ಅಂತ್ರಾಳ್ ಇತಿಹಾಸಾಂತ್ ಅನ್ಯೇಕ್ ನಾಂವ್ : ಸುನಿತಾ ವಿಲಿಯಾಮ್ಸ್ (RAKNNO)

ಗೆಲೆತ್ಯಾ ದಿಸಾನಿಂ ಇಂಡಿಯಾಚಾ ಮೀಡಿಯಾನ್ ರಜನಿಕಾಂತಾಚೆಂ ಫಿಲ್ಮ್ ಶಿವಾಜಿ-ದಿ ಬಾಸ್ ವಿಶ್ಯಾಂತ್ ವಾಳಾಯ್ಲೆಂ ವಾದಳ್ ಆಕೇರ್ ಜಾಂವ್ಕ್ ಯೆಂವ್ಚೆ ಪಯ್ಲೆಂಚ್ ಸುನಿತಾ ವಿಲಿಯಾಮ್ಸ್ ಮ್ಹುಳ್ಯಾ ಅಮೆರಿಕಾನ್-ಇಂಡಿಯಾನ್ ಅಂತ್ರಾಳ್ ಯಾತ್ರಿ ವಿಶ್ಯಾಂತ್ ಆನ್ಯೇಕ್ hype ಪ್ರಾರಂಭ್ ಕೆಲೆಂ. ಸ ಮಹಿನ್ಯಾ ಉಪ್ರಾಂತ್ , ಅಂತ್ರಾಳಾರ್ ಆಸ್ಚಾ ಇಂಟರ್‌ನ್ಯಾಶಿನಲ್ ಸ್ಪೇಸ್ ಸ್ಟೇಷನಾ (ISS) ರ್ ವಸ್ತಿ ಕರ್ನ್ ಭೂಂಯ್ಕ್ ಪಾಟಿಂ ಯೇಂವ್ಕ್ ಭಯ್ರ್ ಸರ್ಲ್ಯಾ ಸುನಿತಾ ವಿಶ್ಯಾಂತ್ CNN, BBC ತಸಲಿಂ ಇಂಟರ್‌ನ್ಯಾಶಿನಲ್ ಚಾನೆಲಾಂ decent ಜಾವ್ನ್ ವರ್ದಿ ಕರ್ನ್ ಆಸ್ತಾನಾ, ಆಮ್ಚಿಂ NDTV,CNN-IBN, ಆಜ್‌ತಕ್ ಸವೆಂ ಪ್ರಿಂಟ್ ಮೀಡಿಯಾನೀ ಹಾಕಾ ದಿಲ್ಯಾ ವಿಶೇಸ್ ಪ್ರಾಮುಖ್ಯಾತೆ ವರ್ವಿಂ, ಬಿಲಿಯಾನ್ ಲೊಕಾಚಾ ಹ್ಯಾ ರಾಷ್ಟ್ರಾನ್ ‘ಆಮ್ಚೆಂ ಚೆಡುಂ’ ಸುರಕ್ಷಿತ್ ಜಾವ್ನ್ ಪಾಟಿ೦ ಯೇಂವ್ದಿ ಮ್ಹುಣ್ ಮಾಗ್ಣೆ ಕರ್ನ್ ಆತ್ರೆಗಾನ್ ರಾಕ್‌ಲ್ಲೆಂ ವ್ಹಯ್......

ಅ೦ತ್ರಾಳಾರ್ ಅಕ್ಲಾಸ್..........!!
