ಮೊಳ್ಬಾಯುಗಾಂತ್ ಆದ್ಲ್ಯಾ ಜನೇರಾಚಾ 11 ಏಕ್ ವಡ್ಲೊ ದಾಕ್ಲೊ ಜಾಲ್ಲೊ ತುಮ್ಕಾಂ ಉಡಾಸ್ ಆಸೊಂಕ್ ಪುರೊ. ಚಿಣ್ಕಾರಾನಿಂ ತ್ಯಾ ದಿಸಾ ಆಪ್ಲೆಂ, ಫೆಂಗ್‌ಯೂನ್ ಮ್ಹುಳ್ಳೆಂ ಏಕ್ ನಿರುಪಯುಕ್ತ್ ಹವಾಮಾನ್ ಉಪಗ್ರಹಾಕ್ ಬ್ಯಾಲಿಸ್ಟಿಕ್ ಮಿಸೈಲ್ ದಾಡ್ನ್ ಮಾರ್ನ್ ಉಡಾಯ್ಲೆಂ. ಅಮೆರಿಕಾ ಆನಿಂ ಆದ್ಲ್ಯಾ ಸೋವಿಯಾತಕ್ ಸೊಡ್ಲ್ಯಾರ್ ಆಸಲ್ಲೆಂ ಸಾಧನ್ ಕೆಲ್ಲೆಂ ತಿಸ್ರೆಂ ರಾಷ್ಟ್ರ್ ಮ್ಹುಳ್ಳೆಂ ಮುಕುಟ್ ಚಿಣ್ಕಾರಾಂಚಾ ತಕ್ಲೆರ್ ಬಸ್ಲೆಂ ಸೊಡ್ಲ್ಯಾರ್ ತಾಣಿಂ ತ್ಯಾ ಪ್ರಯೋಗಾ ದ್ವಾರಿಂ ಅಂತ್ರಾಳಾರ್ ಏಕ್ ವಡ್ಲಿ ಕೊಯ್ರಾಚಿ (Space Debris) ರಾಸ್ ಘಾಲ್ಯಾ (ಕು)ಖ್ಯಾತೆ ಪಾವ್ಲೆಂ. ಪಾಟ್ಲ್ಯಾ ಸಾಟ್ ವರ್ಸಾಂಚಾ ಮೊಳ್ಬಾ ಇತಿಹಾಸಾಂತ್ ತಿತ್ಲೊ ಕೊಯ್ರ್ ಭುಂಯ್ಚಾ ಕಕ್ಷೆರ್ ಕೊಣೆಂಯೀ ಗಾಲುಂಕ್ ನಾತ್‌ಲ್ಲೊ. ಅಮೆರಿಕಾ ತಶೆಂ ಸಬಾರ್ ದೇಶಾನಿಂ ಚೈನಾಚ ಯಾ ಪ್ರಯೋಗಾಕ್ ಭಾರಿ ಠಿಕಾ ಕೆಲ್ಲಿ. ಆಶೆಂ ಭರ್ತಿ ಏಕಾ ವರ್ಸಾ ಉಪ್ರಾಂತ್ ಪರತ್ ಆಸಲ್ಲೆಂ ಏಕ್ ಘಡಿತ್ ಗಡ್ಲಾಂ. ಹ್ಯಾ ಪಾವ್ಟಿಂ ತ್ಯಾಚ್ ಅಮೆರಿಕಾನ್ ಏಕ್ ಮಿಸೈಲ್ ದಾಡ್ನ್ ಅಪ್ಲೆಂ ಏಕ್ ಗುಡಾಚಾರ್ಯ್ ಉಪಗ್ರಹಾಕ್ (Spy Satellite) ಪಿಟೊ ಕೆಲಾಂ....!! ಸುಮಾರ್ 20 ವರ್ಸಾಂ ಆದಿಂ ರಾವ್‌ಲ್ಲೊ ಮೊಳ್ಬಾಹಾತೆರಾಂಚೊ ಸ್ಪರ್ಧೊ ಪರತ್ ಆರಂಭ್ ಜಾಂವ್ಚಿ ಲಕ್ಷಣಾಂ ದಿಸೊನ್ ಯೆತಾತ್........
ಕಸಲಿ ಆನಿವಾರ್ಯಾತಾ ಆಸ್‌ಲ್ಲಿ ?
ಇತ್ಲ್ಯಾಕೀ ಅಮೆರಿಕಾಕ್ ಹೆಂ ಉಪಗ್ರಹ್ ಮಾರ್ನ್ ಉಡಾಂವ್ಚಿ ಆನಿವಾರ್ಯ್ ಪರಿಸ್ಥಿತಿ ಆಸ್‌ಲ್ಲಿಗಿ ? ಯೆದೊಳ್ ಮ್ಹುಣಾಸರ್ ಹಾಕಾ ಏಕ್ ಸ್ಪಷ್ಟ್ ಜವಾಬ್ ಮೆಳೊಂಕ್ ನಾ. ಫೆಬ್ರವರಿಚಾ ಪಯ್ಲ್ಯಾ ಹಪ್ತ್ಯಾಂತ್ ಅಮೆರಿಕಾಚೆಂ ಏಕ್ ಉಪಗ್ರಕ್ ಭುಂಯ್ಕ್ ಯೇವ್ನ್ ಆಪ್ಟಾಂವ್ಕ್ ಪುರೊ ಮ್ಹುಳ್ಳಿ ಖಬರ್ ಹೆಣೆಂ - ತೆಣೆಂ ಆಯ್ಕೊಂಕ್ ಮೆಳ್ತಾಲಿ. ಹೆಂ USA -193 ಮ್ಹುಳ್ಯಾ ಉಪಗ್ರಹಾಕ್ ಅಮೇರಿಕಾನ್ 2006 ಚಾ ಡಿಸೆಂಬರ್ 14 ತಾರಿಕೆರ್ ಉಬಾಯ್ಲೆಂ. ತೆಂ ಏಕ್ ಗುಡಾಚಾರ್ಯ್ ಉಪಗ್ರಹ್ ಜಾವ್ನ್ ಆಸ್‌ಲ್ಲೆಂ. ಹ್ಯಾ ಉಪಗ್ರಹಾಚೊ ಸ್ಪಷ್ಟ್ ಉದ್ದೇಶ್ ಕಸಲೊ ಮ್ಹುಣ್ ಭಯ್ಲ್ಯಾ ಸಂಸಾರಾಕ್ ಗೊತ್ತು ನಾತ್ಲ್ಯಾರೀ , ತೆಂ ಉಬಾಯ್ಲ್ಯಾ ಭರಿಚ್ ನಿಯಂತ್ರಣಾ ಭಯ್ರ್ ಗೆಲ್ಯಾನ್ ತ್ಯಾ ಘಡ್ಯೆಚ್ ವಿಫಲ್ ಜಾಲ್ಲೊ ವಿಷಯ್ ಮಾತ್ರ್ ಖಳಿತ್ ಆಸ್‌ಲ್ಲೊ. ಇತ್ಲ್ಯಾಕೀ ಅಂತ್ರಾಳ್ ವಿಗ್ಯಾನಾಂತ್ ಹೆಂ ಅಸಾಮಾನ್ಯ್ ಘಡಿತ್ ನ್ಹಂಯ್. ಅಸಲ್ಲಿಂ ಸಬಾರ್ ಘಡಿತಾಂ ಯೆದೊಳ್ ಗಡ್ಲ್ಯಾಂತ್. ಆದಿಂ ಆಮ್ಚಿಂಚ್ ಇನ್ಸಾಟ್ ಉಪಗ್ರಹಾಂ ನಿಯಂತ್ರಣ್ ಚುಕೊನ್ ಭಯ್ರ್ ಗೆಲ್ಲಿಂ ತುಮ್ಕಾಂ ಉಡಾಸ್ ಆಸೊಂಕ್ ಪುರೊ.
