ನಾಸಾಚಾ ೨೦೨೦ ಚಂದ್ರ್ ಮಿಸಾಂವಾಕೀ ಆನಿ ತಾಂಚಾ ಸತ್ತರಾವ್ಯಾ ದಾಕ್ಟ್ಯಾಚಾ ಚಂದ್ರ್ ಮಿಸಾಂವಾಕೀ ಮಸ್ತ್ ಫರಕ್ ಆಸ್ತಲೊ. ವಿಭಿನ್ನ್ ಕಾರಣಾಯೀಂ ಆಸ್ತಾಲಿಂ. ಚಾಳಿಸ್ ವರ್ಸಾಂ ಪಯ್ಲೆಂ ಮನಿಸ್ ಚಂದ್ರಾಕ್ ಪಾವೊಂಕ್ ಅಮೆರಿಕಾ ಆನಿಂ ಸೊವಿಯಾತಾ ಮದೆಂ ಆಸ್‌ಲ್ಲೆಂ ಥಂಡ್ ಝುಜ್‌ಚ್ ಕಾರಾಣ್ ಜಾಲ್ಲೆಂ. ಚಂದ್ರಾರ್ ಸಂಸೋಧ್ ಚಲಂವ್ಚಾಕೀ ಚಡ್ ಥಂಯ್ ಪಾಯ್ ದವರ್ಚೊಚ್ ಏಕ್ ಪ್ರತಿಷ್ಟೆಚೊ ವಿಷಯ್ ಜಾವ್ನ್ ಆಸ್‌ಲ್ಲೊ. ಆಮ್ಚಾ ಆತಾಂಚಾ ಮೊಬೈಲ್ ಫೊನಾಂಚಾಕೀ ಮಸ್ತ್ ಉಣೆ ಪ್ರಾಸೆಸಿಂಗ್ ಸ್ಫೀಡ್ ಆಸ್ಚಾ ಕಂಪ್ಯೂಟಾರಾಂಚಾ ಕಾಳಾರ್ ಅಮೆರಿಕಾನ್ ಮನ್ಶ್ಯಾಕ್ ಚಂದ್ರಾಕ್ ದಾಡ್ತಾನಾ ಪಯ್ಸ್ಯಾಂಚೆ ತೋಂಡ್ ಪಳೆಂವ್ಕ್ ನಾತ್‌ಲ್ಲೆಂ. ೧೯೬೯ಂತ್ ಪಯ್ಲೆ ಪಾವ್ಟಿ ಚಂದ್ರಾಕ್ ದೆವ್‌ಲ್ಲೆ ಆರ್ಮ್‌ಸ್ರಾಂಗ್ ಆನಿಂ ಆಲ್ಡ್ರೀನ್ ತ್ಯಾ ಧರ್ಣೆರ್ ಫಕತ್ ದೇಡ್ ಗಂಟೆ ಆಸ್‌ಲ್ಲೆ. ೧೯೭೨ ಂತ್ ನಿಮಾಣೆ ಪಾವ್ಟಿಂ ಚಂದ್ರಾಕ್ ಭೆಟ್ ದಿಲ್ಯಾ ಸರ್ನನ್ ಆನಿಂ ಹ್ಯಾರಿಸಾನಾನ್ ೩೩ ಗಂಟೆ ಥಂಯ್ ರಾವ್‌ಲ್ಲೊಚ್ ಯೆದೊಳ್‌ಚೊ ವಡ್ಲೊ ದಾಕ್ಲೊ. ಪುಣ್ ಪುಡ್ಲೆ ಪಾವ್ಟಿಂ ಮನ್ಶ್ಯಾಕ್ ಚಂದ್ರಾಕ್ ದಾಡ್ತಾನಾ ಥಂಯ್ ಗಂಟ್ಯಾನಿಂ ರಾವೊಂಕ್ ನಾಸಾಕ್ ಭಿಲ್ಕುಲ್ ಮನ್ ನಾ. ಕಿತೆಂ ಜಾಲ್ಯಾರೀ ಮಹಿನ್ಯಾಗಟ್ಲ್ಯಾನ್ ಪುಣಿ ಮನ್ಶ್ಯಾಕ್ ಥಂಯ್ ರಾವಾಂವ್ಚಿ ಅಲೋಚಾನ್ ತಾಂಚಿ...!!. ಹ್ಯಾ ಖಾತಿರ್ ಚಂದ್ರಾರ್ ಏಕ್ ಶಾಸ್ವಿತ್ ಥಳ್ ಭಾಂದುಂಕ್ ಚಿಂತ್ಲಾಂ ತಾಣಿ.....!!
