ಹ್ಯಾ ಕಂಪ್ಯೂಟರಾ ವಿಷ್ಯಾಂತ್ ಸಮ್ಜೊಂಕ್ ಜಾಯ್ ಆಸ್‌ಲ್ಲೆ ಮಸ್ತ್ ವಿಷಯ್ ಆಸಾತ್. ಹಾರ್ಡ್‌ವೇರ್ ಆನಿ ಸಾಪ್ಟ್‌ವೇರ್ ವಿಶ್ಯಾಂತ್ ಖಳಿತ್ ಜಾಯ್ಜೆ ಆಸ್‌ಲ್ಲೆ ರಾಸ್ ವಿಷಯ್ ಆಸಾತ್. ನೆಟ್‌ವರ್ಕಿಂಗಾ ವಿಶ್ಯಾಂತ್ ಗೊತ್ತು ಜಾಯ್ಜೆ ಆಸ್‌ಲ್ಲೆಂ ಧಾರಾಳ್ ಆಸಾ. ಕಂಪ್ಯೂಟರಾಚ ಉಪಯೋಗ್ ಆನಿ ದುರುಪಯೋಗಾ ವಿಶ್ಯಾಂತ್ Ph.D ಜೊಡ್ಚೆ ತಿತ್ಲಿ ಮಾಹೆತ್ ಆಸಾ. ಪುಣ್ ಗೊತ್ತುನಾಸ್ತನ ರಾವೊಂಕ್ ಜಾಯ್ನಾ ತಸಲೆ ವಿಷಯ್‌ಯೀ ಆಸಾತ್. ಹಾಂತುಂ ದುಸ್ರ್ಯಾಂಚೆಂ ಕಂಪ್ಯೂಟರ್ ನಾಸ್ ಕರುಂಕ್, ಮಾಹೆತ್ ಚೊರುಂಕ್ ಬರಯ್ಲೆಂ ದುರುದ್ದೇಶಿತ್ ಸಾಪ್ಟ್‌ವೇರಾಂ ವಿಶ್ಯಾಂತ್ ಜಾಣ ಜಾಯ್ಜೆ ತಸಲಿ ಅವಶ್ಯ್ ಮಸ್ತ್ ಆಸಾ. ಹ್ಯಾ ಸಾಪ್ಟ್‌ವೇರಾಂಕ್ Malicious Softwares ಮ್ಹುಣ್ತಾತ್. ಹ್ಯಾ Malicious Softwares ಂತ್ ವೈರಸ್, WORM, ಟ್ರೊಜಾನ್ ಹಾರ್ಸ್, ಸ್ಪೈವೇರ್, Adware, ಅಸಲೆ ಸಬಾರ್ ಪ್ರಕಾರ್ ಆಸಾತ್.ಪುಣ್ ಸಬಾರ್ ಲೊಕಾನಿಂ ಹ್ಯಾ ಸರ್ವ್ ಪ್ರಕಾರಾಂಕ್ ಏಕ್‌ಚ್ ನಾಂವಾನ್ ಆಪಾಂವ್ಚೆಂ. ತೆಂಚ್ ಕಂಪ್ಯೂಟರ್ ವೈರಸ್.....!!!!
ವೈರಸ್ ಆನಿಂ WORM…Vital Information Resource Under Siege (VIRUS) ಮ್ಹುಣ್ ಆಪಾಂವ್ಚಾ ಕಂಪ್ಯೂಟರ್ ವೈರಸಾಕೀ ಆನಿಂ ಜೀವ್‌ಶ್ರಾಸ್ತ್ರೀಯ್ ವೈರಸಾಕೀ ಸಾಮ್ಕೆಪಣ್ ಆಸ್‌ಲ್ಯಾರೀ ತಿಂ ಏಕ್‌ಚ್ ನ್ಹಂಯ್. ವಾಸ್ತವ್ ಜಾವ್ನ್ ತೆಂ ಏಕ್ ಸಾಪ್ಟ್‌ವೇರ್. ಪುಣ್ ವಾಯ್ಟ್ ಉದ್ದೇಶ ಖಾತಿರ್ ಬರಯ್ಲೆಂ, Malicious Softwares ಚೆಂ ಏಕ್ ಪ್ರಕಾರ್ ತೆಂ. ಹ್ಯಾ ಕಂಪ್ಯೂಟರ್ ವೈರಸಾಕ್ ತಾಚ ಇತ್ಲ್ಯಾಕ್‌ಚ್ ಕಂಪ್ಯೂಟರ್ ವಾಪರ್‍ಯಾಚಾ ಗುಮಾನವಿಣೆಂ ನಕಲ್ ಜಾಂವ್ಚಿ ಸಕತ್ ಆಸಾ. ತೆಂ ಏಕಾ ಕಂಪ್ಯೂಟಾರ ಥಾವ್ನ್ ಆನೇಕಾ ಕಂಪ್ಯೂಟರಾಕ್ ಪ್ಲಾಪಿ, USB ಡ್ರೈವ್, CD ಮುಖಾಂತ್ರ್ ಪ್ರಸಾರ್ ಜಾಂವ್ಕ್ ಪುರೊ. ಅಂತರ್‌ಜಾಳಿ ತಶೆಂ ಇ-ಮೈಲಾ ದ್ವಾರಿಂಯೀ ಯೇಂವ್ಚೆಂ ಸಾದ್ಯ್ ಆಸ್ತಾ. ಹ್ಯಾ ವೈರಸಾಕ್ ಕಂಪ್ಯೂಟರಾಚ ಸ್ಮರಣ್ ಕೋಶಾಕ್(memory) ದಾಡ್ ಘಾಲ್ನ್ ಸಗ್ಳಿ ವೆವಾಸ್ಥಚ್ ಸವ್ಕಾಸ್ ಕರ್ಚಿ ಸಕತ್ ಆಸ್ತಾ. ತೆಂ ತುಮ್ಚಾ ಹಾರ್ಡ್ ಡಿಸ್ಕಾಂತ್ಲಿ ಫೈಲಾಂ ವಿಬ್ಡಾಯ್ ಕರುಂಕೀ ಪುರೊ.