ವಾಸ್ತವ್ ಜಾವ್ನ್ ಇನ್ಸಾಟಾ ತಸಲಿಂ ಭುಂಯ್ ಸ್ಥಿರ್ ಉಪಗ್ರಹಾಂ ಭುಮಿ ಥಾವ್ನ್ 36,000 ಕಿ.ಮೀ ಪಯ್ಸ್ ಆಸ್ತಾತ್. ತಿಂ ನಿಯಂತ್ರಣ್ ಚುಕ್ಲ್ಯಾರ್‌ಯೀ ಭುಂಯ್ಕ್ ಪಾಟಿಂ ಯೆಂವ್ಚಿಂ ಆಪ್ರೂಬ್. ಪುಣ್ ಗುಡಾಚಾರ್ಯ್ ತಸಲ್ಯಾ ಉಪಗ್ರಹಾಂಕ್ ಭುಂಯ್ಚಾ ಲಾಗ್ಸಿಲ್ಯಾ ಕಕ್ಷೆರ್ ಸಂಸ್ಥಾಪಿತ್ ಕರ್‍ತಾತ್. ಇತ್ಲ್ಯಾಕೀ ಹೆಂ USA -193 ಮ್ಹುಳ್ಳೆಂ ಏಕಾ ಬಸ್ಸಾ ತೆದೆಂ ಉಪಗ್ರಹ್ ಆಸ್‌ಲ್ಲೆಂ ಭರೀ 250ಕಿ.ಮೀ ಪಯ್ಸ್ ಮಾತ್ರ್. ಇತ್ಲೆಂ ಪಯ್ಸ್ ಆಸ್‌ಲ್ಲೆಂ ಖಂಚಯ್ ಉಪಗ್ರಹ್ ಏಕ್ ದೀಸ್ ಮ್ಹುಣೀ ಭುಂಯ್ಕ್ ಪಾಟಿಂ ಯೆತಾಚ್. ಆಶಿಂ ಪಾಟಿಂ ಯೆಂವ್ಚಿಂ ಉಪಗ್ರಹಾಂ ಭುಂಯ್ಚಾ ವಾತಾವಾರಣಾಚಾ ದಾಟ್ ಪದರಾಕ್ ಘಷ್ಟತಾನ ಉತ್ಪನ್ನ್ ಜಾಲ್ಯಾ ತಾಪಾಕ್ ಭಸ್ಮ್ ಜಾತಾತ್. ಥೊಡೆ ಪಾವ್ಟಿಂ ಹಾಚೆ ಉರ್‌ಲ್ಲೆ ಕುಡ್ಕೆ ಭುಮಿಕ್ ಯೇವ್ನ್ ಪಡ್ತಾತ್. ಪುಣ್ USA -193 ಆಶೆಂ ನಗಣ್ಯ್ ಕರುಂಕ್ ಸಾದ್ಯ್ ನಾತ್‌ಲ್ಲೆಂ. ಕಿತ್ಯಾಕ್ ಮ್ಹುಳ್ಯಾರ್ ತಾಂತುಂ ಹೈಡ್ರಾಜೈನ್ (Hydrazine) ಮ್ಹುಳ್ಳೆಂ ವಿಕಾಳ್ ಇಂಧನ್ ಭರ್‌ಲ್ಲಿ ಏಕ್ ಟ್ಯಾಂಕ್ ಆಸ್‌ಲ್ಲಿ. ವಾಸ್ತವ್ ಜಾವ್ನ್ ರಾಕೆಟಾಕ್ ಆಸ್‌ಲ್ಯಾ ಭರಿ ಹರ್‍ಯೇಕ್ ಉಪಗ್ರಹಾಕ್‌ಯೀ ಏಕ್ ಇಂಧನಾಚಿ ಟ್ಯಾಂಕ್ ಆಸ್ತಾ. ಭುಂಯ್ ಥಾವ್ನ್ ಉಪಗ್ರಹಾಚೆಂ ಪಥ್ ಬದ್ಲುಂಕ್ , ತೆಂ ವಯ್ರ್ ಯಾ ಸಕಯ್ಲ್ ವರುಂಕ್..... ಅಶೆಂ ತಾಚೆಂ ಸಗ್ಳೆಂ ನಿಯಂತ್ರಣ್ ಕಾಣ್ಘೆಜೆ ಜಾಲ್ಯಾರ್ ಅಸಲೆಂ ಇಂಧನ್ ಉಪಗ್ರಹಾಂತ್ ಆಸಾಜೆಚ್. ಏಕಾ ಉಪಗ್ರಹಾಂತ್ ಹೆಂ ಇಂಧನ್ ಮುಗ್ದಲ್ಯಾರ್ ತ್ಯಾ ಉಪಗ್ರಹಾಚೆಂ ಆವ್ಕ್‌ಯೀ ಮುಗ್ದಲ್ಯಾ ಬರಿ. ಪುಣ್ USA -193 ಂತ್ ಆಸ್‌ಲ್ಲೆಂ ಹೈಡ್ರಾಜೈನ್ ಭಿರಾಂಕುಳ್ ವಿಕಾಳ್ ತೆಂ. ತಾಚೊ ಪ್ರಯೋಗ್ ಏಕಾ ಜೀವಿಕ್ ನಿರ್ಜೀವ್ ಕರ್ಚೆ ತಿತ್ಲೊ ಸಕ್ತೆವಂತ್. ತಿತ್ಲ್ಯಾಕೀ ಉಪಗ್ರಹ್ ಉಬಾಯ್ಲ್ಯಾ ಭರಿಚ್ ನಿಯಂತ್ರಣ್ ಚುಕೊನ್ ಭಯ್ರ್ ಗೆಲ್ಲೆಮ್ ನ್ಹಂಯ್‌ವೇ. ತಶೆಂ ತಾಂತುಂ ಆಸ್‌ಲ್ಲೆಂ ಭರ್ತಿ 453 ಕೆ.ಜಿ. ಹ್ಶೆಡ್ರಾಜೈನ್ ಉಪ್ಯೋಗ್ ಜಾಯ್ನಾಸ್ತಾನ ತಸೆಂಚ್ ಆಸ್‌ಲ್ಲೆಂ. ಉಪಗ್ರಹ್ ಮ್ಹುಣಿ ಭುಂಯ್ಕ್ ಪಾಟಿಂ ಆಯ್ಲ್ಯಾರ್ ಹಿ ಟ್ಯಾಂಕ್ ಪುಟೊನ್ ವಿಕಾಳ್ ಮೊಡಾಚೆಂ ಪದರ್ ರೂಪ್ ಜಾವ್ನ್ ಥೊಡೆ ಮ್ಹುಣೀ ಜೀವ್ ಬಲಿ ಕಾಣ್ಘೆಂವ್ಚೆಂ ಖಚಿತ್ ಜಾಲ್ಲೆಂ. ದೆಕುಂನ್‌ಚ್ ಹ್ಯಾ ಉಪಗ್ರಹಾಕ್ ಆಂತ್ರಾಳಾರ್ ಮಾರ್ನ್ ಉಡಾಯಾ ಮ್ಹುಣ್ ಅದ್ಯಕ್ಷ್ ಬುಶಾನ್ ಹ್ಯಾಚ್ ಫೆಬ್ರವರಿ 12 ತಾರಿಕೇರ್ ಆಜ್ನಾ ದಿಲ್ಲಿ.....!!!