ಆಶೆಂ ಚಂದ್ರಾರ್ ಏಕ್ ಥಳ್ ಬಾಂದ್ಲ್ಯಾರ್ ಸಬಾರ್ ಲಾಬ್ ಆಸಾತ್. ಸುರ್ಯಾ-ಮಂಡಳಾಚಾ ದುಸ್ರ್ಯಾಂ ಗ್ರಹಾಂಕ್ ವಚೊಂಕ್ ಚಂದ್ರ್ ಏಕ್ ಪಯ್ಲೆಂ ಮೇಟ್ ಜಾವ್ನ್ ಉಪ್ಯೋಗ್ ಕೆಲ್ಯಾರ್ ಸಬಾರ್ ಫಾಯ್ದೆ ಆಸಾತ್. ಚಂದ್ರಾಚಿ ಗುರುತ್ವಾಕರ್ಷನ್ ಸಕತ್ ಭುಂಯ್ಚಾಕೀ ೧/೬ ಅಸ್‌ಲ್ಲ್ಯಾನ್ ದಾಕ್ಟಿಂ ರಾಕೆಟಾಂ ವಾಪರ್‍ನ್ ದುಸ್ರ್ಯಾಂ ಗ್ರಹಾಂಕ್ ಪಯ್ಣ್ ಕರ್ಯೇತ್. ಆಶೆಂ ಸಬಾರ್ ರಾಕೆಟ್ ಇಂಧನಾಚೊ ವಿಭಾಡ್ ಉಣೆಂ ಜಾವ್ನ್ ಮಸ್ತ್ ಖರ್ಚ್ ಉರವ್ಯೇತ್ . ಇತ್ಲೆಂಚ್ ನ್ಹಂಯ್ ಚಂದ್ರಾಕ್ ವಾತವರಣ್ ನಾತ್‌ಲ್ಲ್ಯಾ ವರ್ವಿಂ ಥಂಯ್ ಥಾವ್ನ್ ಮೊಳಾಬ್ ಆನಿಂ ಆಂತ್ರಾಳ್ ಕೂಡಿ ಸ್ಪಷ್ಟ್ ದಿಸ್ತಾತ್. ತಶೆಂ ಜಾಲ್ಲ್ಯಾನ್ ಭೂಂಯ್ ಥಾವ್ನ್ ಕರುಂಕ್ ಜಾಯ್ನಾತ್ಲೆ ಸಂಸೋಧ್ ಚಂದ್ರಾ ಥಾವ್ನ್ ಕರ್ಯೇತ್.
ಪುಣ್ ಚಂದ್ರಾರ್ ಏಕ್ ಥಳ್ ಬಾಂದ್ಚೆಂ ತಿತ್ಲೆಂ ಸಲಿಸ್ ನ್ಹಂಯ್. ಮನ್ಶ್ಯಾಕ್ ಮಹಿನ್ಯಾಗಟ್ಲ್ಯಾನ್ ಚಂದ್ರಾರ್ ರಾವಾಯ್ಜೆ ಜಾಲ್ಲ್ಯಾರ್ ಸಬಾರ್ ಪ್ರಮಾಣಾಚಾ ಉದ್ಕಾಚಿ ಆನಿಂ ಒಕ್ಸಿಜಾನಾಚಿ ಗರ್ಜ್ ಆಸಾ. ಚಂದ್ರಾರ್ ಭುಂಯ್ ಬರಿ ಉದಾಕ್ ಮೆಳಾನ. ಭುಂಯ್ ಥಾವ್ನ್ ಏಕ್ ಲೀಟರ್ ಉದಾಕ್ ಚಂದ್ರಾರ್ ವರಿಜೆ ಜಾಲ್ಲ್ಯಾರ್ ಸುಮಾರ್ ದೋನ್ ಲಾಕಾ ಥಾವ್ನ್ ಧಾ ಲಾಕ್ ರೂಪಯ್ ಮ್ಹುಣಾಸರ್ ಖರ್ಚ್ ಪಡ್ತಾ. ಪುಣ್ ಚಂದ್ರಾಚಾ ಧ್ರುವ ಪ್ರದೇಶಾಂಚಾ ಥೊಡ್ಯಾ ಜಾಗ್ಯಾನಿಂ ಉದಾಕ್, ಐಸಾ ರೂಪಾರ್ ಆಸಾ ಮ್ಹುಣ್ ವಿಗ್ಯಾನಿ ಪಾತ್ಯೇವ್ನ್ ಆಸ್‌ಲ್ಲೆ. ೧೯೯೪ ಇಸ್ವೆಂತ್ ನಾಸಾಚಾ ಕ್ಲೆಮೆಂಟೈನ್ ಮ್ಹುಳ್ಳ್ಯಾ ಚಂದ್ರ್-ತಾರ್ವಾನ್ ಚಂದ್ರಾಚಾ ದಕ್ಷಿಣ್ ದ್ರುವಾಂತ್ ಉದ್ಕಾ-ಐಸ್ ಆಸಾ ಮ್ಹುಣ್ ಹಿಶಾರೆ ದಿಲ್ಲೆ. ಪುಡೆಂ ೧೯೯೮ ಂತ್ Lunar Prospector ಮ್ಹುಳ್ಳ್ಯಾ ಚಂದ್ರ್-ತಾರ್ವಾಕೀ ಚಂದ್ರಾಚಾ ಧ್ರುವ ಪ್ರದೇಶಾಂತ್ ಐಸಾಚಿ ಲಕ್ಷಣಾಂ ದಿಸೊನ್ ಆಯ್ಲಿಂ. ಹೆಂ ಉದ್ಕಾ -ಐಸ್ ಖಂಚಾ ರುಪಾರ್ ಆಸಾ ಮ್ಹುಣ್ ಅನಿಕೀ ಸಮಾ ಕಳಿತ್ ನಾ. ಜಾಲ್ಯಾರೀ ಹೆಂ ರೂಪಾಂತರ್ ಕರ್ನ್ , ಪಿಯೆಂವ್ಚೆ ಉದಾಕ್, ಒಕ್ಸಿಜಾನ್ ತಶೆಂಚ್ ರಾಕೆಟಾ ಇಂಧನಾಕ್ ಜಾಯ್ ಜಾಲ್ಲೆಂ ಹೈಡ್ರೋಜನ್ ತಯಾರ್ ಕರ್ಯೇತ್ ಮ್ಹುಣ್ ವಿಗ್ಯಾನಿ ಪಾತ್ಯೆಲ್ಯಾತ್.
ಇತ್ಲ್ಯಾಕೀ ಹೆಂ ಉದ್ಕಾ- ಐಸ್ ಚಂದ್ರಾರ್ ಕಶೆಂ ಆಯ್ಲೆಂ.. !!? ತುಮಿಂ ರಾತಿಂ ಮೊಳ್ಬಾ ಥಾವ್ನ್ ಉಲ್ಕಾ ಪಡ್ಚೊ ಪಳೆಯ್ಲ್ಯಾ ಜಾಂವ್ಕ್ ಪುರೊ. ಹ್ಯಾ ಉಲ್ಕಾಚಾ ಕುಡ್ಕ್ಯಾಂತ್ ಉದ್ಕಾ ಐಸ್ ಆಸ್ತಾ. ಪುಣ್ ಭುಮಿಚಾ ವಾತಾವರಣಾಕ್ ಪಾವ್ತನಾ ಘರ್ಷನ್ ಉಬ್ಜೊನ್, ತೆ ಉಲ್ಕಾ ಕುಡ್ಕೆ ಭಸ್ಮ್ ಜಾತಾತ್. ಪುಣ್ ಚಂದ್ರಾರ್ ವಾತಾವರಣ್ಂಚ್ ನಾ...! ಆಶೆಂ ಚಂದ್ರಾರ್ ಬಿಲಿಯಾನ್ ವರ್ಸಾಂ ಥಾವ್ನ್ ಉಲ್ಕಾಪಾತ್ ಜಾವ್ನ್ ಥಂಯ್ ವಡ್ಲ್ಯೊ- ವಡ್ಲೊಗುಂಡಿಯೊ ಪಡ್ಲ್ಯಾತ್. ಆಶೆಂ ಚಂದ್ರಾರ್ ದರಬಸ್ತ್ ಜಾವ್ನ್ ಉದ್ಕಾ-ಐಸ್ ಯೇವ್ನ್ ಪಡ್ಲ್ಯಾರೀ, ಚಂದ್ರಾಚಾ ದಿಸಾ(ಮ್ಹುಳ್ಯಾರ್ ೨೯ ಭೂಂಯ್ಚೆ ದೀಸ್) ವೆಳಾರ್ ಸುಮಾರ್ ಶೆಂಭರ್ ಡಿಗ್ರಿಚಾಕೀ ವಚಿii ತಾಪ್ ಆಸ್ತಾ. ಇತ್ಲ್ಯಾ ಉಷ್ಣಾಂಶಾಕ್ ತೆಂ ಐಸ್ ಸಂಪೂರ್‍ಣ್ ನಾಸ್ ಜಾತಾ. ಪುಣ್ ಚಂದ್ರಾಚಾ ಧ್ರುವ ಪ್ರದೇಶಾಂಚಾ ಥೊಡ್ಯಾ ಗುಂಡ್ಯಾನಿಂ ಸುರ್ಯಾಚಿಂ ಕಿರ್‍ಣಾಂ ಪಡನಾತ್‌ಲ್ಲೆ ಥೊಡೆ ಜಾಗೆ ಆಸಾತ್. ಹ್ಯಾ ಜಾಗ್ಯಾಂಕ್ ಸಾಸ್ಣಿಕ್ ಸಾವ್ಳೆಚೆ ಜಾಗೆ (Permanently shadowed areas) ಮ್ಹುಣ್ತಾತ್. ಚಂದ್ರಾರ್ ಹ್ಯಾ ಜಾಗ್ಯಾಚಿ ವ್ಯಾಪ್ತ್ ಸುಮಾರ್ ೧೨,೫೦೦ ಸ್ವ್ಯಾರ್. ಕಿ.ಮೀ. ಮ್ಹುಣ್ ಅಂದಾಜ್. ಹ್ಯಾ ಜಾಗ್ಯಾನಿಂ ಉಷ್ಣಾಂಶ್ -೧೭೦ ಡಿಗ್ರಿ ಸೆಂಟಿಗ್ರೆಡಾಚಾಕಿ ಸಕಯ್ಲ್ ದೆವಾನಾ. ಆಶೆಂ ಉಲ್ಕಾಪಾತಾ ವರ್ವಿಂ ಹಾಂಗಾ ಜಮೊ ಜಾಲ್ಲೆಂ ನಾಸ್ ಜಾಯ್ನಾಸ್ತಾನ ಉರ್‍ಲಾಂ ಮ್ಹುಣ್ ವಿಗ್ಯಾನಿ ಪಾತ್ಯೇತಾತ್. ತ್ಯಾ ಐಸಾಚಾ ವಚಿiiಚ್ ನಾಸಾಚೊ ದೊಳೊ ಆತಾಂ.....!!!
ಹ್ಯಾ ವಿಶ್ಯಾಂತ್ ಖಚಿತ್ ಮಾಹೆತ್ ಜೊಡುಂಕ್ ಆನಿ ಸಂಸೋಧ್ ಕರುಂಕ್ ನಾಸಾನ್ ಹ್ಯಾಚ್ ಜುನಾಚಾ ೧೮ ತಾರಿಕೆರ್ Lunar CRater Observation and Sensing Satellite (LCROSS) ಮ್ಹುಳ್ಳೆಂ ಏಕ್ ತಾರುಂ ಚಂದ್ರಾಕ್ ದಾಡ್ಲಾಂ. ಹ್ಯಾ ತಾರ್ವಾಂತ್ ಆಸ್‌ಲ್ಲಿ ಏಕ್ ಮಿಸೈಲ್ ಹ್ಯಾಚ್ ಅಕ್ಟೋಬರ್ ೯ ತಾರಿಕೆರ್ ಚಂದ್ರಾಚಾ ದಕ್ಷಿಣ್ ಧ್ರುವಾಚಾ ಏಕ್ ಸಾಸ್ಣಿಕ್ ಸಾವ್ಳೆಚಾ ಜಾಗ್ಯಾರ್ ಬಳಾನ್ ವಚೊನ್ ದಾಡ್ ಗಾಲ್ತೆಲಿ. ಹ್ಯಾ ವರ್ವಿಂ ಥಂಯ್ ವಡ್ಲಿ ಏಕ್ ಗುಂಡಿ ಪಡೊನ್, ೬ ಕಿ. ಮೀ ಚಾ ಕೀ ವಚಿii ಮ್ಹುಣಾಸರ್ ಏಕ್ ಧುಂವ್ರಿಚೆಮ್ ಮೋಡ್ ಉಬ್ಜಾತಾಲೆಂ. ಹಾಚೊ ಪರಿಣಾಮ್ LCROSS ಅಧ್ಯಾಯನ್ ಕರ್ನ್ ಚಂದ್ರಾಚಾ ಉದ್ಕಾ ವಿಶ್ಯಾಂತ್ ಯೆದೊಳ್ ಮ್ಹುಣಾಸರ್ ಅಸ್ಲೆ ದುಭಾವ್ ಪರಿಹಾರ್ ಕರ್‍ತೆಲೆಂ. ..