ಹ್ಯಾ ವೈರಸಾ ತಸಲಿಚ್ ಆನ್ಯೇಕ್ ಭೆಷ್ಟಾವ್ಣಿ (threat) ಕಂಪ್ಯೂಟರಾಕ್ ಆಸಾ. ಹಾಕಾ WORM ಮ್ಹುಣ್ತಾತ್. ಏಕ್ ವೈರಸ್ ಪ್ರಸಾರ್ ಜಾಯ್ಜೆ ಜಾಲ್ಯಾರ್ ಕಂಪ್ಯೂಟರ್ ವಾಪರ್‍ಯಾನ್ ಗೊತ್ತುನಾಸ್ತನಾ ವಿಬ್ಡಾಯ್ ಜಾಲ್ಲೆಂ(infect) ಖಂಚೆಯೀ ಫೈಲ್ ಉಗ್ತೆ ಕರಿಜೆ. ತೆದೊಳ್ ಮುಣಾಸರ್ ವೈರಸ್ ಪ್ರಸಾರ್ ಜಾಯ್ನಾ. ಪುಣ್ WORM ಪ್ರಸಾರ್ ಜಾಂವ್ಕ್ ವಾಪರ್‍ಯಾಚಾ ಕಸಲ್ಲಿಚ್ ಕ್ರಿಯಾಚಿ ಗರ್ಜ್ ನಾ. ತೆಂ ವಾಸ್ತವ್ ಜಾವ್ನ್ ಸ್ವಯಂ ನಕಲ್ ಜಾವ್ನ್ ನೆಟ್‌ವರ್ಕಾಚೆರ್ ಪ್ರಸಾರ್‍ತಾ. ಪುಣ್ ವೈರಸಾ ತಿತ್ಲೆಂ ಭಿರಂಕುಳ್ ನ್ಹಂಯ್ ತೆಂ. ಚಡಾವತ್ ಜಾವ್ನ್ ತೆಂ ನೆಟ್ರ್ಕಾಚೆಂ bandwidth ಖಾತ. ಹ್ಯಾ WORM ವರ್ವಿಂ ಥೊಡಿಂ ವೆಬ್ ಸರ್ವರಾಂ crash ಜಾಲ್ಲಿಂ ಘಡಿತಾಂಯೀ ಆಸಾತ್. 2003 ಇಸ್ವೆಂತ್ ಫಿಲಿಪೈನ್ಸಾಚಾ 23 ವರ್ಸಾಂಚಾ ತರ್ನಾಟ್ಯಾನ್ ಬರಯ್ಲಾ Love Bug ಮ್ಹುಳ್ಯಾ WORM ನ್ ಕೆಲ್ಲಿಂ ಆಚಾತುರ್ಯಾಂ ಪಳೆಯಾ. ಮೋಗ್ ಕರ್ಚೊ ಕಸೊ ಮುಳ್ಯಾ ವಿಷಯಾಚೆರ್ ಸಬಾರಾಂಕ್ ಏಕ್ ಇ-ಮೈಲ್ ಆಯ್ಲೆಂ. ತೆಂ ಇ-ಮೈಲ್ ಉಗ್ತೆ ಕೆಲ್ಯಾಂಚಾ ಕಂಪ್ಯೂಟರಾಂತ್ WORM ರಿಗೊನ್ ಥೊಡಿಂ ಫೈಲಾಂ ನಾಸ್ ಕೆಲ್ಲೆಂ ತಿತ್ಲೆಂಚ್ ನ್ಹಂಯ್ ಅಪ್ಣಾ ಇತ್ಲ್ಯಾಕ್‌ಚ್ ತ್ಯಾ ಇ-ಮೈಲಾಚಾ ಎಡ್ರೆಸ್ ಬುಕಾಂತ್ ಆಸ್‌ಲ್ಲ್ಯಾ ಹರ್ಯೇಕಾ ಎಡ್ರೆಸಾಕೀ ತೆಂಚ್ ಮೈಲ್ ದಾಡ್ತಲೆಂ. ಆಶೆಂ ಸಗ್ಳ್ಯಾ ಸಂಸಾರಾಕ್ ಪ್ರಸಾರ್ ಜಾವ್ನ್ ಹ್ಯಾ WORM ನ್ ಕೆಲ್ಲೊ ನಶ್ಟ್ ಫಕತ್ 15 ಬಿಲಿಯಾನ್ ಡಾಲರ್ ಮಾತ್ರ್...!!!