ಕಶೆಂ ಸಾಧ್ಯ್ ಜಾಲೆಂ ಹೆಂ ?
ಆಶಿ ಆಜ್ನಾ ಮೆಳ್ಳಿ ನ್ಹಂಯ್‌ವೇ ? ತೆದೊಳ್‌ಚ್ ಪಶ್ಚಿಮ್ ಹವಾಯ್ ಪ್ರಾಂತ್ಯಾಂತ್ ಅಮೆರಿಕಾಚ ನೇವಿಚಿಂ ತೀನ್ ಝುಜಾ ತಾರ್‍ವಾಂ ಹ್ಯಾ ಕಾರ್ಯಾಕ್ ಸನ್ನಧ್ ಜಾವ್ನ್ ಆಸ್‌ಲ್ಲಿಂ. ತಾಂತ್ಲ್ಯಾ ಏಕಾ ತಾರ್‍ವಾಂತ್ಲಿ SM -3 (Standard Missile 3) ಉಪಗ್ರಹಾಕ್ ಆಪ್ಟಾಂವ್ಕ್ ತಯಾರ್ ಆಸ್‌ಲ್ಲಿ. ಎಕಾದೆವಾಳ ಪಯ್ಲೆಂ ಪ್ರಯತ್ನ್ ವಿಫಲ್ ಜಾಲ್ಯಾರ್ ಮ್ಹುಣ್ ದುಸ್ರ್ಯಾ ಆನಿಂ ತಿಸ್ರ್ಯಾ ಝುಜಾ ತಾರ್‍ವಾಂರ್ ಥೊಡ್ಯೊ ಮಿಸೈಲ್ ಜಮೊ ದವರ್ಲ್ಯೊ. ಹ್ಯಾ ಸಗ್ಳ್ಯಾ ಮಾಂಡವಾಳೆಕ್ ಉಪ್ಯೋಕ್ ಕೆಲ್ಲೆಂ ತಂತ್ರಜ್ನಾನ್ Aegis Ballestic Missile Defence System. ಹೆಂ ನಾಂವ್ ಖಂಡಿತ್ ತುಮಿ ಆಯ್ಕಾಲಾಂ ಜಾಂವ್ಕ್ ಪುರೊ. ವೈರಿ ದೇಶಾಚಿ ಬ್ಯಾಲಿಸ್ಟಿಕ್ ಮಿಸೈಲ್ ವಾಟೆರ್‌ಚ್ ನಾಸ್ ಕರ್ಚೆಂ ಅಮೆರಿಕಾಚೆಂ ಮಹತ್ವಾಕಾಂಕ್ಷ್ ಯೋಜಿತ್ ಕಾರ್ಯಕ್ರಮ್ ತೆಂ. ಗೆಲೆತ್ಯಾ ಥೊಡ್ಯಾ ವರ್ಸಾನಿಂ ಹ್ಯಾ ಖಾತಿರ್ ಅಮೆರಿಕಾ ಸಬಾರ್ ಪ್ರಯೋಗ್ ಕರ್ನ್ ಆಸಾ. ಹೆಂಚ್ ತಂತ್ರಜ್ನಾನ್ ಇಲ್ಲೆಶೆಂ ರೂಪಾಂತರ್ ಕರ್ನ್ ತಾಣಿಂ ಉಪಗ್ರಹ್ ಮಾರುಂಕ್ ಮಿಸೈಲ್ ತಯಾರ್ ಕೆಲ್ಲಿ...!!
ಆಶೆಂ ಹ್ಯಾ ತಾರ್‍ವಾರ್ Spy-1 ಮುಳ್ಳೆಂ ರಾಡಾರ್ ಆಸ್‌ಲ್ಲೆಂ. ತಾಂತು ಚಾರ್ ಆಂಟೆನಾ ಆಸ್‌ಲ್ಯಾನ್ ಸಗ್ಳ್ಯಾ 360 ಡಿಗ್ರಿ ವ್ಯಾಪ್ತ್ ಆವರಣ್ ಜಾವ್ನ್ ಆಸ್‌ಲ್ಲಿ. ಹಿಂ ರಾಡಾರಾಂ ಆನಿಂ ತಾಂತ್ಲಿಂ ಕಂಪ್ಯೂಟರಾಂ ಉಪ್ಯೋಗ್ ಕರ್ನ್ ಉಪಗ್ರಹಾಚೆಂ ಜುಸ್ತ್ ಸ್ಥಾನ್ ಲೇಕ್ ಕರುಂಕ್ ಜಾತಲೆಂ. ತೆಂ ಉಪಗ್ರಹ್ 247 ಕಿ.ಮೀ ವಯ್ರ್ ಘಂಟ್ಯಾಕ್ 28,000 ವೇಗಾಂತ್ ಘುಂವೊನ್ ಆಸ್‌ಲ್ಲೆಂ. ಇತ್ಲೊ ವಿವರ್ ಮೆಳ್ಯಾ ಉಪ್ರಾಂತ್ ತಾಂತ್ಲ್ಯಾ ಏಕಾ ತಾರ್‍ವಾಂತ್ ಆಸ್‌ಲ್ಲಿ ಚಾರ್ ಹಂತಾಚಿ SM-3 ಮಿಸೈಲ್ ಉಬ್ಲಿ. ಪಯ್ಣಾ ಮದೆಂ ತ್ಯಾ ಮಿಸೈಲಾಕ್ ಹ್ಯಾ ಝುಜಾ ತಾರ್‍ವಾಂ ಸಾಂಗಾತಾ GPS ಉಪಗ್ರಹಾಂ ಥಾವ್ನ್‌ಯೀ USA -193 ಉಪಗ್ರಹಾಚಿ ನಿರಂತರ್ ಮಾಹೆತ್ ಆನಿಂ ಮಾರ್ಗದರ್ಷನ್ ಮೆಳೊನ್ ಆಸ್‌ಲ್ಲೆಂ. ಹ್ಯಾ ಮಿಸೈಲಾಚೆ ತೀನ್ ಹಂತ್ ವಿವಿಧ್ ವೆಳಾರ್ ನಿಕಾಳ್ಯಾ ಉಪ್ರಾಂತ್ ಅಂತಿಮ್ ಹಂತಾರ್ ಆಸ್ಚೊ ವಿಶೇಷ್ ಭಾಗ್ ಉಪಗ್ರಹಾಕ್ ಸೊದುನ್ ಗೆಲೊ. ತಾಂತ್ಲಿ ಸೆನ್ಸಾರಾಂ ಪಯ್ಲೆಂಚ್ ಪ್ರೋಗ್ರಾಮ್ ಕೆಲ್ಯಾನ್ ತೊ ಭಾಗ್ ವಚುನ್ ಜುಸ್ತ್ ಇಂಧನ್ ಟ್ಯಾಂಕಿಕ್ ಅಪ್ಟಾಲ್ಲೊ ತಿತ್ಲೆಂಚ್, ಏಕ್ ವಡ್ಲ್ಯಾ ಉಜ್ಯಾಚೊ ಗುಡೊ ಉಬ್ಜಲ್ಲೊ ದಿಸೊನ್ ಆಯ್ಲೊ. ತಿತ್ಲ್ಯಾರ್ ತೆಂ ಉಪಗ್ರಹ್ ಪಿಟೊ ಜಾಲ್ಲೆಂ ಖರೆಂ ಪುಣ್ ತ್ಯಾ ಇಂಧನಾಚಿ ಟ್ಯಾಂಕ್ ಕಿತೆಂ ಜಾಲ್ಯಾ ಮ್ಹುಣ್ ವಿವರ್ ಯೆದೊಳ್ ಮ್ಹುಣಾಸರ್ ಯೇವ್ನಾ.
