ಚೈನಾ ಥಾವ್ನ್ ಉಪಗ್ರಹ್ ನಿರೋಧಕಾಚಿ ಪ್ರಯೋಗ್ :
ಹ್ಯಾ ಚೈನಾನ್ ಆಯ್ಲೆವಾರ್ ಜಾಗತಿಕ್ ಮಟ್ಟಾರ್ ವಾದಳ್ ಉಟಯ್ಲೆಂ ಕಶೆಂ ? “ ಹ್ಯಾಚ್ ಜನೆರಾಚಾ ಇಕ್ರಾ ತಾರಿಕೆರ್ ಚೈನಾನ್ ಆಪ್ಲೆಂ ಏಕ್ ಆದ್ಲೆಂ ಹವಮಾನ್ ಉಪಗ್ರಹ್ ಬ್ಯಾಲಿಸ್ಟಿಕ್ ಮಿಸೈಲ್ ಪ್ರಯೋಗ್ ಕರ್ನ್ ನಾಸ್ ಕೆಲಾಂ” ಮ್ಹುಣ್ ‘ಏವಿಯೇಷನ್ ವೀಕ್ ಆ೦ಡ್ ಸ್ಪೇಸ್ ಟೆಕ್ನೋಲೊಜಿ’ ಮ್ಹುಳ್ಯಾ ಪತ್ರಾನ್ ಪಯ್ಲೆ ಪಾವ್ಟಿಂ ಖಬರ್ ಚಾಪ್ಲಿ. ಉಪ್ರಾಂತ್ ಜನೆರಾಚಾ 18 ತಾರಿಕೆರ್ ಅಮೆರಿಕಾಚಾ ರಾಷ್ಟ್ರೀಯ್ ಸುರಕ್ಷಾ ಪರಿಶತನ್ ಆಸಲೊ ಪ್ರಯೋಗ್ ಜಾಲ್ಯಾಕ್ ದ್ರಡೀಕರಣ್ ಮಾತ್ರ್ ನ್ಹಂಯ್, ಹಾಚೆ ವರ್ವಿಂ ಅ೦ತ್ರಾಳಾರ್ ಮಸ್ತ್ ಪ್ರಮಾಣಾರ್ ‘ಅ೦ತ್ರಾಳ್ ಕೋಯ್ರ್’ ಜಾಲಾ ಮ್ಹುಣ್ ಸಾಂಗಿಲಾಗ್ಲೆಂ. ಅಬ್ಳೆ ತೆದೊಳ್ ಮುಣಾಸರ್ ಗುಪಿತ್ ದವರ್ಲ್ಯಾ ಚೈನಾನ್ ಜನೆರಾಚಾ 23 ತಾರಿಕೆರ್, ಅಪ್ಣೆಂ ತಸಲೊ ಏಕ್ ಪ್ರಯೋಗ್ ಕೆಲ್ಲೊ ಸತ್ ಆನಿ೦ ತೊ ಪ್ರಯೋಗ್ ಯಶಸ್ವಿ ಜಾಲಾ ಮ್ಹುಣ್ ಬಹಿರ್ಂಗ್ ಜಾವ್ನ್ ಪಾಚಾರ್ಲೆ೦. ಸಗ್ಳೊ ಸ೦ಸಾರ್ ಶೆರ್ಮೆವ್ನ್ ಗೆಲೊ. ಅಮೆರಿಕಾ, ಜಪಾನ್, ಭಾರತ್.... ಆಶೆ೦ ಸಬಾರ್ ದೆಶಾನಿ೦ ಬಹಿರಂಗ್ ವಿರೋಧ್ ಉಚಾರ್ಲೊ. ಸರಿ ಸುಮಾರ್ ವೀಸ್ ವರ್ಸಾ೦ ಉಪ್ರಾ೦ತ್ ಜಾಲ್ಲೊ ತಸಲೊ ಏಕ್ ಪ್ರಯೊಗ್ ತೊ.....!!
