ಅಸಲ್ಲೊ ಏಕ್ ಸಿದ್ದಾಂತ್ ಪಯ್ಲೆಂ ಪಾವ್ಟಿಂ ನಿರೂಪಣ್ ಕೆಲ್ಲೊ ಬಿಲ್ ಕ್ಯಾಸಿಂಗ್ ಮ್ಹುಳ್ಯಾ ಏಕಾ ವ್ಯಕ್ತಿನ್. ಹಾಣೆ 1974 ಇಸ್ವೆಂತ್ “ We never went to the moon: America’s thirty Billion dollar swindle” ಮ್ಹುಳ್ಳೊ ಬೂಕ್ ಬರಯ್ಲೊ. ಹೊ ಬೂಕ್ ಅಮೆರಿಕಾನ್ 1969 ಇಸ್ವೆ ಥಾವ್ನ್ 1972 ಇಸ್ವೆ ಮ್ಹುಣಾಸರ್ ಸ ಪಾವ್ಟಿಂ ಮನ್ಶ್ಯಾಕ್ ಚಂದ್ರಾರ್ ದೆವಯ್ಲ್ಯಾ ದೋನ್ ವರ್ಸಾಂ ಉಪ್ರಾಂತ್ ಪರ್ಗಟ್ ಜಾಲ್ಲೊ. ಹ್ಯಾ ಬುಕಾಂತ್ ತಾಣೆ ನಾಸಾನ್ ಚಂದ್ರಯಾನ್ ಮ್ಹುಳ್ಳೊ ನಾಟಕ್ ಕಸೊ ವ್ಯವಸ್ಥಿತ್ ಜಾವ್ನ್ ನಿರ್ಮಾಣ್ ಕೆಲ್ಲೊ ಮ್ಹುಣೊನ್ ಸವಿಸ್ತಾರ್ ರಿತಿನ್ ವಿವರ್‍ಸಿಲೆಂ. ಹೊ ಬೂಕ್ ವಾಚ್‌ಲ್ಲೆ ಸಬಾರ್ ಆಶೆಂ ಜಾಂವ್ಕೀ ಪುರೊ ಮ್ಹುಣ್ ಪಾತ್ಯೆಂವ್ಕ್ ಲಾಗ್ಲೆ. 1978 ಇಸ್ವೆಂತ್ Capricom One ಮ್ಹುಳ್ಳ್ಯಾ ಫಿಲ್ಮಾಂತ್ ಮಂಗಳಾ ಗ್ರಹಾಕ್ ಮನ್ಶ್ಯಾನ್ ಭೆಟ್ ದಿಂವ್ಚೆಂ ಕಾಲ್ಪನಿಕ್ ಘಡಿತ್ ದಾಕಯ್ಲೆಂ. ತೆಂ ಫಿಲ್ಮ್ ಪಳೆಯ್ಲ್ಯಾ ಉಪ್ರಾಂತ್ ಸಬಾರ್ ಜಣ್ ಅಪೊಲ್ಲೊ ಕಾರ್ಯಕ್ರಮ್ ಏಕ್ ವ್ಹಡ್ ಫಟ್ ಮ್ಹುಣ್ ಚಿಂತುಂಕ್ ಲಾಗ್ಲೆ. ಆಶೆಂ ಹ್ಯಾ ಚಾಳಿಸ್ ವರ್ಸಾನಿಂ Moon Hoax ಸಿದ್ದಾಂತ ವಿಶ್ಯಾಂತ್ ಸಬಾರ್ ಚರ್ಚೆ, ಲೇಖನಾಂ, ಟಿವಿ ಕಾರ್ಯಕ್ರಮಾಂ ಚಲುನ್ಂಚ್ ಆಸಾತ್. ವಾರೆಂ ನಾತ್‌ಲ್ಲ್ಯಾ ಚಂದ್ರಾರ್ ಅಮೆರಿಕಾಚೊ ಬಾವ್ಟೊ ಕಸೊ ಉಬೊನ್ ಆಸಾ ? ಚಂದ್ರಾಚಾ ಮೊಳ್ಬಾ ಥಾವ್ನ್ ನೆಕೆತ್ರಾಂ ಕಶಿಂ ದಿಸಾನಾಂತ್? ....ಅಶೆಂ ಸಬಾರ್ ಆನಿಮ್ ಸಬಾರ್ ಸವಲಾಂ ತಾಂಚೆಂ ಕಡೆನ್ ಆಸಾತ್. ನಾಸಾನ್ ಆನಿಂ ಥೊಡ್ಯಾ ಜಾಣ್ತ್ಯಾಂನಿಂ ಹ್ಯಾ ಸವಲಾಂಕ್ ಸ್ಪಷ್ಟೀಕರಣ್ ದಿಲ್ಯಾರೀ ತೆ ಪಾತ್ಯೆಂವ್ಕ್ ತಯಾರ್ ನಾಂತ್...!!