ಏಕಚ್ ಫಾತ್ರಾಕ್ ದೋನ್ ಸುಕ್ಣಿಂ ?
ಅಸೊ ಉಪಗ್ರಹ್ ಮ್ಹುಣಿ ನಾಸ್ ಜಾಲೊ. ಪುಣ್ ಅಮೆರಿಕಾನ್ ಏಕಚ್ ಫಾತ್ರಾಕ್ ದೋನ್ ಸುಕ್ಣಿಂ ಮಾರ್‍ಲಿಂಗೀ ? ಅಸಲೊ ಏಕ್ ದುಬಾವ್ ದಿಸೊನ್ ಯೆತಾ. ಗೆಲೆತ್ಯಾ ವರ್ಸಾ ಚೈನಾನ್ ಮೊಳ್ಬಾರ್ ಅಸಲ್ಲೊ ಏಕ್ ಪ್ರಯೋಗ್ ಕೆಲ್ಯಾ ಉಪ್ರಾಂತ್ ಅಮೆರಿಕಾ ಖುಬಾಳ್ಳೆಂ ಫಟ್ ನ್ಹಂಯ್. ಚಿಣ್ಕಾರಾಂ ಬರಿಂ ತಾಣಿಂಯೀ ತಸಲೊ ಪ್ರಯೋಗ್ ಕೆಲ್ಯಾರ್ ಜಾಗಾತೀಕ್ ಮಟ್ಟಾರ್ ಠಿಕಾ ಆಯ್ಕಾಜೆ ಪಡ್ತೆ ಆಸ್‌ಲ್ಲಿ. ಮೊಳ್ಬಾಹಾತೆರಾಂಚೊ ಸ್ಪರ್ಧ್ಯಾಕ್ ಕಾರಣ್ ಜಾಲಾಂ ಮ್ಹುಣ್ ದುರ್ಸೊವ್ಣಿ ಅಯ್ಕಾಜೆ ಆಸ್‌ಲ್ಲೆಂ . ಪುಣ್ ಅಮೆರಿಕಾಕ್ ಏಕ್ ಬರೊ ಅವ್ಕಾಸ್ ಮೆಳ್ಳೊ ..! ಪಿಡೆಸ್ತಾಕ್ ಜಾಯ್ಜೆ ಆಸ್‌ಲ್ಲೆಂಯೀ ದೂದ್, ದಾಕ್ತೆರಾನ್ ಪಿಯೊಂಕ್ ಸಾಂಗ್ಲೆಂಯೀ ದೂದ್‌ಚ್.. ಮ್ಹುಳ್ಯಾ ಬರಿ ಜಾಲೆಂ. ಹ್ಯಾ ಚಿಣ್ಕಾರಾನಿಂ 800 ಕಿ.ಮೀ ವಯ್ಲ್ಯಾ ವಗೆಚ್ ಆಸ್‌ಲ್ಯಾ ಉಪಗ್ರಹಾಕ್ ಪಿಟೊ ಕೆಲ್ಲೆ ಕುಡ್ಕೆ ಸಬಾರ್ ವರ್ಸಾಂ ಥಂಯ್‌ಚ್ ಆಸ್ತೆಲೆ. ಪುಣ್ ಅಮೆರಿಕಾಚಾ ಉಪಗ್ರಹಾಚೆ ಕುಡ್ಕೆ ಪುರಾ ದೋನ್ ಹಪ್ತ್ಯಾ ಭಿತರ್ ಭುಂಯ್ಕ್ ಪಾಟಿಂ ಯೆತಾಲೆ. ಆಶೆಂ ಮೊಳ್ಬಾರ್ ಕೋಯ್ರ್ ಘಾಲ ಮ್ಹುಣ್ ಅಮೇರಿಕಾಚಾ ಮಾಂಡ್ಯರ್ ಗುಗ್ ಬಸಂವ್ಕ್ ಜಾಯ್ನಾ. ಹ್ಯಾ ಪ್ರಯೋಗಚೊ ಉದ್ಡೇಶ್‌ಯೀ ಸವಾಲ್ ಕರುಂಕ್ ಕೊಣ್ಣಾಯ್ಕಿ ಜಾಯ್ನಾ..... ಹಾಚೆ ಸಾಂಗಾತಾ ಭುಂಯ್ಕ್ ಮ್ಹುಣೊನ್ ವಿನ್ಯಾಸ್ ಕೆಲ್ಲೆಂ ಬ್ಯಾಲೆಸ್ಟಿಕ್ ಮಿಸೈಲ್ ನಿರೋಧಕ್ ತಂತ್ರಜ್ನಾನ್ ಅಂತ್ರಾಳಾಚ್ ಉಪ್ಯೋಗಾಕ್ ರೂಪಾಂತರ್ ಕರುಂಕ್ ಕೆಲ್ಲೊ ಪಯ್ಲೊ ಪ್ರಯೋಗ್‌ಯೀ ಯಶಸ್ವಿ.....!!!
