂಯ್ ಮ್ಹುಳ್ಯಾ ಬರಿ ಜಾಲೆಂ . ತುಮ್ಕಾಂ ಖಳಿತ್ ಅಸೊಂಕ್ ಪುರೊ. ಜಾಳಿಜಾಗ್ಯಾಂಕ್ ತುಮಿಂ ಭೆಟ್ ದಿತಾನಾ, ತುಮ್ಚಿ ಥೊಡಿ ಖಾಸ್ಗಿ ಮಾಹೆತ್ Cookies ಮ್ಹುಳ್ಳ್ಯಾ ದಾಕ್ಟ್ಯಾ text file ನಿಂ ದಾಸ್ತಾನ್ ಜಾವ್ನ್ ಆಸ್ತಾ. ತುಮಿಂ ಭೆಟ್ ದಿಂವ್ಚೆ ಥೊಡೆ ಜಾಳಿಜಾಗೆ , ಹ್ಯಾ Cookies ಥಾವ್ನ್ ಅಕ್ರಮ್ ಜಾವ್ನ್ ತುಮ್ಚಿ ಮಾಹೆತ್ ಘೆತಾತ್. ತುಮಿಂ ಜಾಳಿರ್ ಕಿತೆಂ ಕಿತೆಂ ಕರ್ತಾತ್ ಮ್ಹುಣ್ ತುಮ್ಚಾ IP Address ರ್ ನಿಗಾ ದವರ್ನ್ ತುಮ್ಚಿ ಮಾಹೆತ್ ತಿಸ್ರ್ಯಾ ಪಾಡ್ತಿಕ್ ವಿಕ್ತಾತ್. Spam ಇ-ಮೈಲಾಂ ಯೆಂವ್ಚಿಂ ತೆನ್ನಾಂಚ್ . ಥೊಡೆ ಪಾಟಿಂ ತುಮ್ಚಿ ಮಾಹೆತ್ Spyware ಂಕ್ ಯೀ ಮೆಳೊಂಕ್ ಪುರೊ. ಆಶೆಂ ಜಾಲ್ಲ್ಯಾನ್ ವಡ್ಲೊ ಅಪಾಯ್ ಆಸ್ತಾ. 

ಅಪಾಯ್ ಮಾತ್ರ್ ನ್ಹಂಯ್ ಹ್ಯಾ ವ್ಯವಸ್ಥೆಂತ್ ಥೊಡೆ ಉಪ್ಯೋಗ್ ಯೀ ಆಸಾತ್. ಅಂತರ್ ಜಾಳಿಚೊ ವಾಯ್ಟ್ ಉಪ್ಯೋಗ್ ಹ್ಯಾ ವರ್ವಿಂ ನಿವಾರುಂಕ್ ಸಾಧ್ಯ್ ಜಾತಾ. ಅನಾಮಿಕ್ ಜಾವ್ನ್ ಇ-ಮೈಲ್ ಕೊಣಾ ಕೊಣಾಕ್ ದಾಡ್ನ್ , ಸೈಬರ್ ಕ್ರೈಮ್ ಕೆಲ್ಲ್ಯಾರ್ ಸುಲಾಭಾಯೆನ್ ಶಿರ್ಕೊನ್ ಪಡೊಂಕ್ ತುಮ್ಚಾ ಕಂಪ್ಯೂಟರಾಚೊ IP Address ಪುರೊ.  ಕದಿರೆನಾ ಹಳ್ಳೆಚಾ , ಮಾಂಟ್ಯಾಂತ್ ಬಸೊನ್ ಪಾರ್ಲಿಮೆಂಟಾಕ್ ಬಾಂಬ್ ದವರ್ಲಾ ಮ್ಹುಣ್ ತುವೆಂ fake ಐಡಿ ಕರ್ನ್ ಇ-ಮೈಲ್ ದಾಡ್ಲ್ಯಾರ್ , ತುಜೆಂ ಇ-ಮೈಲ್ ಖಂಚಾ IP Address ಥಾವ್ನ್ ಆಯ್ಲೆಂ ? ತ್ಯಾ IP Address ಚೆಂ ಕಂಪ್ಯೂಟರ್ ಕಂಯ್ ಆಸಾ ಹೆಂ ಪುರಾ ಸೈಬರ್ ಪೋಲಿಸಾಂಕ್ ಕಳ್ತಾ. ತಶೆಂ ಜಾಲ್ಯಾನ್ ತೆ ತುಜ್ಯಾ ಮಾಂಟ್ಯಾ ಮ್ಹುಣಾಸರ್ ಯೇಂವ್ಕ್ ಸಕ್ತಾತ್ ..!

ತರ್ ಅಂತರ್ ಜಾಳಿರ್ ಅನಾಮಿಕ್ ಜಾವ್ನ್ browsing ಕರುಂಕ್ ಜಾಯ್ನಾಂ ಗೀ ? ಕಂಪ್ಯೂಟರ್ ಸಂಸಾರಾಂತ್  " Impossible is nothing" ಮ್ಹುಳ್ಳಿ ಏಕ್ ಸಾಂಗ್ಣಿ ಆಸಾ. ತಶೆಂ ಜಾಲ್ಯಾನ್ ತುಕಾ ಜರೂರ್ ಜಾವ್ನ್ ಅಂತರ್ ಜಾಳಿರ್ ಅನಾಮಿಕ್ ಜಾವ್ನ್ browsing ಕರ್ಯೇತ್. ಹಾಕಾ ಸಬಾರ್ ವಿಧಾನಂ ಆಸಾತ್. ಸುಲಾಭಾಯೆಚೆಂ ಮ್ಹುಳ್ಯಾರ್ Proxy Server ವಾಪಾರ್ಚೆಂ . ಹಿಂ Proxy Server ಕಶಿಂ ಕಾಮ್ ಕರ್ತಾತ್ ಪಳೆಯಾ. ದಾಕ್ಲ್ಯಾಕ್, ತುಂ ತುಜಾ ಕಂಪ್ಯೂಟರಾ ಥಾವ್ನ್ GMAIL ಉಗ್ತೆ ಕರ್ನ್ ಆಸಾಯ್ ಮ್ಹುಣ್ ಚಿಂತ್ಯಾ. ತುಜೆಂ ವೆಬ್ ಬ್ರೌಸರ್ , GMAIL ಸರ್ವರಾಕ್ GMAIL ಉಗ್ತೆ ಕರ್ ಮ್ಹುಣ್ ವಿನವ್ಣಿ ದಾಡ್ತಾ. GMAIL ಸರ್ವರಾಕ್ ಕಂಚಾ IP Address ಥಾವ್ನ್ ವಿನವ್ಣಿ ಆಯ್ಲ್ಯಾ ಮ್ಹುಣ್ ಖಳಿತ್ ಆಸ್ತಾ. ಅಸೊ ತುಜ್ಯಾ ಕಂಪ್ಯೂಟರಚಿ ಮಾಹೆತ್ GMAIL ಸರ್ವರಾಕ್ ಕಳಿತ್ ಜಾಲೆಂ ಮ್ಹುಣ್. ಹೆ ಅಡಾವ್ನ್ ಆನಾಮಿಕ್ ಜಾವ್ನ್ GMAIL ಸರ್ವರಾಕ್ ಕಶಿ ವಿನವ್ಣಿ ತುವೆಂ ದಾಡ್ಯೆತ್?. ಹೆಂ ಸಾದ್ಯ್ ಜಾವ್ಚೆಂ Proxy Server ದ್ವಾರಿಂ. ತುಜ್ಯಾ ಆನಿಂ GMAIL ಸರ್ವರಾ ಮಧೆಂ ಕಾಮ್ ಕರ್ತಾ ಹೆಂ Proxy Server . ಅನಾಮಿಕ್ ಜಾವ್ನ್ GMAIL ವಾಪಾರುಂಕ್ ತುವೆಂ ಪಯ್ಲೆಂ ವಿನವ್ಣಿಂ Proxy Server ಕ್ ದಾಡಿಜೆ. ಹೆಂ Proxy Server ತುಜೊ IP Address ಲಿಪವ್ನ್ ದವರ್ನ್ , ಅಪ್ಣಾಂ ದ್ವಾರಿಂ GMAIL ಸರ್ವರಾಕ್ ತುಜಿ ವಿನವ್ಣಿ ದಾಡ್ನ್ , ತುಕಾ GMAIL ಸರ್ವರಾಚಿ ಮಾಹೆತ್ ಪಾವಾಯ್ತಾ. ತಶೆಂ ಜಾಲ್ಲ್ಯಾನ್ ತುವೆಂ ಕದಿರೆನಾ ಹಳ್ಳೆಚಾ ಮಾಂಟ್ಯಾ ಥಾವ್ನ್ ಇ-ಮೈಲ್ ದಾಡ್ಲ್ಯಾರೀ GMAIL ಸರ್ವರಾಕ್ ತೆಂ ಪಯ್ಶಿಲ್ಯಾ ಕಜಕಿಸ್ತಾನ ಥಾವ್ನ್ ಆಯಿಲ್ಲ್ಯಾ ಬರಿ ದಿಸ್ತಾ...! 

ಸಬಾರ್ ನಮೂನೆಚೆ Proxy Server ಆಸಾತ್. ಚಡಾವತ್ ಜಾವ್ನ್ ಸಾಧರಣ್ ಕಂಪ್ಯೂಟರ್ ಗಿನ್ಯಾನ್ ಆಸ್ ಲ್ಯಾನಿ ವೆಬ್ ಆಧಾರಿತ್ Proxy ವಾಪಾರ್ಯೇತಾ. ಥೊಡ್ಯೊ ಫಾಮಾದ್ ವೆಬ್ ಆಧಾರಿತ್ Proxy  ಪಳೆಯಾ .... Newipnow.com , Blewpass.com, Proxify.com , Anonymouse.org.... ತುಮ್ಕಾಂ ಹಾತುಂ ಏಕ್ try ಕರ್ನ್ ಪಳವ್ಯೇತಾ. ತಶೆಂ ಮ್ಹುಳ್ಯಾರ್ , Proxy  ವಾಪಾರ್ನ್ ಸಕ್ಕಡೀ ಗೋಲ್ ಮಾಲ್ ಕರುಂಕ್ ಜಾತಾ ಮ್ಹುಣ್ ನ್ಹಂಯ್. ತುವೆಂ ಹೆಲ್ಮೆಟ್ ಗಾಲ್ನ್ ಚೊರಿ ಕೆಲ್ಯಾರ್ ಯೀ , ಪೋಲಿಸಾಂಕ್ ತುಕಾ ಧರುಂಕ್ ಆಸಾಧ್ಯ್ ಮ್ಹುಣ್ ಕಾಂಯ್ ನಾ. Proxy ಕ್ ಯೀ ಅಪ್ಲಿಚ್ ಮ್ಹುಳ್ಳಿ ಮಸ್ತ್ ಸೀಮಿತಾಯ್ ಆಸಾ...!
ಇತ್ಲ್ಯಾಕೀ ಹೆಂ Proxy ವಾಪಾರ್ಚೆಂ ಮ್ಹುಳ್ಯಾರ್ , ಕೊಣಾಚೆಂ ಗೀ ಕಾಜಾರ್ ಬೆಂದೂರ್ ಹೊಲಾಂತ್ ಚಲ್ತಾನಾ , ವಾಟೆರ್ ಚಲ್ಚಾ ತುವೆಂ ಹೊಕ್ಲೆಚಾ ಅನಿಂ ನವ್ರ್ಯಾಚಾ ಪಾಡ್ತಿಂಚಾಂಕ್ ಘುಸ್ಪಾಡಾವ್ನ್ , ದೋನ್ ಪಡಿ ದುಕ್ರಾ ಮಾಸ್ ಕಾಂವ್ಚಾ ಬರಿ..!!
   *********

ಮೊಬೈಲ್ TV ...!

Naman Ballok October  2012

ಚಡಾವತ್ ಜಾವ್ನ್ ಆಮ್ಕಾಂ ಹೆವ್ಶಿನ್- ತೆವ್ಶಿನ್ ವಚುಂಕ್ ಆಸ್ತಾನಾ, TV ರ್ ಆಮಿಂ ಪಳೆಂವ್ಚೊ ಸೀರಿಯಾಲ್ ಚುಕೊನ್ ವೆತಾ. ಏಕ್  ಖಂಚಯೀಂ ಪ್ರಮುಖ್ , ಕ್ರಿಕೆಟ್ ಮ್ಯಾಚ್ ಆಸ್ ಲ್ಯಾರ್ ಆನಿಂ ತುಕಾ ಖಂಯ್ ಪುಣಿ ಪಯ್ಣ್ ಕರುಂಕ್ ಆಸ್ ಲ್ಯಾರ್ ತೆಂ ಮ್ಯಾಚ್ ಪಳೆಂವ್ಚೊ ಅವ್ಕಾಸ್ ಹೊಗ್ಡಾಯ್ಜೆ ಪಡ್ತಾ. ಅಸಲೆ ಪುರಾ ಸಮಸ್ಯೆ ಥೊಡ್ಯಾ ವರ್ಸಾಂ ಅದಿಂ ಆಸ್ ಲ್ಲೆ. ಪುಣ್ ಅತಾಂ ಟೆಕ್ನೊಲೊಜಿ ವಾಡೊನ್ ಆಯ್ಲ್ಯಾ. ಥೊಡ್ಯಾ ವರ್ಸಾಂ ಆದಿಂ ಪೊಕೆಟ್ ಟಿವಿಚಾ ಅಭಿವ್ರದ್ದೆ ವಿಶಿಂ ಪರಿಕಲ್ಪನ್ ಆಸ್ ಲ್ಲೆಂ. ಪುಣ್ ಆತಾಂ ಅಮ್ಚೆಂ ಮೊಬೈಲ್ ಚ್ TV ಜಾವ್ನ್ ವಾಪಾರ್ಯೇತ್. ಹೆಂ ಪುರಾ ಸಾಧ್ಯ್ ಜಾಲ್ಲೆಂ ಚಡಿತ್ ಸ್ಪೀಡಾನ್ data ವಾ‍ರ‍್ಯಾರ್ ದಾಡುಂಕ್ ಜಾಲ್ಲೆ ನಿಮ್ತಿಂ . 3G ತಾಂತ್ರಿಕಾಯೆಚೊ ಪರಿಣಾಮ್ ಹೊ...

ತಶೆಂ ಮ್ಹುಳ್ಯಾರ್ 3G ಯೆಂವ್ಚಾ ಪಯ್ಲೆಂ ಹ್ಯೊ ಪೊಕೆಟ್ TV ನಾತ್ ಲ್ಯೊ ಮ್ಹುಣ್ ನ್ಹಂಯ್. 1977 ಂಚ್ ಸಿಂಕ್ಲೆರ್ ರೆಡಿಯೊನಿಕ್ಸ್ ಮ್ಹುಳ್ಳ್ಯಾ ಕಂಪೆನಿನ್ ಬಲ್ಸಾಂತ್ ಗಾಲ್ನ್ ವರುಂಕ್ ಜಾಂವ್ಚೆ ತಸಲಿ MTV-1 Micro TV ಮ್ಹುಳ್ಳಿ ಪೊಕೆಟ್ TV ಭಯ್ರ್ ಕಾಡ್ ಲ್ಲಿ. ತ್ಯಾಚ್ ವೆಳಾರ್ ಪ್ಯಾನಸೊನಿಕ್ ಕಂಪೆನಿನ್ Panasonic IC TV ಮ್ಹುಳ್ಳಿ ಪೊಕೆಟ್ TV ಯೀ ಮಾರ್ಕೆಟಿಕ್ ಗಾಲ್ಲಿ. ಪಾಂಚ್ ವರ್ಸಾಂ ಉಪ್ರಾಂತ್ ಸೊನಿ ಕಂಪೆನಿಚಾ Watchman ಮ್ಹುಳ್ಳಾ ದಾಕ್ಟ್ಯಾ ಮೆಶಿನಾನ್ ಏಕ್ ಕ್ರಾಂತ್ ಚ್ ಕೆಲ್ಲಿ. ಇಂಡಿಯಾಂತ್ TV ಚ್ ಆಪ್ರೂಪ್ ಆಸ್ ಲ್ಲ್ಯಾ ಕಾಳಾರ್ , ಹ್ಯಾ ಸೊನಿ ಕಂಪೆನಿಚೆಂ ಹೆಂ ಪಾಂಚ್ ಸೆಂಟಿ ಮೀಟರ್ ಸ್ಕ್ರೀನಾಚೆಂ Watchman ತ್ಯಾ ವೆಳಾರ್ ಭಾರಿ ಲೊಕಾಮೊಗಾಳ್ ಜಾಲ್ಲೆಂ. ಪುಡ್ಲ್ಯಾ ಪಂದ್ರಾ ವರ್ಸಾನಿಂ ಹ್ಯಾ ದಾಕ್ಟುಲ್ಯಾ ಮೆಶಿನಾ ವಯ್ರ್ ಮಸ್ತ್ ಸುದ್ರಾಪ್ ಆಯ್ಲೆಂ. ಪುಣ್ 1998 ಂತ್ ಇಸ್ವೆಂತ್ ಹೆಂ ಬಂಧ್ ಪಡ್ಲೆಂ ...! ಕಿತ್ಯಾಕ್ ಡಿಜಿಟಲ್ ಟೆಕ್ನೊಲೊಜಿ ಮುಕಾರ್ ಅದ್ಲಿ ಅನಾಲೋಗ್ ಟೆಕ್ನೊಲೊಜಿ ಮಸ್ತ್ ಪರ್ನಿ ಮ್ಹುಳ್ಳಾ ಬರಿ ಜಾಲ್ಲಿ. ತೆನ್ನಾಂ ಚ್ ಮೊಬೈಲ್ ಫೊನಾಂಚಿ ವಾಡಾವಳ್ ವಡ್ಲ್ಯಾ ಮಾಫಾನ್ ಜಾವ್ನ್ ಆಸ್ ಲ್ಲಿ. ಚಡಿತ್ ಸ್ಪೀಡಾಚಿ 3G ತಾಂತ್ರಿಕಾತಾ ಆಯ್ಲಾ ಉಪ್ರಾಂತ್ , data ವರ್ಗಾವಣ್ ಮಸ್ತ್ ಸುಲಭ್ ಜಾಲೆಂ. ಮೊಬೈಲಾರ್ ಚ್ TV ಪಳೆಂವ್ಕ್ ಯೀ ಸಾದ್ಯ್ ಜಾಲ್ಲೆಂ ತೆನ್ನಾಂಚ್ ...