ವ್ಹಯ್.. ಹೆಂ ಅಟ್ಲಾಂಟಿಸ್ ಮ್ಹುಳ್ಳೆಂ ಸ್ಪೇಸ್ ಶಟಲ್(ISS) ಹ್ಯಾಚ್ ಜುನಾಚಾ 8 ತಾರಿಕೆರ್ ಸಾತ್ ಜಣಾಂ ಯಾತ್ರಿಂ ಸವೆಂ ಭೂಂಯ್ ಥಾವ್ನ್ ಭಯ್ರ್ ಸರ್ನ್ ISS ಕ್ ಭೆಟೊಂಕ್ ರಾಕ್ತಾಲೆಂ ಮಾತ್ರ್..!. ತವಳ್ ತ್ಯಾ ಶಟಲಾಚಾ ರಕ್ಷಣ್ ಕವಚಾಕ್ ಚಾರ್ ಇಂಚಾಚೊ ಏಕ್ ಲ್ಹಾನ್ ಬುರಾಕ್ ಜಾಲ್ಲೊ ದಿಸೊನ್ ಆಯ್ಲೊ. ಸುಮಾರ್ 25 ವರ್ಸಾಂ ಥಾವ್ನ್ 118 ಪಾವ್ಟಿಂ ಅಸಲ್ಯಾ ಶಟಲಾಂ ದ್ವಾರಿಂ 820 ಅಂತ್ರಾಳ್‌ಯಾತ್ರಿಂಕ್ ದಾಡ್‌ಲ್ಯಾ ಅಮೆರಿಕಾಚಾ ನಾಸಾಕ್(NASA) ವಾಸ್ತವ್ ಜಾವ್ನ್ ತೊ ಏಕ್ ವಡ್ಲೊ ವಿಷಯ್ ನ್ಹಂಯ್ ಅಸ್‌ಲ್ಲೊ. ಸಬಾರ್ ಪಾವ್ಟಿಂ ಅಸಲ್ಲಿಂ ಘಡಿತಾಂ ಘಡ್ಲ್ಯಾರೀ ನಾಸಾನ್ ನಗಣ್ಯ್ ಕೆಲ್ಲೆಂಚ್ ಚಡ್. ಪುಣ್ ಹ್ಯಾ ಪಾವ್ಟಿಂ ನಾಸಾಕ್ ಹೊ ವಿಷಯ್ ಗಂಭೀರ್ ಜಾವ್ನ್ ಕಾಣ್ಘೆಜೆ ಪಡ್ಲೊ. ಕಿತ್ಯಾಕ್ ಮ್ಹುಳ್ಯಾರ್ 2003 ಇಸ್ವೆಂತ್ ಕೊಲಂಬಿಯಾ ಮ್ಹುಳ್ಳೆಂ ಅಸಲೆಂ ಏಕ್ ಶಟಲ್ ನಾಸಾಚಾ ಹ್ಯಾಚ್ ನಾಜಾವಬ್ದಾರೆ ವರ್ವಿಂ ಭಾರತೀಯ್ ಮುಳಾಚಾ ಕಲ್ಪನಾ ಚಾವ್ಲಾ ಸಾಂಗಾತಾ ಸ ಜಣಾಂ ಯಾತ್ರಿಂ ಸವೆಂ ಅಂತ್ರಾಳಾರ್‌ಚ್ ಗೊಬೊರ್ ಜಾಲ್ಲೆ೦, ಘಡಿತ್ ಲೊಕಾಚಾ ಕಾಳ್ಜಾ ಥಾವ್ನ್ ಅನಿಕೀ ಮಾಸ್ವೊಂಕ್ ನಾತ್‌ಲ್ಲೆಂ. ತಿತ್ಲ್ಯಾಕೀ ಏಕ್ ಶಟಲ್ ಭೂಂಯ್ಕ್ ಪಾಟಿ೦ ವೆತಾನ ಜಾಂವ್ಚಾ ವಾತಾವರಣಾಚಾ ಘರ್ಷಣೆ ವರ್ವಿಂ ಉತ್ಪನ್ನ್ ಜಾಂವ್ಚ ತಾಪಾಕ್ ಏಕ್ ಸ್ಟೀಲಾಚಾ ಸ್ಟೀಲಾಕೀ ಕರ್‍ಗೊಂವ್ಚಿ ಸಕತ್ ಆಸ್ತಾ. ತಸೆ೦ ಜಾಲ್ಯಾನ್ ಹ್ಯಾ ಅಂತ್ರಾಳ್‌ಯಾತ್ರಿನಿಂ Spece Walk ಕರ್ನ್ ರಕ್ಷಣ್ ಕವಚಾಚೊ ಹೊ ಬುರಾಕ್ ಶಿಂವಾಜೆ ಪಡ್ಲೊ.