ಪುಣ್ ಮಿಲಿಯಾನ್ ಡಾಲಾರ್ ಸವಾಲ್ ಉರ್‍ಲಾಂ. ಬ್ಯಾಲೆಸ್ಟಿಕ್ ಮಿಸೈಲ್ ನಿರೋಧಕ್ ತಂತ್ರಜ್ನಾನ್ ಭುಂಯ್ಕ್ ಮ್ಹುಣೊನ್ ವಿನ್ಯಾಸ್ ಕೆಲ್ಲೆಂ ಅಂತ್ರಾಳಾಚ್ ಉಪ್ಯೋಗಾಕ್ ರೂಪಾಂತರ್ ಕರ್ತಾನಾ ಉಣ್ಯಾರ್ ಉಣೆಂ ಮ್ಹುಳ್ಯಾರ್ ಲೊಂಚಿಗ್ ಸಿಸ್ಟಮಾ ಥಾವ್ನ್ ಅಂತಿಮ್ ಭಾಗಚಾ ಸೆನ್ಸಾರಾ ಮ್ಹುಣಾಸರ್ ಬರಯ್ಲೆಮ್ ಸಾಪ್ಟ್‌ವೇರ್ ಮ್ಹುಣ್‌ಯೀ ರೂಪಾಂತರ್ ಕರಿಜೆ ಪಡ್ತಾ. ಆಶೆಂ ಕರಿಜೆ ಜಾಲ್ಯಾರ್ ಸಗ್ಳೊ ಕೋಡ್‌ಚ್ ಪರ್ತ್ಯಾಕೀ ಬರವ್ನ್ ಟೆಸ್ಟ್ ಕರಿಜೆ ಪಡ್ತಾ. ಉಣೆಂ ಮ್ಹುಳ್ಯಾರೀ ಹಾಕಾ ದೋನ್ - ತೀನ್ ಮಯ್ನೆ ಜಾಯ್ಜೆ. ಪುಣ್ ಅಮೆರಿಕಾಕ್ ಫಕತ್ ದಾ ದಿಸಾನಿಂ ಹೆಂ ಕಶೆಂ ಕೆಲೆಂ ? ಯಾ ತಾಣಿಂ ಸಬಾರ್ ಮಯ್ನಾ ಪಯ್ಲೆಂಚ್ ಹಾಚಿ ತಯರಾಯ್ ಆರಂಭ್ ಕೆಲ್ಲಿ.....!!! ? ಚೈನಾನ್ ಆನಿಂ ರಶಿಯಾನ್ ಹ್ಯಾ ಪ್ರಯೋಗಾ ವಿಶಿಂ ಸವಾಲ್ ಕೆಲ್ಲೆಂ ಯೆದೊಳ್ ಮ್ಹುಣಾಸರ್ ಕೋಣ್‌ಯೀ ಆಯ್ಕೊಂಚೆ ಸ್ಥಿತೆರ್ ನಾಂತ್. BCCI ನ್ Yes ಮ್ಹುಳ್ಯಾರ್ ತೆಂ NO ಮ್ಹುಣೊಂಕ್ ಕ್ರಿಕೆಟ್ ಆಸ್ಟ್ರೇಲಿಯಾ ಸೊಡ್ ICC ಕೀ ಜಾತಾವೇ ? ತಿಚ್ ಗತ್ ಚಿಣ್ಕಾರಾಂಚಿ ಜಾಲ್ಯಾ....!!!!
**************************************
- ಪ್ರಮೋದ್ ಜೆ. ರಾಡ್ರಿಗ್ಸ್, ಹೊಸ್ಪೆಟ್
pramrods@gmail.com
ಕಸಲಿ ಆನಿವಾರ್ಯಾತಾ ಆಸ್‌ಲ್ಲಿ ?
ಇತ್ಲ್ಯಾಕೀ ಅಮೆರಿಕಾಕ್ ಹೆಂ ಉಪಗ್ರಹ್ ಮಾರ್ನ್ ಉಡಾಂವ್ಚಿ ಆನಿವಾರ್ಯ್ ಪರಿಸ್ಥಿತಿ ಆಸ್‌ಲ್ಲಿಗಿ ? ಯೆದೊಳ್ ಮ್ಹುಣಾಸರ್ ಹಾಕಾ ಏಕ್ ಸ್ಪಷ್ಟ್ ಜವಾಬ್ ಮೆಳೊಂಕ್ ನಾ. ಫೆಬ್ರವರಿಚಾ ಪಯ್ಲ್ಯಾ ಹಪ್ತ್ಯಾಂತ್ ಅಮೆರಿಕಾಚೆಂ ಏಕ್ ಉಪಗ್ರಕ್ ಭುಂಯ್ಕ್ ಯೇವ್ನ್ ಆಪ್ಟಾಂವ್ಕ್ ಪುರೊ ಮ್ಹುಳ್ಳಿ ಖಬರ್ ಹೆಣೆಂ - ತೆಣೆಂ ಆಯ್ಕೊಂಕ್ ಮೆಳ್ತಾಲಿ. ಹೆಂ USA -193 ಮ್ಹುಳ್ಯಾ ಉಪಗ್ರಹಾಕ್ ಅಮೇರಿಕಾನ್ 2006 ಚಾ ಡಿಸೆಂಬರ್ 14 ತಾರಿಕೆರ್ ಉಬಾಯ್ಲೆಂ. ತೆಂ ಏಕ್ ಗುಡಾಚಾರ್ಯ್ ಉಪಗ್ರಹ್ ಜಾವ್ನ್ ಆಸ್‌ಲ್ಲೆಂ. ಹ್ಯಾ ಉಪಗ್ರಹಾಚೊ ಸ್ಪಷ್ಟ್ ಉದ್ದೇಶ್ ಕಸಲೊ ಮ್ಹುಣ್ ಭಯ್ಲ್ಯಾ ಸಂಸಾರಾಕ್ ಗೊತ್ತು ನಾತ್ಲ್ಯಾರೀ , ತೆಂ ಉಬಾಯ್ಲ್ಯಾ ಭರಿಚ್ ನಿಯಂತ್ರಣಾ ಭಯ್ರ್ ಗೆಲ್ಯಾನ್ ತ್ಯಾ ಘಡ್ಯೆಚ್ ವಿಫಲ್ ಜಾಲ್ಲೊ ವಿಷಯ್ ಮಾತ್ರ್ ಖಳಿತ್ ಆಸ್‌ಲ್ಲೊ. ಇತ್ಲ್ಯಾಕೀ ಅಂತ್ರಾಳ್ ವಿಗ್ಯಾನಾಂತ್ ಹೆಂ ಅಸಾಮಾನ್ಯ್ ಘಡಿತ್ ನ್ಹಂಯ್. ಅಸಲ್ಲಿಂ ಸಬಾರ್ ಘಡಿತಾಂ ಯೆದೊಳ್ ಗಡ್ಲ್ಯಾಂತ್. ಆದಿಂ ಆಮ್ಚಿಂಚ್ ಇನ್ಸಾಟ್ ಉಪಗ್ರಹಾಂ ನಿಯಂತ್ರಣ್ ಚುಕೊನ್ ಭಯ್ರ್ ಗೆಲ್ಲಿಂ ತುಮ್ಕಾಂ ಉಡಾಸ್ ಆಸೊಂಕ್ ಪುರೊ.
ವಾಸ್ತವ್ ಜಾವ್ನ್ ಇನ್ಸಾಟಾ ತಸಲಿಂ ಭುಂಯ್ ಸ್ಥಿರ್ ಉಪಗ್ರಹಾಂ ಭುಮಿ ಥಾವ್ನ್ 36,000 ಕಿ.ಮೀ ಪಯ್ಸ್ ಆಸ್ತಾತ್. ತಿಂ ನಿಯಂತ್ರಣ್ ಚುಕ್ಲ್ಯಾರ್‌ಯೀ ಭುಂಯ್ಕ್ ಪಾಟಿಂ ಯೆಂವ್ಚಿಂ ಆಪ್ರೂಬ್. ಪುಣ್ ಗುಡಾಚಾರ್ಯ್ ತಸಲ್ಯಾ ಉಪಗ್ರಹಾಂಕ್ ಭುಂಯ್ಚಾ ಲಾಗ್ಸಿಲ್ಯಾ ಕಕ್ಷೆರ್ ಸಂಸ್ಥಾಪಿತ್ ಕರ್‍ತಾತ್. ಇತ್ಲ್ಯಾಕೀ ಹೆಂ USA -193 ಮ್ಹುಳ್ಳೆಂ ಏಕಾ ಬಸ್ಸಾ ತೆದೆಂ ಉಪಗ್ರಹ್ ಆಸ್‌ಲ್ಲೆಂ ಭರೀ 250ಕಿ.ಮೀ ಪಯ್ಸ್ ಮಾತ್ರ್. ಇತ್ಲೆಂ ಪಯ್ಸ್ ಆಸ್‌ಲ್ಲೆಂ ಖಂಚಯ್ ಉಪಗ್ರಹ್ ಏಕ್ ದೀಸ್ ಮ್ಹುಣೀ ಭುಂಯ್ಕ್ ಪಾಟಿಂ ಯೆತಾಚ್. ಆಶಿಂ ಪಾಟಿಂ ಯೆಂವ್ಚಿಂ ಉಪಗ್ರಹಾಂ ಭುಂಯ್ಚಾ ವಾತಾವಾರಣಾಚಾ ದಾಟ್ ಪದರಾಕ್ ಘಷ್ಟತಾನ ಉತ್ಪನ್ನ್ ಜಾಲ್ಯಾ ತಾಪಾಕ್ ಭಸ್ಮ್ ಜಾತಾತ್. ಥೊಡೆ ಪಾವ್ಟಿಂ ಹಾಚೆ ಉರ್‌ಲ್ಲೆ ಕುಡ್ಕೆ ಭುಮಿಕ್ ಯೇವ್ನ್ ಪಡ್ತಾತ್. ಪುಣ್ USA -193 ಆಶೆಂ ನಗಣ್ಯ್ ಕರುಂಕ್ ಸಾದ್ಯ್ ನಾತ್‌ಲ್ಲೆಂ. ಕಿತ್ಯಾಕ್ ಮ್ಹುಳ್ಯಾರ್ ತಾಂತುಂ ಹೈಡ್ರಾಜೈನ್ (Hydrazine) ಮ್ಹುಳ್ಳೆಂ ವಿಕಾಳ್ ಇಂಧನ್ ಭರ್‌ಲ್ಲಿ ಏಕ್ ಟ್ಯಾಂಕ್ ಆಸ್‌ಲ್ಲಿ. ವಾಸ್ತವ್ ಜಾವ್ನ್ ರಾಕೆಟಾಕ್ ಆಸ್‌ಲ್ಯಾ ಭರಿ ಹರ್‍ಯೇಕ್ ಉಪಗ್ರಹಾಕ್‌ಯೀ ಏಕ್ ಇಂಧನಾಚಿ ಟ್ಯಾಂಕ್ ಆಸ್ತಾ. ಭುಂಯ್ ಥಾವ್ನ್ ಉಪಗ್ರಹಾಚೆಂ ಪಥ್ ಬದ್ಲುಂಕ್ , ತೆಂ ವಯ್ರ್ ಯಾ ಸಕಯ್ಲ್ ವರುಂಕ್..... ಅಶೆಂ ತಾಚೆಂ ಸಗ್ಳೆಂ ನಿಯಂತ್ರಣ್ ಕಾಣ್ಘೆಜೆ ಜಾಲ್ಯಾರ್ ಅಸಲೆಂ ಇಂಧನ್ ಉಪಗ್ರಹಾಂತ್ ಆಸಾಜೆಚ್. ಏಕಾ ಉಪಗ್ರಹಾಂತ್ ಹೆಂ ಇಂಧನ್ ಮುಗ್ದಲ್ಯಾರ್ ತ್ಯಾ ಉಪಗ್ರಹಾಚೆಂ ಆವ್ಕ್‌ಯೀ ಮುಗ್ದಲ್ಯಾ ಬರಿ. ಪುಣ್ USA -193 ಂತ್ ಆಸ್‌ಲ್ಲೆಂ ಹೈಡ್ರಾಜೈನ್ ಭಿರಾಂಕುಳ್ ವಿಕಾಳ್ ತೆಂ. ತಾಚೊ ಪ್ರಯೋಗ್ ಏಕಾ ಜೀವಿಕ್ ನಿರ್ಜೀವ್ ಕರ್ಚೆ ತಿತ್ಲೊ ಸಕ್ತೆವಂತ್. ತಿತ್ಲ್ಯಾಕೀ ಉಪಗ್ರಹ್ ಉಬಾಯ್ಲ್ಯಾ ಭರಿಚ್ ನಿಯಂತ್ರಣ್ ಚುಕೊನ್ ಭಯ್ರ್ ಗೆಲ್ಲೆಮ್ ನ್ಹಂಯ್‌ವೇ. ತಶೆಂ ತಾಂತುಂ ಆಸ್‌ಲ್ಲೆಂ ಭರ್ತಿ 453 ಕೆ.ಜಿ. ಹ್ಶೆಡ್ರಾಜೈನ್ ಉಪ್ಯೋಗ್ ಜಾಯ್ನಾಸ್ತಾನ ತಸೆಂಚ್ ಆಸ್‌ಲ್ಲೆಂ. ಉಪಗ್ರಹ್ ಮ್ಹುಣಿ ಭುಂಯ್ಕ್ ಪಾಟಿಂ ಆಯ್ಲ್ಯಾರ್ ಹಿ ಟ್ಯಾಂಕ್ ಪುಟೊನ್ ವಿಕಾಳ್ ಮೊಡಾಚೆಂ ಪದರ್ ರೂಪ್ ಜಾವ್ನ್ ಥೊಡೆ ಮ್ಹುಣೀ ಜೀವ್ ಬಲಿ ಕಾಣ್ಘೆಂವ್ಚೆಂ ಖಚಿತ್ ಜಾಲ್ಲೆಂ. ದೆಕುಂನ್‌ಚ್ ಹ್ಯಾ ಉಪಗ್ರಹಾಕ್ ಆಂತ್ರಾಳಾರ್ ಮಾರ್ನ್ ಉಡಾಯಾ ಮ್ಹುಣ್ ಅದ್ಯಕ್ಷ್ ಬುಶಾನ್ ಹ್ಯಾಚ್ ಫೆಬ್ರವರಿ 12 ತಾರಿಕೇರ್ ಆಜ್ನಾ ದಿಲ್ಲಿ.....!!!
ಕಶೆಂ ಸಾಧ್ಯ್ ಜಾಲೆಂ ಹೆಂ ?