ಟ್ರೋಜನ್ ಘೊಡೆಇತ್ಲಿ ವೈರಸ್ ಆನಿ WORM ಚಿ ಕಾಣಿ ಜಾಲ್ಯಾರ್ ಟ್ರೋಜನ್ ಘೊಡ್ಯಾಂಚಿ(Trojan Horse) ಕಾಣಿ ಆನ್ಯೇಕ್‌ಚ್. ತೆಂ ವೈರಸಾ ಬರಿ ಕಂಪ್ಯೂಟರ್ ಸವ್ಕಾಸ್‌ಯೀ ಕರಿನಾ ಯಾ WORM ಬರಿ bandwidth ಯೀ ಖಾಯ್ನಾ. ಅಸಲಾಕ್ ತೆಂ ತುಜ್ಯಾ ಕಂಪ್ಯೂಟರಾಂತ್ ಆಸಾ ಮ್ಹುಣೊನ್‌ಯೀ ಕಳಾನ. ಜಾಲ್ಯಾರೀ ತೆಂ ಭಾರಿ ಭಿರಂಕುಳ್. ಗ್ರೇಕ್ ಪುರಾಣಾಂತ್ ಯೆಂವ್ಚಾ ಟ್ರೋಜನ್ ಝುಜಾಂತ್ ಟ್ರಾಯ್ ಶಹರಾಚ ಕೊಟ್ಯಾ ಬಿತರ್ ರಿಗೊಂಕ್ ಗ್ರೆಕಾನಿಂ ರುಕಾಚಾ ಘೊಡ್ಯಾ ಭಿತರ್ ಸೈನಿಕಾಂಕ್ ಲಿಪೊನ್ ವೆಲ್ಲೆಂ ಪರಿಕಲ್ಪನ ಬರಿಚ್ ಹೆಂ ಟ್ರೋಜನ್ ವೈರಸ್ ಕಾಮ್ ಕರ್ತಾ. ಹಾಕಾ “ ಟ್ರೊಜಾನ್ ಹಾರ್ಸ್ (ಘೊಡೆ)” ಮ್ಹುಳ್ಳೆಂ ನಾಂವ್ ಆಯಿಲ್ಲೆಂಯೀ ಹ್ಯಾಚ್ ಕಾರಣಾಕ್. ದ್ರಷ್ಟಾಂತಾಕ್ ಹೆ ಟ್ರೋಜನ್ ಘೊಡೆ ಕಶೆಂ ಕಾರ್ಯಾಗತ್ ಜಾತಾತ್ ಮ್ಹುಣೊನ್ ಪಳೆಯಾಂ. ಚಿಂತ್ಯಾಂ ಮಕಾ ಮ್ಹುಜಾ ವೈರಿಚಾ(victim) ಇ-ಮೈಲಾಚೆ ಪಾಸ್‌ವರ್ಡ್ , ಕ್ರೆಡಿಟ್ ಕಾರ್ಡ್ ವಿವರ್ ಯಾ ತಾಚ್ಯಾ ಕಂಪ್ಯೂಟರಾಂತ್ ಆಸ್ಚಿಂ ಗುಪಿತ್ ದಸ್ತಾವೇಜಾಂ , ಫೈಲಾಂ ಜಾಯ್ಜೆ. ಹಾಂವ್ ತಾಕಾ ಏಕ್ ಪಾರ್ವಾಡ್ ಇ-ಮೈಲ್ ದಾಡ್ತಾಂ. ತ್ಯಾ ಇ-ಮೈಲಾಚಿತ್ ಪಾಂಚ್ ಇಮೇಜ್(ಪಿಂತುರಾಂ) ಫೈಲಾಂ ಆಸ್ತಾತ್. ತೊ ಏಕ್-ಏಕ್‌ಚ್ ಫೈಲ್ ಡೌನ್‌ಲೋಡ್ ಕರ್ನ್ ಉಗ್ತೆ ಕರ್ತಾ. ಪಯ್ಲಿಂ ಚಾರ್ ಫೈಲಾಂ ಸಾಚಾ ತಿಂ. ಪುಣ್ ಪಾಂಚ್ವೆಂ ಫೈಲ್ ಉಗ್ತೆಂ ಕರ್‍ತನಾ “File is corrupt” ಮುಳ್ಳೊ ಸಂದೇಶ್ ಯೆತಾ. ತೆಂ ಉಗ್ತೆ ಜಾಯ್ನಾ. ಕಿತ್ಯಾಕ್ ತೆಂ ಇಮೇಜ್ ಫೈಲಾಚೆಂ ರೂಪ್ ಘೆವ್ನ್ ಆಯ್ಲೆಂ backdoor ಟ್ರೋಜನ್ ತೆಂ. ತಾಣೆ ತೆಂ ಉಗ್ತೆ ಕರುಂಕ್ double click ಕೆಲ್ಲೆಂಚ್ ತೆಂ ಪ್ರೋಗ್ರಾಮ್ ಚಾಲು ಜಾವ್ನ್ ಕಂಪ್ಯೂಟರಾಚ ಪಾಟ್ಲ್ಯಾ ಬಾಗ್ಲಾರ್(background) ವಚುನ್ ಬಸ್ತಾ. ಏಕಾ ರಾಕೆಟಾನ್ ಗುಢಾಚಾರ್ಯ್ ಉಪಗ್ರಹಕ್ ಆಂತ್ರಾಳಾಚ ಕಕ್ಷೆರ್ ಪಾವಯ್ಲ್ಯಾ ಬರಿ.....!!!