ಆಜ್ ಆಮ್ಚೆ ಕಡೆ ಖಂಚಂಯೀ ಏಕ್ ಸ್ಮಾರ್ಟ್ ಫೋನ್ ಆಸ್ ಲ್ಯಾರ್ ತೆಂ TV ಜಾವ್ನ್ ಯೀ ವಾಪಾರ್ಯೇತ್. ಹೆಂ ಜಾರಿ ಕರಿಜೆ ಜಾಲ್ಯಾರ್ ತುಜಾ ಮೊಬೈಲಾರ್ 3G ಸಂಪರ್ಕ್ ಆಸಾಜೆ ಸಾಂಗಾತಾ ಏಕ್ ಲ್ಹಾನ್ ಎಪ್ಲಿಕೇಷನ್ ತುಜ್ಯಾ ಫೊನಾಂತ್ ಇನ್ಸ್ಟಾಲ್ ಕರಿಜೆ. ಆಜ್ ಐ-ಫೋನ್ , ಅಂಡ್ರೊಯಿಡ್, ಬ್ಲ್ಯಾಕ್ ಬೆರಿ ಯಾ ಇತರ್ ಮೊಬೈಲಾಕ್ ಸಂಬಂಧ್ ಜಾಲ್ಲಿಂ ಎಪ್ಲಿಕೇಷಾನಾಂ ಸಬಾರ್ TV ಚಾನೆಲಾಂ  ಧರ್ಮಾರ್ತ್ ಡೌನ್ ಲೋಡ್ ಕರುಂಕ್ ದಿತಾತ್. ತಿಂ ತುಮಿಂ ತುಮ್ಚಾ ಫೊನಾಂತ್ ಲೋಡ್ ಕೆಲ್ಯಾರ್ ಜಾಲೆಂ ತೆಂ ಚಾನೆಲ್ ಪಳವ್ಯೇತ್.. ಹಾಚೆ ಸಾಂಗಾತಾ ಥೊಡಿಂ ಎಪ್ಲಿಕೇಷನಾಂ ತುಮ್ಕಾಂ ಶೆಂಭರಾಚಾಕೀ ವಯ್ರ್ ಚಾನೆಲಾಂ ಪಳೆಂವ್ಕ್ ಆವ್ಕಾಸ್ ದಿತಾತ್. ಥೊಡಿಂ ಪುಂಕ್ಯಾಕ್ ಆನಿಂ ಥೊಡಿಂ ಮ್ಹೊಲಾಕ್...! ಅಸಲಿಂ ಡಜನಾಂ ಗಟ್ಲ್ಯಾನ್ ಎಪ್ಲಿಕೇಷಾನಾಂ ಆಸಾತ್. ತಾಂತುಂ ಥೊಡಿಂ ಫಮಾದ್ ಆಸ್ಚಿಂ Yupp TV , NexGTv , Mundu TV , Ditto TV , Zenga TV ...ಅಸಲಿಂ. ತುಮ್ಚೆ ಕಡೆ ಅಂಡ್ರೊಯಿಡ್ ಫೊನಾಂ ಆಸ್ ಲ್ಯಾರ್ ಹಾಂಚಿಂ ಅಂಡ್ರೊಯಿಡ್ ಎಪ್ಲಿಕೇಷಾನಾಂ , ಐ-ಫೋನ್ ಆಸ್ ಲ್ಯಾರ್ IOS ಕ್ ಜುಳ್ತೆಂ ಎಪ್ಲಿಕೇಷಾನ್ ತುಮಿಂ ಡೌನ್ ಲೋಡ್ ಕರ್ನ್ ವಾಪಾರ್ಯೇತ್. ಹಾವೆಂ ಪಳೆಯ್ಲ್ಯಾ ಪಯ್ಕಿ NexGTv ಎಪ್ಲಿಕೇಷನ್ ಬರೆಂ ಆಸಾ. ಹಾಂತುಂ ಶೆಂಬರಾ ವಯ್ರ್ ಚಾನೆಲಾಂ ಮೆಳ್ತಾತ್. ಕಂಯ್ ಪುಣೀ ಇಂಟರ್ ನೆಟ್ ಕನೆಕ್ಷನಾಚೊ ಸ್ಪೀಡ್ ಉಣೊ ಆಸ್ ಲ್ಯಾರ್ , ಸಕಯ್ಲ್ಯಾ ದರ್ಜೆಚೆಂ ಸ್ಟ್ರೀಮಿಂಗ್ ಕರ್ನ್ ಪುಣೀ ತುಮ್ಕಾಂ ಚಾನೆಲ್ ಮೆಳ್ಚಾ ಬರಿ ಕರ್ತಾ. ಹಾಂತುಂ replay ತಸಲೀ ಸೌಲತ್ತ್ ಯೀ ಆಸಾ. ಸಾಂಗಾತಾ ಇತರ್ ಸಬಾರ್ ಬರೆ features ಯೀ ಆಸಾತ್. ಫಕತ್ ಗೆತೆಲ್ಯಾ ಮಹಿನ್ಯಾಂತ್ ಚ್ ಹೆಂ ಎಪ್ಲಿಕೇಷಾನ್ ಪಾಂಚ್ ಲಾಕ್ ಲೋಕಾನಿಂ ಡೌನ್ ಲೋಡ್ ಕೆಲಾಂ ಮ್ಹುಣ್ ಹ್ಯಾ ಕಂಪ್ಣೆಚೊ ದಿರೆಕ್ತೊರ್ ಸಿ ಡಿ ಸಿಂಗಾನ್ ಟೈಮ್ಸ್ ಒಫ್ ಇಂಡಿಯಾಕ್ ಸಾಂಗ್ ಲ್ಲೆಂ ..
ಸಾಂಗ್ ಲ್ಯಾ ಬರಿ 3G  ವಾಪಾರ್ನ್ , ಮೊಬೈಲ್ TV ವಾಪಾರ್ತಾನಾ ಜಾಗ್ರುತ್ ಆಸಾಜೆ. ತುಮ್ಕಾಂ ಖಳಿತ್ ಆಸೊಂಕ್ ಪುರೊ. ಜಾಳಿರ್ ವಿಡಿಯೊ ಸ್ಟ್ರೀಮಿಂಗಾಕ್ ಚಡಿತ್ ಬ್ಯಾಂಡ್ ವಿಡ್ತ್ ಜಾಯ್ಜೆ ಪಡ್ತಾ. ತಶೆಂ ಜಾಲ್ಲ್ಯಾನ್ ತುಮ್ಚೆಂ 3G ಯೋಜನ್ ಕಿತ್ಲೆಂ MB/GB ಮ್ಹುಣಾಸರ್ ಪುಂಕ್ಯಾಕ್ ದಿತಾ?. ತಾಚಾ ಉಪ್ರಾಂತ್ ಏಕಾ MB ಕ್  ಕಿತ್ಲೆ ಪಯ್ಶೆ ಮೋಲ್ ಘೆತಾ? ತುಮ್ಚೆಂ ಸ್ಕೀಮ್ unlimited ಗೀ ? ಹೆಂ ಪುರಾ ಪಳಯ್ಜೆ ಪಡ್ತಾ. unlimited ಯೋಜನ್ ಆಸ್ ಲ್ಯಾರ್ ತನವ್ ನಾ. ಪುಣ್ ಸೀಮಿತ್ ಯೋಜನ್ ಆಸ್ ಲ್ಯಾರ್ ನಿಯಂತ್ರಿತ್ ಆಸಾಜೆ. ನಾತ್ ಲ್ಯಾರ್ ತುಮ್ಕಾಂ ಏಕ್ ವ್ಹಡ್ ಫೋನ್ ಬಿಲ್ಲ್ ಯೇಂವ್ಕ್ ಪುರೊ ...! ತುಮ್ಚೆ ಕಡೆ 3G ಸಂಪರ್ಕ್ ನಾತ್ಲ್ಯಾರ್ , ಕಂಯ್ ಪುಣಿ ಧರ್ಮಾರ್ಥ್ Wi-Fi ಹೊಟ್ ಸ್ಪೋಟ್ ಮೆಳ್ಳ್ಯಾರ್ ತುಮ್ಕಾಂ ಪುಂಕ್ಯಾಕ್ TV ಪಳವ್ಯೇತ್..!

ಏಕ್ ಗಂಟೊ ಜಾಲ್ಯಾ ರೀ ವೊಕ್ಲೆಚೊ ಸಾಡೊ ನೆಸೊನ್ ಜಾವ್ನಾ ನೇ ಮ್ಹುಣ್ ಕಾಜಾರಾಚಾ ಮಾಟ್ವಾಂತ್ ಬೋರ್ ಜಾತಾನಾ, ಬಗ್ಲೆಚಾ ಬಾರಾಕ್ ವಚುನ್ ಏಕ್ ಪೆಗ್ಗ್ ಗಾಲ್ನ್ ಥಂಯ್ಚಿ TV ತಿಳ್ಚಾ ಬದ್ಲಾ , ಮಾಟ್ವಾಂತ್ ಬಸೊನ್ಂ ಚ್  ಮೊಬೈಲಾರ್ ವಿರಾಟ್ ಕೊಯ್ಲಿನ್ ಕಿತ್ಲೆ ಸಿಕ್ಸ್ ಮಾರ್ಲ್ಯಾತ್ ಮ್ಹುಣ್ ಪಳವ್ಯೇತ್ . ಸ್ಮಾರ್ಟ್ ಫೋನಾಂತ್ಲಿ ಅತಾಂಚಿಂ ಸ್ಮಾರ್ಟ್ ಎಪ್ಲಿಕೇಷಾನಾಂ ಕಿತೆಂ ಯೀ ಕರುಂಕ್ ಸಕ್ತಾತ್ ..!!
                                ***********

ತಾಂತ್ರಿಕ್ ಭಾವಾರ್ಥ್ ...!

Naman Ballok September  2012 

ಬಾವಾರ್ಥಾಚೆಂ ವರಸ್ ಆರಂಭ್ ಜಾಂವ್ಚೊ ವೇಳ್ ಆಯ್ಲೊ ತುಮ್ಕಾಂ ಖಳಿತ್ ಆಸಾ . ಪಾಪ್ ಸಾಯ್ಬಾನಿಂ ಘೋಷಣ್ ಕೆಲ್ಲೆಂ ಬಾವಾರ್ಥಾಚೆಂ ವರಸ್ ಹ್ಯಾಚ್ ಅಕ್ಟೊಬರ್ 11 ಕ್ ಆರಂಭ್ ಜಾವ್ನ್ ಪುಡ್ಲ್ಯಾ ವರ್ಸಾಚಾ ನವೆಂಬರಾಚಾ 24 ಕ್ ಆಖೇರ್ ಜಾತಾ. ತೆಂ ಇಗರ್ಜ್ ಮಾತೆಚಾ ಭಾವಾರ್ಥಾ ವಿಶಿಂ . ವ್ಹಯ್ ಬಾವಾರ್ಥ್  ಆಸಾಜೆ ಆಮ್ಕಾಂ. ಫಕತ್ ಇಗರ್ಜ್ ಮಾತೆ ವಯ್ರ್ ಮಾತ್ರ್ ನ್ಹಂಯ್ ಆಮಿಂ ಕರ್ಚಿಂ ಇತರ್ ಕಾರ್ಯಿಂ ನಿಷ್ಕಳಂಕ್ ಜಾಲ್ಯಾರ್ , ತಾಚೆ ವಯ್ರ್ ಖರಿ ಪಾತ್ಯೆಣಿ ಆಸಾಜೆ..!  ಕಂಪ್ಯೂಟರ್, ಅಂತರ್ ಜಾಳ್, ಯಾ ಮೊಬೈಲ್ ವಾಪಾರ್ತಾನಾಂ ಯೀ ಹಿಚ್ ರೇಗ್ರ್ ಲಾಗು ಜಾತಾ.

ಆಯ್ಚಾ digital ತಾಂತ್ರಿಕಾತೆಂತ್ ಬಾವಾರ್ಥ್  ಮ್ಹುಳ್ಯಾರ್ ಕಿತೆಂ ? ತುಮಿಂ  ತುಮ್ಚಾ ಮಿತ್ರಾಕ್ ಏಕ್ ಇಮೈಲ್ ದಾಡ್ತಾತ್. ಖಂಯ್ ಪುಣೀ Failed Delivery ಮ್ಹುಣ್ ಸಂದೇಶ್ ಪಾಟಿಂ ಯೆನಾತ್ಲ್ಯಾರ್ , ತೆಂ ಇಮೈಲ್ ತಾಕಾ ಪಾವಿತ್ ಜಾಲಾಂ ಮ್ಹುಣ್ ಚಿಂತಾತ್. ಪುಣ್ ವಿಪರ್ಯಾಸ್ ಮ್ಹುಳ್ಯಾರ್ , ಪಾವಿತ್ ಜಾಲ್ಲೆಂ ತೆಂ ಇಮೈಲ್ spam folder ಕ್ ಗೆಲ್ಯಾರ್ "ಫಾಲ್ಯಾಚ್" ಗಣಪತಿ ಕಾಜಾರ್ ಜಾತಾ ಮ್ಹುಳ್ಯಾ ಬರಿ ಜಾತಾ ಆಮ್ಚೊ ಭಾವಾರ್ಥ್ . ಫಕತ್ ಇಮೈಲ್ ನ್ಹಂಯ್ , screen ಕೆಲ್ಲ್ಯಾ sms ಚಿ ಯೀ ಹಿಚ್ ಗತ್. ಹ್ಯಾ ಕಂಪ್ಯೂಟರ್ ಸಂಸಾರಾಂತ್ ಫಕತ್ ಬಾವಾರ್ಥ್ ಆಸ್ ಲ್ಯಾರ್ ಪಾವಾನಾ, ಖರೊ ಬಾವಾರ್ಥ್ ಆಸಾಜೆ ...!

ತಾಂತ್ರಿಕ್ ಸಂಸಾರಾಂತ್ ಖಂಯ್ ಖಂಯ್ ಭಾವಾರ್ಥ್ ಆಸಾಜೆ ಆನಿಂ ಖಂಯ್ ಖಂಯ್ ಭಾವಾರ್ಥ್ ದವರುನುಜೊ ಮ್ಹುಳ್ಳೆ ಥೊಡೆ ಅಸಕ್ತೆದಾಯಕ್ ವಿಷಯ್ ಆಸೆ ಆಸಾತ್ ....

- ತುಮ್ಚಾ ಕಂಪ್ಯೂಟರ್ ಹಾರ್ಡ್ ದಿಸ್ಕಾಚೆರೆ ತುಮ್ಕಾಂ ಕೆನ್ನಾಂಯ್ ಚಡಿತ್ ಭಾವಾರ್ಥ್ ಆಸೊಂಕ್ ನುಜೊ. ಹಾರ್ಡ್ ಡಿಸ್ಕಾಂ ಕೆನ್ನಾಂಯ್ ಹಾರ್ಟ್ ಪೆಷಾಂಟಾಂ ಬರಿ. ಕೆನ್ನಾ crash ಜಾತಾತ್ ಮ್ಹುಣ್ ಸಾಂಗೊಂಕ್ ಜಾಯ್ನಾ . Online ದಾಸ್ತಾನ್ ಜಾಗ್ಯಾರ್ ಭಾವಾರ್ಥ್ ದವರ್ಯೆತ್. ಥಂಯ್ backup ಚಿ ಬರಿ ವ್ಯವಸ್ಥಾ ಆಸಾ.

- ಏಕಾ ನಿಜಾ ದೆವಾಕ್ ಪಾತ್ಯೆಜೆ. ತಶೆಂಚ್ ಏಕಾ ನಿಜಾ Antivirus ರ್ ಭಾವಾರ್ಥ್ ದವರಿಜೆ.  ಪೈರೆಟೆಡ್ Antivirus ರ್ ಭಾವಾರ್ಥ್ ದವರ್ನ್ ತುಮಿಂ ಇನ್ಸ್ಟಾಕ್ ಕೆಲ್ಯಾರ್ ತುಮ್ಚಾ ಕಂಪ್ಯೂಟರಾಕ್ AIDS ಯೇಂವ್ಕ್ ಪುರೊ.

- Facebook ರ್ ಭಾವಾರ್ಥ್ ದವರ್ನ್ ತುಮ್ಚಿ ಖಾಸ್ಗಿ ಮಾಹೆತ್ ಆನಿಂ ತಸ್ವೀರ್ಯೋ upload ಕೆಲ್ಯಾರ್ , ತುಮಿಂ ತುಮ್ಚಾಚ್ ಖುಶೆನ್ ತೆಂ ಪಬ್ಲಿಕಾಕ್ ವಾಂಟುನ್ ಘೆತಾತ್ ಮ್ಹುಣ್ ತುಮಿಂ ಚಿಂತಿಜೆ. ಒಳೊಕ್ ನಾತ್ಲ್ಯಾ Facebook ಮಿತ್ರಾಂ ಕಡೆ ಭಾವಾರ್ಥ್  ದವರ್ಚೊ ಮ್ಹುಳ್ಯಾರ್ ಜಿವ್ಘಾತ್ ಕೆಲ್ಲ್ಯಾ ಬರಿ...!

- Wikipedia ರ್ ಕೆನ್ನಾಂಯ್ ಚಡಿತ್ ಭಾವಾರ್ಥ್ ದವರುಂಕ್ ನುಜೊ. Wikipedia ರ್ ಆಸ್ ಲ್ಲೆಂ ಸಕ್ಕಡೀ gospel truth ನ್ಹಂಯ್...!!

- ಲಾಟ್ರಿ ಉಟ್ಲ್ಯಾ ಮ್ಹುಣ್  ಆಯಿಲ್ಲ್ಯಾ ಇಮೈಲ್ ಯಾ sms ರ್ ತುಮ್ಕಾಂ ಭಾವಾರ್ಥ್ ಆಸ್ ಲ್ಯಾರ್ ತುಮಿಂ ಭಿಕಾರಿ ಜಾಂವ್ಚೆಂ ಖರೆಂ..!!

- Linux ವಾಪಾರುಂಕ್ ಕಷ್ಟ್ ಜಾತಾ ಮ್ಹುಣ್ Windows ರ್ ಚಡ್ ಭಾವಾರ್ಥ್ ದವರುಂಕ್ ನುಜೊ. Windows ಕ್ ಕೆನ್ನಾಂಯ್ ಪೊಡುನ್ ಕಾಡುಂಕ್ ಜಾತಾ ..!!

-ಏಕ್ ಲ್ಯಾಪ್ ಟೊಪ್ ಘೆವ್ನ್ ಪುಡ್ಲ್ಯಾ ಪಾಂಚ್ ವರ್ಸಾಂ ಮ್ಹುಣಾಸರ್ ವಾಪಾರ್ತಾಂ ಮ್ಹುಣ್ ಭಾವಾರ್ಥ್ ಕೆನ್ನಾಂಯ್ ದವರುಂಕ್ ನುಜೊ.

- ಸೆಕೆಂಡ್ ಹ್ಯಾಂಡ್ ದೆಸ್ಕ್ ಟೊಪಾ ವಯ್ರ್ ದವರಿತಿತ್ಲೊ ಭಾವಾರ್ಥ್ , ಸೆಕೆಂಡ್ ಹ್ಯಾಂಡ್ ಲ್ಯಾಪ್ ಟೊಪಾರ್ ಕೆನ್ನಾಂಯ್ ದವರುಂಕ್ ನುಜೊ ..!

ತಾಂತ್ರಿಕ್ ಸಂಸಾರಾಚೆ ಅಸಲೆ ಪುರಾ ಭಾವಾರ್ಥಾಂಚಿ ಪಟ್ಟಿ ಕೆಲ್ಯಾರ್ , ಡಜನ್ ಗಟ್ಲೆ ಪಾನಾಂ ಜಾಯ್ಜೆ ಪಡ್ತಾ. ಹಿಂ ಕಂಪ್ಯೂಟಿಂಗ್ ಮೆಶಿನಾಂ ಕ್ ಸಕ್ಕಡ್ ಕರುಂಕ್ ಸಾಧ್ಯ್ ಆಸಾ , ತಿಂ ಮನ್ಶ್ಯಾಚಾ ಕೀ ಬುದ್ವಂತ್ ಮ್ಹುಣ್ ಪಾತ್ಯೆಂವ್ಕ್ ನುಜೊ. ಹ್ಯಾ ಸಂಸಾರಾಂತ್ಲಿ ಸಕ್ಕಡೀ ಕಂಪ್ಯೂಟಿಂಗ್ ಮೆಶಿನಾಂ , ಬುದ್ವಂತ್ ಮನ್ಶ್ಯಾನ್ ಬರಯ್ಲೊ code ನಿಯತ್ತೆಂತ್ ಕಾರ್ಯರೂಪಾಕ್ ಹಾಡ್ತಾತ್ ಸೊಡ್ನ್ ಮಾಗಿರ್ ಕಿತೆಂ ಯೀ ನ್ಹಂಯ್ ..!! . ದೆವಾಚೆಂ ವಿಸ್ಮಯ್ ತೆಂ ..!