ಆಶಿ ಆಜ್ನಾ ಮೆಳ್ಳಿ ನ್ಹಂಯ್‌ವೇ ? ತೆದೊಳ್‌ಚ್ ಪಶ್ಚಿಮ್ ಹವಾಯ್ ಪ್ರಾಂತ್ಯಾಂತ್ ಅಮೆರಿಕಾಚ ನೇವಿಚಿಂ ತೀನ್ ಝುಜಾ ತಾರ್‍ವಾಂ ಹ್ಯಾ ಕಾರ್ಯಾಕ್ ಸನ್ನಧ್ ಜಾವ್ನ್ ಆಸ್‌ಲ್ಲಿಂ. ತಾಂತ್ಲ್ಯಾ ಏಕಾ ತಾರ್‍ವಾಂತ್ಲಿ SM -3 (Standard Missile 3) ಉಪಗ್ರಹಾಕ್ ಆಪ್ಟಾಂವ್ಕ್ ತಯಾರ್ ಆಸ್‌ಲ್ಲಿ. ಎಕಾದೆವಾಳ ಪಯ್ಲೆಂ ಪ್ರಯತ್ನ್ ವಿಫಲ್ ಜಾಲ್ಯಾರ್ ಮ್ಹುಣ್ ದುಸ್ರ್ಯಾ ಆನಿಂ ತಿಸ್ರ್ಯಾ ಝುಜಾ ತಾರ್‍ವಾಂರ್ ಥೊಡ್ಯೊ ಮಿಸೈಲ್ ಜಮೊ ದವರ್ಲ್ಯೊ. ಹ್ಯಾ ಸಗ್ಳ್ಯಾ ಮಾಂಡವಾಳೆಕ್ ಉಪ್ಯೋಕ್ ಕೆಲ್ಲೆಂ ತಂತ್ರಜ್ನಾನ್ Aegis Ballestic Missile Defence System. ಹೆಂ ನಾಂವ್ ಖಂಡಿತ್ ತುಮಿ ಆಯ್ಕಾಲಾಂ ಜಾಂವ್ಕ್ ಪುರೊ. ವೈರಿ ದೇಶಾಚಿ ಬ್ಯಾಲಿಸ್ಟಿಕ್ ಮಿಸೈಲ್ ವಾಟೆರ್‌ಚ್ ನಾಸ್ ಕರ್ಚೆಂ ಅಮೆರಿಕಾಚೆಂ ಮಹತ್ವಾಕಾಂಕ್ಷ್ ಯೋಜಿತ್ ಕಾರ್ಯಕ್ರಮ್ ತೆಂ. ಗೆಲೆತ್ಯಾ ಥೊಡ್ಯಾ ವರ್ಸಾನಿಂ ಹ್ಯಾ ಖಾತಿರ್ ಅಮೆರಿಕಾ ಸಬಾರ್ ಪ್ರಯೋಗ್ ಕರ್ನ್ ಆಸಾ. ಹೆಂಚ್ ತಂತ್ರಜ್ನಾನ್ ಇಲ್ಲೆಶೆಂ ರೂಪಾಂತರ್ ಕರ್ನ್ ತಾಣಿಂ ಉಪಗ್ರಹ್ ಮಾರುಂಕ್ ಮಿಸೈಲ್ ತಯಾರ್ ಕೆಲ್ಲಿ...!!
ಆಶೆಂ ಹ್ಯಾ ತಾರ್‍ವಾರ್ Spy-1 ಮುಳ್ಳೆಂ ರಾಡಾರ್ ಆಸ್‌ಲ್ಲೆಂ. ತಾಂತು ಚಾರ್ ಆಂಟೆನಾ ಆಸ್‌ಲ್ಯಾನ್ ಸಗ್ಳ್ಯಾ 360 ಡಿಗ್ರಿ ವ್ಯಾಪ್ತ್ ಆವರಣ್ ಜಾವ್ನ್ ಆಸ್‌ಲ್ಲಿ. ಹಿಂ ರಾಡಾರಾಂ ಆನಿಂ ತಾಂತ್ಲಿಂ ಕಂಪ್ಯೂಟರಾಂ ಉಪ್ಯೋಗ್ ಕರ್ನ್ ಉಪಗ್ರಹಾಚೆಂ ಜುಸ್ತ್ ಸ್ಥಾನ್ ಲೇಕ್ ಕರುಂಕ್ ಜಾತಲೆಂ. ತೆಂ ಉಪಗ್ರಹ್ 247 ಕಿ.ಮೀ ವಯ್ರ್ ಘಂಟ್ಯಾಕ್ 28,000 ವೇಗಾಂತ್ ಘುಂವೊನ್ ಆಸ್‌ಲ್ಲೆಂ. ಇತ್ಲೊ ವಿವರ್ ಮೆಳ್ಯಾ ಉಪ್ರಾಂತ್ ತಾಂತ್ಲ್ಯಾ ಏಕಾ ತಾರ್‍ವಾಂತ್ ಆಸ್‌ಲ್ಲಿ ಚಾರ್ ಹಂತಾಚಿ SM-3 ಮಿಸೈಲ್ ಉಬ್ಲಿ. ಪಯ್ಣಾ ಮದೆಂ ತ್ಯಾ ಮಿಸೈಲಾಕ್ ಹ್ಯಾ ಝುಜಾ ತಾರ್‍ವಾಂ ಸಾಂಗಾತಾ GPS ಉಪಗ್ರಹಾಂ ಥಾವ್ನ್‌ಯೀ USA -193 ಉಪಗ್ರಹಾಚಿ ನಿರಂತರ್ ಮಾಹೆತ್ ಆನಿಂ ಮಾರ್ಗದರ್ಷನ್ ಮೆಳೊನ್ ಆಸ್‌ಲ್ಲೆಂ. ಹ್ಯಾ ಮಿಸೈಲಾಚೆ ತೀನ್ ಹಂತ್ ವಿವಿಧ್ ವೆಳಾರ್ ನಿಕಾಳ್ಯಾ ಉಪ್ರಾಂತ್ ಅಂತಿಮ್ ಹಂತಾರ್ ಆಸ್ಚೊ ವಿಶೇಷ್ ಭಾಗ್ ಉಪಗ್ರಹಾಕ್ ಸೊದುನ್ ಗೆಲೊ. ತಾಂತ್ಲಿ ಸೆನ್ಸಾರಾಂ ಪಯ್ಲೆಂಚ್ ಪ್ರೋಗ್ರಾಮ್ ಕೆಲ್ಯಾನ್ ತೊ ಭಾಗ್ ವಚುನ್ ಜುಸ್ತ್ ಇಂಧನ್ ಟ್ಯಾಂಕಿಕ್ ಅಪ್ಟಾಲ್ಲೊ ತಿತ್ಲೆಂಚ್, ಏಕ್ ವಡ್ಲ್ಯಾ ಉಜ್ಯಾಚೊ ಗುಡೊ ಉಬ್ಜಲ್ಲೊ ದಿಸೊನ್ ಆಯ್ಲೊ. ತಿತ್ಲ್ಯಾರ್ ತೆಂ ಉಪಗ್ರಹ್ ಪಿಟೊ ಜಾಲ್ಲೆಂ ಖರೆಂ ಪುಣ್ ತ್ಯಾ ಇಂಧನಾಚಿ ಟ್ಯಾಂಕ್ ಕಿತೆಂ ಜಾಲ್ಯಾ ಮ್ಹುಣ್ ವಿವರ್ ಯೆದೊಳ್ ಮ್ಹುಣಾಸರ್ ಯೇವ್ನಾ.