ಹ್ಯಾ ಟ್ರೋಜನಾಂತ್ ಸಬಾರ್ ಘಟಕ್(modules) ಆಸ್ತಾತ್. ತಾಂತು Keylogger ಮ್ಹುಳ್ಳೊ ಘಟಕ್ ಆಸ್ಲ್ಯಾರ್, ತೆಂ ನಿಯುಕ್ತ್ ಸುವಾತೆಂತ್ (Remote Destination) ಆಸ್‌ಲ್ಯಾ ಮ್ಹುಜಾ ವೈರಿನ್ ಕಂಪ್ಯೂಟರಾರ್ ಟೈಪ್ ಕೆಲ್ಲೊ ಹರ್ಯೇಕ್ ಸಬ್ದ್ ದಸ್ತಾವೇಜ್ ಕರ್ನ್ ಮಕಾ ದಾಡ್ತಾ. ಹ್ಯಾ ಟ್ರೋಜನಾಂತ್ ಅನ್ಯೇಕ್ ಘಟಕ್ ಆಸ್ತಾ. ತೆಂ ವೈರಿಚಾ ಕಂಪ್ಯೂಟರಾಂತ್ ದಾಸ್ತಾನ್ ಜಾಲ್ಯೊ cookies ಮ್ಹುಜಾ ಕಂಪ್ಯೂಟಾರಕ್ ವರ್ಗಾವಣ್ ಕರ್ತಾ. ಆಮಿ ಇ-ಮೈಲ್ ಯಾ ಖಂಚಯೀ ಬ್ಯಾಂಕಿಂಗ್ ಸೈಟ್ ಯಾ ದುಸ್ರೆಂ ಉಗ್ತೆ ಕರ್ತಾನಾ , ತೆಂ ವೆಬ್‌ಸರ್ವರ್ ಆಮ್ಚ್ಯಾ ಕಂಪ್ಯೂಟರಾಚ ವೆಬ್ ಬ್ರೌಸರಾಕ್ ಗುಪಿತ್ ಭಾಷೆನ್ (Encrypted) ಸಂದೇಶ್ ದಾಡ್ತಾ. ತೊ ಸಂದೇಶ್ ಆಮ್ಚೆಂ ಬ್ರೌಸರ್ ಏಕಾ ಫೈಲಾಂತ್ ದಸ್ತಾವೇಜ್ ಕರ್ನ್ ದವರ್‍ತಾ. ತ್ಯಾ ಫೈಲಾಕ್ cookie ಮ್ಹುಣ್ತಾತ್. ತ್ಯೊ cookies, decode ಆನಿಂ ವಿಶ್ಲೇಷಣ್ ಕರ್ನ್ ವೈರಿಚೊ ಸೂಕ್ಷ್ಮ್ ವಿವರ್ ಗ್ರಹಣ್ ಕರುಂಕ್ ಜಾತಾ...!!. ಇತ್ಲೆಂಚ್ ನ್ಹಂಯ್ ಹ್ಯಾ ಟ್ರೋಜನಾಂತ್ Remote Control ಮ್ಹುಳ್ಳೆಂ ಸಾಧನ್ ಆಸ್ಲ್ಯಾರ್ ನಿಯುಕ್ತ್ ಸುವಾತೆಂತ್ಲ್ಯಾ ಕಂಪ್ಯೂಟರಾಚೆಂ ಸಗ್ಳೆಂ ನಿಯಂತ್ರಣ್ ಕಾಣ್ಘೆವ್ಯೆತ್. ತಾಂತುಂ ಆಸ್‌ಲ್ಲಿಂ ದಸ್ತಾವೇಜಾಂ , ಫೈಲಾಂ ಆಮ್ಚ್ಯಾ ಕಂಪ್ಯೂಟರಾಕ್ ವರ್ಗಾವಣ್ ಕರ್‍ಯೇತ್. ತ್ಯಾ ಕಂಪ್ಯೂಟರಾಂತ್ ಆಮಿಂ ಕಸಲಿಯೀಂ ಸಾಪ್ಟ್‌ವೆರಾಂ ಸಂಸ್ಥಾಪ್ ಯಾ ಅಸಂಸ್ಥಾಪಿತ್ (uninstall) ಕರ್‍ಯೇತ್...!!