  ******

ಬ್ಯಾಂಕಿಂಗ್ ಕ್ಷೇತ್ರಾಂತ್ಲಿ ತಾಂತ್ರಿಕ್ ವಿಸ್ಮಯ್ ....

Naman Ballok September  2012

ಬ್ಯಾಂಕಾಂತ್ ವಚುನ್ ವ್ಯವಹಾರ್ ಕರ್ಚೊ ಮ್ಹುಳ್ಯಾರ್ ಚ್ ಏಕ್ ವಡ್ಲಿ ತಕ್ಲಿ ಪಡಾಪಡೆಚಿ ಪಿಡಾ ಆಸ್ ಲ್ಲಿ ಥೊಡ್ಯಾ ವರ್ಸಾಂ ಅದಿಂ. ಗಿರಾಯ್ಕಾಂಚಿ ಖೆಟಿ, ಸಾಲಿನ್ ರಾವೊನ್ ವ್ಯವಹಾರ್ ಕರ್ಚಿ ಆನಿವಾರ್ಯಾತ, ಆಸಹಕಾರಿ ಬ್ಯಾಂಕ್ ಶಿಬ್ಬಂದಿ ಮಾತ್ರ್ ನ್ಹಂಯ್ ವ್ಹಡಾ ಮಾಫನ್ ವೇಳಾಚೊ ವಿಬ್ಡಾಯ್ ಜಾವ್ನ್ ಆಸ್ ಲ್ಲೊ. ಹಾತಾವಾವ್ರಾಚೊ ವ್ಯವಹಾರ್ ಬ್ಯಾಂಕಾನಿಂ ಚಲ್ನ್ ಆಸ್ ಲ್ಯಾ ವೆಳಾರ್ , ವಡ್ಲಿ ಪಾರದರ್ಷಕತಾ ಮ್ಹುಳ್ಳಿ ಯೀ ನಾತ್ ಲ್ಲಿ. ಪುಣ್ ಕೆನ್ನಾ ಬ್ಯಾಂಕಾನಿಂ ಕಂಪ್ಯೂಟರಾಂ ಆಯ್ಲಿಂ ಪಳೆ ಪರಿಸ್ಥಿತಿ ಇಲ್ಲಿಶಿ ಸುದ್ರಾಲಿ. ಪಾರದರ್ಷಕತಾ ಚಡ್ ಲ್ಲಿ ಮಾತ್ರ್ ನ್ಹಂಯ್ ವೆಳಾಚೊ ವಿಬಾಡ್ ಯೀ ಮಸ್ತ್ ಉಣೊ ಜಾಲೊ.

ಪುಣ್ ವ್ಹಡ ಮಾಫನ್ ಬ್ಯಾಂಕಿಂಗಾಂತ್ ತಾಂತ್ರಿಕತೆಚಿ ಕ್ರಾಂತ್ ಆಯಿಲ್ಲಿ ಚ್ , Core banking solutions ಆಯಿಲ್ಯಾ ಉಪ್ರಾಂತ್. ತವಳ್ ಮ್ಹುಣಾಸರ್ ಬ್ಯಾಂಕ್ ವ್ಯವಹಾರಚೊ data ತ್ಯಾ , ತ್ಯಾ ಬ್ರಾಂಚಾಂತ್ ಆಸ್ ಲ್ಯಾ ಸ್ಥಾನಿಕ್ ಸರ್ವರಾನಿಂ ಮಾತ್ರ್ ದಾಸ್ತಾನ್ ಜಾವ್ನ್ ಆಸ್ ಲ್ಲೊ. ಪುಣ್ ಕೆನ್ನಾ Core banking solutions ಟೆಕ್ನೊಲೊಜಿ ಆಯ್ಲಿ ಪಳೆ , ಸ್ಥಾನಿಕ್ ಸರ್ವರಾಂ ಬದ್ಲಾ , ಕೇಂದ್ರಿಕ್ರತ್ ಸರ್ವರಾರ್ ಸಗ್ಳೊ ವ್ಯವಹಾರ್ , ಪುಂಜೊ ಜಾಂವ್ಕ್ ಆರಂಭ್ ಜಾಲೆಂ. ತಶೆಂ ಜಾಲ್ಯಾನ್ ಏಕಾ ಬ್ಯಾಂಕಾಚೆ ಸಕ್ಕಡಿ ಬ್ರಾಂಚಾಂಕ್ ನತೆಂ ಜೋಡುಂಕ್ ಸಾಧ್ಯ್ ಜಾಲೆಂ. ಆಶೆಂ ಮೂಳ್ ಬ್ರಾಂಚಾ ಬದ್ಲಾ, ತ್ಯಾ ಬ್ಯಾಂಕಾಚಿಂ ಬ್ರಾಂಚಾಂ ಖಂಯ್ ಆಸ್ ಲ್ಯಾರೀ ತಾಂತುಂ ವ್ಯವಹಾರ್ ಕರ್ಚಿ ಸೌಲತ್ ಮೆಳ್ಳಿ. ಕೇಂದ್ರಿಕ್ರತ್ ಸರ್ವರಾಂಚೊ ಫಾಯ್ದೊ Automated Teller Machine (ATM) ವಯ್ರ್ ಯೀ ಪಡ್ಲೊ. ಫಕತ್ ನಗದ್ ಘೆಂವ್ಕ್ ಮಾತ್ರ್ ನ್ಹಂಯ್ , ಹರ್ಯೇಕ್ ಬ್ಯಾಂಕಿಂಗ್ ವ್ಯಹಹಾರ್ , ತ್ಯಾ ಮೆಶಿನಾಂ ದ್ವಾರಿಂ ಚ್ ಕರುಂಕ್ ಸಾದ್ಯ್ ಜಾಲೆಂ. ಬ್ಯಾಂಕಾಕ್ ಚಲ್ಚಿ ಗರ್ಜ್ ನಾ ಮ್ಹುಳ್ಳ್ಯಾ ಬರಿ ಜಾಲೆಂ. ಹ್ಯಾ ಮಧೆಂ ATM ಕಾರ್ಡಾಂ ಡೆಬಿಟ್ ಕಾರ್ಡ್ ಜಾವ್ನ್ ಯೀ ವಾಪರುಂಕ್ ಜಾಲೆಂ ಪಳೆ , ತೆನ್ನಾ ನಗದ್ ಹಾತಾನಿಂ ಚ್ ಘೆಜೆ ಮುಳ್ಳಿ ಗರ್ಜ್ ನಾತ್ ಲ್ಯಾ ಮ್ಹುಣಾಸರ್ ಪಾವ್ಲಿ ಬ್ಯಾಂಕಿಂಗ್ ಟೆಕ್ನೊಲೊಜಿ. ಹಿ "swipe" ಸಂಸ್ಕ್ರತಿ ಆಯ್ಲ್ಯಾ ಉಪ್ರಾಂತ್  ಶೆಹರಾಂತ್ಲೊ ,ಹ್ಯಾ ಪಿಳ್ಗೆಚೊ ಚಡಾವತ್ ಲೋಕ್ ಖಂಯ್ ಪುಣಿ ವಾಹಾನಾರ್ ಯೆತಾನ, ಪೋಲಿಸಾನಿಂ ಧರ್ಲ್ಯಾರ್ ಲೊಂಚ್ ದೀಂವ್ಕ್ ಏಕ್ ದೊನ್ಶಿ ರೂಪಾಯ್ ಬಲ್ಸಾಂತ್ ಘೆವ್ನ್ ಚಲ್ತಾತ್ ಸೊಡ್ಲ್ಯಾರ್ , ಬಾರಾಂ ಥಾವ್ನ್ ಪೆಟ್ರೊಲ್ ಬಂಕ್ ಮಾತ್ರ್ ನ್ಹಂಯ್ ಆಜ್ ಕಾಲ್ ಗುಡಾಂಗಡೆಂತ್ ಯೀ ಕಾರ್ಡ್ "ಘಷ್ಟುನ್" ಂಚ್ ವ್ಯವಹಾರ್ ಕರ್ತಾ. ಬ್ಯಾಂಕಿಂಗ್ ಟೆಕ್ನೊಲೊಜಿ ವಾಡೊನ್ ಯೆತಾನಾಂಚ್ cashless ಸಂಸ್ಕ್ರತಿ ಚಡೊನ್ ಂಚ್ ಯೆತಾ ...

     

ATM ಂತ್ ಯೀ ಸಾಲ್ ಚಡ್ ಲ್ಯಾ ಉಪ್ರಾಂತ್ ಆಯಿಲ್ಲಿ ತಾಂತ್ರಿಕತಾ ಮ್ಹುಳ್ಯಾರ್ , NET Banking ಯಾ Online ಬ್ಯಾಂಕಿಂಗ್. NET Banking ದ್ವಾರಿಂ ಸಗ್ಳೊ ಬ್ಯಾಂಕಿಂಗ್ ವ್ಯವಹಾರ್ ಘರಾಂತ್ ಚ್ ಥಾವ್ನ್ ಕರುಂಕ್ ಸಾಧ್ಯ್ ಜಾಂವ್ಚಾ ಬರಿ ಜಾಲೆಂ. ಕಂಪ್ಯೂಟರ್ ಆನಿಂ ಇಂಟರ್ನೆಟ್ ಆಸ್ ಲ್ಯಾರ್ ಘರಾ ಥಾವ್ನ್ಂಚ್ ಬ್ಯಾಂಕಾಚಾ ಜಾಳಿಜಾಗ್ಯಾರ್ Login ಜಾವ್ನ್ ಸರ್ವ್ ರಿತಿಚೊ ದುಡ್ವಾ ವೆವಾರ್ ಮಾತ್ರ್  ನ್ಹಂಯ್ , ಇನ್ಸ್ಯೂರೆನ್ಸ್ ಪ್ರೀಮಿಯಾಂ, ಕರೆಂಟ್ ಬಿಲ್ಲ್, ಫೋನ್ ಬಿಲ್ಲಾಂ ಥಾವ್ನ್ ಚಡಾವತ್ ಸಕ್ಕಡ್ ಬಿಲ್ಲಾಂ Online ಚ್ ಪಾವ್ತಿ ಕರ್ಯೇತ್. NET Banking ಉಪ್ರಾಂತ್ Online ಶಾಪಿಂಗ್ ಮಸ್ತ್ ಸುಲಭ್ ಜಾಲೆಂ. ಥೊಡ್ಯಾ ವರ್ಸಾಂ ಆದಿಂ NET Banking ಸುರಕ್ಷೆ ವಿಶಿಂ ಇಲ್ಲಿಶಿ ಭಿರಂತ್ ಆಸ್ ಲ್ಲಿ. ಪುಣ್ ಹ್ಯಾ ದಿಸಾನಿಂ ಬ್ಯಾಂಕಾಚಾನಿಂ , ಆಕ್ವಾಂಟ್ ಮೊಬೈಲಾಕ್ ಲಿಂಕ್ ಕರ್ನ್ ಸೆಕ್ಯೂರಿಟಿ ಚಡಯ್ಲ್ಯಾ. ಬ್ಯಾಕಿಂಗ್ ವೆಬ್ ಸಾಯ್ಟ್ hack ಕರ್ಚಾಕೀ ಪಾರ್ಲಿಮೆಂಟಾ ಭಿತರ್ ಬಾಂಬ್ ವರ್ನ್ ಸಲ್ಚೆಂ ಮಸ್ತ್ ಸುಲಭ್..!

 ಬ್ಯಾಂಕಿಂಗ್ ಟೆಕ್ನೊಲೊಜಿ NET Banking ಮ್ಹುಣಾಸರ್ ಮಾತ್ರ್ ಸೀಮಿತ್ ಜಾವ್ನ್ ರಾವುಂಕ್ ನಾ. ಟೆಕ್ನೊಲೊಜಿ ವಾಡ್ಲ್ಯಾ ತಿತ್ಲಿಚ್ , ಲೊಕಾಚಿ ಆಳ್ಸಾಯ್ ಯೀ ವಾಡ್ ಲ್ಲಿ. ಬ್ಯಾಂಕಾಂತ್ ಸಾಲೆಕ್ ರಾವೊನ್ ಆಸ್ ಲ್ಲ್ಯಾ ವೆಳಿಂ ATM ಆಯ್ಲಿಂ. ಪುಣ್ ATM ಕ್ ವಚುಂಕ್ ಯೀ ಆಳ್ಸಾಯ್ ಜಾತಾನಾ, NET Banking ವಾಪಾರುಂಕ್ ಆರಂಭ್ ಕೆಲ್ಲೆಂ. ಪುಣ್ ಚಡಾವತ್ ಲೋಕಾರ್ ಅತಾಂ ಥೊಡೆ ಪಾವ್ಟಿಂ ಕಂಪ್ಯೂಟರ್ ಉಗ್ತೆ ಕರ್ನ್ , ಬ್ಯಾಂಕಿಗ್ ಜಾಳಿ ಜಾಗ್ಯಾಂಕ್ Login ಜಾಂವ್ಚಿ ಸೊಸ್ಣಿಕಾಯೀ  ಆಸಾನಾ. ಹ್ಯಾ ಗೂಗಲಾಚಾ "ಆಂಡ್ರೊಯಿಡ್" ನ್ ಕೆಲ್ಲ್ಯಾ ಮ್ಯಾಜಿಕಾ ವರ್ವಿಂ ಅತಾಂ ಮೊಬೈಲ್ ಬ್ಯಾಂಕಿಂಗ್ ಮಸ್ತ್ ಸುಲಭ್ ಜಾಲಾಂ. ಅತಾಂ CITI , ICICI ... ತಸಲ್ಯಾ ಪ್ರಮುಖ್ ಬ್ಯಾಂಕಾಚಿಂ Android ಅಪ್ಲಿಕೇಷನಾಂ ಆಯ್ಲ್ಯಾಂತ್ . ತಿಂ ತುಮ್ಚಾ ಆಂಡ್ರೊಯಿಡ್ ಫೊನಾರ್ ಇನ್ಸ್ಟಾಲ್ ಕೆಲ್ಯಾರ್ ಪುರೊ . ತುಂ ಕಂಯ್ ಪುಣೀ ಬಸ್ಸಾರ್ ವಚೊನ್ ಆಸ್ತಾನಾ , ತುರ್ತಾನ್ ತುಜಾ ಬ್ಯಾಂಕಾ ಥಾವ್ನ್ ದುಸ್ತ್ಯಾ ಖಾತ್ಯಾಕ್ ದುಡು ವರ್ಗಾವಣ್ ಕರುಂಕ್ ಆಸ್ ಲ್ಯಾರ್ ಖಿಣಾ ಬಿತರ್ ಹೆಂ ಕರ್ಯೇತ್. ಬಸ್ಸಾರ್ ಬಸೊನ್ ಆಸ್ತಾನಾಂತ್ , ಟೆಲಿಪೋನ್ , ಮೊಬೈಲ್, ಕರೆಂಟ್ ಯಾ  ಕಸಲೆಂಯೀ ಬಿಲ್ಲಾಂ ಮಾತ್ರ್ ನ್ಹಂಯ್ ಇನ್ಸ್ಯೂರೆನ್ಸ್ ಪ್ರಿಮಿಯಮಂ ಸಯ್ತ್ ಘಡ್ಯೇನ್ ಬಾಂದ್ಯೆತ್. ಬಸ್ಸಾರ್ ಥಾವ್ನ್ಂ ಚ್ ಪಿಜ್ಜಾ order ಕರ್ನ್ ಮೂವಿ ಟಿಕೆಟ್ ಯೀ ಬುಕ್ಕ್ ಕರ್ಯೇತ್ . !!

ಸಾಲಿಂತ್ ರಾವೊನ್ ಆಸ್ ಲ್ಲ್ಯಾ ಬ್ಯಾಂಕಿಂಕ್ ವೆವಾರಾಕ್ , ಮಾಹೆತ್ ತಂತ್ರಾಗ್ನ್ಯಾನ್ ಫಕತ್ ಘರಾ ನ್ಹಂಯ್ ಹಾತಾಂ ಮ್ಹುಣಾಸರ್ ಹಾಡ್ಲೆಂ . ಆನಿಂ ಖಂಯ್ ಖಂಯ್ ಮ್ಹುಣಾಸರ್ ಪಾವ್ತಾ ಗೀ ...!!!

*****

ದೆವಾಚೆಂ ಏಕ್ ಕಣ್ ಆನಿಂ ಹ್ಯಾ ವಿಶ್ವಚೆ ರಹಸ್ಯ್ ಮಿಸ್ತೆರ್ ...!!!

Naman Ballok September  2012

ಏಕ್ ಕಣ್ ಆಸ್ತಾ. ತ್ಯಾ ಕಣಾಚಾ ಕೀ ದಾಕ್ಟೆ ಕಣ್ ಆಸ್ತಾತ್. ತಾಂಕಾಂ ಸಕ್ಡಾಂಕೀ ದ್ರವ್ಯ್ ರಾಸ್ (mass) ಆಸ್ತಾ. ಪುಣ್ ಫೋಟಾನ್ (photons) ಆನಿಂ ನ್ಯೂಟ್ರಾನ್ (neutrons) ತಸಲ್ಯಾಂಕ್ ದ್ರವ್ಯ್ ರಾಸ್ ಚ್ ನಾ. ಪ್ರೊಟಾನಾಂಚಿ  (protons)  ಏಕಾಮೆಕಾ ಅಪ್ಟಾವ್ಣಿ ಜಾತಾನಾ , ಬೊಸಾನ್ (bosons) ಮ್ಹುಳ್ಳೆ ಥೊಡೆ ಕಣ್ ಉತ್ಪನ್ ಜಾತಾತ್..( ಹ್ಯಾ ಕಣಾಂಕ್ ಬೊಸಾನ್ ಕಿತ್ಯಾಕ್ ಮ್ಹುಣ್ತಾತ್ ಮ್ಹುಳ್ಯಾರ್ , ಹಾಚೊ ಆವಿಷ್ಕಾರಿ ಇಂಡಿಯಾನ್ ವಿಗ್ಯಾನಿ ಸತ್ಯೇಂದ್ರನಾತ್ ಭೋಸ್.) ಆಶೆಂ ಉತ್ಪನ್ ಜಾಲ್ಲ್ಯಾ ಕಣಾಂಕ್ ಯೀ ತ್ಯಾ ಪ್ರೊಟಾನಾಂ ಬರಿಚ್ ದ್ರವ್ಯ್ ರಾಸ್  ಆಸ್ತಾ. ತ್ಯಾ ಕಣಾಂಕ್ ದ್ರವ್ಯ್ ರಾಸ್ ಮೆಳ್ಳಿ ಜಾಲ್ಯಾ ರ್ ಯೀ ಕಶಿ ? ಪಾಟ್ಲ್ಯಾ 45 ವರ್ಸಾಂ ಥಾವ್ನ್ ವಿಗ್ಯಾನಿಂಕ್ ಮಾಂಡೊ ಹುನ್ ಜಾವ್ನ್ ಆಸ್ ಲ್ಲೆಂ ಹೆಂ ಏಕ್ ಸವಾಲ್. ಥೊಡ್ಯಾ ಕಣಾಂಕ್ ದ್ರವ್ಯ್-ರಾಸ್ (mass) ಆಸಾ ಪುಣ್ ಥೊಡ್ಯಾಂಕ್ ನಾ. ಕಿತ್ಯಾಕ್ ? ಗೆಲ್ಯಾತ್ಯಾ ಶೆಕ್ಡಾಚಾ ಸಾಟಾವ್ಯಾ ದಾಕ್ಡ್ಯಾಂತ್ , ಪೀಟರ್ ಹಿಗ್ಸ್ ಮ್ಹುಳ್ಯಾ ಬೌತ್ ಶಾಸ್ತ್ರಿನ್ , ಆಮ್ಚಾ ನದ್ರೆಕ್ ಪಡನಾತ್ಲೆಂ ಆನ್ಯೇಕ್ ಕಣ್ ಆಸಾ. ತೆಂ ಬೊಸಾನ್ಸಾ ಸಂಗಿ ವಿಲೀನ್ ಜಾವ್ನ್ ದ್ರವ್ಯ್ ರಾಸ್ ದೀಂವ್ಕ್ ಸಕ್ತಾ ಮ್ಹುಣಾಲೊ. ತೆಂಚ್ ಹಿಗ್ಸ್ ಬೋಸಾನ್. ತಾಣೆಂ ತೆಂ ಸೈದ್ದಾಂತಿಕ್ ಜಾವ್ನ್ ನಿರೂಪಣ್ ಕೆಲ್ಯಾರೀ , ಪ್ರಾಯೋಗಿಕ್ ಜಾವ್ನ್ ತೆಂ ಆನಿಕೀ ಮೆಳೊಂಕ್ ನಾ. ದೆಕುನ್ಂಚ್ ತಾಕಾ ‘ದೆವಾಚೆಂ ಕಣ್’ (God’s Particle)ಮ್ಹುಣ್ತಾತ್. ಪುಣ್ ಗೆಲೆತ್ಯಾ ಜುಲೈ ಚಾರ್ ತಾರಿಕೆರ್ Large Hadron Collider ರ್ ಪ್ರಯೋಗ್ ಕರ್ನ್ ಆಸ್ಚಾ Cern (European Organization for Nuclear Research) ವಿಗ್ಯಾನಿನಿಂ ಖುಶೆನ್ ಘೊಷಣ್ ಕೆಲೆಂ ... ! ತೆಂಚ್ "ದೆವಾಚೆಂ ಕಣ್’  ಮೆಳ್ಳಾಂ" ಮ್ಹುಣ್....