ಪುಣ್ ಅಕ್ಲಾಸ್ ತೆದೊಳ್‌ಚ್ ರಾವೊಂಕ್ ನಾತ್‌ಲ್ಲೆ. ಸುನಿತಾ ವಿಲಿಯಾಮ್ಸ್ ಆಸ್ಚಾ ISS ಂತ್, ಸಗ್ಳೆಂ ಸ್ಟೇಷನ್ಂಚ್ ನಿಯಂತ್ರಣ್ ಕರ್ಚೆ ರಶಿಯಾಚೆ ಕಂಪ್ಯೂಟಾರ್‌ಚ್ ವಿಫಲ್ ಜಾಯ್ಜೆಗೀ ?. ಪುಣ್ ದೆವಾಚಾ ದಯೆನ್ ಹಾಚೆಂ ದುರಸ್ತ್ ಸಕಾಳಾಕ್ ಜಾಲ್ಯಾನ್ ವಿಜ್ನಾನಿನಿಂ ಏಕ್ ಸಮಾಂ ಉಸ್ವಾಸ್ ಸೊಡ್ಲೊ. ಇತ್ಲ್ಯಾರ್‌ಚ್ ವಿಘ್ನಾಂ ನಿವಾರ್‍ಲ್ಯಾರ್ ವೊಡ್ನಿ ಆಸ್‌ಲ್ಲೆಂ. ಪರತ್ ISS ಥಾವ್ನ್ ಸುಟೊನ್ , ಭೂಂಯ್ಕ್ ದೆವೊಂಕ್ ಮ್ಹುಣ್ ಭಯ್ರ್ ಸರ್‍ಲ್ಯಾ ಅಟ್ಲಾಂಟಿಸಾನ್ ಹವ್ಯಾ ವೈಪರಿತ್ಯಾ ವರ್ವಿಂ ದೋನ್ ದೀಸ್ ಕಕ್ಷೆರ್‌ಚ್ ಘುಂವೊವ್ನ್ ಆಕ್ರೇಖ್ ಕೆನಡಿ ಸ್ಪೇಸ್ ಸೆಂಟಾರ ಬದ್ಲಾ, ಮೊಜಾವೆ ಮರುಭೂಂಯ್ಚಾ ಎಡ್ವರ್ಡ್ಸಾಂತ್ ಯಶಸ್ವಿ ಜಾವ್ನ್ ದೆಂವ್ತಾನಾಂಚ್ ನಾಸಾಕ್ ಏಕ್ ವಡ್ಲೆಂ ಸಮದಾನ್ ಬಗ್ಲೆಂ. ಆಶೆಂ ಸುನಿತಾ ವಿಲಿಯಾಮ್ಸ್ ಭೂಂಯ್ಕ್ , 195 ದಿಸಾ ಉಪ್ರಾಂತ್ ಪಾಂಯ್ ತೆಂಕ್ತಾನಾ ಭಾರತೀಯ್ ಕಾಳಾರ್ ಜುನಾಚಾ 23 ತಾರಿಕೆಚಿಂ 1: 19 ವೊರಾಂ. ಸತ್ತಾರವ್ಯಾ ದಾಕ್ಡ್ಯಾಂತ್‌ಚ್ ಅಪೊಲ್ಲೊ 13 ಂತ್ ಚಂದ್ರಾಕ್ ಮ್ಹುಣ್ ದಾಡ್ನ್ ವಾಟೆರ್ ಜಾಲ್ಯಾ ಆವ್ಘಡಾಂ ವರ್ವಿಂ ತೀನ್ ಲಾಕ್ ಕಿ.ಮೀ ಥಾವ್ನ್ ತೆಗಾಂ ಯಾತ್ರಿಂಕ್ ಸುರಕ್ಷಿತ್ ಪಾಟಿಂ ಹಾಡ್‌ಲ್ಯಾಚಾಕೀ, ಹ್ಯಾ ಪಾವ್ಟಿಂ ಫಕತ್ 300 ಕಿ.ಮೀ ಥಾವ್ನ್ ಅಟ್ಲಾಂಟಿಸ್ ಯಾತ್ರಿಂಕ್ ಪಾಟಿಂ ಹಾಡುಂಕ್ ನಾಸಾ tense ಜಾಲ್ಲೆಂ ಪಳೆಯ್ತಾನಾ ಅಮಿಂ ಆನಿಕೀ ಸತ್ತರಾವ್ಯಾ ದಾಕ್ಡ್ಯಾಚಾ ಸ್ಪೇಸ್ ಕಾಳಾಂತ್‌ಚ್ ಆಸಾಂವ್‌ಗೀ ಮ್ಹುಣ್ ಥೊಡ್ಯಾಂಕ್ ಅನುಮಾನ್ ಆಯ್ಲೊ ಫಟಿ ನ್ಹಂಯ್.....!!!