ವಿಸ್ತ್ರತ್ ಭೆಷ್ಟವ್ಣ್ಯೊ (Expanded Threats)ವೈರಸ್ , ವೊರ್ಮ್ , ಟ್ರೋಜನ್ ಘೊಡ್ಯಾ ಭಯ್ರ್‌ಯೀ ಸಭಾರ್ ವಿಸ್ತ್ರತ್ ಭೆಷ್ಟವ್ಣ್ಯೊ ಕಂಪ್ಯೂಟರಕ್ ಆಸಾತ್. ತಾಂತುಂ ಪ್ರಮುಖ್ ಜಾವ್ನ್ ಸ್ಪೈವೇರ್ (Spyware) ಆನಿ Adware . ಹಿಂ ಸ್ಪೈವ್ಭೆರಾಂ ವಾಣಿಜ್ಯ್ ಉದ್ದೇಶಾ ಖಾತಿರ್ ರಚನ್ ಕೆಲ್ಲಿಂ ದಾಕ್ಟಿಂ ಸಾಪ್ಟ್‌ವೆರಾಂ. ತಿಂ ತುಮ್ಚ್ಯಾ ಗುಮಾನವಿಣಿಂ ಕಂಪ್ಯೂಟರಂತ್ ಸಂಸ್ಥಾಪ್ ಜಾವ್ನ್ ಜಾಳಿಜಾಗ್ಯಾರ್ ತುಮ್ಚ್ಯೊ ಚಟುವಟಿಕ್ಯೊ ಗ್ರಾಸುನ್ ತಿಸ್ರ್ಯಾ ಪಾಡ್ತಿಕ್ ವಿವರ್ ದಿತಾತ್. ವಾಸ್ತವ್ ಜಾವ್ನ್ ಹಿಂ ಸ್ಪೈವೇರಾಂ ಜಾಳಿ ಜಾಗ್ಯಾರ್ ತುಮಿಂ ಡೌನ್‌ಲೋಡ್ ಕೆಲ್ಯಾ ಫ಼್ರೀ ಸಾಪ್ಟ್‌ವೇರಾಂ ಸಾಂಗಾತ ತುಮ್ಚ್ಯಾ ಕಂಪ್ಯೂಂಟಾರಾಂತ್ ತುಮ್ಚ್ಯಾ ಕಬ್ಲಾತೆ ವರ್ವಿಂ ಪುಣ್ ಗುಮಾನವಿಣೆಂ ಸಂಸ್ಥಾಪಿತ್ ಜಾತಾತ್. ಹರ್ಯೇಕ್ ಸಾಪ್ಟ್‌ವೇರ್ ಕಂಪ್ಯೂಟರಾಂತ್ ಸಂಸ್ಥಾಪ್ ಕರ್ತಾನಾ ವಾಸ್ತವ್ ಜಾವ್ನ್ EULA (End User Licence Agreement) ಮ್ಹುಳ್ಳೆಂ ಕಾಯ್ದ್ಯಾನುಸಾರ್ ಖರಾರ್ ಆಸ್ತಾ. ತ್ಯೊ ನಿರ್ದಿಷ್ಟ್ “ Terms and Conditions “ ವಾಚುನ್ ಜಾಲ್ಯಾ ಉಪ್ರಾಂತ್ “ I Agree” ಆನಿಂ “ I Don’t Agree” ಮ್ಹುಳ್ಯೊ ದೋನ್ ವಿಂಚೊವ್ಣ್ಯೊ ಆಸ್ತಾತ್. “I Agree “ ವಿಂಚೊವ್ಣೆಕ್ ಕ್ಲಿಕ್ ಕೆಲ್ಯಾರ್ ಮಾತ್ರ್ ತೆಂ ಸಾಪ್ಟ್‌ವೇರ್ ಸಂಸ್ಥಾಪಿತ್ ಕರ್‍ಯೇತ್. ವಾಸ್ತವ್ ಜಾವ್ನ್ ಕೊಣ್‌ಯೀ ತಿಂ “Terms and Conditions ” ವಾಚಿನಾಸ್ತಾನ, ತ್ಯೊ ಒಪ್ಪುನ್ ಸಾಪ್ಟ್‌ವೇರ್ ಸಂಸ್ಥಾಪಿತ್ ಕರ್ತಾತ್. ಹಾಚೊ ದುರುಪಯೋಗ್ ಕರ್ನ್ ಥೊಡಿಂ ಸಾಪ್ಟ್‌ವೇರಾಂ “ಆಮ್ಚೆಂ ಸಾಪ್ಟ್‌ವೇರ್ ಸಂಸ್ಥಾಪಿತ್ ಕೆಲ್ಯಾರ್ ತುಮ್ಚ್ಯಾ ಕಂಪ್ಯೂಟರಾಂತ್ಲೊ ಖಾಸ್ಗಿ ವಿವರ್ ಕಾಣ್ಘೆತಾಂವ್” ಮ್ಹುಳ್ಯಾ ತಸಲೆಂ ನಿಯಮ್ ಸೆರ್ವಾಯ್ತಾತ್. ಹೆಂ ವಾಚಿನಾಸ್ತಾನ ನಿಯಮಾಂ ಒಪ್ಪುನ್ ಸಾಪ್ಟ್‌ವೇರ್ ಸಂಸ್ಥಾಪಿತ್ ಕರ್ನ್ ತುಮ್ಚೊ ಖಾಸ್ಗಿ ವಿವರ್ ಭಯ್ರ್ ಗೆಲ್ಯಾರ್‌ಯೀ ತುಮ್ಕಾಂ ಕಾನುನ್ ಕ್ರಮ್ ಕಾಣ್ಘೆಂವ್ಕ್ ಜಾಯ್ನಾ. ಕಿತ್ಯಾಕ್ ತೆಂ legal ..!! ಆಶೆಂಚ್ Addwares. ತುಮಿ ಜಾಳಿಜಾಗ್ಯಾರ್ ಭೆಟ್ ದಿತಾನ ಜಾಹೀರಾತಂಚೆ window ಉಗ್ತೆ ಕರ್ನ್ ತುಮ್ಕಾಂ ಉಪದ್ರ್ ದೀವ್ನ್ ಆಸ್ತಾತ್.
ಹಾಚೆ ಸಾಂಗಾತಾ ಆನ್ಯೇಕ್ ವಿಸ್ತ್ರತ್ ಭೆಷ್ಟಾವ್ಣಿ ಜಾಳಿ ಜಾಗ್ಯಾರ್ ಆಸಾ. ಹಾಕಾ ಪಿಶಿಂಗ್(Phishing) ಮ್ಹುಣ್ತಾತ್. ತಾಕಾ ಬಲಿ ಜಾಲ್ಯಾರ್ ತುಮ್ಚೆ ಪಾಸ್‌ವರ್ಡ್, ಕ್ರೆಡಿಟ್ ಕಾರ್ಡ್ ನಂಬ್ರಾ ...ಅಸಲೊ ವಿವರ್ ಚೊರಿ ಜಾಲ್ಯಾ ಬರಿ. ಇತ್ಲ್ಯಾಕೀ ಪಿಶಿಂಗ್ ಮ್ಹುಳ್ಯಾರ್ ನೀಜ್ ಕಂಪೆನಿಚಾ ನಾವಾನ್ ಗೋಲ್‌ಮಾಲ್ ಕಂಪೆನಿನ್ ಇ-ಮೈಲ್ ದಾಡ್ನ್ ತುಮ್ಚೊ ವೈಯಕ್ತಿಕ್ ವಿವರ್ ಚೊರ್‍ಚೊ. ದಾಖ್ಲ್ಯಾಕ್ ತುಮ್ಚೆಂ ಬ್ಯಾಂಕ್ ಎಕೌಂಟ್ citibank.com ಂತ್ ಅಸ್ಲ್ಯಾರ್ ತುಮ್ಕಾಂ ಏಕ್ ಇ_ಮೈಲ್ ಯೇಂವ್ಕ್ ಪುರೊ. “ಆಮ್ಚ್ಯಾ ಬ್ಯಾಂಕಾಚೆಂ ವೆಬ್ ಸರ್ವರ್ crash ಜಾಲ್ಯಾನ್ ಆಮಿಂ ನವೆಂ ಸರ್ವರ್ ಸ್ಥಾಪಿತ್ ಕೆಲಾಂ. ತಾಂತು ತುಮ್ಚೊ ವಿವರ್ ಭರುಂಕ್ ಸಕಯ್ಲೆಂ ಲಿಂಕ್ ಕ್ಲಿಕ್ ಕರಾ.” . ಹೆಂ ಲಿಂಕ್ ಕ್ಲಿಕ್ ಕೆಲ್ಯಾರ್ ಚಿತಿ ಬ್ಯಾಂಕಾಚಾ ವೆಬ್‌ಸೈಟಾ ಭರಿಚ್ ಆಶ್ಚೆಂ ಆನ್ಯೇಕ್ ವೆಬ್‌ಸೈಟ್ ಉಗ್ತೆ ಜಾತಾ. ಹಾಂತುಂ ತುಮಿ ತುಮ್ಚೊ ವೈಯಕ್ತಿಕ್ ವಿವರ್ ದಿಲ್ಯಾರ್ ತೊ ಸೈಬರ್ ಚೊರಾಂಕ್ ಮೆಳ್ಯಾ ಭರಿಚ್.....!!!