 ಹೆಂ ವಿಶ್ವ್ ಕಶೆಂ ರೂಪಿತ್ ಜಾಲ್ಲೆಂ ಮ್ಹುಳ್ಳೊ ಮಿಸ್ತೆರ್ ಹೆಂ ದೆವಾಚೆಂ ಕಣ್’  ಸೊಡಾಯ್ತಾ ಗೀ  ? ಹ್ಯಾ ಸವಾಲಾಕ್ ಜವಾಬ್ ಸೊದ್ತಾನಾ ಪಯ್ಲೆಂ ನದ್ರೆಕ್ ಯೆಂವ್ಚೆಂಚ್ ಭೂವಸ್ತ್ (matter). ಹ್ಯಾ matter ಯಾ ಭೂವಸ್ತ್ ವಿಶ್ಯಾಂತ್ ಭೌತ್ ಶಾಸ್ತ್ರಿನಿ ಮಂಡೊ ಖರ್ಚಿಲೊ ಆಜ್-ಕಾಲ್ ನ್ಹಂಯ್. ಹೆಂಚ್ ಕಣ್-ಭೌತ್ ಶಾಸ್ತಿರ್(particle physics). ಆಜ್ ಹ್ಯಾ ಕಣ್-ಭೌತ್ ಶಾಸ್ತಿರಾ ವಿಶ್ಯಾಂತ್ ಚಡಾವತ್ ಮಾಹೆತ್ ಆಮ್ಕಾಂ ಮೆಳ್ಯಾರೀ ಆನಿಕೀ ಜಾಣಾಂ ಜಾಂವ್ಕ್ ಆಸ್ಚೆ ಮಿಸ್ತೆರ್ ಸಬಾರ್ ಆಸಾತ್. ಹೆ ಮಿಸ್ತೆರ್ ಉಗ್ಡಾಪಣ್ ಕರುಂಕ್ ತಿತ್ಲೆಂ ಸುಲಭ್ ನಾತ್ಲ್ಯಾರೀ, ವಿಗ್ಯಾನಿ ಮಾತ್ರ್ ಹಟ್ಟಾಕ್ ಪಡ್ಲ್ಯಾ ಭರಿ ಸಂಸೋಧ್ ಕರ್ನ್ ಆಸಾತ್. ಹೆಂ ಭೂವಸ್ತ್ ಮ್ಹುಳ್ಯಾರ್ ಕಿತೆಂ ? ಆಮ್ಕಾ ದಿಸ್ಚೆಂ ಸಕ್ಕಡೀ ಭೂವಸ್ತ್ ಚ್.. ಹೆಂ ಭೂವಸ್ತ್ ಸೂಕ್ಷ್ಮ್ ಕಣಾಂ ಥಾವ್ನ್ ರೂಪಿತ್ ಜಾಲಾಂ ಮ್ಹುಣ್ ಥೊಡ್ಯಾ ಶೆಕ್ಡಾಂ ಆದಿಂಚ್ ಕಳಿತ್ ಜಾಲ್ಲೆಂ. ದೀಸ್ ಯೆತಾ ಯೆತಾನಾ ಹ್ಯಾ ಕಣಾಂ ವಿಶ್ಯಾಂತ್ ಚಡ್ ಚಡ್ ಮಾಹೆತ್ ಮೆಳ್ಳಿ. ಇತ್ಲೆಂ ಲ್ಹಾನ್ ಕಣ್ ಪ್ರೋಟಾನ್ , ಇಲೆಕ್ಟ್ರಾನ್ ಆನಿಂ ನ್ಯೂಟ್ರಾನಾ ಥಾವ್ನ್ ರೂಪಿತ್ ಜಾಲಾಂ ಮ್ಹುಣ್ ಗೆಲೆತ್ಯಾ ಶೆಕ್ಡಾಂತ್‌ಚ್ ಕಳ್‌ಲ್ಲೆಂ. ಪರತ್ ಹ್ಯಾ ಕಣಾಂ ಭಿತರ್ಲಿಂ ಕಣಾಂ ಕ್ವಾರ್ಕ್ಸ್, ಲೆಪ್ಪೆನ್ಸ್ ಆನಿಂ ಬೊಸಾನ್ಸ್ ಥಾವ್ನ್ ಜಾಲ್ಯಾಂತ್ ಮ್ಹುಣ್ ಉಜ್ವಾಡಾಕ್ ಆಯ್ಲೆಂ. ಭೌತ್ ವಿಗ್ಯಾನಿಂ ಹ್ಯಾ ಕಣಚಾ ಚಡ್ ಚಡ್ ಗುಂಡ್ಯೆ ಭಿತರ್ ರಿಗ್ತನಾ ಚಡ್ ಚಡ್ ಮಿಸ್ತೆರ್ ದಿಸೊನ್ ಆಯ್ಲೆ. ಸೂಮಾರ್ ಶೆಂಬರ್ ವರ್ಸಾಂ ಆದಿಂ ಆಲ್ಬರ್ಟ್ ಐನ್‌ಸ್ಟೈನಾನ್ ಏಕ್ ನವೊ ಮಹತ್ವಾಚೊ ಸಿದ್ದಾಂತ್ ಉಗ್ಡಾಪಣ್ ಕೆಲೊ. ತಾಣೆ ಮ್ಹುಳೆಂ ಭೂವಸ್ತುಕ್ ಆನಿಂ ಸಕ್ತೆಕ್ ಸಂಬಂಧ್ ಆಸಾ ಮ್ಹುಣ್. ತಾಚೆ ಪ್ರಕಾರ್ ಭೂವಸ್ತ್ ಆನಿ ಸಕತ್ ಏಕ್‌ಚ್. ತುಕಾ ಸಕ್ತೆ ಥಾವ್ನ್ ಭೂವಸ್ತ್ ಉಬ್ಜಾವ್ಯೇತ್ ಯಾ ಭೂವಸ್ತು ಥಾವ್ನ್ ಸಕತ್ ಉಬ್ಜಾವ್ಯೇತ್.  ಆಶೆಂ ಗೆಲೆತ್ಯಾ ಶೆಕ್ಡಾಂತ್ ಹಜಾರೊಂ ಭೌತ್ ಶಾಸ್ತ್ರಿಂಚಾ ಸಂಸೋಧ್ ಆನಿಂ ಸಿದ್ದಾಂತಾ ನಿಮ್ತಿಂ ಭೂವಸ್ತುಚಾ ರಚನೆ ವಿಶ್ಯಾಂತ್ ಮೂಳ್‌ಭೂತ್ ಮ್ಹುಣ್ಚೆ ತಸಲಿ ಮಾಹೆತ್ ಮೆಳ್ಳಿ. ಹ್ಯಾ ವಿಶ್ವಾಂತ್ ಕಸಲೆಂ ಪುರಾ ಆಸಾನೇ ತೆಂ ಬಾರಾ ಮೂಳ್‌ಭೂತ್ ಕಣಾಂ ಥಾವ್ನ್ ರೂಪಿತ್ ಜಾಲಾಂ ಆನಿಂ ಚಾರ್ ಮೂಳ್‌ಭೂತ್ ಸಕ್ತೆಚಾ ನಿಯಂತ್ರಣಾರ್ ಆಸಾ ಮ್ಹುಣ್ ಏಕ್ ಸಿದ್ದಾಂತ್ ಚಾಲ್ತೆಕ್ ಆಯ್ಲೊ. ತೊಚ್ Standard model of Physics . ಸಕ್ಡಾನಿಂ ಮಾನುನ್ ಘೆತ್‌ಲ್ಲೊ ಸರ್ವಾಚ್ ಸಿದ್ದಾಂತ್ ತೊ..!!

ಹೊ model of Physics ಕಣ್ ಭೌತ್ ಶಾಸ್ತಿರಾಚೆ ಸಕ್ಕಡೀ ಮಿಸ್ತೆರ್ ಸೊಡಾಯ್ತಾಗೀ ? ಭಿಲ್ಕುಲ್ ನಾ. ತುಕಾ ಹೊ Standard model ಸಮ್ಜಾಜೆ ಜಾಲ್ಯಾರ್ ಕಣ್ ಭೌತ್ ಶಾಸ್ತಿರಾಚೆ ವಿಶ್ಯಾಂತ್ ಗೂಂಡ್ ಜಾಣ್ವಾಯ್ ಆಸಾಜೆ. ಹೊ Standard model ಕಣ್ ಭೌತ್ ಶಾಸ್ತಿರಾಚೆ ಸಕ್ಕಡೀ ಕಾಣಿ ಸಾಂಗಿನಾ. ಮ್ಹುಳ್ಯಾತ್ ಥೊಡೆ ಮಿಸ್ತೆರ್ ಆನಿಕೀ ಕಳಜೆ. ಥೊಡೆ ಸೈದ್ದಾಂತಿಕ್ ಜಾವ್ನ್ ಪ್ರೊಫೆಸಿ ಕೆಲ್ಯಾರೀ ಪ್ರಾಯೋಗಿಕ್ ಜಾವ್ನ್ ರುಜು ಕರುಂಕ್ ಜಾವ್ನಾಂತ್ ..! ಪುಣ್ ಅತಾಂ ಹಿಗ್ಸ್ ಬೊಸಾನ್ ಮೆಳ್ಳಾಂ ಯಾ ಹಿಗ್ಸ್ ಬೊಸಾನಾ ಬರಿಚ್ ಆಸ್ಚೊ ಕಣ್ ಮೆಳ್ಳಾ. ವಿಗ್ಯಾನಿಂಕ್ ಆತಾಂ Standard model  ಪರಿಪೂರ್ಣ್ ಕರ್ನ್ , ವಿಶ್ವಚಾ ರಚನೆಚೆ ಮಿಸ್ತೆರ್ ವೆಗ್ಗಿಂಚ್ ಭಯ್ರ್ ಕಾಡಿಜೆ ಮ್ಹುಣ್ ತವಕ್.

ಪುಣ್ ಕಣ್-ಭೌತ್ ಶಾಸ್ತಿರಾಚೆ ಮಿಸ್ತೆರ್ ತಿತ್ಲೆ ಮಾತ್ರ್ ನ್ಹಂಯ್. ಆಮ್ಕಾಂ ದಿಸ್ಚಾ ಆನಿಂ ಖಳಿತ್ ಆಸ್ಚೆಂ ವಿಶ್ವ್ ಹ್ಯಾಚ್ ಸಾಮಾನ್ಯ್ ಕಣಾಂ ಥಾವ್ನ್ ಜಾಲಾಂ. ತೆಂ ಆಮಿ ನೆಣಾ. ಮ್ಹುಳ್ಯಾರ್ ಫಕತ್ 4% ವಿಶ್ವಚಾಕ್ ಕಣಾಂ ವಿಶ್ಯಾಂತ್ ಮಾತ್ರ್ ಆಮ್ಕಾಂ ಜಾಣ್ವಾಯ್ ಆಸ್ಚಿ. ಪುಣ್ ಬಾಕಿಚಾ ವಿಶ್ವಚಾ ಭಾಗಾಂತ್ ಥೊಡ್ಯೊಗುಪಿತ್ ಭೂವಸ್ತು ಆನಿಂ ಥೊಡ್ಯೊ ಸಕ್ತ್ಯೊ ಆಸಾತ್ ಮುಣ್ ಥೊಡ್ಯಾಂಚಿ ಪಾತ್ಯೆಣಿ. ಹೊ ಮಿಸ್ತೆರ್ ಸೊಧುನ್ ಕಾಡ್ಚೊ ತಿತ್ಲೊ ಸುಲಭ್ ನ್ಹಂಯ್..!!ಸಾಂಗಾತಾಚ್ Antimatter ವಿಶಿಂ ಆನಿಕೀ ಗೂಂಡ್ ಜಾವ್ನ್ ಸಮ್ಜಜೆ ಪಡ್ತಾ . ತೊ ಯೀ ಏಕ್ ಗೂಂಡ್ ಮಿಸ್ತೆರ್. Matter ಮ್ಹುಳ್ಯಾರ್ ಕಾಲೆಂ ಮ್ಹುಣ್ ತುಮ್ಕಾಂ ಯೆದೊಳ್‌ಚ್ ಕಳಿತ್ ಆಸಾ. Bigbang ಜಾವ್ನ್ ಹೆಂ ವಿಶ್ವ್ ರೂಪಿತ್ ಜಾತಾನಾ ಸಮಾನ್ ಪ್ರಮಾಣಾರ್ matter ಆನಿಂ Antimatter ಉತ್ಪನ್ನ್ ಜಾಲ್ಲೆ ಖಂಯ್. ಹೆಂ Antimatter ವಿರುದ್ಧ್ ಇಲೆಕ್ಟ್ರಾನ್ ಚಾರ್ಜಾಚೆಂ ಕಣ್. ಆಶೆಂ Bigbang ತೆದಾಳಾ, matter ಆನಿಂ Antimatter ಒಟ್ಟು ಮೆಳೊನ್ ಏಕಾಮೆಕಾ ಸಂಹಾರ್ ಕರುಂಕ್ ಲಾಗೊನ್ ಆಶೆಂ ಏಕ್ ವ್ಹಡ್ ಪ್ರಮಾಣಾಂತ್ ಸಕತ್ ಉಬ್ಜಾಲಿ. ಹ್ಯಾ ಸಂಹಾರಾ ದ್ವಾರಿಂ ಸಕ್ಕಡೀ Antimatter ನಾಸ್ ಜಾಲ್ಯಾರೀ ಇಲ್ಲೆಶೆಂ matter ಉರ್‍ಲಾಂ. ತೆಂಚ್ ಆಮಿಂ ಜಿಯೆಂವ್ಚೊ ಹೊ ವಿಶ್ವ್ ಖಂಯ್ ..!! ಹ್ಯಾ Antimatter ಚೊ ಮಿಸ್ತೆರ್ ಕಸೊ ಸೊಡೊಂವ್ಚೊ ..!!??

ಫ್ರಾನ್ಸಾಚಾ ಆನಿಂ ಸ್ವಿಜರ್ಲ್ಯಾಂಡಾಚಾ ಗಡಿರ್ , ಭೂಂಯ್ಚಾ ಶೆಂಭರ್ ಮೀಟರ್ ಪಂದಾ , 27 ಕಿ. ಮೀ ಲಾಂಬಾಯೆಚಾ ಸುರಂಗಾರ್ Large Hadron Collider ಪ್ರಯೋಗ್ ಅನಿಕೀ ಮುಖಾರುನ್ ಂಚ್ ಆಸಾ. ಅತಾಂ ಮೆಳ್ ಲ್ಲೊ ನವೊ ಕಣ್ ಹಿಗ್ಸ್ ಬೊಸಾನ್ ಜಾಂವ್ಕ್ ಯೀ ಪುರೊ ಯಾ ಇತರ್ ಕಣ್ ಯೀ ಜಾವ್ನ್ ಹ್ಯಾ ವಿಶ್ವ ಚಾ ರಚನಾಚಾ ಆನಿಂ ಮುಕ್ಲ್ಯಾ ಸಂಸೋಧಾಂಕ್ ಘುಂವ್ಡಾಯ್ ದೀಂವ್ಕ್ ಯೀ ಪುರೊ.
CERN ವಿಗ್ಯಾನಿಂ ಭಾರಿ ಆಸಕ್ತೆನ್ ಹೆಂ ಕಾಮ್ ಮುಖಾರುನ್ ವರ್ನ್ಂಚ್ ಆಸಾತ್.... ಮುಖಾರ್ ಕಸ್ಲೆ ಪುರಾ ಮಿಸ್ತೆರ್ ಉಗ್ಡಾಪಣ್ ಜಾತಾತ್ ಮ್ಹುಣ್ ಪಳಯ್ಜೆ ....!

ತುಮ್ಚಾ ಕಂಪ್ಯೂಟರಾಕ್ Anti - Virus ಸಾಪ್ಟ್ ವೇರ್ ಘೆಂವ್ಚಾ ಪಯ್ಲೆಂ ...

Naman Ballok August  2012

ತುಮಿಂ ಇಂಡಿಯಾಂತ್ ಆಸಾತ್ ಯಾ ತ್ಯಾ ಪಯ್ಸಿಲ್ಯಾ ಸೊಮಾಲಿಯಾಂತ್ ಯಾ ಇಂಡೊನೇಶಿಯಾಂತ್ ಆಸ್ ಲ್ಯಾರೀ , ತುಮ್ಚಾ ಕಂಪ್ಯೂಟರರ್  ಗೋಲ್ ಮಾಲ್  Windows ವಾಪಾರ್ಲ್ಯಾರ್ ತುವೆಂ ಪಯ್ಶೆ ದೀವ್ನ್ ಘೆಜೆ ಜಾಲ್ಲೆಂಚ್ ಸಾಪ್ಟ್ ವೇರ್ ಮ್ಹುಳ್ಯಾರ್ Anti - Virus ಸಾಪ್ಟ್ ವೇರ್..! ತುಮಿಂ ಇಂಡಿಯಾ ತಸಲ್ಯಾ ಪೈರೆಸಿ ಸರ್ಗ್ ದೇಶಾಂತ್ ಆಸ್ ಲ್ಯಾರ್ ತುಮಿಂ ಕಂಚೆ ಪುಣೀ ಪೈರೆಟೆಡ್ ಸಾಪ್ಟ್ ವೇರ್ ತುಮ್ಚಾ ಕಂಪ್ಯೂಟರಕ್ ಗಾಲ್ಯೇತ್. ಪುಣ್ ಪೈರೆಟೆಡ್ Anti - Virus ಸಾಪ್ಟ್ ವೇರ್ ಗಾಲ್ಯಾರ್ , ಏಕ್ ಕಚ್ರೊ ಗಲ್ಲ್ಯಾ ಬರಿ..! ತೆಂ ಉಪ್ಯೋಗಾಕ್ ಚ್ ಪಡನಾ ..! ತುಮ್ಚಾ ಕಂಪ್ಯೂಟರಾಕ್ ಕಂಯ್ ಪುಣೀ (ಕಂಯ್ ಪುಣೀ ನ್ಹಂಯ್ but ,must) Anti - Virus ಸಾಪ್ಟ್ ವೇರ್ ಗಾಲುಂಕ್ ಆಸ್ಲ್ಯಾರ್ ಮೊಲಾಕ್ ಘೆವ್ನ್ , ಅದಿಕ್ರತ್ Anti - Virus ಸಾಪ್ಟ್ ವೇರ್ ಘೆಂವ್ಚೆಂ ಚ್ ಬರೆಂ . ತೆನ್ನಾ ಮಾತ್ರ್ ತುಮ್ಚೆಂ ಕಂಪ್ಯೂಟರ್ ಸುರಕ್ಷಿತ್ ..!

ಆದಿಂ ಪುರಾ ಕಂಪ್ಯೂಟರಾಕ್ ವೈರಸಾಚಿ ಮಾತ್ರ್ ಭಿರಂತ್ ಆಸ್ ಲ್ಲಿ. ಪುಣ್ ಆಜ್ ಪಳೆಯಾ.. ಫಕತ್ ವೈರಸ್ ನ್ಹಂಯ್ .ಟ್ರೊಜನ್ ಘೊಡೆ ಆಸಾತ್, worms ಆಸಾತ್, spyware ಆಸಾತ್. ಮಾಗಿರ್ ಇತರ್ ಕಿತೆಂ ಕಿತೆಂ ಆಸಾ. ಹ್ಯಾ ಸಕ್ಕಡೀ ಭಿರಂತೆಕ್ ತುಮಿಂ malware ಮ್ಹುಣ್ ಆಪಾವ್ಯೇತ್. ತಶೆಂ ಜಾಲ್ಲ್ಯಾನ್ ತುಮಿಂ ಕಂಯ್ ಪುಣೀ Anti - Virus ಸಾಪ್ಟ್ ವೇರ್ ಘೆತ್ಲ್ಯಾರ್ , ತೆಂ ಫಕತ್ ವೈರಸಾಂಕ್ ಮಾತ್ರ್ ನಿಯಂತ್ರಣ್ ಕರುಂಕ್ ಸಕೊಂಕ್ ಪುರೊ. ಪುಣ್ ಇತರ್ malware ಂ ಕ್ ನ್ಹಂಯ್ . ತುಮಿಂ ಫಕತ್ Anti - Virus  ಸಾಪ್ಟ್ ವೇರ್ ಘೆತ್ಯ್ಲಾರ್ , spyware ಂಕ್ ಮ್ಹುಣ್ ಆನ್ಯೇಕ್ , ಟ್ರೊಜನ್ ಘೊಡ್ಯಾಂಕ್ ಮ್ಹುಣ್ ಆನ್ಯೇಕ್ ಘೆಜೆ ಪಡ್ತಾ. ತೆಂ ಸುರಕ್ಷಿತ್ ಬಿಲ್ಕುಲ್ ನ್ಹಂಯ್ . ಕಂಪ್ಯೂಟರ್ ಸಂಸಾರಾರ್ ಏಕ್ thumb rule ಆಸಾ. " You should not have more than one security software in your computer ...!" ...

ಅತಾಂ ಫಕತ್ Anti - Virus ಸಾಪ್ಟ್ ವೇರ್  ಮ್ಹುಣ್ಚಾಕೀ ಚಡ್ ಕಂಪ್ಯೂಟರ್ ಸೆಕ್ಯೂರಿಟಿ ಸಾಪ್ಟ್ ವೇರ್ ಘೆಂವ್ಚೊ ಬುದ್ವಾಂತೆಚೊ ನಿರ್ಧಾರ್. ಕಿತ್ಯಾಕ್ ಮ್ಹುಳ್ಯಾರ್ ಕಂಪ್ಯೂಟರ್ ಸೆಕ್ಯೂರಿಟಿ ಸಾಪ್ಟ್ ವೇರ್ ಫಕತ್ ವೈರಸ್ ಮಾತ್ರ್ ನ್ಹಂಯ್ ಇತರ್ malware ಂಕ್ ಯೀ ನಿಯಂತ್ರಣ್ ಕರುಂಕ್ ಸಕ್ತಾ. ತರ್ ಕಂಚೆಂ ಸೆಕ್ಯೂರಿಟಿ ಸಾಪ್ಟ್ ವೇರ್ ಘೆಂವ್ಚೆಂ ? ತುಮ್ಕಾಂ ಪಯ್ಶೆ ದಿಲ್ಯಾರ್ ಡಜನ್ ಗಟ್ಲ್ಯಾನ್ ಸೆಕ್ಯೂರಿಟಿ ಸಾಪ್ಟ್ ವೇರ್ ದಿಂವ್ಚೊ ಕಂಪ್ಣ್ಯೊ ಆಸಾತ್. ತಿತ್ಲೆಂ ಚ್ ಕಿತೆಂ ?  ಡಜನ್ ಗಟ್ಲ್ಯಾನ್  ಪುಂಕ್ಯಾಕ್  ಸೆಕ್ಯೂರಿಟಿ ಸಾಪ್ಟ್ ವೇರ್ ದಿಂವ್ಚೊ  ಯೀ AVG , AVAST ತಸಲ್ಯೊ ಕಂಪ್ಣ್ಯೊ ಯೀ ಆಸಾತ್. ತುಮಿಂ ಚಡಿತ್ ಅಂತರ್ ಜಾಳಿಚಾ ಸಂಪರ್ಕಾರ್ ನಾತ್ ಲ್ಯಾರ್ AVG ತಸಲಿಂ ಸಾಪ್ಟ್ ವೇರಾಂ ವಾಪಾರ್ಯೇತ್. ಪುಣ್ ಚಡಿತ್ ಜಾಳಿಚಾ ಸಂಪರ್ಕರ್ ಆಸ್ಲ್ಯಾರ್ ಥೊಡೆ ಪಾವ್ಟಿಂ ಅಸಲಿಂ ಪುಂಕ್ಯಾಚಿಂ ಸಾಪ್ಟ್ ವೇರಾಂ ವಾಪಾರ್ಲ್ಯಾರ್ , ಮಾರ್ಗಾ ದೆಗೆಚಿ ಬಿರಿಯಾನಿ ಕಾವ್ನ್ food poison ಜಾಲ್ಲ್ಯಾ ಬರಿ... ! ಮಾರ್ಗಾ ದೆಗೆಚೊ food ಥೊಡೆ ಪಾವ್ಟಿಂ ಕಿತ್ಲೊ ರುಚಿಕ್ ಆಸ್ ಲ್ಯಾರೀ ಮಸ್ತ್ ರಿಸ್ಕೆಚೊ ...!

ತುಮಿಂ ಕಂಯ್ ಪುಣೀ original Windows ವಾಪಾರ್ಲ್ಯಾರ್ , Microsoft Security Essentials  ಮ್ಹುಳ್ಳೆಂ ಸೆಕ್ಯೂರಿಟಿ ಸಾಪ್ಟ್ ವೇರ್ ತಾಂತುಂಚ್ ಆಸ್ತಾ. ತಶೆಂ ಜಾಲ್ಲ್ಯಾನ್ original Windows ಆಸ್ ಲ್ಯಾರ್ ದುಸ್ರ್ಯಾ  ಸೆಕ್ಯೂರಿಟಿ ಸಾಪ್ಟ್ ವೇರಾಂಚಿ ಗರ್ಜ್ ನಾ ಮ್ಹುಣ್ತಾ Microsoft..! ಪುಣ್ ತೆಂಚ್ ಪಾತ್ಲ್ಯೆಲಾರ್ ತುಮ್ಕಾಂ ಏಕ್ ಚೆಂಬು ಗ್ಯಾರಾಂಟಿ...! ಕಿತ್ಲ್ಯಾಕ್ ಮ್ಹುಳ್ಯಾರ್  Microsof ಕ್ ಫಾತೊರ್ ಉಡಾಂವ್ಚೆ ಇತರ್ ಮಾತ್ರ್ ನ್ಹಂಯ್ .. Symantec, McAfee ತಸಲ್ಯೊ ಫಮಾದ್ ಸೆಕ್ಯೂರಿಟಿ ಸಾಪ್ಟ್ ವೇರ್ ದಿಂವ್ಚೊ ಕಂಪ್ಣ್ಯೊ  ಯೀ ಕರ್ನ್ ಆಸಾತ್. ಚಡಾವತ್ ಜಾವ್ನ್ ಗುಪಿತ್ ವೈರಸಾಂ ಸೊಡ್ನ್ ವ್ಯವಹಾರ್ ಕರ್ನ್ ಲಾಭ್ ಕರ್ನ್ ಆಸಾತ್ ಹೆ ಸಂಸ್ಥೆ ..!
ಇತ್ಲ್ಯಾಕೀ  ಚಡಾವತ್ ಸೆಕ್ಯೂರಿಟಿ ಸಾಪ್ಟ್ ವೇರಾನಿಂ ವೈರಸಾಂಕ್ ಆಡಾಂವ್ಚೆಂ ಜಾಲ್ಯಾರೀ ಕಶೆಂ ? ಚಿಂತ್ಯಾಂ ಏಕಾ ಚೊರಾನ್ ಚೊರಿ ಕರ್ನ್ ಶಿರ್ಕೊನ್ ಪಡ್ಲೊ. ತಾಕಾ ಚೋರ್ ಮ್ಹುಣ್ ಬಿಲ್ಲೊ ಪಡ್ಲೊ. ತೊ ಕೆನ್ನಾಯ್ ಚೋರ್ ಚ್ ಜಾತಾ. ಆಶೆಂ ಶಿರ್ಕೊನ್ ಪಡ್ಲ್ಯಾ ಚೋರಾಂಚಿಂ ಪಟ್ಟಿ ದಿಸಾನ್ ದೀಸ್ ಕರ್ನ್ ಆಸ್ತಾತ್ ಹ್ಯೊ Anti - Virus ಸಾಪ್ಟ್ ವೇರ್ ಕಂಪ್ಣೊ. ಹಾಕಾ ಆಮಿಂ ವೈರಸ್ virus definitions ಯಾ security updates ಮ್ಹುಣ್ತಾಂವ್. ತ್ಯೊ ಆಮಿಂ ದಿಸಾನ್ ದೀಸ್ update ಕರ್ನ್ ಆಸಾಜೆ ಪಡ್ತಾ. ತೊ ಚೋರ್ ಕಂಯ್ ಪುಣೀ ತುಮ್ಚಾ ಗೇಟಿ ಭಿತರ್ ರಿಗ್ಲ್ಯಾರ್ ಹಿಂ ಸೆಕ್ಯೂರಿಟಿ ಸಾಪ್ಟ್ ವೇರಾಂ ಆಸಾತ್ ಪಳೆ ತಾಕಾ ಹುಮ್ಟೊವ್ನ್ ಉಡಾಯ್ತಾತ್..!

ಪುಣ್ ಥೊಡೆ ಪಾವ್ಟಿಂ ಶೆಳ್ಯಾಂ ರೂಪಾರ್ ಯೆಂವ್ಚೆಂ ಬೊಲ್ಪೆ ಆಸಾತ್ ನೇ ? ಯಾ ಪಯ್ಲೆಂ ಪಾವ್ಟಿಂ ಚೊರುಂಕ್ ಯೆಂವ್ಚೆಂ ಚೋರ್ ಆಸಾತ್ ನೇ ? ಹಾಂಕಾಂ ಆಡಾಂವ್ಚೆ ಕಶೆಂ . ಹಾಕಾ ದುಸ್ರಿಚ್ ಟೆಕ್ನೊಲೊಜಿ ಜಾಯ್ ಪಡ್ತಾ. ಏಕ್ ಮನಿಸ್ , ಚೋರ್ ನ್ಹಂಯ್ ಜಾಲ್ಯಾರ್ ಯೀ , ತೊ ಚೊರಾ ಬರಿ ವರ್ತನ್ ಕೆಲ್ಯಾರ್ ತಾಕಾ ಆಡಾಯ್ಜೆ ಪಡ್ತಾ. Shave ಕರಿನಾಸ್ತಾನಾ ಆನಿಂ ಇಸ್ತ್ರಿ ಕರುಂಕ್ ನಾತ್ ಲ್ಲೆಂ ಕೋಮಿಸ್ ಗಾಲ್ನ್ , ಪ್ರಮಾಣ್ ವಚನ್ ಕರುಂಕ್  ಗೆಲ್ಯಾ ಕೋಟಾ ಶ್ರೀನಿವಾಸ್ ಪೂಜಾರಿಕ್ ಹೊ ಮಿನಿಸ್ಟರ್ ಗೀ ಯಾ ಚೋರ್ ಗೀ ಮ್ಹುಣ್ ರಾಜ್ ಭವನಾಚಾ ಸೆಕ್ಯೂರಿಟಿ  ಸಿಬ್ಬಂದೆನ್ ತಾಕಾ ಭಿತರ್ ವಚುಂಕ್ ಆಡಾಯ್ಲೆಂ ನೇ ? ಮಾಗಿರ್ ತೊ ಚೋರ್ ನ್ಹಂಯ್ ಮ್ಹುಣ್ ವಿಚಾರಣ್ ಕೆಲ್ಲ್ಯಾ ಉಪ್ರಾಂತ್ ಚ್ ತಾಕಾ ಭಿತರ್ ಸೊಡ್ಲೆಂ. Symantec ತಸಲ್ಯೊ ಕಂಪ್ಣ್ಯೊ ಅಪ್ಲ್ಯಾ ಸೆಕ್ಯೂರಿಟಿ ಸಾಪ್ಟ್ ವೇರಾನಿಂ ಆಸಲ್ಲಿಚ್ ಟೆಕ್ನೊಲೊಜಿ ವಾಪಾರ್ನ್ ಆಸಾತ್. ತ್ಯಾ ಟೆಕ್ನೊಲೊಜಿಕ್ heuristic analysis ಮ್ಹುಣ್ತಾತ್. ಮ್ಹುಳಾರ್ ತುಮ್ಚಾ ಕಂಪ್ಯೂಟಾರಾಚೆಂ ಕಂಚೆ ಪುಣೀ ಸಾಚಾ ಪ್ರೊಗ್ರಾಮ್ , ದುಬಾವಾಚೆಂ ನಡ್ತೆಂ ಕೆಲ್ಯಾರ್ ತಾಕಾ ಧರ್ನ್ ವಿಚಾರಾಣ್ ಕರ್ತಾ...!!

 ತಾಂತ್ರಿಕ್ ಸಂಸಾರಾಚೆಂ ಫಾಮಾದ್ ವಿಶ್ಲೇಷಣ್ ಸಂಸ್ಥೊ CNET ನ್ 2012 ಂತ್ ಕೆಲ್ಲ್ಯಾ ಸಮೀಕ್ಷೆ ಪ್ರಕಾರ್ , ಹ್ಯಾ ವರ್ಸಾಚಿಂ ಉಂಚ್ಲಿ ತೀನ್ ಸೆಕ್ಯೂರಿಟಿ ಸಾಪ್ಟ್ ವೇರಾಂ ಪಳೆಯಾ . ಪಯ್ಲೆಂ Norton Internet Security 2012 ( ವರ್ಸಾಕ್ 1200 ರೂಪಯ್) , ದುಸ್ರೆಂ Kaspersky Internet Security 2012 ( ವರ್ಸಾಕ್ 900 ರೂಪಯ್) ಆನಿಂ ತಿಸ್ರೆಂ Bitdefender Total Security 2012 ( ವರ್ಸಾಕ್ 1900 ರೂಪಯ್) ...! . ಪುಣ್ ಹಾವೆಂ ಪಾಟ್ಲ್ಯಾ ಪಾಂಚ್ ವರ್ಸಾಂ ಥಾವ್ನ್ ವಾಪಾರ್ಚೆಂ Norton 360. ಮಸ್ತ್ ಮ್ಹಾರಗ್ ತೆಂ .. ಪುಣ್ ತೆಂ ತುಮ್ಚಾ ಕಂಪ್ಯೂಟಾರಾಂತ್ ಆಸ್ ಲ್ಯಾರ್ malware ರಿಗ್ತಾತ್ ಮ್ಹುಣ್ ಕರಂದಾಯ್ ಚ್ ನಾ... ! You are always safe...!

ಅಂತರ್ ಜಾಳಿರ್ ಲೈಂಗಿಕಾತಾ, ಸಮಸ್ಯೆ ಆನಿಂ ಥೊಡಿಂ ಪರಿಹಾರಾಂ....

Naman Ballok Jesu July 2012

ಅಂತರ್ ಜಾಳಿನ್ ಹ್ಯಾ ಆಮ್ಚಾ ಸಂಸಾರಾಚಾ ಸಂಪರ್ಕ್ ಮಾಧ್ಯಮಾಂತ್ ಕಸ್ಲಿ ಕ್ರಾಂತ್ ಕೆಲ್ಯಾ ಮ್ಹುಣ್ ತುಮ್ಕಾಂ ಸರ್ವಾಂಕ್ ವಿವರಣ್ ದಿಂವ್ಚಿ ಗರ್ಜ್ ಚ್ ನಾ. ಹ್ಯಾ WWW ಮ್ಹುಳ್ಯಾ ಮಾಯೆನ್ ಫಕತ್ ಸಂಪರ್ಕಚಾ ಶೆತಾಂತ್ ಮಾತ್ರ್ ಕ್ರಾಂತ್ ಕರುಂಕ್ ನಾ , ವಡ್ಲ್ಯಾ ಮಾಫಾಂತ್ ಲೈಂಗಿಕ್ ಕ್ರಾಂತ್ ಯೀ ಕರ್ನ್ ಸೊಡ್ಲಿ. ತುಮ್ಕಾಂ ಪುರಾ ಕಳಿತ್ ಆಸೊಂಕ್ ಪುರೊ , ಇಂಡಿಯಾಂತ್ ಆಸ್ಚೊ ಪುರಾ ಸಿರಿವಂತ್ ಜಣ್ ಕೋಣ್ ಮ್ಹುಳ್ಯಾರ್ ತುಮಿ, ಅಂಬಾನಿ, ಟಾಟಾ, ಬಿರ್ಲಾ... ಆಶೆಂ ಮ್ಹುಣ್ತಾತ್. ಪುಣ್ ಅನಧಿಕ್ರತ್ ಜಾವ್ನ್ ತಾಂಚಾಕೀ ಚಡ್ ಗಿರೆಸ್ತ್ , ಕಂಯ್ ಸಮಸ್ಸೊ ಪುಣೀ ಆಯ್ಲ್ಯಾರ್ ಲೊರಿಯೆನಿಂ ಲೋಡ್ ಗಟ್ಲ್ಯಾನ್ "ಬ್ಲ್ಯಾಕ್ ಮನಿ" ಉಲ್ಪಾಂವ್ಚೆ ಜನಾ ರೆಡ್ಡಿ ತಸಲೆ ಬ್ಯುಸಿನೆಸ್ ಮ್ಯಾನ್ ಯೀ ಆಸಾತ್. ಅಂತರ್ ಜಾಳ್ ಯೀ ತಶೆಂಚ್... ಹಾಂಗಾ ಕೋಣ್ ಗಿರೆಸ್ತ್ ಮ್ಹುಳ್ಯಾರ್ ತುಮಿಂ Google , Microsoft , Amazon... ಆಶೆಂ ಮ್ಹುಣ್ತಾತ್. ಪುಣ್ ಜಾಳಿರ್ ವಡ್ಲ್ಯಾ ಮಾಫಾರ್ ಬ್ಯುಸಿನೆಸ್ ಮ್ಹುಳ್ಯಾರ್ ಚ್ porn. ಅಂತರ್ ಜಾಳಿರ್ ಲೈಗಿಂಕ್ ಸಂಬಂಧಿ ವ್ಯವಹಾರಾಂತ್ ಚ್ ಕೊರೊಡಾಂಚೊ ದಂಧೊ ಆಸಾ....!!!