ಸುನಿತಾಚೆಂ ಅಂತ್ರಾಳ್ ಪಯ್ಣ್ ಆನಿಂ ದಾಕ್ಲೆ.

ಸಂಸಾರಾಚಾ ಬಾರಾ ದೆಶಾನಿಂ ಸಾಂಗಾತಾ ಮೆಳೊನ್ ಭೂಂಯ್ಚಾ ಸುಮಾರ್ 320 ಕಿ.ಮೀ ವಯ್ರ್, ಬಾಂದುನ್ ಆಸ್ಚೆಂ ಇಂಟರ್‌ನ್ಯಾಶಿನಲ್ ಸ್ಪೇಸ್ ಸ್ಟೇಷನಾ (ISS) ಮ್ಹುಳ್ಯಾ ವಡ್ಲ್ಯಾ ಆಂತ್ರಾಳ್ ಘರಾಂತ್ 2000 ಇಸ್ವೆ ಥಾವ್ನ್ ಕೋಣ್ ಯಾ ಕೋಣ್ ರಾವೊನ್ಂಚ್ ಆಸಾತ್. ಹ್ಯಾ ISS ಚೆಂ ಕಾಮ್ 1998 ಂತ್ ಪ್ರಾರಂಭ್ ಕೆಲ್ಯಾರೀ ತಾಚೆಂ ಬಾಂಧಪ್ ಸಂಪೂರ್‍ಣ್ ಜಾಂವ್ಚೆಂ 2010 ಂತ್‌ಚ್. ತೆದೊಳ್ ಮ್ಹುಣಾಸರ್ ಥಂಯ್ ರಾವೊನ್ ಸಂಸೋದ್ ಆನಿಂ ಬಾಂದ್ಪಾ ಕಾರ್ಯ್ ಪೂರ್‍ಣ್ ಕರುಂಕ್ ತೇಗ್-ತೇಗ್ ಯಾತ್ರಿ ಸುಮಾರ್ ಸ ಮಹಿನೆ ಮ್ಹುಣಾಸರ್ ರಾವೊಂನ್‌ಚ್ ಆಸಾತ್. ಹ್ಯಾ ಕಾರ್ಯಾಕ್ Expedition ಮುಣ್ತಾತ್. ಯೆದೊಳ್ ಮ್ಹುಣಾಸರ್ ಅಸಲಿಂ ಪಂದ್ರಾ Expedition ಜಾಲ್ಯಾಂತ್. ಗೆಲೆತ್ಯಾ ಡಿಸೆಂಬರಾಂತ್ ತ್ಯಾ ISS ಂತ್ ಸ ಮಹಿನೆ ಫ್ಲೈಟ್ ಇಚಿಜಿನಿಯರ್ ಜಾವ್ನ್ ಕಾಮ್ ಕರ್ನ್ ಆಸ್‌ಲ್ಯಾ ಜರ್ಮನಿಚಾ ಥಾಮಾಸ್ ರೀಟೆರಾ ಬದ್ಲಾಕ್ ವಾವ್ರ್ ಕರುಂಕ್ ಮ್ಹುಣ್ ಸುನಿತಾಕ್ ತ್ಯಾ ಡಿಸೆಂಬರಾಂತ್ ಶಟಲ್ ಡಿಸ್ಕವರಿಂ ದ್ವಾರಿಂ ಪಾವಯ್ಲೆಂ. ಆಶೆಂ ಸ ಮಹಿನೆ ವಾವ್ರ್ ಕೆಲ್ಯಾ ಉಪ್ರಾಂತ್ ಹ್ಯಾ ಅಟ್ಲಾಂಟಿಸಾ ಮುಕಾಂತ್ರ್ ಪೋಯ್ರ್ ಸುನಿತಾಕ್ ಪಾಟಿಂ ಹಾಡ್ನ್ ತಿಚೆ ಬದ್ಲಾ ಅಮೆರಿಕಾಚಾ ಕ್ಲೇಟಾನ್ ಅಂಡರ್ಸಾನಾಕ್ ಪಾವಯ್ಲಾಂ.

ಹ್ಯಾ ISS ರ್ ಥಾವ್ನ್ ಸುನಿತಾನ್ ಸಬಾರ್ ದಾಕ್ಲೆ ಕೆಲ್ಯಾತ್. ಹ್ಯಾ ಅಂತ್ರಾಳ್ ಘರಾಂತ್ 195 ದೀಸ್ ರಾವೊನ್ ಅತ್ಯಧಿಕ್ ದೀಸ್ ಅಂತ್ರಾಳಾರ್ ರಾವ್‌ಲ್ಲಿ ಮಹಿಳಾ ಮುಳ್ಯಾ ಖ್ಯಾತೆಕ್ ಸುನಿತಾ ಪಾವ್ಲಾಂ. ಹಾಚೆ ಖಾತಿರ್ ಸುನಿತಾನ್ ತಾಂಚಾಚ್ ದೇಶಾಚ ಶಾರೊನ್ ಲ್ಯೂಸಿಡ್ ಹಿಚೊ 188 ದಿಸಾಂಚೊ ದಾಕ್ಲೊ ಮೊಡ್ಲಾ. ಸಾಂಗಾತಾಚ್ ಚಾರ್ ಪಾವ್ಟಿಂ Spece Walk ಕೆಲ್ಲಿ ಪಯ್ಲಿ ಮಹಿಳಾ ಮ್ಹುಳ್ಳಿ ಕೀರ್ತ್‌ಯೀ ತಿಚಾ ನಾಂವಾರ್ ಆಸಾ. 29 ಗಂಟೆ 17 ಮಿನಿಟಾಂ Spece Walk ಕೆಲ್ಲೊ ತಿಚೊ ಆನ್ಯೇಕ್ ದಾಕ್ಲೊ. ಇತ್ಲೆಂಚ್ ನ್ಹಂಯ್ ISS ರ್ ಅಪ್ಲ್ಯಾ ವಸ್ತೆ ವೆಳಾರ್ ತಿಣೆ ಕೆಲ್ಯಾ ಬೌತ್ ವಿಜ್ನಾನ್ , ಜೈವಿಕ್ ವಿಜ್ನಾನ್, ಭೂಂಯ್ ವಿPಣೆಚಿಂ ಪ್ರಯೊಗಾಂ..... ವಿಜ್ನಾನಿಂಕ್ ಭಾರಿ ಉಪ್ಯೋಗ್ ಪಡ್ಲ್ಯಾಂತ್.

ಭಾರತೀಯ್ ಮೂಳ್ .....!!