ಪುಣ್ ಅತಾಂ ಹ್ಯಾ Moon Hoax ಸಿದ್ದಾಂತ್‌ಗಾರಾಂಚಾ ಸೊಂಡಾಕ್ ಇಸ್ರೊಚಾ ಚಂದ್ರಯಾನ್-1 ತಸ್ವೀರ್‍ಯಾನಿಂ ಏಕ್ ಥಾಪಡ್ ದಿಲಾಂ. ಹ್ಯಾಚ್ ಜನವರಿಚಾ 11 ತಾರಿಕೆಚಾ ಟೈಮ್ಸ್ ಆಫ್ ಇಂಡಿಯಾಕ್ ದಿಲ್ಲ್ಯಾ ಏಕಾ ಸಂದರ್ಶನಾಂತ್ ಪಿ. ಶ್ರೀಕುಮಾರ್ ಮ್ಹುಳ್ಯಾ ಏಕಾ ಇಸ್ರೊಚಾ ವಿಗ್ಯಾನಿನ್, ಚಂದ್ರಯಾನ್-1 ಉಪಗ್ರಹಾನ್ ನಾಸಾನ್ ಮನ್ಶ್ಯಾಕ್ ದೆವಯ್ಲ್ಯಾ ಚಂದ್ರಾಚಾ ಜಾಗ್ಯಾಚೊ ತಸ್ವೀರ್ಯೊ ಕಾಡ್ಲ್ಯಾತ್ ಮ್ಹುಣೊನ್ ಬಹಿರಂಗ್ ಕರಿ ಲಾಗ್ಲೊ. ನಾಸಾನ್ ಮನ್ಶ್ಯಾಕ್ ಚಂದ್ರಾಕ್ ಸ ಪಾವ್ಟಿಂ ದೆವಯ್ಲ್ಯಾ ಸರ್ವ್ ಜಾಗ್ಯಾಂಚೊ ತಸ್ವೀರ್ಯೊ ಚಂದ್ರಯಾನ್-1 ಕಾಡ್ಲ್ಯಾತ್ ಖಂಯ್ ಆನಿಂ ಮನಿಸ್ ಥಂಯ್ ಪಾವ್ಲ ಮ್ಹುಣ್ ಸಬಾರ್ ಸಾಕ್ಷ್ಯೊ ಇಸ್ರೊಕ್ ಮೆಳ್ಯಾತ್ ಖಂಯ್. ಥೊಡ್ಯಾ ದಿಸಾಂ ಆದಿಂ ,ಚಂದ್ರಯಾನ್-1 ನ್ ಕಾಡ್‌ಲ್ಲ್ಯಾ ಅಪೊಲ್ಲೊ 15 ದೆವ್‌ಲ್ಲ್ಯಾ ಸುವಾತೆಚಿ ತಸ್ವೀರ್ ಪರ್ಗಟ್ ಜಾಲ್ಲಿ. ತಾಂತುಂ ಚಂದ್ರಯಾನಿನಿಂ ಚಂದ್ರಾಚಾ ಧರ್‍ಣೆರ್ ಪಯ್ಣ್ ಕರುಂಕ್ ವಾಪಾರ್ಲ್ಯಾ ರೋವಾರಾಚೆ ಗುರ್ತ್ ತ್ಯಾ ಮಾತ್ಯೆಂತ್ ದಿಸೊನ್ ಆಸಾತ್. ಚಂದ್ರಾಕ್ ಮನಿಸ್ ಪಾವ್ಲಾ ಮ್ಹುಣೊನ್ ಹ್ಯೊ ತಸ್ವೀರ್ಯೊ ಉತ್ತೀಮ್ ಸಾಕ್ಸ್ ದೀವ್ನ್ ಆಸಾತ್.
ಹಿ ಖಬರ್ ಆಯ್ಕೊನ್ ನಾಸಾಕ್ ಭಾರಿ ಖುಶಿ ಜಾಲ್ಯಾ ಖಂಯ್. ಏಕ್ ಸತಾಕ್ ಫಟ್ ಮ್ಹುಣೊನ್ ಥೊಡ್ಯಾ ಕಾಳಾರ್ ಥೊಡ್ಯಾಂಕ್ ಮಾಂಕೊಡ್ ಕರ್‍ಯೇತ್ ಪುಣ್ ಸರ್ವ್ ಕಾಳಾರ್ ನ್ಹಂಯ್... ಖಂಡಿತ್ ನ್ಹಂಯ್ ವೇ..!!!