ತುಮಿಂ ಮ್ಹಕಾ ಪಾತ್ಯೆತಾಗೀ ಯಾ ಸೊಡಾ. ಅಂತರ್ ಜಾಳಿರ್ ದಿಸಾಕ್ ಆಶ್ಲೀಲ್ ಲೈಂಗಿಕಾತೆಕ್ ಸಂಬಂಧ್ ಜಾಲ್ಲಿಂ 250 ಕೊರೊಡ್ ಇಮೈಲಾಂ ವ್ಹಾಳೊನ್ ಆಸಾತ್. ತಾಣಿಂ ದಿಂವ್ಚಿಂ link , ಯಾ ಥೊಡೆ ಪಾವ್ಟಿಂ ದಿವ್ಚೆಂ tempt ಕ್ ವ್ಹಡಾ ಮಾಪಾರ್ ಲೋಕ್ ಸ್ಪಂದನ್ ಕರ್ತಾ. ಥೊಡೆ interesting ದತ್ತಾಂಶ್ ಪಳೆಯಾ ...ಜಾಳಿರ್ ಲೈಂಗಿಕ್ ಯಾ ಆಶ್ಲೀಲತಾತಾ ಪಳೆಂವ್ಕ್ ಮ್ಹುಣ್ ಹರ್ಯೇಕ್ ಸೆಕುಂಡಾಕ್ ಲೋಕ್ ತೀನ್ ಲಾಕ್ ಕರ್ಚ್ ಕರ್ತಾ. ಹರ್ಯೇಕಾ ಸೆಕುಂಡಾಕ್ 28,258 ಲೋಕ್ ಆಶ್ಲೀಲತಾ ಸಂಬಂಧಿ ಜಾಳಿ ಜಾಗ್ಯಾಂಕ್ ಭೆಟ್ ದಿತಾ. ಹರ್ಯೇಕಾ ಏಕಾ ಸೆಕುಂಡಾಕ್ search engine ವಾಪಾರ್ನ್ 372 ಜಣ್ ಆಶ್ಲೀಲತಾ ವಿಶಿಂ ಸೊದ್ನಾಂ ಕರ್ನ್ ಆಸಾತ್. ಉಣ್ಯಾರ್ ಉಣೆಂ ಮ್ಹುಳ್ಯಾರ್ ಯೀ ದಾ ಮಿನುಟಾಂಕ್ ಏಕ್ ನವೊ ಆಶ್ಲೀಲ್ ವಿಡಿಯೊ ಜಾಳಿರ್ upload ಜಾತಾ. ಆಶೆಂ ಜಾಲ್ಯಾನ್ , ಜಾಳಿರ್ porನ್ ಬ್ಯೂಸಿನೆಸ್ ಕರ್ಚಾ top ಜಾಲಿಜಾಗ್ಯಾಂಕ್ ತುಲನ್ ಕೆಲ್ಯಾರ್ ತ್ಯಾ ನಾರಾಯಣ್ ಮೂರ್ತಿಚಿ ಇನ್ಪೊಸಿಸ್ ಯೀ ಲೆಕಾಕ್ ಯೆನಾ... !

ತಶೆಂ ಜಾಲ್ಯಾನ್ ತುವೆಂ ಅಂತರ್ ಜಾಳಿರ್ ಬೊಂವ್ತಾನಾ , ತುಕಾ ಮನ್ ಆಸೊಂ ಯಾ ನಾ ಆಶ್ಲೀಲತಾ ಸಂಬಂಧಿ ತಾಣಾಂಕ್ ಭೇಟ್ ದೀಂವ್ಕ್ ತೆನ್ನಾ ತೆನ್ನಾ ಲಿಂಕ್ ಮೆಳ್ತಾತ್. ಕಂಯ್ ಪುಣೀ ತುಮಿ ಸಂಪಡ್ಲ್ಯಾತ್ ತುಮ್ಚಾ ಕಂಪ್ಯೂಟರಾಂತ್ ಇಲ್ಲೆಂ ಪುಣಿ ವೈರಸ್ ಯೆಂವ್ಚೆಂ ನಿಸ್ಚಿತ್. ವಡ್ಲೊ ಅಪಾಯ್ ಮ್ಹುಳ್ಯಾರ್ ಅಂತರ್ ಜಾಳ್ ವಾಪಾರ್ಚಾ ತುಮ್ಚಾ ಭುರ್ಗ್ಯಾಂಕ್ ಸುಲಾಭಾಯೆನ್ ಮೆಳ್ಚೆಂ porn. ಆಶೆಂ ಮೆಳ್ಯಾನ್ ಸಮಾಜೆರ್ ಜಾಂವ್ಚಿಂ ವಡ್ಲಿಂ ದುಶ್ಪರಿಣಾಮಾಂ. ತುಮ್ಕಾಂ ಕಳಿತ್ ಆಸೊಂಕ್ ಪುರೊ . ಅಂತರ್ ಜಾಳ್ ಕೆನ್ನಾಯ್ ಮುಕ್ತ್. ತಾಕಾ ಬಾಪೊಯ್ ನಾ. ತಶೆಂ ಮುಕ್ತ್ ಆಶ್ಲೀಲತಾ ವಾಳೊನ್ ಆಸ್ತಾ. ತರ್ ಹೆಂ ನಿಂಯತ್ರಣ್ ಜಾಲ್ಯಾರ್ ಕಶೆಂ ಕರ್ಚೆಂ ? ?

ಜಾಳಿರ್ ತುಮ್ಚಾ ಭುರ್ಗ್ಯಾಂಕ್ ನಿಯಂತ್ರಿತ್ ಕರುಂಕ್ Parental control ಮ್ಹುಳ್ಳಿಂ ಸಾಪ್ಟ್ ವೆರಾಂ ಮೆಳ್ತಾತ್. ತಿಂ ತುಮ್ಚಾಂ ಕಂಪ್ಯೂಟರಾಂತ್ ಗಾಲ್ನ್ ಏಕಾ ಮಟ್ಟಾರ್ ಪುಣೀ ತುಮ್ಚಾ ಭುರ್ಗ್ಯಾಂಕ್ ಅಂತರ್ ಜಾಳಿರ್ ನಿಯಂತ್ರಿರ್ ಕರ್ಯೆತ್. ವಿಭಿನ್ನ್ features ಆಸ್ ಲ್ಲಿಂ ಸಬಾರ್ ಸಾಪ್ಟ್ ವೆರಾಂ ತುಮ್ಕಾಂ ಜಾಳಿರ್ ಮೆಳ್ತಾತ್. ಥೊಡಿಂ ಪುಂಕ್ಯಾಕ್ ಆನಿಂ ಥೊಡಿಂ ಮ್ಹೊಲಾಕ್. ತುಮಿಂ ಖಂಯ್ ಪುಣೀ Windows 7 ವಾಪಾರ್ಲ್ಯಾರ್ (ಚಡಾವತ್ ತುಮಿಂ Windows 7 ವಾಪಾರ್ತಾತ್ ಮ್ಹುಣ್ ಚಿಂತಾಂ) ತಾಂತುಂ inbuilt ಆಸಲೆಂ ನಿಯಂತ್ರಿತ್ ಸಾಪ್ಟ್ ವೇರ್ ಆಸಾ. ತುಮಿಂ ಕಂಟ್ರೋಲ್ ಪೆನೆಲಾಕ್ ವಚುನ್ ತೆಂ enable ಕರ್ಯೇತ್. ತಾಂತುಂ ತುಮ್ಚಾ ಭುರ್ಗಾಂನಿಂ ಕಸಲಿಂ ಮಾತ್ರ್ ಎಪ್ಲಿಕೆಷನಾಂ ವಾಪಾರ್ಜೆ, ಕಸ್ಲೆ ಮಾತ್ರ್ ಗೇಮ್ಸ್ ಕೆಳಜೆ, ಕಂಚಿ ಮಾತ್ರ್ ಜಾಳಿಜಾಗೆ ವಾಪಾರಿಜೆ , ಕಸಲೆ ಜಾಳಿಜಾಗ್ಯಾಂಕ್ ನಿರ್ಬಂಧ್ ಗಾಲಿಜೆ ಮ್ಹುಳ್ಳೆ ತಿತ್ಲೆ ಧರ್ನ್ ಕಂಚಾ ವೆಳಾರ್ , ಕಿತ್ಲೊ ವೇಳ್ ಮ್ಹುಣಾಸರ್ ಮಾತ್ರ್ ಆಪ್ಲ್ಯಾ ಭುರ್ಗಾನಿಂ Log In ಕರಿಜೆ ಮ್ಹುಣಾಸರ್ ಮಾಂಡಾವಳ್ ಕರುಂಕ್ ಜಾತಾ. ತುಮಿಂ ಖಂಯ್ ಪುಣೀ ಏಕ್ ಪ್ರಮಾಣೀತ್ ನೋರ್ಟನ್ ಇಂಟರ್ನೆಟ್ ಸೆಕ್ಯೂರಿಟಿ ತಸಲೆಂ Antivirus ಸಾಪ್ಟ್ ವೇರ್ ವಾಪಾರ್ನ್ ಆಸ್ ಲ್ಯಾರ್ ತಾಂತುಂ ಯೀ ತುಮ್ಕಾಂ Parental control ಚಿ ಸೌಲತ್ ಆಸ್ತಾ. ತೆಂ ಸೊಡ್ಲ್ಯಾರ್ ತುಮಿಂ Safe Eyes, Webwatcher, Spector Pro, PC Tattletale .....ತಸಲಿಂ ತಿಸ್ತ್ರ್ಯಾ ಪಾಡ್ತಿಚಿಂ ಸಾಪ್ಟ್ ವೇರಾಂ ಯೀ ಮೋಲಾಕ್ ಘೆವ್ನ್ ಇನ್ಸ್ಟಾಲ್ ಕರ್ಯೇತ್ . ತಾಂತ್ಲಿಂ ಥೊಡಿಂ ತುಮ್ಚಾ ಕಂಪ್ಯೂಟರಾಕ್ ಗಾಲ್ಯಾರ್ , ಆದ್ರಶ್ಯ್ ರೂಪಾರ್ ಚ್ ರಾವೊನ್ ತುಮ್ಚಾ ಭುರ್ಗ್ೆಂ ಕಂಪ್ಯೂಟಾರಾಂತ್ ಕಿತೆಂ ಕರ್ತಾ ಮ್ಹುಳ್ಳೆ ಸಗ್ಳೆ ವಿವರ್ ತುಮಿಂ ಖಂಯ್ ಆಸ್ ಲ್ಯಾ ರೀ ವೀಜ್ ತಪ್ಪಾಲ್ ಮುಖಾಂತ್ರ್ ಪಾವಾಯ್ತಾ. ಮಾಗಿರ್ ಥೊಡಿಂ ಪುಂಕ್ಯಾಕ್ ಮೆಳ್ಚಿಂ Parental control ಸಾಪ್ಟ್ ವೆರಾಂ ಜಾಳಿರ್ ಡಜನಾಂ ಗಟ್ಲ್ಯಾನ್ ಆಸಾತ್. ತಾಂತುಂ ಏಕ್ Norton Online Family ಮ್ಹುಳ್ಳೆಂ ಏಕ್ ಬರೆಂ ತಂತ್ರಾಂಶ್ ಆಸಾ. ತುಮಿಂ ತೆಮ್ ಪುಂಕ್ಯಾಕ್ ಡೌನ್ ಲೋಡ್ ಕರ್ಯೇತ್ ...

ಇತ್ಲೆಂ ಪುರಾ ಹಾಂವೆಂ ಸಾಂಗ್ ಲ್ಲೆಂ ತುಮ್ಚಾ ಕಂಪ್ಯೂಟರಾವಿಶಿಂ . ಪುಣ್ ತುಮಿಂ ತುಮ್ಚಾ ಭುರ್ಗ್ಯಾಂಕ್ ಅಂಡ್ರೋಯಿಡ್ ಫೋನ್ ದಿಲ್ಯಾರ್ ತಾಂತುಂ ಆಸ್ಚಾ ಜಾಳಿಚಾ ಆಶ್ಲೀಲತಾಕ್ ಕಶೆ ನಿರ್ಭಂದ್ ಗಾಲ್ತಾತ್ ..????

ಕಂಪ್ಯೂಟರಾರ್ Remote Access ವಿಶಿಂ ಥೊಡೆಂ...

(Naman Ballok Jesu - June 2012)

Remote Access ... ಅಶೆಂ ಮ್ಹುಳ್ಳೊ ಸಬ್ದ್ ಕಂಪ್ಯೂಟರ್ ಸಂಸರಾಂತ್ ಆಯ್ಕೊಂಕ್ ಮೆಳ್ತಾ. ನಾಂವ್ ಆಯ್ಕತಾನಾಂಚ್ ಹೆಂ ಕಿತೆಂ ಮ್ಹುಣೊನ್ ತುಮ್ಕಾಂ ಸಮ್ಜೊಂಕ್ ಪುರೊ. ತುಮಿಂ ಖಂಯ್ ಪುಣಿ ಕದಿರೆನಾ ಹಳ್ಳೆಂತ್ ಆಸಾತ್ ಮ್ಹುಣ್ ಚಿಂತಿಯಾಂ. ತ್ಯಾ ಪಯ್ಶಿಲ್ಯಾ ಕಜಕಿಸ್ತಾನಾಂತ್ ಆಸ್ ಲ್ಯಾ ತುಮ್ಚಾ ಮಿತ್ರಾಚೆಂ ಕಂಪ್ಯೂಟರಾಂತ್ ತುಮ್ಕಾಂ ಕಿತೆಂ ಪುಣೀ ಕಾಮ್ ಕರುಂಕ್ ಆಸಾ . ತುಮಿಂ ಹ್ಯಾ ಕದಿರೆನಾ ಹಳ್ಳೆಂತ್ ಚ್ ಬಸೊನ್, ತುಮ್ಚಾ ಕಂಪ್ಯೂಟರಾಚಾ ಸ್ಕ್ರೀನಾರ್ ತ್ಯಾ ಕಜಕಿಸ್ತಾನಾಂತ್ಲ್ಯಾ ತುಜಾ ಮಿತ್ರಾಚೆಂ ಕಂಪ್ಯೂಟರ್ ಚಲವ್ಯೇತ್. ತುಜೆಂ ಚ್ ಮೌಸ್ ಆನಿಂ ಕೀ -ಬೋರ್ಡ್ ವಾಪಾರ್ನ್ ತ್ಯಾ ಕಂಪ್ಯೂಟರಾಂತ್ ಕಿತೆಂ ಜಾಯ್ ಪಳೆ ಕರ್ಯೇತ್. ಕಸಲಿಂ ಯಿಂ ಸಾಪ್ಟ್ ವೆರಾಂ ಇನ್ಸ್ಟಾಲ್ ಕರುಂಕ್ ಆಸ್ ಲ್ಯಾರ್ ಹಾಂಗಾಚ್ ಬಸೊನ್ ತಿಂ ಕರ್ಯೇತ್. ಕಸ್ಲೊ ಯೀ data ವರ್ಗಾವಣ್ ಕರುಂಕ್ ಆಸ್ ಲ್ಯಾರೀ ಸುಲಾಭಾಯೆನ್ ಕರ್ಯೇತ್. ಮ್ಹುಳ್ಯಾರ್ ಹಾಂಗಾ ಬಸೊನ್ಂ ಚ್ ತ್ಯಾ ಕಂಪ್ಯೂಟರಚಿ ಸಂಪೂರ್ಣ್ ದುರಸ್ತಿ ಕರ್ಯೇತ್ (ಹಾರ್ಡ್ ವೇರ್ ಸಂಬಂಧಿ ನ್ಹಂಯ್).

ಹೆಂ ಕರ್ಚೆಂ ಜಾಲ್ಯಾರ್ ಯೀ ಕಶೆಂ ? ಹಾಕಾ ಮ್ಹುಳ್ಳೆ ಚ್ ಥೊಡೆ ಸಾಪ್ಟ್ ವೇರ್ ಆಸಾತ್. Remote Access Software (RAS) ಮ್ಹುಣ್ತಾತ್ ತಾ ಸಾಪ್ಟ್ ವೇರಾಂಕ್ . ವಾಸ್ತಾವ್ ಜಾವ್ನ್ ಅತಾಂಚಾ Windows ಚಾ ಸಂಯ್ಭಂತ್ ಚ್ ಅಸಲೆಂ ಸಾಪ್ಟ್ ವೇರ್ ಆಸ್ತಾ. ಪುಣ್ ತೆಂ ವಾಪಾರಿಜೆ ಜಾಲ್ಯಾರ್ ತುಕಾ ಏಕ್ ಮಟ್ಟಾಚಿ ಪುಣೀ ತಾಂತ್ರಿಕ್ ಜಾಣ್ವಾಯ್ ಆಸಾಜೆ. ಪುಣ್ ಹೆಂ Remote Access ಸುಲಾಭಾಯೆನ್ ಕರುಂಕ್ ತಿಸ್ತ್ರ್ಯಾ ಪಾಡ್ತಿಚಿಂ ಡಜನ್-ಡಜನ್ ಸಾಪ್ಟ್ ವೇರಾಂ ಮೆಳ್ತಾತ್. ಥೊಡಿಂ ಮೊಲಾಕ್ ಆನಿಂ ಥೊಡಿಂ ಪುಂಕ್ಯಾಕ್. ತಾಂತ್ರಿಕ್ ಭಾಶೆಂತ್ ಸಾಂಗ್ಚೆ ಜಾಲ್ಯಾರ್ ಹ್ಯಾ Remote Access ಸಾಪ್ಟ್ ವೇರಾಂತ್ ದೋನ್ ಪ್ರಮುಖ್ ಪ್ರಕಾರ್ ಆಸಾತ್. ಏಕ್ attended ಆನಿಂ ದುಸ್ತ್ರೆಂ unattended .

ಹಿಂ attended ಪ್ರಕಾರಾಚಿಂ ಸಾಪ್ಟ್ ವೇರಾಂ ಮ್ಹುಳ್ಯಾರ್ ತುಕಾ ನಿಯುಕ್ತ್ ಸುವಾತೆರ್ ಆಸ್ಚಾ ಕಂಪ್ಯೂಟಾರಾಚಿ ರೀಗ್ ಜಾಯ್ಜೆ ಜಾಲ್ಯಾರ್ , ಥಂಯ್ ಏಕಾ ಮನ್ಶ್ಯಾಚಿ ಹಾಜ್ರಿ ಜಾಯ್ ಪಡ್ತಾ. ಮ್ಹುಳ್ಯಾರ್ ಕಜಕಿಸ್ತಾನಾಚಾ ಮಿತ್ರಾಚೆಂ ಕಂಪ್ಯೂಟರಾರ್ ತುಕಾ ರೀಗ್ ಜಾಯ್ಜೆ ಜಾಲ್ಯಾರ್ , ತಾಣೆಂ ತ್ಯಾ ಕಂಪ್ಯೂಟರಾ ಲಾಗ್ಗಿಂ ಆಸಾಜೆ ಪಡ್ತಾ. ತುವೆಂ ದಿಲ್ಲೆಂ Remote ಸಾಪ್ಟ್ ವೇರ್ run ಕರ್ನ್ ತುವೆಂ ರೂಪಿತ್ ಕೆಲ್ಲೊ ಕೋಡ್ ಗಾಲ್ನ್ ಪರ್ವಣ್ಗಿ ದಿಲ್ಯಾರ್ ತುಕಾ ತ್ಯಾ ಕಂಪ್ಯೂಟರಾರ್ ರೀಗ್ ಮೆಳ್ತಾ. ಹೆಂ ಏಕಾ ಪಾವ್ಟಿಚೆಂ ಮಾತ್ರ್ ಜುಂತ್. ಆನ್ಯೇಕ್ ಪಾವ್ಟಿಂ ತುಕಾ ರೀಗ್ ಜಾಯ್ಜೆ ಜಾಲ್ಯಾರ್ ಆನ್ಯೇಕ್ ಕೋಡ್ ಗಾಲ್ನ್ ಸಂಪರ್ಕ್ ಕರಿಜೆ ಪಡ್ತಾ. ತುಕಾ ಪರತ್ ಪರತ್ ನಿಯುಕ್ತ್ ಸುವಾತೆರ್ ಆಸ್ಚೆಂ ತ್ಯಾಚ್ ಕಂಪ್ಯೂಟರಾಕ್ ರೀಗ್ ಘೆಜೆ ಜಾಲ್ಯಾರ್ unattended ಪ್ರಕಾರಾಚಿಂ ಸಾಪ್ಟ್ ವೇರಾಂ ಆಸಾತ್. ಪಯ್ಲೆಂ ಏಕ್ ಪಾವ್ಟಿಂ ತ್ಯಾ ಕಂಪ್ಯೂಟರಾರ್ ಸಾಪ್ಟ್ ವೇರ್ ಗಾಲ್ನ್ ಆನಿಂ ಥೊಡ್ಯೊ setting ಕೆಲ್ಯಾರ್ ಮಾಗಿರ್ ತ್ಯಾ ಕಂಪ್ಯೂಟರಾ ಮುಖಾರ್ ಕೋಣಿ ಜಣ್ ನಾತ್ ಲ್ಯಾರೀ ತುಕಾ ತಾಚಿ ರೀಗ್ ಘೆವ್ಯೇತ್. ತುಂ ಅಫಿಸಾಂತ್ ಆಸೊನ್ , ತುಕಾ ತುಜ್ಯಾ ಘರ್ಚಾ ಕಂಪ್ಯೂಟರಾಚಿ ಜತನ್ ತವಳ್ ತವಳ್ ಕರುಂಕ್ ಆಸ್ಲ್ಯಾರ್ unattended ಪ್ರಕಾರಾಚಿಂ ಸಾಪ್ಟ್ ವೇರಾಂ ಬರಿಂ.

ಥೊಡಿಂ ಫಮಾದ್ Remote Access Software (RAS) ಪಳೆಯಾ. LogMeIn , TeamViewer , Join.me , GotoMyPc .. ಆಶಿಂ ಸಬಾರ್ ಆಸಾತ್. ಅತಾಂ ಪುರಾ ಅಸಲಿಂ ಅಪ್ಲಿಕೇಷನಾಂ ಅಂಡ್ರೊಯಿಡ್ ಫೊನಾರ್ ಚ್ ಗಾಲ್ನ್ ಯೀ ಕಂಚಾಯೀ ಕಂಪ್ಯೂಟರಾಕ್ control ಕರ್ಯೇತ್. ಚಡಾವತ್ ಜಾವ್ನ್ ಥೊಡೆ TeamViewer ಪಸಂದ್ ಕರ್ತಾತ್. ಪುಣ್ ಹೆಂ ಇಲ್ಲೆಶೆಂ slow. ದೋನಿ ಕಂಪ್ಯೂಟರಾಂತ್ ಹೆಂ ಸಾಪ್ಟ್ ವೇರ್ ಆಸಾಜೆ ಪಡ್ತಾ. ಸುಲಭಾಯೆರ್ ಜಾಂವ್ಚೆ ಮ್ಹುಳ್ಯಾರ್ Join.me. ತುಮಿ ಫಕತ್ www.join.me ಜಾಳಿ ಜಾಗ್ಯಾಕ್ ವಚುನ್ ಥೊಡ್ಯಾಚ್ ಮಿನುಟಾನಿಂ ನಿಯುಕ್ತ್ ಸುವಾತೆಚಾ ಕಂಪ್ಯೂಟರಾಕ್ ರೀಗ್ ಘೆವ್ಯೇತ್. ಮಾಗಿರ್ LogMeIn ಭಾರಿ ಲೊಕಾಮೊಗಾಳ್. ತಾಂಚೆಂ unattended ಸಾಪ್ಟ್ ವೇರ್ ಪುಂಕ್ಯಾಕ್ ಮೆಳ್ತಾ. ಹಾವೆಂ ಮಸ್ತ್ ಪಸಂದ್ ಕರ್ಚೆಂ LogMeIn ಚೆಂ Rescue ಸಾಪ್ಟ್ ವೇರ್. ಮೊಲಾಕ್ ತರೀ ಹಾಚೊ trial ಉಪ್ಯೋಗ್ ಜಾಳಿರ್ ಕರ್ಯೇತ್. Speed ಬರೊ ಆಸಾ. ಸಭಾರ್ ಆಕರ್ಷಕ್ features ತಾಂತುಂ ಆಸಾತ್. ಕಿತ್ಲೆ ಮ್ಹುಳ್ಯಾರ್ , ನಿಯುಕ್ತ್ ಸುವಾತೆಚಾ ಕಂಪ್ಯೂಟರಾಕ್ restart ಕರ್ನ್ safeboot with networking ಂತ್ ಯೀ ಕಾಮ್ ಕರ್ಯೇತ್. ಆಶೆಂ ಜಾಲ್ಲ್ಯಾನ್ ಕಂಪ್ಯೂಟರ್ ಖಂಯ್ ಆಸ್ಲ್ಯಾರ್ ಯೀ ಪುರೊ , ಕಸಲೆಯೀ ಸಮಸ್ಯೆ ಆಸ್ ಲ್ಯಾರ್ ಬಸ್ ಲ್ಲ್ಯಾ ಕಡೆ ಥಾವ್ನ್ ಂಚ್ ವಿವರಿತ್ ದುರಸ್ತಿ ಕರ್ಯೇತ್. ಹೆಂ ವಾಪಾರುಂಕ್ ಯೀ ಭಾರಿ ಸುಲಭ್ . ದಾಕ್ಲಾಕ್ ಮ್ಹಕಾ ದುಬೈಂತ್ ಆಸ್ ಲ್ಯಾ ಮ್ಹುಜಾ ಮಿತ್ರಾಚೆಂ ಕಂಪ್ಯೂಟಾರಕ್ ರೀಗ್ ಜಾಯ್ಜೆ ಜಾಲ್ಯಾರ್ , ಹಾವೆಂ ಹಾಂಗಾ generate ಕೆಲ್ಲೊ ಸ ಅಂಕ್ಡಾಚೊ ಕೋಡ್ ಮ್ಹುಜಾ ಮಿತ್ರಾನ್ www.logmein123.com ವಚುನ್ ಥಂಯ್ ತೊ ದಾಕಾಲ್ ಕರ್ನ್ connect ಮ್ಹುಣ್ ದಾಂಬ್ಲ್ಯಾರ್ ಪುರೊ. ಏಕ್ ದಾಕ್ಟುಲೆಂ ಅಪ್ಲಿಕೇಶಾನ್ ಉಬ್ಜೊನ್ run ಕರುಂಕ್ ವಿಚಾರ್ತಾ. ತೆಂ run ಕೆಲ್ಯಾರ್ ಜಾಲೆಂ. ಏಕಾ ಮಿನುಟಾ ಭಿರತ್ ಚ್ ಮ್ಹಕಾ ತಾಚಾ ಕಂಪ್ಯೂಟರಾಂತ್ ರೀಗ್ ಮೆಳ್ತಾ ...!!


ಏಕಾ ಲೆಕಾರ್ Remote Access Software ಏಕ್ ಮ್ಯಾಜಿಕ್ ....!!!

ತುಮ್ಚಾ ಕಂಪ್ಯೂಟಾರಾಂತ್ಲ್ಯಾ data ಚೆಂ ಸಂರಕ್ಷಣ್ ಕಶೆಂ ?

NAMAN BALLOK JESU -May 2012

ತುಮ್ಚೆಂ ಕಂಪ್ಯೂಟರ್ ಯಾ ಲ್ಯಾಪ್ ಟೋಪ್ ಆಸಾ ಮ್ಹುಣ್ ಚಿಂತಿಯಾಂ.ತೆಂ ಸಕಯ್ಲ್ ಪಡ್ಲೆಂ. ಮೊನಿಟರ್ ಯಾ ಸ್ಕ್ರೀನ್ ವಿಭಾಡ್ ಜಾಲೆಂ. ಮಾರ್ಕೆಟಿಕ್ ವಚುನ್ ತುಮ್ಕಾಂ ನವೆಂ ಸ್ಕ್ರೀನ್ ಘೆವ್ಯೇತ್. ಯಾ ತುಮ್ಚಾ ಕಂಪ್ಯೂಟರಾಚೆಂ Windows ಶೆವ್ಟಾಲೆಂ ಮ್ಹುಣ್ ಚಿಂತಿಯಾಂ. ತೆಂ ಪರತ್ ಇನ್ಸ್ಟಾಲ್ ಕೆಲ್ಯಾರ್ Windows ಪಾಟಿಂ ಯೆತಾ. ತುಮ್ಚೆಂ ಕಂಪ್ಯೂಟರ್ ಪಯ್ಲೆಂ ಆಸ್ ಲ್ಯಾ ಬರಿ ಪರತ್ ಸ್ಥಿತೆಕ್ ಹಾಡ್ಯೇತ್. ಪುಣ್ ತುಮ್ಚಾ ಕಂಪ್ಯೂಟರಾಚೆಂ ಹಾರ್ಡ್ ಡಿಸ್ಕ್ crash ಜಾಲೆಂ. ತುಮ್ಕಾಂ ನವೆಂ ಹಾರ್ಡ್ ಡಿಸ್ಕ್ ಹಾಡ್ಯೇತ್. ಪುಣ್ ತ್ಯಾ ಹಾರ್ಡ್ ಡಿಸ್ಕಾ ಭಿತರ್ಲೊ data ? ಚಡುಣೆಂ ಪಾಟಿಂ ಹಾಡುಂಕ್ ಚ್ ಜಾಯ್ನಾ ಯಾ ಪಾಟಿಂ ಹಾಡುಂಕ್ ಜಾಲ್ಯಾರ್ ಯೀ ತಿತ್ಲ್ಯಾ ಸುಲಭಾಯೆನ್ ಜಾಯ್ನಾ. ಏಕ್ ಪಾವ್ಟಿಂ ತುಮ್ಚೊ ಮಹತ್ವಾಚೊ ಮಾಹೆತಿ ಪುಂಜೊ ನಾಸ್ ಜಾಲ್ಯಾರ್ ತೆಂ ಏಕ್ ವಡ್ಲೆಂ ಲುಕ್ಸಾಣ್....

ಆಜ್ ಕಾಲ್ ಸಗ್ಳೊ ಸಂಸಾರ್ ಚ್ ಡಿಜಿಟಲ್ ಜಾಲಾ. ಅತಾಂ ಪೇಪರಾನಿಂ ಆಸ್ಚಿಂ ದಸ್ತಾವೇಜಾಂ ಯಾ ರೆಕೊರ್ಡ್ಸ್ ಮಸ್ತ್ ಉಣೆಂ. ಅಮಿಂ ಕ್ಯಾಮೆರಾಂತ್ ಕಾಡ್ ಲ್ಲ್ಯೊ ತಸ್ವೀರ್ಯೊ , ವಿಡಿಯೊ ಧರ್ನ್ ಅಮಿಂ ಕರ್ಚೊ ಸದಾಂಚೊ ವ್ಯವಹಾರ್ ಪುರಾ Word, Excel ಮ್ಹುಣೊನ್ ಂಚ್ ಆಸ್ತಾ. ಹೆಂ ಸಗ್ಳೆಂ ಪುರಾ ಚೆಪುನ್ ಆಸ್ಚೆಂ ಕಂಪ್ಯೂಟರಾಚಾ ಹಾರ್ಡ್ ಡಿಸ್ಕಾಂತ್. ಕಂಯ್ ಪುಣೀ ತುಮ್ಚೆಂ ಹಾರ್ಡ್ ಡಿಸ್ಕ್ ಗೆಲ್ಯಾರ್ ಹಿಂ ಪುರಾ ಫೈಲಾಂ ನಾಸ್ ಜಾತಾತ್. ಹೆಂ ನಿವಾರುಂಕ್ ಆಸ್ಚೆಂ ಉತ್ತೀಮ್ ವಿಧಾನ್ ಮ್ಹುಳ್ಯಾರ್ ಅಮ್ಚೊ data backup ಕರ್ಚೊ. ತರ್ ಹೊ data ಬ್ಯಾಕಾಪ್ ಕರ್ಚೊ ಜಾಲ್ಯಾರ್ ಯೀ ಖಂಯ್ ಆನಿಂ ಕಸೊ ? ಸಬಾರ್ ವಿಧಾನಾಂ ಯಾ ರೀತಿ ಆಸಾತ್. ವಿವಿಧ್ ಸಾಪ್ಟ್ ವೇರಾಂ ಯೀಂ ಮೆಳ್ತಾತ್ . ಪುಣ್ ಸವಾಲ್ ಖಂಯ್ ಬ್ಯಾಕಾಪ್ ಕೆಲ್ಯಾರ್ ಬರೆಂ ?

ಬ್ಯಾಕಾಪ್ ಖಂಯ್ ಕರ್ಯೇತ್ ಮ್ಹುಣ್ ಸಬಾರ್ ವಿಂಚೊವ್ಣ್ಯೊ ಆಸ್ ಲ್ಯಾರೀ ಚಡಾವತ್ ಜಾವ್ನ್ ವಾಪಾರ್ಚೆಂ DVD ಯಾ external ಹಾರ್ಡ್ ಡಿಸ್ಕ್. ಏಕಾ ರಿತಿರ್ ಹಿಂ ವಿಧಾನಾಂ ಏಕಾ ಮಟ್ಟಾ ಮ್ಹುಣಾಸರ್ ಬರಿಂ. ಆನ್ಯೇಕ್ ವಿಧಾನ್ ಆಸಾ. ತಾಕಾ Cloud storage ಯಾ online storage ಮ್ಹುಣ್ತಾತ್. ಕಿತೆಂ ಯೀ ಜಾಲ್ಯಾರೀ ಬ್ಯಾಕಾಪ್ ಮ್ಹುಣ್ತಾನಾ ತೆಂ ಸಗ್ಳೆಂ ತುಮ್ಚಾ ಕಂಪ್ಯೂಟಾರ ಭಯ್ರ್ ಚ್ ಜಾಯ್ಜೆ. ತೆನ್ನಾ ಮಾತ್ರ್ ತೆಂ ಸುರಕ್ಷಿತ್. ತಶೆಂ ಜಾಲ್ಯಾನ್ ವಯ್ಲಿಂ ವಿಧಾನಾಂ ಬರಿಂಚ್ . ತುಮಿಂ ತುಮ್ಚೊ data , DVD ರ್ ದಾಸ್ತಾನ್ ಕರ್ತಾತ್ ಜಾಲ್ಯಾರ್ ತುಮ್ಚೆ ಕಡೆ DVD writer ಆಸಾಜೆ. ಅತಾಂಚಾ ಸಬಾರ್ ಕಂಪ್ಯೂಟರಾಂತ್ ತೆಂ ಆಸ್ತಾ ಮ್ಹುಣ್ಯಾಂ. ಸಾಂಗಾತಾ ತೆಂ ದಾಸ್ತಾನ್ ಕರುಂಕ್ ಏಕ್ ಸಾಪ್ಟ್ ವೇರ್ ಯೀ ಜಾಯ್ಜೆ ಪಡ್ತಾ. ಪುಣ್ ಏಕಾ DVD ಂತ್ ಏಕ್ ಪಾಂಚ್ ಥಾವ್ನ್ ಆಟ್ GB ಮ್ಹುಣಾಸರ್ data ದಾಸ್ತಾನ್ ಕರ್ಯೇತ್ . ಪುಣ್ ಆಜ್ ಕಾಲ್ ಆಮ್ಚೊ data ಪುರಾ ಶೆಂಬಾರಾನಿಂ GB ಂತ್ ಆಸ್ತಾ. ತಶೆಂ ಜಾಲ್ಲ್ಯಾನ್ ಮಸ್ತ್ DVD ಜಾಯ್ಜೆ ಪಡ್ತಾ. ತುಮಿಂ ತ್ಯೊ DVD ಸಮಾಂ ಸಾಂಬಾಳುನ್ ದವರಿನಾತ್ಲ್ಯಾರ್ ಮ್ಹುಣಿ ಬೊಕೊರ್ಣಿ ಪಡೊನ್ ಮಾಗಿರ್ ತಿ read ಜಾಯ್ನಾ. ತೆಂ ಏಕಾ ರಿತಿರ್ ಅಪಾಯಾಚೆಂ. ಮಾಗಿರ್ ತುಮಿಂ ಪರತ್ ಪರತ್ DVD ರೈಟ್ ಕೆಲ್ಯಾರ್ , ತುಮ್ಚೆಂ DVD ರೈಟರ್ ಯೀ ಪಾಡ್ ಜಾತಾ. ತುಮಿಂ ಏಕ್ ಶೆಂಬರ್ DVD ಉಲ್ಪಾಯ್ಲ್ಯಾ ಉಪ್ರಾಂತ್ ತುಮ್ಚಾ ರೈಟರಾಚಿ ಗ್ಯಾರಂಟಿ ನಾ. ಮಾಗಿರ್ ಪರತ್ ಆನ್ಯೇಕ್ DVD ರೈಟರ್ ಮ್ಹುಣ್ತಾನ ಸಬಾರ್ ಪಯ್ಶೆ ಯೀ ಜಾಯ್...