ಸುನಿತಾಚೊ ಬಾಪಯ್ ಡಾ. ದೀಪಕ್ ಪಾಂಡ್ಯಾ ಇಂಡಿಯಾಚಾ ಗುಜ್ರಾತಾಚೊ. ಅಮೇರಿಕಾಂತ್ settle ಜಾಲ್ಲೊ ವಡ್ಲೊ ನ್ಯೂರೋ ಆನಾಟಮಿಸ್ಟ್ ತೊ. ಆವಯ್ ಇಟಲಿ ಆನಿಂ ಆಸ್ಟ್ರೀಯಾಕ್ ಲಾಗೊನ್ ಆಸ್ಚಾ ಸ್ಲೊವೆನೀಯಾ ಮ್ಹುಳ್ಯಾ ದೇಶಾಚಿ. ಸುನಿತಾಚೊ ಪತಿ ಮೈಕೆಲ್ ವಿಲಿಯಾಮ್ಸ್. ತೆಂ ಜಲ್ಮಾಲ್ಲೆಂ ಸಪ್ತೆಂಬರ್ 19, 1965 ಂತ್, ಅಮೇರಿಕಾಚಾ ಓಹಿಮೊ ಂತ್ಲ್ಯಾ ಯುಕ್ಲಿಡ್ ಮ್ಹುಳ್ಯಾ ಪ್ರಾಂತ್ಯಾಂತ್. ತಿಣೆ ಯು.ಎಸ್. ನೆವಾಲ್ ಅಕೆಡಾಮಿಚಿತ್ ಬೌತ್ ವಿಜ್ನಾನಾಂತ್ B S ಆನಿಂ ಫ್ಲಾರಿಡಾ ಇನ್ಸ್ಟಿಟ್ಯೂಟ್ ಆಫ್ ಟೆಕ್ನೊಲಾಜಿಂತ್ M S ಶಿಕ್ಲಾಂ. ಸುನಿತಾಕ್ ಲ್ಹಾನ್ ಆಸ್ತಾನಾಂಚ್ ಜೆಟ್ ವಿಮಾನಾಂ ಚಲಂವ್ಚಿ ಆಶಾ ಆಸ್‌ಲ್ಲಿ . ಪ್ಯಣ್ ತಾಕಾ ಮೆಳ್ಳಿಂ ಹೆಲಿಕಾಪ್ಟಾರಾಂ ಮಾತ್ರ್.....!!. ಪಯ್ಲ್ಯಾ ಗಲ್ಫ್ ಝುಜಾ ವೆಳಾರ್ ತಿಣೆಂ ಯು.ಎಸ್. ನೆವಿ ಖಾತಿರ್ ಹೆಲಿಕಾಪಾರಾಂ ಚಲಯ್ಲಿಂ. “ತುವೆಂ ಖಂಚೆಂ ಕಾಮ್ ಕೆಲ್ಯಾರೀ ತೆಂ ಬರೆಂ ಆನಿಂ ಅರ್ಪಣ್ ಮನೋಬಾವಚಿತ್ ಕೆಲ್ಯಾರ್ ವಡ್ಲಿ ಯಶಸ್ವಿ ಮೆಳ್ತಾ” ಮ್ಹುಣ್ ಪಾತ್ಯೆಲ್ಯಾ ಸುನಿತಾಕ್ 1998 ಂತ್ ನಾಸಾಕ್ ಸೆರ್ವೊಂಚೊ ಆವ್ಕಾಸ್ ಮೆಳ್ಳೊ. ಉಪ್ರಾಂತ್ ತಿಣೆ ಕೆಲ್ಲೊ ಸಹಾಸ್ ಅತಾಂ ಇತಿಹಾಸ್.....!!