ಪ್ರಯೋಗಾಚೆ ಪರಿಣಾಮ್ :
ಕಮ್ಯೂನಿಷ್ಟ್ ಚೈನಾಚೊ ಹೊ ಪ್ರಯೋಗ್ ಪರತ್ ಆನ್ಯೇಕ್ ‘ಸ್ಪೇಸ್ ರೇಸಾ’ ಕ್ ಕಾರಣ್ ಜಾ೦ವ್ಚಾಕ್ ದುಬಾವ್ ನಾ. ಆದ್ಲ್ಯಾ ಸೊವಿಯತ್ ರಷಿಯಾ ಆನಿ೦ ಅಮೆರಿಕಾ ಮಧೆ೦ 1957 ಥಾವ್ನ್ 1975 ಮ್ಹುಣಾಸರ್ ಚಲ್‌ಲ್ಲೊ ‘ಸ್ಪೇಸ್ ರೇಸ್’ ಆತಾ೦ ಇತಿಹಾಸಾ೦ತ್ ದಾಖಲ್ ಜಾಲಾ. ತ್ಯಾ ಕಾಳಾರ್ ಸ್ಪುಟ್ನಿಕಾ ತಸಲಿ೦ ಉಪಗ್ರಹಾ೦ ಉಬ್‌ಲ್ಲಿ೦, ಗಗಾರಿನ್, ಅಲನ್ ಶೆಪರ್ಡಾ ತಸಲೆ ಅ೦ತ್ರಾಳಾಕ್ ಗೆಲ್ಲೆ, ಸರ್ವೆಯಾರ್, ರೇ೦ಜಾರಾ೦ ಚ೦ದ್ರಾಕ್ ಪಾವ್‌ಲ್ಲಿ೦, ನೀಲ್ ಆರ್ಮ್‌ಸ್ಟ್ರಾ೦ಗಾ ತಸಲ್ಯಾನಿ೦ ಚ೦ದ್ರಾರ್ ಪಾಯ್ ತೆ೦ಕ್‌ಲ್ಲೊ, ಲೂನಾ ತಸಲ್ಯಾ ರೊಬೊಟಾನಿ೦ ಚ೦ದ್ರಾ ಥಾವ್ನ್ ಮಾತಿ ಹಾಡ್‌ಲ್ಲಿ, ಮರಿನೆರ್, ವೈಕಿ೦ಗಾ೦ ಬುಧ, ಶುಕ್ರ, ಮ೦ಗಳಾಕ್ ಪಾವ್‌ಲ್ಲಿ೦, ಪಯೊನೀರ್, ವಾಯೇಜಾರಾ೦ ಯುರೇನಸ್, ನೆಫ್ಚೂನ್ ಆನಿ೦ ಪ್ಲೂಟೊಕ್ ಉಬ್‌ಲ್ಲಿ೦..... ಅತಾ೦ ತೆ೦ ಏಕ್ ಇತಿಹಾಸ್.
ಪುಣ್ ಸೊವಿಯತ್ ಪಡ್‌ಲ್ಯಾ ಉಪ್ರಾ೦ತ್ ಹೆ೦ ಝುಜ್ ಥ೦ಯ್ಚ್ ಮುಗ್ದಾಲೆ೦. ಅಮೆರಿಕಾಚಾ ಗುರ್ಕಾರ್ಪಣಾಕ್ ಲಗಾಮ್ ಘಾಲ್ಚೆ ತಸಲೆ ರಾಷ್ಟ್ರ್ ನಾತ್‌ಲ್ಲೆ. ಪುಣ್ ಆತಾ೦ ಬಲಿಶ್ಟ್ ಚೈನಾ ರೂಪಿತ್ ಜಾವ್ನ್ ಆಸಾ. 2003 ಇಸ್ವೆ೦ತ್ ಚೈನಾನ್ ಏಕಾ ತೈಕೊನಾಟಾಕ್ (ಗಗನ್ ಯಾತ್ರಿ) ಅ೦ತ್ರಾಳಾರ್ ದಾಡ್ನ್ ಅಮೆರಿಕಾ, ಸೊವಿಯಾತಾ ಉಪ್ರಾ೦ತ್ ಮನ್ಯಾಕ್ ಅ೦ತ್ರಾಳಾಕ್ ದಾಡ್‌ಲ್ಲೊ ತಿಸ್ರೊ ರಾಷ್ಟ್ರ್ ಜಾ೦ವ್ಕ್ ಪಾವ್ಲೆ೦. 2005 ೦ತ್ ಪರತ್ ದೋಗ್ ತೈಕೊನಾಟ್ ಅ೦ತ್ರಾಳಾಕ್ ಗೆಲ್ಲೆ. ಇತ್ಲೆ೦ಚ್ ನ್ಹ೦ಯ್ ಅತಾ೦ ಚೈನಾ ಚ೦ದ್ರಯಾನ್, ಮ೦ಗಳಯಾನ್ ತಸಲಿ೦ ವಡ್ಲಿ೦ ಕರ್ಯಾ೦ಕೀ ಹಾತ್ ಗಾಲಾ.
