ಆಜ್ ಇನ್ಪೊಸಿಸ್ ಮ್ಹುಳ್ಳೆಂ ನಾಂವ್ ಕೊಣಾಕ್ ಖಳಿತ್ ನಾ ? ಜುಲೈ 2, 1981 ಂತ್ ಪುಣೆಂತ್ ನಾರಾಯಾಣ ಮೂರ್ತಿನ್ ದಾ ಹಜಾರ್ ರೂಪ್ಯಾಂಕ್ ಆಪ್ಲ್ಯಾ ಬಾಯ್ಲೆಚೆಂ ಭಾಂಗಾರ್ ಅಡವ್ ದವರ್ನ್ ನಂದನ್ ನಿಲೇಕಣಿ, ಕ್ರಿಸ್ ಗೋಪಲ್‌ಕ್ರಷ್ಣನ್, ಆನಿಂ ಹೆರ್ ತೆಗಾಮ್ ಜಣಾಂಕ್ ಗೆವ್ನ್ ಆರಂಭ್ ಕೆಲ್ಲೊ ಸಂಸ್ಥೊ ಇತ್ಲೊ ವ್ಹಡ್ ಜಾತಾ ಮ್ಹುಣ್ ಕೊಣೆಂ ಚಿಂತ್‌ಲ್ಲೆಂ? ತ್ಯಾ ಇನ್ಪೊಸಿಸಾಚಿಂ ಆಜ್ ಬೆಂಗ್ಳೂರ್, ಮಂಗ್ಳೂರ್, ಪುಣೆ..ಕೆಂದ್ರ್ ಸೊಡ್ಯಾಂ ಸಂಸಾರಾಚಾ 22 ದೇಶಾನಿಂ ತಾಂಚಿಂ ಕೇಂದ್ರಾ ಆಸಾತ್.ಸುಮಾರ್ ಏಕ್ ಲಾಕಾಚಾಕೀ ಚಡ್ ಲೋಕ್ ತ್ಯಾ ಕಂಪೆನಿಂತ್ ಕಾಮ್ ಕರ್ನ್ ಆಸಾ. ಗೆಲೆತ್ಯಾ ವರ್ಸಾ ತಾಂಕಾಂ 1.16 ಬಿಲಿಯಾನ್ ಅಮೆರಿಕಾನ್ ಡಾಲಾರಾಚೊ ಲಾಬ್ ಮೆಳ್ಳಾ. ಹ್ಯಾಚ್ ಎಪ್ರಿಲಾಂತ್ ಫೊರ್ಬ್ಸ್ ಮ್ಯಾಗಜಿನಾನ್ ಇನ್ಪೊಸಿಸಾಕ್ ಸಂಸರಾಂತ್ಲ್ಯಾ 5 ಶ್ರೇಷ್ಟ್ ಸಾಪ್ಟ್‌ವೇರ್ ಕಂಪೆನಿಂತ್ ಏಕ್ ಮ್ಹುಣ್ ರೇಟಿಂಗ್ ದಿಲಾಂ. ಆಶೆಂ ಇನ್ಪೊಸಿಸ್ ವಾಡೊನ್ಂಚ್ ಆಸಾ.
ಕಂಪೆನಿ ವಾಡೊನ್ ಯೆತಾನಾ, ವಾವ್ರಾಡಿಯೀ ಚಡೊನ್ ಯೆತಾತ್. ಹ್ಯಾಚ್ ಖಾತಿರ್ ವಾವ್ರಾಡ್ಯಾಂಕ್ ತರ್ಭೇತ್ ದಿಂವ್ಚೆಂ ತಾಂಚೆ ಮೈಸೂರ್‍ಚಾ ಗ್ಲೊಬಲ್ ಎಜುಕೆಷನ್ ಸೆಂಟರಾಚೆಂ ವಿಸ಼ರಣ್ ಕೆಲ್ಲೆಂ ತಾಣಿ. ಹ್ಯಾಚ್ ಸಪ್ತೆಂಬರಾಚಾ 15 ತಾರಿಕೆರ್ ಸೋನಿಯಾ ಗಾಂದಿನ್ ಹ್ಯಾ ಕೆಂದ್ರಾಚೊ ದುಸ್ರೊ ಭಾಗ್ ಉಗ್ತಾವಣ್ ಕೆಲ್ಲೊ. ಆಶೆಂ ಹೆಂ ಸಂಸರಾಚೆಂ ವಡ್ಲೆಂ ಕಾರ್ಪೊರೆಟ್ ತರ್ಭೆತಿ ಕೇಂದ್ರ್ ಮ್ಹುಳ್ಯಾ ಖ್ಯಾತೆಕ್ ಪಾವ್ಲೆಂ. 337 ಎಕ್ರ್ಯಾ ಸುವಾತೆರ್ ಆಸ್ಚ್ಯಾ ಹ್ಯಾ ಕೇಂದ್ರಾಂತ್ ಏಕ್ ಪಾವ್ಟಿಂ 23,500 ಜಣಾಂಕ್ ತರ್ಭೆತ್ ಕರ್‍ಯೇತ್ ಖಂಯ್. ಹ್ಯಾ ಖಾತಿರ್ ಕರ್ಚಲ್ಲೊ ಐವಾಜ್ ಫಕತ್ 2055 ಕೊರೊಡ್ ಮಾತ್ರ್..!! ಹಾಂಗಾ ಅಮೆರಿಕಾ, ಯೂಕೆ, ಆಸ್ಟ್ರೇಲಿಯಾ, ಮಲೇಶಿಯಾ, ಚೈನಾ.. ತಸಲ್ಯಾ ದೇಶಾಂಚಾ ಇನ್ಪೊಸಿಸ್ ವಾವ್ರಾಡ್ಯಾಂಕ್‌ಯೀ ತರ್ಭೆತ್ ಕರ್ತಾರ್. ಸಂಸರಾಂತ್ಲ್ಯಾ ಬೋವ್ ಉತ್ತೀಮ್ ತರ್ಭೆತ್‌ದಾರ್ ಹಾಂಗಾ ವಾವ್ರ್ ಕರ್ನ್ ಆಸಾತ್.