ಹಾಕಾ ಏಕ್ ಪರಿಹಾರ್ ಮ್ಹುಳ್ಯಾರ್ external ಹಾರ್ಡ್ ಡಿಸ್ಕ್ . ಆಜ್ external ಹಾರ್ಡ್ ಡಿಸ್ಕಾಚೆಂ ಮೋಲ್ ಮಸ್ತ್ ದೆವ್ಲಾಂ. ತುಕಾ ಪಾಸ್ ಪೋರ್ಟ್ ಸೈಜಿಚೆಂ , ಏಕ್ TB ಯಾ ದೋನ್ TB external ಹಾರ್ಡ್ ಡಿಸ್ಕ್ ಆಸ್ ಲ್ಯಾರ್ ಮಾಹೆತಿಚೊ ಪುಂಜೊಚ್ ಜಮೊ ಕರ್ಯೇತ್. ಆನ್ಯೇಕ್ ಸಾಂಗಾತ್ ಮ್ಹುಳ್ಯಾರ್ external ಹಾರ್ಡ್ ಡಿಸ್ಕಾಂತ್ ತುಮ್ಚೊ data ಭಾರಿ ವೇಗನ್ ಕರ್ಯೇತ್. ತುಮ್ಚಾ USB port ಕ್ ತೆಂ ಫಕತ್ ಶಿರ್ಕಾಯ್ಲಾರ್ ಜಾಲೆಂ. ಪುಣ್ ಹಿಂ ಕಸಲಿ ಯೀಂ ಹಾರ್ಡ್ ಡಿಸ್ಕಾಂ ಆಸಾತ್ ಪಳೆ , ತಿಂ ಹಾರ್ಟ್ ಪೇಶೆಂಟಾಂ ಬರಿ. ಸಾಂಗೊಂಕ್ ಜಾಯ್ನಾ ಕೆನ್ನಾ crash ಜಾತಾತ್ ಮ್ಹುಣ್. ತುಮ್ಚೆಂ ಹಾರ್ಡ್ ಡಿಸ್ಕ್ ಪಾಂಚ್ ವರ್ಸಾಂ ಉಪ್ರಾಂತ್ ಕೆನ್ನಾಂಯ್ ದೆಸ್ವಾಟ್ ಜಾಂವ್ಕ್ ಪುರೊ. ತಶೆಂ ಜಾಲ್ಲ್ಯಾನ್ ಮಸ್ತ್ ಮಸ್ತ್ ಪ್ರಮುಖ್ data ಹಾರ್ಡ್ ಡ್ರೈವಾ ಸಾಂಗಾತಾ , DVD ರ್ ಯೀ ಉಲ್ಪಾವ್ನ್ ಕಾಡ್ಲ್ಯಾರ್ ಇಲ್ಲೆಂ ಸುರಕ್ಷಿತ್.

ಮಾಗಿರ್ ಪಾವ್ಸ್ ಆಯ್ಲೊ , ಆವ್ರ್ ಆಯ್ಲೆಂ ತುಮ್ಚೆಂ ಘರ್ ಚ್ ಬುಡ್ಲೆಂ ಮ್ಹುಣ್ ಚಿಂತಿಯಾಂ . ತೆನ್ನಾ ತುಮ್ಚೆಂ ಕಂಪ್ಯೂಟರ್ ಮಾತ್ರ್ ನ್ಹಂಯ್ ತುಮ್ಚೆಂ external ಹಾರ್ಡ್ ಡಿಸ್ಕ್ ಯೀ ನಾಸ್ ಜಾತಾ. ತರ್ ತುಮ್ಚೊ ಅಮೊಲಿಕ್ data ಯೀ ನಾಸ್ ಜಾಲ್ಯಾರ್ ? ತಾಕಾ ಏಕ್ ಪರಿಹಾರ್ ಆಸಾ. ತೆಂ Cloud storage ಯಾ online storage. ಮ್ಹುಳ್ಯಾರ್ ತುಮ್ಚೊ data ಅಂತರ್ ಜಾಳಿ ಮುಖಾಂತ್ರ್ ಪಯ್ಶಿಲ್ಯಾ ಸರ್ವಾರಾನಿಂ ದಾಸ್ತಾನ್ ಕರ್ಚೊ. ಹೆಂ ಕರುಂಕ್ ತುಮ್ಕಾಂ justcloud.com , zipcloud.com, mypcbackup.com, CARBONITE, MOZY.... ತಸಲೆ ಡಜನ್ ಡಜನ್ ಜಾಳಿ ಜಾಗೆ ಆಸಾತ್. ಪುಣ್ ತುಮಿಂ ಹಾಂತುಂ ಜಾಗೊ ಪಯ್ಶೆ ದೀವ್ನ್ ಅಮಾನತ್ ಕರಿಜೆ ಪಡ್ತಾ. ಹ್ಯಾ ಸೌಲಾತೆಕ್ ಥೊಡ್ಯಾ ಮಟ್ಟಾಚಾ ವೇಗಾಚೆಂ ಇಂಟರ್ನೆಟ್ ಜಾಯ್ಜೆಚ್ . ಇಲ್ಲೆಶೆಂ ಸವ್ಕಾಸ್ ವಿಧಾನ್ ಹೆಂ . ಪುಣ್ ಮಸ್ತ್ ಸುರಕ್ಷಿತ್ ...

ಇಂಡಿಯಾಚಾ ಮಟ್ಟಾಕ್ ಏಕ್ external ಹಾರ್ಡ್ ಡಿಸ್ಕ್ ಮಸ್ತ್ ಊಂಚ್ ಮ್ಹುಣ್ ಚಿಂತಾ. ಏಕ್ try ದೀವ್ನ್ ಪಳೆಯಾ ತುಮಿ....!!!

                                   ***********************

Pimsleur ವಿದಾನ್ : ಪರ್ಕಿ ಭಾಸ್ ಶಿಕೊಂಕ್ ಹೆಂ ಖೂಬ್ ಸುಲಾಭ್ ವಿಧಾನ್ ..!

NAMAN BALLOK JESU -March 2012   

ತುಮ್ಕಾಂ ಕಂಯ್ ಪುಣೀ ಜರ್ಮನ್ , ಸ್ಪಾನಿಶ್ , ಇಟಾಲಿಯಾನ್, ಪೊಡ್ತುಗೇಜ್ ಯಾ ಇತರ್ ಕಸಲಿ ಯೀ ಪರ್ಕಿ ಭಾಸ್ ಶಿಕೊಂಕ್ ಆಸಾ ಗೀ ? ತುವೆಂ ಅಂತರ್ ಜಾಳಿರ್ ಸೊದ್ನಾಂ ಕೆಲ್ಯಾರ್ ವಿಡಿಯೊ , ಆಡಿಯೊ , ಬೂಕ್ ಯಾ ಸಾಪ್ಟ್ ವೆರಾಂ ಮ್ಹುಣ್ ತುಕಾ ಡಜನಾಂ ಗಟ್ಲ್ಯಾನ್ ವಿಧಾನ್ ಮೆಳ್ತಾತ್. ಪುಣ್ ಹಾಂತುಂ ಸಬಾರಾನಿಂ ಪಸಂದ್ ಕರ್ಚೆ ದೋನ್ ವಿಧಾನ್. ಪಯ್ಲೆಂ ರೊಸೆಟ್ಟಾ ಸ್ಟೋನ್(www.rosettastone.com) ಆನಿಂ ದುಸ್ರೆಂ Pimsleur ವಿದಾನ್ (www.pimsleur.com). ರೊಸೆಟ್ಟಾ ಸ್ಟೊನಾ ವಿಶಿಂ ತುಮಿಂ ಹ್ಯಾ ಪುಡೆಂ ವಾಚ್ಲಾಂ ಜಾಂವ್ಕ್ ಪುರೊ. ತೆಂ ಏಕ್ ಸಾಪ್ಟ್ ವೇರ್ . ತುಮ್ಕಾಂ ಕಂಯ್ ಪುಣಿ ಜರ್ಮನ್ ಬಾಸ್ ಶಿಕಜೆ ಜಾಲ್ಯಾರ್ , ಜರ್ಮನ್ ಬಾಶೆಚೆಂ ಪ್ರೊಗ್ರಾಮ್ ತುಮ್ಚಾ ಕಂಪ್ಯೂಟರಾಂತ್ ಲೋಡ್ ಕರ್ನ್ ತಾಂಚಾ ವಿಧಾನಾ ಪ್ರಕಾರ್ ಶಿಕಜೆ. ತುಮ್ಕಾಂ ತೆಂ ವಿಡಿಯೊ , ಆಡಿಯೊ, ಗ್ರಾಮಾರ್ , ಬರಂವ್ಚಿ ರೀತ್ , ಉಚ್ಚಾರಾಣ್ ಮ್ಹುಣ್ ಪುರಾ ಶಿಕಯ್ತಾ. ತುಮಿ ಮಾತ್ರ್ ನಿಯತ್ತೆನ್ ಕಂಪ್ಯೂಟರಾ ಮುಕಾರ್ ಬಸೊನ್ ಹೆಂ ವಿಧಾನ್ ಶಿಕಜೆ.

ಪುಣ್ ಹೆಂ Pimsleur ವಿದಾನ್ ಆಸಾ ಪಳೆ, ಹಾಕಾ ಕಾಂಯ್ ಕಂಪ್ಯೂಟರ್ ಜಾಯ್ಜೆ ಮ್ಹುಣ್ ಗರ್ಜ್ ನಾ. ಹೊ ಫಕತ್ ಆಡಿಯೊ ಕೋರ್ಸ್ . ತಶೆಂ ಜಾಲ್ಲ್ಯಾನ್ ತಾಂಚಿಂ ಆಡಿಯೊ ಫೈಲಾಂ ಸಿಡಿ , ಡಿವಿಡಿ ಯಾ ತುಮ್ಚಾ ಮೊಬೈಲಾರ್ ಯೀ play ಕರ್ಯೇತ್ . ಚಡಾವತ್ ಜಾವ್ನ್ ಹರ್ಯೇಕಾ ಭಾಶೆಂತ್ ಹಾಂಚೆ ತೀನ್ ಹಂತ್ ಆಸ್ತಾತ್. ಹರ್ಯೇಕಾ ಹಂತಾಂತ್ ಸುಮಾರ್ ತೀಸ್ ಮಿನುಟಾಚೆ ತೀಸ್ ಆಡಿಯೊ ಫೈಲಾಂ ಆಸ್ತಾತ್. ತುವೆಂ ಏಕಾ ದಿಸಾ ಏಕ್ ಫೈಲ್ ಆಯ್ಕಾಲ್ಯಾರ್ ಪುರೊ. ಹಾಂತುಂ ಬೂಕ್ ಯೀ ನಾಂತ್ ಯಾ ಕಸಲೆಂ ಯೀ ವಿಶೇಷ್ ಅಭ್ಯಾಸ್ ಕ್ರಮ್ ನಾ. ತುವೆಂ ತೆಂ ಆಡಿಯೊ ಫೈಲ್ ಫಕತ್ ಆಯ್ಕಾಲ್ಯಾರ್ ಪುರೊ. ತಾಂತುಂ ತುಮ್ಕಾಂ ಸುಡಾಳ್ ಜಾವ್ನ್ ಪರ್ಕಿ ಭಾಶೆಚೆಂ ಉಚ್ಚಾರಣ್ ವಿಧಾನ್ , ಆರ್ಥ್ ಆನಿಂ ಗ್ರಾಮಾರ್ ಶಿಕಯ್ತಾ. ಮೂಳ್ ಬಾಶೆಚೆಂ ಉಚ್ಚಾರಾಣ್ , ಮೂಳ್ ಉಲಾವ್ಪ್ಯಾ ಥಾವ್ನ್ಂ ಚ್ ರೆಕೊರ್ಡ್ ಕೆಲ್ಲ್ಯಾನ್ ಜೊಕ್ತೆಂ ಉಚ್ಚಾರಣ್ ಅಭ್ಯಾಸ್ ಮೆಳ್ತಾ. ಹಾಂತುಂ ತುಮ್ಕಾಂ ಕಾಂಯ್ ಉಡಾಸ್ ದವರಿಜೆ ಯಾ ಕಂಠ್ ಪಾಟ್ ಕರಿಜೆ ಮ್ಹುಣ್ ಗರ್ಜ್ ನಾ. Pimsleur ವಿದಾನಾಚಾ ಸಗ್ಳ್ಯಾ ಕಾರ್ಯಾವಾಳಿಚಾ ಅವ್ದೆಂತ್ ಶಿಕ್ ಲ್ಲಿ ಸಬ್ದಾವಳ್ ನಿರ್ದಿಶ್ಟ್ ಅವ್ದೆಂತ್ ಪುನಾರಾವರ್ತನ್ ಜಾಲ್ಲ್ಯಾನ್ ಉತ್ರಾವಾಳ್ ಅಮ್ಕಾಂ ಅಪ್ಣಾಸ್ತಕಿಂ ಉಡಾಸ್ ಉರ್ತಾ !. Pimsleur ವಿದಾನಾಚೊ ಆನ್ಯೇಕ್ ಫಾಯ್ದೊ ಮ್ಹುಳ್ಯಾರ್ , ಡ್ರೆವ್ ಕರ್ತಾನಾ, ಪಯ್ಣ್ ಕರ್ತಾನಾ ಯಾ ಇತರ್ ಕಂಚೆಂ ಯೀ ಕಾಮ್ ಕರ್ತಾನಾ ಯಿಂ ತುವೆಂ ಹೊ ಕೊರ್ಸ್ ಕರ್ಯೇತಾ. ತಶೆಂ ಜಾಲ್ಲ್ಯಾನ್ ವೆಳಾಚೊ ವಿಬ್ಡಾಯ್ ಯೀ ಜಾಯ್ನಾಂ ಯಾ ರೊಸೆಟ್ಟಾ ಸ್ಟೋನಾ ಬರಿ ಕಂಪ್ಯೂಟರಾ ಮುಕಾರ್ ಬಸ್ಚಿ ಗರ್ಜ್ ಯೀ ಪಡನಾ.

ಆಜ್ Pimsleur ವಿದಾನಾ ದ್ವಾರಿಂ ಸಂಸಾರಾಂತ್ಲ್ಯೊ ಬರೋಬ್ಬರ್ ಪನ್ನಾಸ್ ಬಾಸೊ ಶಿಕ್ಯೇತಾ. ಸಾಂಗ್ ಲ್ಯಾ ಬರಿ ಹೊ ಕೋರ್ಸ್ ಕಾಂಯ್ ಧರ್ಮಾಕ್ ಮೆಳಾನಾ . ಏಕಾ ಭಾಶೆಚ್ ಸಗ್ಳ್ಯಾ package ಕ್ ಇಂಡಿಯಾಚೆ ಲಗ್ಬಗ್ ಆಟ್ರಾ ಹಜಾರ್ ರೂಪಯ್ ಮ್ಹುಣಿ ಪಡ್ತಾ. ಹೆಂ ವಿದಾನ್ ಸೊದೊನ್ ಕಾಡ್ ಲ್ಯಾಚೆಂ ನಾಂವ್ Paul Pimsleur ಮ್ಹುಣೊನ್ . ವಡ್ಲೊ ವಿದ್ವಾಂಸ್ ತೊ . ಹಾಣೆಂ 1963 ಇಸ್ವೆಂತ್ ಹೆಂ ವಿಧಾನ್ ಆರಂಭ್ ಕೆಲ್ಲೆಂ. ಟೇಪ್ ರೆಕೊರ್ಡಾರಾಚೊ ಕಾಳ್ ತೊ. ತಶೆಂ ಜಾಲ್ಲ್ಯಾನ್ ಚಾರ್- ಪಾಂಚ್ ಡಜನ್ ಕೆಸೆಟ್ಯಾಂನಿಂ ಹೊ ಕೋರ್ಸ್ ತ್ಯಾ ಕಾಳಾರ್ ಯೇವ್ನ್ ಆಸ್ ಲ್ಲೊ. ಪುಣ್ ಅತಾಂ ತುಮಿಂ ಹೊ ಸಗ್ಳೊ ಕೋರ್ಸ್ , ಏಕ್ ನಕ್ಶೆ ತಸಲ್ಯಾ ಚಿಪ್ಪಾಂತ್ ಲೋಡ್ ಕರ್ನ್ ಮೊಬೈಲಾರ್ ಚ್ ಆಯ್ಕಾವೇತ್ ...!!

ತರ್ ಪರ್ಕಿ ಭಾಸ್ ಶಿಕೊಂಕ್ ರೊಸೆಟ್ಟಾ ಸ್ಟೋನ್ ವಿಧಾನ್ ಬರೆಂ ಗೀ ಯಾ Pimsleur ವಿದಾನ್ ಬರೆಂ ? ದೋನ್ ಯೀಂ ಉತ್ತೀಮ್ ವಿದಾನಾಂ ಚ್. ರೊಸೆಟ್ಟಾ ಸ್ಟೋನ್ ವಿಧಾನ್ ಆಸಾ ಪಳೆ ಎಕ್ಲ್ಯಾನ್ BE ಕರ್ನ್ ಮೆಕಾನಿಕಲ್ ಇಂಜಿನಿಯರಿಂಗ್ ಪದ್ವಿ ಘೆಂವ್ಚಾ ಬರಿ. Pimsleur ವಿಧಾನ್ ಚವ್ತಿ ಕ್ಲಾಸ್ ನಾಪಾಸ್ ಜಾವ್ನ್ ಗಾರಾಜೆಂತ್ ಕಾಮ್ ಕರ್ಚಾ ಸಾಯ್ಬಾಂಚಾ ಚೆರ್ಕ್ಯಾಂ ಬರಿ. ತುಮ್ಚೆಂ ಕಾರ್ ಕಂಯ್ ಪುಣೀ ಪಾಡ್ ಜಾಲ್ಯಾರ್ ಉತ್ತೀಮ್ ದುರಸ್ತಿ ಕರ್ನ್ ದಿಂವ್ಚಿ ತ್ಯಾ ಸಾಯ್ಬಾಂಚಾ ಚೆಡ್ಯಾನ್ಂ ಚ್.! ಫಿರ್ಗಿಂ ಭಾಸ್ ಯೆನಾತ್ ಲ್ಯಾಚ್ ದಕ್ಷಿಣ್ ಅಮೆರಿಕಾಂಚಾ ದೇಶಾಂಕ್ ತುಮ್ಕಾಂ ಥೊಡೆ ದೀಸ್ ಸಾಂಬಾಳಿಜೆ ಜಾಲ್ಯಾರ್ Pimsleur ವಿದಾನ್ ಬರೆಂ. ತುಮ್ಕಾಂ ಗ್ರೇಕ್ ಬಾಸ್ ಶಿಕೊನ್ , ತಾಂಚೊ ಏಕ್ ಬೂಕ್ ಆಮ್ಚಾ ಭಾಶೆಕ್ ಬಾಶಾಂತರ್ ಕರುಂಕ್ ಆಸ್ ಲ್ಯಾರ್ ರೊಸೆಟ್ಟಾ ಸ್ಟೋನ್ ಬರೆಂ ...!

By the way ಅಮಿಂ ಇಂಡಿಯಾಂತ್ ಆಸಾಂವ್ . ಅಮ್ಕಾಂ ಕಂಚೆಂಯೀಂ ಚಲ್ತಾ. ಆಮಿಂ ಕಾಂಯ್ ಹಜಾರ್ ಹಜಾರ್ ಖರ್ಚ್ ಕರ್ನ್ ಹೆಂ ಮೊಲಾಕ್ ಘೆತಾಂವ್ ವೇ ? !!!. www.torrentz.com ಯಾ www.filestube.com ಂತ್ ಆಮ್ಕಾಂ ಹಾಚೊ ಪೈರೆಟೆಡ್ ಪ್ರತಿ ಮೆಳ್ತಾ. ತುಮ್ಕಾಂ ಹೆಂ ಜರೂರ್ ಚಾಕೊನ್ ಪಳವ್ಯೇತ್ ..!!

****************************