ಅಸೊ ಉಪಗ್ರಹ್ ಮ್ಹುಣಿ ನಾಸ್ ಜಾಲೊ. ಪುಣ್ ಅಮೆರಿಕಾನ್ ಏಕಚ್ ಫಾತ್ರಾಕ್ ದೋನ್ ಸುಕ್ಣಿಂ ಮಾರ್‍ಲಿಂಗೀ ? ಅಸಲೊ ಏಕ್ ದುಬಾವ್ ದಿಸೊನ್ ಯೆತಾ. ಗೆಲೆತ್ಯಾ ವರ್ಸಾ ಚೈನಾನ್ ಮೊಳ್ಬಾರ್ ಅಸಲ್ಲೊ ಏಕ್ ಪ್ರಯೋಗ್ ಕೆಲ್ಯಾ ಉಪ್ರಾಂತ್ ಅಮೆರಿಕಾ ಖುಬಾಳ್ಳೆಂ ಫಟ್ ನ್ಹಂಯ್. ಚಿಣ್ಕಾರಾಂ ಬರಿಂ ತಾಣಿಂಯೀ ತಸಲೊ ಪ್ರಯೋಗ್ ಕೆಲ್ಯಾರ್ ಜಾಗಾತೀಕ್ ಮಟ್ಟಾರ್ ಠಿಕಾ ಆಯ್ಕಾಜೆ ಪಡ್ತೆ ಆಸ್‌ಲ್ಲಿ. ಮೊಳ್ಬಾಹಾತೆರಾಂಚೊ ಸ್ಪರ್ಧ್ಯಾಕ್ ಕಾರಣ್ ಜಾಲಾಂ ಮ್ಹುಣ್ ದುರ್ಸೊವ್ಣಿ ಅಯ್ಕಾಜೆ ಆಸ್‌ಲ್ಲೆಂ . ಪುಣ್ ಅಮೆರಿಕಾಕ್ ಏಕ್ ಬರೊ ಅವ್ಕಾಸ್ ಮೆಳ್ಳೊ ..! ಪಿಡೆಸ್ತಾಕ್ ಜಾಯ್ಜೆ ಆಸ್‌ಲ್ಲೆಂಯೀ ದೂದ್, ದಾಕ್ತೆರಾನ್ ಪಿಯೊಂಕ್ ಸಾಂಗ್ಲೆಂಯೀ ದೂದ್‌ಚ್.. ಮ್ಹುಳ್ಯಾ ಬರಿ ಜಾಲೆಂ. ಹ್ಯಾ ಚಿಣ್ಕಾರಾನಿಂ 800 ಕಿ.ಮೀ ವಯ್ಲ್ಯಾ ವಗೆಚ್ ಆಸ್‌ಲ್ಯಾ ಉಪಗ್ರಹಾಕ್ ಪಿಟೊ ಕೆಲ್ಲೆ ಕುಡ್ಕೆ ಸಬಾರ್ ವರ್ಸಾಂ ಥಂಯ್‌ಚ್ ಆಸ್ತೆಲೆ. ಪುಣ್ ಅಮೆರಿಕಾಚಾ ಉಪಗ್ರಹಾಚೆ ಕುಡ್ಕೆ ಪುರಾ ದೋನ್ ಹಪ್ತ್ಯಾ ಭಿತರ್ ಭುಂಯ್ಕ್ ಪಾಟಿಂ ಯೆತಾಲೆ. ಆಶೆಂ ಮೊಳ್ಬಾರ್ ಕೋಯ್ರ್ ಘಾಲ ಮ್ಹುಣ್ ಅಮೇರಿಕಾಚಾ ಮಾಂಡ್ಯರ್ ಗುಗ್ ಬಸಂವ್ಕ್ ಜಾಯ್ನಾ. ಹ್ಯಾ ಪ್ರಯೋಗಚೊ ಉದ್ಡೇಶ್‌ಯೀ ಸವಾಲ್ ಕರುಂಕ್ ಕೊಣ್ಣಾಯ್ಕಿ ಜಾಯ್ನಾ..... ಹಾಚೆ ಸಾಂಗಾತಾ ಭುಂಯ್ಕ್ ಮ್ಹುಣೊನ್ ವಿನ್ಯಾಸ್ ಕೆಲ್ಲೆಂ ಬ್ಯಾಲೆಸ್ಟಿಕ್ ಮಿಸೈಲ್ ನಿರೋಧಕ್ ತಂತ್ರಜ್ನಾನ್ ಅಂತ್ರಾಳಾಚ್ ಉಪ್ಯೋಗಾಕ್ ರೂಪಾಂತರ್ ಕರುಂಕ್ ಕೆಲ್ಲೊ ಪಯ್ಲೊ ಪ್ರಯೋಗ್‌ಯೀ ಯಶಸ್ವಿ.....!!!
ಪುಣ್ ಮಿಲಿಯಾನ್ ಡಾಲಾರ್ ಸವಾಲ್ ಉರ್‍ಲಾಂ. ಬ್ಯಾಲೆಸ್ಟಿಕ್ ಮಿಸೈಲ್ ನಿರೋಧಕ್ ತಂತ್ರಜ್ನಾನ್ ಭುಂಯ್ಕ್ ಮ್ಹುಣೊನ್ ವಿನ್ಯಾಸ್ ಕೆಲ್ಲೆಂ ಅಂತ್ರಾಳಾಚ್ ಉಪ್ಯೋಗಾಕ್ ರೂಪಾಂತರ್ ಕರ್ತಾನಾ ಉಣ್ಯಾರ್ ಉಣೆಂ ಮ್ಹುಳ್ಯಾರ್ ಲೊಂಚಿಗ್ ಸಿಸ್ಟಮಾ ಥಾವ್ನ್ ಅಂತಿಮ್ ಭಾಗಚಾ ಸೆನ್ಸಾರಾ ಮ್ಹುಣಾಸರ್ ಬರಯ್ಲೆಮ್ ಸಾಪ್ಟ್‌ವೇರ್ ಮ್ಹುಣ್‌ಯೀ ರೂಪಾಂತರ್ ಕರಿಜೆ ಪಡ್ತಾ. ಆಶೆಂ ಕರಿಜೆ ಜಾಲ್ಯಾರ್ ಸಗ್ಳೊ ಕೋಡ್‌ಚ್ ಪರ್ತ್ಯಾಕೀ ಬರವ್ನ್ ಟೆಸ್ಟ್ ಕರಿಜೆ ಪಡ್ತಾ. ಉಣೆಂ ಮ್ಹುಳ್ಯಾರೀ ಹಾಕಾ ದೋನ್ - ತೀನ್ ಮಯ್ನೆ ಜಾಯ್ಜೆ. ಪುಣ್ ಅಮೆರಿಕಾಕ್ ಫಕತ್ ದಾ ದಿಸಾನಿಂ ಹೆಂ ಕಶೆಂ ಕೆಲೆಂ ? ಯಾ ತಾಣಿಂ ಸಬಾರ್ ಮಯ್ನಾ ಪಯ್ಲೆಂಚ್ ಹಾಚಿ ತಯರಾಯ್ ಆರಂಭ್ ಕೆಲ್ಲಿ.....!!! ? ಚೈನಾನ್ ಆನಿಂ ರಶಿಯಾನ್ ಹ್ಯಾ ಪ್ರಯೋಗಾ ವಿಶಿಂ ಸವಾಲ್ ಕೆಲ್ಲೆಂ ಯೆದೊಳ್ ಮ್ಹುಣಾಸರ್ ಕೋಣ್‌ಯೀ ಆಯ್ಕೊಂಚೆ ಸ್ಥಿತೆರ್ ನಾಂತ್. BCCI ನ್ Yes ಮ್ಹುಳ್ಯಾರ್ ತೆಂ NO ಮ್ಹುಣೊಂಕ್ ಕ್ರಿಕೆಟ್ ಆಸ್ಟ್ರೇಲಿಯಾ ಸೊಡ್ ICC ಕೀ ಜಾತಾವೇ ? ತಿಚ್ ಗತ್ ಚಿಣ್ಕಾರಾಂಚಿ ಜಾಲ್ಯಾ....!!!!
**************************************
- ಪ್ರಮೋದ್ ಜೆ. ರಾಡ್ರಿಗ್ಸ್, ಹೊಸ್ಪೆಟ್
pramrods@gmail.com