ಸುರಕ್ಷತಾ :ಕಂಪ್ಯೂಟರಚಾ ವೈರಸಾಕ್ ಆಸ್ಚೆಂ ವಡ್ಲೆಂ ವೊಕತ್‌ಚ್ ಆಂಟಿವೈರಸ್ ಸಾಪ್ಟ್‌ವೇರ್. ಖಂಚಯ್ ಕಂಪ್ಯೂಟರಾಂತ್ ಆಸಾಜೆಚ್ ಜಾಲ್ಲೆಂ ಸಾಪ್ಟ್‌ವೇರ್ ತೆಂ. ಸಾಂಸ್ಕ್ರತಿಕ್ ವಿಭಿನ್ನತಾ ತಶೆಂಚ್ ಭಾರತೀಯ್ ಆನಿಂ ಪಾಶ್ಚ್ಯಾತ್ ಮನಸ್ಥಿತೆಂತ್‌ಯೀ ತಫಾವತ್ ಆಸಾ. ಆಮ್ಚಿ ಪೈರೆಟೆಡ್ ಸಾಪ್ಟ್‌ವೇರ್ ಸಂಸ್ಕ್ರತಿ ಜಾಲ್ಯಾರ್ ತಾಂಚಿ ಲೈಸನ್ಸ್ಡ್ ಸಂಸ್ಕ್ರತಿ. ಆಶೆಂಚ್ ಆಂಟಿವೈರಸ್ ಸಾಪ್ಟ್‌ವೇರಾಚಿ ಸ್ಥಿತಿ. ತುಮಿಂ ಖಂಚಯೀಂ ಸಾಪ್ಟ್‌ವೇರಾಂಚಿ ಗೋಲ್‌ಮಾಲ್ ಪ್ರತಿ ಉಪ್ಯೋಗ್ ಕರ್‍ಯೇತ್ ಪುಣ್ ಪೈರೆಟೆಡ್ ಆಂಟಿವೈರಸ್ ಉಪ್ಯೋಗ್ ಕರ್ಚೆಂ ಭಾರಿ ಆಪಾಯಾಚೆಂ. ದಿಸಾಕ್ ಯೆಂವ್ಚ್ಯಾ ಶೆಂಭೊರಾ ವಯ್ಲ್ಯಾ ನವ್ಯಾ ವೈರಸಾಂಕ್ ಸೊದುನ್ ತಿಂ ಕಶಿಂ ನಿರ್ನಾಮ್ ಕರ್ಚಿಂ ಮ್ಹುಳ್ಳೊ ಕೋಡ್ ಬರವ್ನ್ ಸದಾಂಯ್ ನಿಯತ್ತೆನ್ ತುಮ್ಚ್ಯಾ ಕಂಪ್ಯೂಟರಕ್ ಪಾವಯ್ಜೆ ಜಾಲ್ಯಾರ್ ತುವೆಂ ಒರಿಜಿನಲ್ ಆಂಟಿವೈರಸ್ ಸಾಪ್ಟ್‌ವೇರ್ ಮೊಲಾಕ್ ಘೆಜಾಯ್ತ್. ಆಜ್ ಸಂಸಾರಾಂತ್ ಆಸ್ಚ್ಯಾ 75 % ಕಂಪ್ಯೂಟರಾಂತ್ ಉಪ್ಯೋಗ್ ಕರ್ಚೆಂ ಆಂಟಿವೈರಸ್ ಸಾಪ್ಟ್‌ವೇರ್ ಸಿಮ್ಯಾಂಟೆಕ್(Symantec) ಕಂಪೆನಿಚೆಂ ನೊರ್‍ಟನ್(Norton). ಹಾಚೆ ಉಪ್ರಾಂತ್ ಯೆಂವ್ಚಿಂ McAfee, AVG ತಸಲಿಂ ನಾಂವಾಂ. ಅಪ್ರೂಬ್ ಖಂಯ್ ಮ್ಹುಣೀ ಕಂಪ್ಯೂಟರ್ ಸವ್ಕಾಸ್ ಕರ್ತಾ ಮ್ಹುಳ್ಳೊ ಅಪವಾದ್ ಸೊಡ್ಲ್ಯಾರ್ ನೊರ್‍ಟನಾ ತಸಲೆಂ ಸುರಕ್ಷಿತ್ ಸಾಪ್ಟ್‌ವೇರ್ ದುಸ್ರೆಂ ನಾಂ.