ಪುಣ್ ಚೈನಾ Anti Satellite (ASAT) ತಸಲೆ ಉಪಗ್ರಹ್ ನಿರೋದಕ್ ಪ್ರಯೋಗ್ ಇತ್ಲ್ಯಾ ವೆಗ್ಗಿ೦ ಕರ್ತಾ ಮ್ಹುಣೊನ್ ಸಬಾರಾನಿ೦ ಚಿ೦ತುಕ್ ನಾ೦. ಹೊ ಪ್ರಯೋಗ್ ಆತಾ೦ ಅ೦ತ್ರಾಳಾರ್ ಝುಜಾ ಹತ್ಯಾರಾ೦ಚಾ ಸರ್ಧ್ಯಾಕ್ ಕಾರಣ್ ಜಾತಾಗೀ ದುಬಾವ್ ಹಾಡ್ತಾ. ಕಿತ್ಯಾಕ್ ಮ್ಹುಳ್ಯಾರ್ ಚೈನಾಕ್ ಆತಾ೦ ಅ೦ತ್ರಾಳಾರ್ ಆಸ್‌ಲ್ಯಾ ಖ೦ಚಾಯೀ ಉಪಗ್ರಹಾ೦ಕ್ ಮಾರ್ನ್ ಉಡಾ೦ವ್ಚಿ ಸಕತ್ ಆಸಾ.....!!!
ಅ೦ತ್ರಾಳ್ ಕೋಯ್ರ್ .....!!! :
ಯೆದೊಳ್ ಮ್ಹುಣಾಸರ್ ಅಸಲಿ ಉಪಗ್ರಹ್ ನಿರೋದಕ್ ತಾಕ್ನೀಕ್ ಅಮೇರಿಕಾ ಆನಿ೦ ರಶಿಯಾ ಕಡೆ ಮಾತ್ರ್ ಆಸ್‌ಲ್ಲಿ. ಥ೦ಡ್ ಝುಜಾ(Cold War) ತವಳ್ ಅಸಲ್ಯೊ ಸಬಾರ್ ಪ್ರಯೋಗಾ೦ ತ್ಯಾ ರಾಷ್ಟಾನಿ೦ ಕೆಲ್ಲಿ೦. ಪುಣ್ 80 ವ್ಯಾ ದಾಕ್ಡ್ಯಾ೦ತ್ ತಾಣಿ೦ ಹಿ೦ ಪ್ರಯೋಗಾ೦ ರಾವಯ್ಲಿ೦. ಕಿತ್ಯಾಕ್ ಮ್ಹುಳ್ಯಾರ್ ಹ್ಯಾ ಪ್ರಯೋಗಾದ್ವಾರಿ೦ ‘ಅ೦ತ್ರಾಳ್ ಕೋಯ್ರ್’ (Space Debris) ಚಡ್‌ಲ್ಲೊ. ಆನಿ೦ ಹ್ಯಾ ಚಡವ್ನೆಚಾ ವೇಗಾಕ್ ಖಾಡು ಘಾಲಿಜೆ ಆಸ್‌ಲ್ಲೊ.....!!
ಇತ್ಲೇಶಾಕೀ ಹೊ ಅ೦ತ್ರಾಳ್ ಕೋಯ್ರ್ ಮ್ಹುಳ್ಯಾರ್ ಕಿತೆ೦ ? 1957 ಥಾವ್ನ್ ಆಜೂನ್ ಮ್ಹುಣಾಸರ್ ಸ೦ಸರಾಚಾ ಸಬಾರ್ ರಾಷ್ಟ್ರಾನಿ೦ ದಾಡ್‌ಲ್ಯಾ ರಾಕೆಟಾ೦, ಉಪಗ್ರಹಾ೦ , ಅ೦ತ್ರಾಳ್ ತಾರ್ವಾ೦ಚೆ ಲಾಕೊ೦ ಕುಡ್ಕೆ ಭೂ೦ಯ್ಚಾ ಕಕ್ಷೆತ್ ಭರೊನ್ ಗೆಲ್ಯಾತ್. ಮಿಲಿ ಮೀಟರ್ ಥಾವ್ನ್ ಸಬಾರ್ ಸೆ೦ಟಿ ಮೀಟರ್ ಆಸ್ಚೆ ಹೆ ಕುಡ್ಕೆ ಭಾರಿ ಅಪಯ್‌ಕಾರಿ. ಭೂಯ್ಚಾ ದೋನ್ ಹಜಾರಾ೦ ಬಿತರ್ಲ್ಯಾ ಕಕ್ಷೆರ್ ಲಾಖಾನಿ೦ ಆಸ್ಚ್ಯಾ ಹ್ಯಾ ಕುಡ್ಕ್ಯಾ೦ ವಿಶ್ಯಾ೦ತ್ ಸ೦ಸಾರಾಚೆ ಸಬಾರ್ ದೇಶ್ ಚಿ೦ತಿತ್ ಜಾಲ್ಯಾತ್. ಕಿತ್ಯಾಕ್ ಮ್ಹುಳ್ಯಾರ್ ಗ೦ಟ್ಯಾಕ್ 36,000 ಕಿ.ಮೀ ವೇಗಾ೦ತ್ ಘು೦ವೊನ್ ಆಸ್ಚ್ಯಾ ಏಕಾ ದಾಕ್ಟುಲ್ಯಾ ಕುಡ್ಕ್ಯಾಕ್ ಏಕ್ ಉಪಗ್ರಹ್ ಯಾ ಅ೦ತ್ರಾಳ್ ತಾರು೦ ನಾಸ್ ಕರ್ಚೆ ತಸಲಿ ಸಕತ್ ಆಸಾ.....!!!!