ಸುನಿತಾ ಆನಿಂ ಕಲ್ಪನಾ ಹ್ಯಾ ದೊಗಾಯೀಂ ಚೆಡ್ವಾ ಭುರ್ಗ್ಯಾನಿಂ ಇಂಡಿಯಾಚೆಂ ನಾಂವ್ ಅಂತರಾಷ್ಟ್ರೀಯ್ ಮಟ್ಟಾರ್ ಉಬಾರ್ಲೆಂ ತಿತ್ಲೆಂಚ್ ನ್ಹಂಯ್ ಸಬಾರ್ ಆಮ್ಚ್ಯಾ ಯುವಜಣಾಂಕ್ ಪ್ರೇರಾಣ್ ಜಾವ್ನ್ ಪಾವ್ಲ್ಯಾಂತ್. ಹ್ಯಾ ದೊಗಾಂಯ್ಚೆಂ ವಿಶ್ಲೇಷಣ್ ಕರ್‍ತಾನಾ, ಹರಿಯಾಣಾಚಾ ಏಕಾ ಹಳ್ಳೆಂತ್ ವಾಡೊನ್, ಥಂಯ್‌ಚ್ ಶಿಕೊನ್ ನಾಸಾಕ್ ಸೆರ್ವಾಲ್ಲೆಂ ಕಲ್ಪನಾ ಚಾವ್ಲಾ ಇಲ್ಲೆಂ great ದಿಸ್ತಾ. ಪುಣ್ ಯೆದೊಳ್ ಮ್ಹುಣಾಸರ್ “I’m proud American” ಮ್ಹುಣ್ ಇಂಡಿಯಾಚೆಂ ಮೂಳ್ ಒಪ್ಪೊಂಕ್ ನಾತ್ಲ್ಯಾರೀ , ಇಂಡಿಯಾಚಾ ಲೊಕಾರ್ ತಾಚೆರ್ ಹೆಮ್ಮೆ ಆಸಾ ಆನಿಂ ತೆಂ ಆಸಾಜೆ. ಹಾಂತುಂ ಕಾಂಯ್ ಗೊಂದೊಳ್ ನಾಂ. ಪುಣ್ ಗೊಂದೊಳ್ ಆಸ್ಚೊ “ತೆಂ ಆಮ್ಚೆಂಚ್ ಚೆಡುಂ” ಮ್ಹುಣ್ಚಾ ಥೊಡೆ ಆಮ್ಚೆ so called ‘ಪರಮ್ ದೇಶ್ ಭಕ್ತ್’ ಸಂಘಟಾನಾಂಚೆರ್ ಆನಿಂ ತಾಂಚಾಂ ಅವ್ಕಾಸ್‌ವಾದ್ ‘ವಿದೇಶಿ ಮೂಳ್’ ಸಿದ್ದಾಂತಾಚೆರ್..........

************************
-ಪ್ರಮೋದ್ ರಾಡ್ರಿಗ್ಸ್ , ಹೊಸ್ಪೆಟ್ (RAKNNO)
pramrods@gmail.com


Block

ಕಾಲೆಂ ಹೆಂ ಸ್ಪೇಸ್ ಶಟಲ್ ?

ಪರತ್- ಪರತ್ ಉಪ್ಯೋಗ್ ಕರುಂಕ್ ಸಕ್ಚಾ ನಾಸಾಚಾ ಸ್ಪೇಸ್ ಶಟಲಾಕ್(Space Shuttle) ಅಧಿಕ್ರತ್ ಜಾವ್ನ್ ಸ್ಪೇಸ್ ಟ್ರಾನ್ಸ್‌ಪೋರ್‍ಟೇಶನ್ ಸಿಸ್ಟಮ್ (STS) ಮ್ಹುಣ್ ಆಪಯ್ತಾತ್. ರಾಕೆಟಾ ಬರಿ ಉಡಾವಾಣ್ ಜಾವ್ನ್, ಅಂತ್ರಾಳ್ ವಾಹಾನ ಬರಿ ಕಕ್ಷೆರ್ ಘುಂವೊನ್ ವಿಮಾನ ಬರಿ ಭೂಂಯ್ಕ್ ದೆಂವ್ಚಿ ಶಟಲಾಚಿ ವಿಶೇಷಾತ. ಹ್ಯಾ ಶಟಾಲಾಂತ್ ಏಕ್ ಪಾವ್ಟಿಂ 7 ಜಣಾಂ ಯಾತ್ರಿಂಕ್ ಪಯ್ಣ್ ಕರ್ಯೇತ್. ಹಾಂತುಂ ಮುಖ್ಯ ಜಾವ್ನ್ ತೀನ್ ಭಾಗ್ ಆಸಾತ್. ದೋನ್ ವಡ್ಲಿಂ ರಾಕೆಟ್ ಬುಸ್ಟಾರಾಂ ಏಕ್ ಬಾಹ್ಯ್ ಟ್ಯಾಂಕ್ ಆನಿಂ ಪಾಕಟೆ ಆಸ್ಚೆಂ ಏಕ್ ಆರ್ಬಿಟರ್. ಶಟಾಲ್ ಉಡಾವಣ್ ಕೆಲ್ಯಾ ದೋನ್ ಮಿನಿಟಾಂ ಉಪ್ರಾಂತ್ ಹಿಂ ಬುಸ್ಟಾರಾಂ ಟ್ಯಾಂಕಾ ಥಾವ್ನ್ ನಿಕ್ಳೊವ್ನ್ ಪ್ಯಾರಚೂಟಾ ಸಮೇತ್ ಭೂಮಿಕ್ ಪಡ್ತಾತ್. ಆಶಿಂ ಹಿಂ ಬುಸ್ಟಾರಾಂ ಪರತ್ ಉಪಯೋಗ್ಸೆತ್. ಥೊಡ್ಯಾ ವೆಳಾ ಉಪ್ರಾಂತ್ ಬಾಹ್ಯ್ ಟ್ಯಾಂಕ್ ನಿಕ್ಳಾವ್ನ್ ಪಡ್ಲ್ಯಾರೀ, ತಿ ಪರತ್ ಉಪಯೋಗ್ ಕರುಂಕ್ ಜಾಯ್ನಾ. ಉರ್‌ಲ್ಯಾ ಆರ್ಬಿಟರ್, ಅಂತ್ರಾಳ್ ಯಾತ್ರಿ ಸವೆಂ ಕಕ್ಷೆಕ್ ಪಾಂವ್ತಾ.

ಪಯ್ಲೆಂ ಶಟಾಲ್ ಕೊಲಾಂಬಿಯಾ ಉಡಾವಣ್ ಜಾಲ್ಲೆಂ 1981 ಂತ್. ಉಪ್ರಾಂತ್ ಚಾಲೆಂಜಾರ್ (1982) , ಡಿಸ್ಕವರಿ (1983), ಅಟ್ಲಾಂಟಿಸ್ (1985) ಆನಿಂ ಎ೦ಡೆವರ್ (1991) ಆಶಿಂ ಪಾಂಚ್ ಶಟಲಾಂ ಆಸಾತ್. ಚಾಲೆಂಜಾರ್ ಆನಿ ಕೊಲಂಬಿಯಾ ಅವ್ಘಡಾಕ್ ಸಂಪ್ಡವ್ನ್ ನಾಸ್ ಜಾಲ್ಯಾಂತ್. ಆಶಿಂ ತೀನ್ ಶಟಲಾಂ ಮಾತ್ರ್ ಉರ್ಲ್ಯಾಂತ್. ನಾಸಾನ್ ಹಿಂ ಶಟಲಾಂ ಉಪಗ್ರಹಂ ವರುಂಕ್, MIR, ISS ತಸಲ್ಯಾ ಸ್ಪೇಸ್ ಸ್ಟೇಷಾನಾ ಖಾತಿರೀ ಉಪಯೋಗ್ಸಿಲ್ಯಾಂತ್. 2010 ಹಿಂ ಸಕ್ಕದ್ ಶಟಲಾಂ ನಿವ್ರತ್ತ್ ಜಾತಾತ್. ಶಟಲಾಂ ಬದ್ಲಾ ನಾಸಾ ಒರಿಯಾನ್(Orion) ಮುಳ್ಳೆ೦ ಆಧುನಿಕ್ ವಾಹನ್ ತಯಾರ್ ಕರ್ನ್ ಆಸಾ..!!!!