“NASA prepares to bomb moon…” ಆಶೆಂ ಮ್ಹುಣೊನ್ ಸಂಸಾರ್ ಭರ್ ಸಬಾರ್ ಖಬ್ರೆ ಪತ್ರಾಂ ತಶೆಂಚ್ ಜಾಳಿ-ಜಾಗ್ಯಾರ್ ಹ್ಯಾ ದಿಸಾನಿ ಭರನ್ ಖಬ್ರೊ , ಕಾಣಿಯೊ ಆನಿಂ ಚರ್ಚ್ಯಾ ಚಲವ್ನ್ ಆಸಾ. ಸಬಾರ್ ಟೀಕಾಯ್ ಚಡೊನ್ ಯೆತಾತ್. ಥೊಡ್ಯಾ ವಿಗ್ಯಾನಿನಿಂ ಹ್ಯಾ ಪ್ರಯೋಗಾಕ್ ಆಕ್ಶೇಪ್ ಕೆಲಾ. ದಿಸಾನ್ -ದೀಸ್ ವಿವಾದ್ ಚಡೊನ್ ಯೆಂವ್ಚಿ ಲPಣಾಂ ದಿಸೊನ್ ಯೆತಾತ್. ಪುಣ್ ನಾಸಾ ಹ್ಯಾ ವಿಶ್ಯಾಂತ್ ವಿಚಲಿತ್ ಜಾಲ್ಯಾ ಭರಿ ದಿಸಾನಾ. ಚಂದ್ರಾಕ್ ‘ಬಾಂಬ್’ ಗಾಲ್ಚ್ಯಾ ಥೊಡ್ಯಾ ದಿಸಾಂ ಪಯ್ಲೆಂ , ಖಚಿತ್ ಜಾಗೊ ಆನಿ ವೇಳ್ ಸಾಂಗ್ತಾಂ ಮ್ಹುಣೊನ್ ನಾಸಾನ್ ಭಾಸಯ್ಲಾಂ. ಕಿತ್ಯಾಕ್ ಮ್ಹುಳ್ಯಾರ್ ಹ್ಯಾ ಪ್ರಯೋಗಾ ವರ್ವಿಂ ಚಂದ್ರಾರ್ ಉಬ್ಜಾಲ್ಲೆಂ ಧುವ್ರಿಚೆಂ ಮೋಡಾಕ್ ಟೆಲಿಸ್ಕೊಪಾ ದ್ವಾರಿಂ ಭೂಂಯ್ತ್ ಥಾವ್ನ್ ಪಳೆಂವ್ಕ್ ಜಾತಾತ್ ಖಂಯ್. ಆಶೆಂ ಸಬಾರ್ ದೇಶಾಂಚೆ ವಿಗ್ಯಾನಿಂ ತಶೆಂ ಸಂಘ್-ಸಂಸ್ಥ್ಯಾಂಕ್ ಹ್ಯಾ ಪ್ರಯೋಗಾಚೆಂ ವಿಶ್ಲೇಶಣ್ ಕರ್ಯೇತ್. ಇಂಡಿಯಾಚಾಂಕ್ ಹ್ಯಾ ಘಡಿತಾಚೆಂ ಚಡಿತ್ ಸಂಸೋದ್ ಕರುಂಕ್ ಸಾಧ್ಯ್ ಜಾತೆಲೆಂ. ಚಂದ್ರಾ ಕಕ್ಷೆರ್ ಆಸ್ಚೆಂ ಆಮ್ಚೆಂ ಚಂದ್ರಯಾನ್-೧ ಉಪಗ್ರಹ್ ಹೆಂ ಪ್ರಯೋಗ್ ಲಾಗ್ಶಿಲ್ಯಾನ್ ಪಳಯ್ತೆಲೆಂ. ...!! ಸಕ್ಕಡೀ ಸಮಾ ರಿತಿನ್ ಜಾಲ್ಯಾರ್ ಹ್ಯಾಚ್ ಅಕ್ಟೋಬರ್ ೯ ತಾರಿಕೆರ್ ಚಂದ್ರಾರ್ ‘ಬಾಂಬ್’ ಪಡ್ತೊಲೊ...” ಚಂದ್ರಾಚಾ ಉದ್ಕಾ ವಿಶ್ಯಾಂತ್ ಆಸ್‌ಲ್ಲೆ ಯೆದೊಳ್ ಮ್ಹುಣಾಸರ್ ಆಸ್‌ಲ್ಲೆ ದುಬಾವ್ ಪರಿಹಾರ್ ಜಾತೆಲೆ. ..Best of luck NASA….!!!
**************************
-ಪ್ರಮೋದ್ ಜೆ.ರಾಡ್ರಿಗ್ಸ್ , ಹೊಸ್ಪೆಟ್(RAKNNO)
pramrods@gmail.com