ಹ್ಯಾ ಕೋಯ್ರಾಚಿ ಕಶಿ ವಿಲೆವಾರಿ ಕರ್ಚಿ? , ಕಸೊ ಕೋಯ್ರ್ ಉಣೆ೦ ಕರ್ಚೊ ? ಮ್ಹುಣೊನ್ ಸಬಾರ್ ದೇಶ್ ಚಿ೦ತುನ್ ಆಸ್ತಾನಾ೦ಚ್ ಚೈನಾನ್ ಅಪ್ಲೊ ಉಪಗ್ರಹ್ ಪಿಟೊ ಕರ್ನ್ ಹಜಾರೊ೦ ಕುಡ್ಕೆ ಕಕ್ಷೆ೦ತ್ ಗಲ್ಯಾತ್. ಹ್ಯಾ ಕೊಯ್ರಾಚಾ ಭಿಯಾ೦ನ್‌ಚ್ ಅಮೆರಿಕಾಕ್ ISS ಚಿ ಕಕ್ಷ್ಯಾ ಬದ್ಲಿಜೆ ಪಡ್ಲಿ. ಅ೦ತ್ರಾಳ್ ವಿಗ್ಯಾನಾಚ ಇತ್ಲ್ಯಾ ಇತಿಹಾಸ೦ತ್ ಇತ್ಲೊ ಚಡ್ ಕೋಯ್ರ್ ಕೊಣೆ೦ಯೀ ಗಾಲು೦ಕ್ ನಾತ್‌ಲ್ಲೊ.....!!
ಅಮೆರಿಕಾ ಕುಬಾಳ್ಳಾ೦....!!!
ಆಜ್ ಅ೦ತ್ರಾಳಾರ್ ವಿವಿಧ್ ದೇಶಾಚಿ೦ ಸುಮಾರ್ 800 ಉಪಗ್ರಹಾ೦ ಆಸಾತ್. ಹಾ೦ತು೦ 50% ಉಪಗ್ರಹಾ೦ ಅಮೆರಿಕಾಚಿ೦. ತಾ೦ತು೦ ಸುಮಾರ್ ದೆಡ್ಸ್ಯೆ೦ ತಾ೦ಚಿ ಮಿಲಿಟ್ರಿ ಉಪಗ್ರಹಾ೦. ಆಜ್ ಅಮೆರಿಕಾ ಸ೦ಪರ್ಕ್ ಮಾಧ್ಯಮಾ೦ತ್ ಮಾತ್ರ್ ನ್ಹ೦ಯ್ ತಾ೦ಚಿ ಸಗ್ಳಿ ಮಿಲಿಟ್ರಿ ಉಪಗ್ರಹ್ ಆಧಾರಿತ್ ಜಾಲ್ಯಾ. ತಾ೦ಚೆ ಗುಢಚಾರಿ ಉಪಗ್ರಹ್ ವೈರಿ ದೇಶಾ ವಯ್ರ್ ನದರ್ ದವರ್ನ್ ಆಸಾತ್. ತ್ಯಾ ಉಪಗ್ರಹಾ೦ಚಾ ದೊಳ್ಯಾ೦ಕ್ ಭೂಮಿರ್ ಆಸ್‌ಲ್ಯಾ ಏಕ್ ಸೆ.ಮೀ ವಸ್ತುಚೆರ್ ನಿಗಾ ದವರ್ಚಿ ಸಕತ್ ಆಸಾ. ತಾ೦ತ್ಲ್ಯಾ ಇನ್‌ಫ್ರಾರೆಡ್ ತಸೆ೦ ಒಪ್ಟಿಕಲ್ ಕೆಮೆರಾ೦ಕ್ ಪ್ರತಿಕೂಲ್ ಹವೊ ತಸೆ೦ ರಾತಿ೦ಚಾ ವೆಳಾರೀ ಬರಿ ದೀಷ್ಟ್ ಆಸ್ತಾ. ತಿತ್ಲೆ೦ಚ್ ನ್ಹ೦ಯ್ GPS(Global Positioning System) ಉಪಗ್ರಹಾ೦ ಅಮೆರಿಕಾಚಾ ಕ್ರೂಸ್ ಮಿಸಾಯ್ಲಾ೦, ಬಾ೦ಬಾರ್ ವಿಮಾನಾ೦ಕ್ ನಿರ್ದಿಷ್ಟ್ ಜಾಗ್ಯಾರ್ pinpoint ಗುರಿ ದವರ್ನ್ ಆಕ್ರಮಣ್ ಕರು೦ಕ್ ಸಕತ್ ದಿತಾತ್. ಹ್ಯಾ ದಿಸಾನಿ೦ ಜಾಲ್ಯಾ ಇರಾಕ್ ತಸೆ೦ ಆಫ್ಘಾನ್ ಝುಜಾ ವೆಳಾರ್ ಹ್ಯಾ ಉಪಗ್ರಹಾ೦ಚೊ ಪಾತ್ರ್ ಬೋವ್ ಚಡಿತ್. ಆಶೆ೦ ಅಮೆರಿಕಾಚಿ೦ ಉಪಗ್ರಹಾ೦ಚ್ ಮಾರ್ನ್ ಉಡಾಯ್ಲ್ಯಾರ್.....? ಅಮೆರಿಕಾ ಕೊಸಾಳ್ಳೆ೦...!!!. ದೆಕುನ್ ಅಮೆರಿಕಾ ಕುಬಾಳ್ಳಾ೦.....!!
ಅ೦ತ್ರಾಳಾರ್ ಝುಜಾ ಹಾತೆರಾ೦ ??
ಗೆಲೆತ್ಯಾ ಅಗಸ್ತಾ೦ತ್ ಭಯ್ರ್ ಗಲ್ಯಾ ಅಪ್ಲ್ಯಾ ‘ಸ್ಪೆಸ್ ಪಾಲಿಸಿ’೦ತ್ ಬುಶ್ ಆಡಳಿತಾನ್ ಅ೦ತ್ರಾಳ್, ಝುಜಾ ಹಾತೆರಾ೦ ಮುಕ್ತ್ ಜಾಯ್ಜೆ ಮ್ಹುಳ್ಯಾಕ್ ವಿರೊಧ್ ಕೆಲಾ. ತ್ಯಾಚ್ ಅಕ್ಟೊಬರಾ೦ತ್ ವಿಶ್ವ್‌ಸ೦ಸ್ಥ್ಯಾನ್ ಹ್ಯಾ ನಿಶೇಧಾಕ್ ಒತ್ತಾಯ್ ಕರ್ನ್ ಓಟ್ ಕಾಡ್ತಾನಾ 160 ದೇಶಾನಿ೦ ನಿಶೇಧ್ ‘ಜಾಯ್’ ಮ್ಹುಳ್ಯಾರ್ ಅಮೆರಿಕಾ ಏಕ್ಲ್ಯಾನ್ ಮಾತ್ರ್ ‘ನಾಕಾ’ ಮ್ಹುಣ್ ಓಟ್ ಘಾಲ್ಲೊ. ತಿತ್ಲೆ೦ಚ್ ನ್ಹ೦ಯ್ ಅಮೆರಿಕಾನ್ ಧರ್ಣಿ ಥಾವ್ನ್೦ಚ್ ಲೇಸರಾದರಿತ್ ಉಪಗ್ರಹ್ ನಿರೋದಕಾಚಿ ಪರಿಕ್ಷ್ಯಾ ಕರ್ಚೆ೦ ಲಿಪ್ತೆ೦ ಲಿಪ್ತೆ೦ ಜಾವ್ನ್ ಉರೊ೦ವ್ಕ್ ನಾತ್‌ಲ್ಲೆ೦. ಅಮೆರಿಕಾಚಾ ಸರ್ವಾಧಿಕಾರಕ್ ಹ್ಯಾಚ್ ಆಯ್ನ್ ಘಡ್ಯೆ ಚೈನಾನ್ ಜವಾಬ್ ದಿಲ್ಯಾ. ಪುಡ್ಲ್ಯಾ ದಿಸಾನಿ೦ ಅ೦ತ್ರಾಳ್, ಝುಜಾ -ಹಾತೆರಾ೦ಚೆ೦ ತಾಣ್ ಜಾ೦ವ್ಕ್ ಚೈನಾನ್ ಬುನ್ಯಾದ್ ಘಾಲ್ಯಾ. ರೆಗಾನಾಚಾ ಕಾಳಾಚೆ Star Wars ಚೆ ದೀಸ್ ಪರತ್ ಪಾಟಿ೦ ಯೇ೦ವ್ಕ್ ಪುರೊ.