ವೈರಸ್ ಸುರಕ್ಷೆ ಖಾತಿರ್ ಭಾರತೀಯ್ ಮನಸ್ಥಿತೆಚಾ ತೀನ್ ವರ್ಗಾಂಚಾ ಲೊಕಾನಿಂ ಸಕಯ್ಲ್ ದಿಲ್ಲಿ ಸಲಹಾ ಘೆವ್ಯೇತ್. ಪಯ್ಲ್ಯಾ ವರ್ಗಾಚಾ ಲೊಕಾಕಡೆ ಕಂಪ್ಯೂಟರ್ ಆಸೊನ್ ಇಂಟರ್‌ನೆಟ್ ಆಸಾನ. ತಾಂಕಾಂ ವೈರಸಾಚಿ ಆಪಾಯ್ ಉಣಿಂ. ಹಾಣಿಂ ನೊರ್‍ಟನಾಚೆಂ 2005 ಚಾಕೀ ಪಯ್ಲೆಂಚೆಂ ಪೈರೆಟೆಡ್ ಆಂಟಿವೈರಸ್ ಸಾಪ್ಟ್‌ವೇರ್ ಉಪ್ಯೋಗ್ ಕರ್ನ್ ಮಯ್ನ್ಯಾಕ್ ಏಕ್ ಪಾವ್ಟಿಂ ಖಂಯ್ ಥಾವ್ನ್ ಮ್ಹುಣಿ Symantec ಚಾ ಜಾಳಿಜಾಗ್ಯಾರ್ ವಚುನ್ ವೈರಸ್ definitions ಡೌನ್‌ಲೋಡ್ ಕರ್ನ್ ಅಪ್ಲ್ಯಾಕಂಪ್ಯೂಟರಾಂತ್ update ಕರ್‍ಯೇತ್. ದುಸ್ರ್ಯಾ ವರ್ಗಚಾ ಲೊಕಾಕಡೆ ಕಂಪ್ಯೂಟರ್‌ಯೀ ಆಸ್ತಾ, ಇಂಟರ್‌ನೆಟ್‌ಯೀ ಆಸ್ತಾ. ಪುಣ್ ತೆ ಪೈರೆಟೆಡ್ Windows ಉಪ್ಯೋಗ್ಸಿತಾತ್. ಅಸಲ್ಯಾನಿಂ AVG ತಸಲಿಂ ದರ್ಮಾರ್ಥ್ ಸಾಪ್ಟ್‌ವೇರಾಂ ಉಪ್ಯೋಗ್ ಕರ್‍ಯೇತ್. ಪುಣ್ ತಿಸ್ರ್ಯಾ ವರ್ಗಾಚೊ ಲೋಕ್ ಬೋವ್ ಉಣೊ. ತಾಂಚೆ ಕಡೆ ಕಂಪ್ಯೂಟರ್‌ಯೀ ಆಸ್ತಾ, ಇಂಟರ್‌ನೆಟ್‌ಯೀ ಆಸ್ತಾ. ತಾಣಿಂ ಉಪ್ಯೋಗ್ ಕರ್ಚೊ Windows ಯೀ ಒರಿಜಿನಲ್. ತಸಲ್ಯಾನಿಂ Symantec ಚೆಂ ನೊರ್‍ಟನ್ ಸಾಪ್ಟ್‌ವೇರ್ ಘೆಂವ್ಚೆಂ ಬರೆಂ. ಕಿತ್ಯಾಕ್ ಮ್ಹುಳ್ಯಾರ್ Symantec ನ್ ವಿಕ್ಚಾ ನೊರ್‍ಟನ್ ಸಾಪ್ಟ್‌ವೇರಾಚೆಂ ಮೋಲ್ ಸಗ್ಳ್ಯಾ ಸಂಸಾರಾಂತ್‌ಚ್ ಭಾರತಂತ್ ಉಣೆಂ......!!!!
***************************************
- ಪ್ರಮೋದ್ ಜೆ. ರಾಡ್ರಿಗ್ಸ್ , ಹೊಸ್ಪೆಟ್
pramrods@gmail.com