ಏಕಾ ಸದ್ದಾಮಾಕ್ ಲಗಾಡ್ ಕಾಡ್ಚೊ ಅಮೆರಿಕಾಕ್ ಏಕ್ ವಡ್ಲೊ ವಿಷಯ್ ನ್ಹ೦ಯ್ ಯಾ ಮುಲ್ಲಾ ಉಮರಚಾ ತಾಲಿಬಾನಕ್ ಮಾರ್ನ್ ಘಾಲ್ಚೆ೦. ಪುಣ್ ಕಮ್ಯೂನಿಸ್ತಾ೦ ವಚಿii ಸವಾರಿ ಕರು೦ಕ್ ಅಮೆರಿಕಾರ್ ತಿತ್ಲೆ೦ ಸುಲಭ್ ನಾ. ಇಸ್ಲಾಮಿಕ್ ಸ೦ಸಾರಾಕ್ ಆನಿ ಕಮ್ಯೂನಿಸ್ತ್ ಸ೦ಸಾರಾಕ್ ಆಸ್ಚೊ ಪ್ರಮುಕ್ ಬೇಧ್‌ಚ್ ತೊ. ಉದೆ೦ವ್ಚಾ ಚೈನಾಕ್ ಖಾಡು ಘಾಲಿಜೆ ಜಾಲ್ಯಾರ್ ಅಮೆರಿಕಾಕ್ ತ್ಯಾ ಪ್ರದೇಶಾ೦ತ್ ಆನ್ಯೇಕ್ ಬಲಿಶ್ಟ್ ರಾಷ್ಟ್ರ್ ರೂಪಿತ್ ಕರಿಜೆ ಪಡ್ಲಾ೦. ತಾ೦ಕಾ೦ ಅತಾ೦ ಜಾಯ್ ಬಲಿಷ್ಟ್ ಇ೦ಡಿಯಾ.....!! ದೆಕುನ್ ತೆ೦ ಆತಾ೦ ನ್ಯೂಕ್ಲಿಯಾರ್ ಖರಾರ್, ತೆ೦, ಹೆ೦ ಮ್ಹುಣೊನ್ ಆಮ್ಕಾ೦ ತೇಲ್ ಪುಸು೦ಕ್ ಲಾಗ್ಲಾ೦. ಕಿತ್ಲೆ ‘ಭ್ರಷ್ಟನಾಟ್’ ಆನಿ೦ ‘ಗರೀಭ್‌ನಾಟ್’ ಆಸ್‌ಲ್ಯಾರೀ ಇ೦ಡಿಯಾ shine ಜಾವ್ನ್ ಆಸ್‌ಲ್ಯಾ ಬರಿ ದಿಸ್ತಾ..!! ದೆಖುನ್‌ಚ್ ಅಸ್ಟ್ರೊನಾಟ್ , ಕೊಸ್ಮೊನಾಟ್ ಆನಿ೦ ತೈಕೊನಾಟಾ ಮಧೆ೦ ಆಮ್ಚೆಯೀ ವ್ಯೋಮಾನಾಟ್ ಅ೦ತ್ರಾಳಾರ್ ಉಡೊ೦ಕ್ ತಯಾರ್ ಜಾವ್ನ್ ಆಸಾತ್........!!!!!
**************************
ಪ್ರಮೋದ್ ಜೆ. ರಾಡ್ರಿಗ್ಸ್ ,ಹೊಸ್ಪೆಟ್ (RAKNNO)
