RAKNNO
2005 ಇಸ್ವೆಂತ್ ಪ್ರಕಾಶಿತ್ ಜಾಲ್ಲ್ಯಾ, 768 ಪುಟಾಂಚಾ ಹ್ಯಾ ಬುಕಾಂತ್ ಆರ್ಮ್‌ಸ್ಟ್ರಾಂಗಾಚಾ ಜೀವನಾಚಿಂ ಸಬಾರ್ ಘಡಿತಾಂ ಉಲ್ಲೇಕ್ ಕೆಲ್ಯಾಂತ್.
ನೀಲ್ ಆರ್ಮ್‌ಸ್ಟ್ರಾಂಗ್ ಜಲ್ಮಾಲ್ಲೊ 1930 ಚಾ ಆಗೊಸ್ತ್ ಪಾಂಚ್ ತಾರಿಕೆರ್, ಅಮೆರಿಕಾಚಾ ಒಹಿಹೊಂತ್. ತಾಚೊ ಬಾಪಯ್ ಸ್ಟೀಫನ್ ಆರ್ಮ್‌ಸ್ಟ್ರಾಂಗ್, ಸರ್ಕಾರಿ ನೌಕರ್. ಆವಯ್ ವಿಯೊಲ್ಲಾ ಲೂಯಿಸ್. 1947 ಇಸ್ವೆಂತ್ ತೊ Purdue University ಂತ್ ಏರೊಸ್ಫೇಸ್ ಇಂಜಿನಿಯರಿಂಗ್ ಶಿಕೊಂಕ್ ಸೆರ್ವಾಲೊ.
1955 ಇಸ್ವೆಂತ್ ಹಾಕಾ ಹಿ ಡಿಗ್ರಿ ಮೆಳ್ಳಿ. ಹ್ಯಾಚ್ ವೆಳಾರ್ ತೊ ಅಮೆರಿಕಾಚಾ ನೇವಿಂತ್ ನೇವಾಲ್ ಪೈಲಟ್ ಜಾವ್ನ್ ಸೆವಾ ದೀವ್ನ್ ಆಸ್‌ಲ್ಲೊ. ಕೊರಿಯಾ ಝುಜಾಂತ್‌ಯೀ ಹಾಣೆಂ ಸಕ್ರೀಯ್ ಪಾತ್ರ್ ಘೆತ್‌ಲ್ಲೊ. ಹ್ಯಾ ಝುಜಾ ಉಪ್ರಾಂತ್ ತಾಣೆಂ Dryden Flight Research Center ಂತ್ ತಪಾಸ್ಣಿ ಪೈಲಟ್ (Test Pilot) ಜಾವ್ನ್ ವಾವ್ರ್ ಕರ್ನ್ ಆಸ್‌ಲ್ಲೊ. ಹಾಂಗಾ ತೊ ವಿವಿಧ್ ವಿಮಾನಾಂಚಿ ತಪಾಸ್ಣಿ ವಿವಿಧ್ ವೇಗಾಂತ್ ಆನಿ ವಿವಿಧ್ ಉಬ್ರಾಯೆರ್ ಚಲವ್ನ್ ಆಸ್‌ಲ್ಲೊ.
1962 ಇಸ್ವೆಂತ್ ಹಾಣೆಂ ಯುನಿವರ್ಸಿಟಿ ಆಫ್ ಕ್ಯಾಲಿಪೊರ್ನಿಯಾ ಥಾವ್ನ್ ಏರೊಸ್ಫೇಸ್ ಇಂಜಿನಿಯರಿಂಗಾಂತ್ ಮಾಸ್ಟರ್ ಡಿಗ್ರಿಯೀ ಆಪ್ಣಾಯ್ಲಿ...
1960 ಚೊ ಕಾಳ್ ತೊ. ಅಮೆರಿಕಾ ಆನಿ ಸೊವಿಯಾತ ಮಧೆಂ ಥಂಡ್ ಝುಜ್ ಭರನ್ ಚಲೊನ್ ಆಸ್‌ಲ್ಲೆಂ. ಹ್ಯಾಚ್ ವೆಳಾರ್ ನಾಸಾ ಆಪ್ಲೆಂ ದುಸ್ರೆಂ ಅಂತ್ರಾಳ್-ಯಾತ್ರಿ ಪಂಗಡ್ ರಚನ್ ಕರುಂಕ್ ಲಾಗ್ಲೆಂ. ಆರ್ಮ್‌ಸ್ಟ್ರಾಂಗಾಕ್ ಪಯ್ಲೆಂ ಅಂತ್ರಾಳ್-ಯಾತ್ರಿ ಜಾಂವ್ಚಿ ಕಸಲಿಯೀ ಉಮೆದ್ ನಾತ್ಲ್ಯಾರೀ ಆಪೊಲ್ಲೊ ಕಾರ್ಯಕ್ರಮ ವಿಶ್ಯಾಂತ್ ಆಸಕ್ತ್ ಜಾಲ್ಯಾನ್ ತಾಣೆಂ ನಾಸಾಕ್ ಅರ್ಜಿ ಘಾಲಿ. ಸುಲಭಾಯೆನ್ ವಿಂಚೊವ್ನೀ ಆಯ್ಲೊ. ಹಾಚಾ ಉಪ್ರಾಂತ್ ಹಾಕಾ ಇತರ್ ಅಂತ್ರಾಳ್-ಯಾತ್ರಿ ಸವೆಂ ಕಠೀನ್ ತರ್ಬೇತ್ ಮೆಳ್ಳಿ.
ಆಂತ್ರಾಳ್-ಯಾತ್ರಿ ಜಾಲ್ಲ್ಯಾ ಉಪ್ರಾಂತ್ ಆರ್ಮ್‌ಸ್ಟ್ರಾಂಗಾಕ್ ಮೆಳ್ಳಿ ಪಯ್ಲಿ ವಡ್ಲಿ ಜವಬ್ದಾರಿಚ್ ಜೆಮಿನಿ- 8 ಚೆಂ ಪ್ರಯೋಗ್. ಅಂತ್ರಾಳಾರ್ ದೋನ್ ತಾರ್ವಾಂಕ್ ಜೋಡನ್ ಕರ್ಚೊ ಪ್ರಯೋಗ್ ತೊ. ಪುಡ್ಲೆಂ ಚಂದ್ರಯಾನ್ ಯಶಸ್ವಿ ಜಾಯ್ಜೆ ಜಾಲ್ಯಾರ್ ನಾಸಾಕ್ ಹ್ಯಾ ಜೆಮಿನಿ-೮ ಪ್ರಯೋಗಾಚೆಂ ಜಯ್ತ್ ನಿರ್ಣಾಯಕ್ ಜಾಲ್ಲೆಂ. ಆರ್ಮ್‌ಸ್ಟ್ರಾಂಗ್ ಹ್ಯಾ ಪ್ರಯೋಗಾಚೊ ಕಮಾಂಡ್ ಪೈಲಟ್ ಜಾಲ್ಯಾರ್ , ಡೇವಿಡ್ ಸ್ಕಾಟ್ ಸಹ ಪೈಲಟ್ ಜಾವ್ನ್ ಆಸ್‌ಲ್ಲೊ. 1966 ಚಾ ಮಾರ್ಚ್ 16 ತಾರಿಕೆರ್ ನಾಸಾನ್ ಪಯ್ಲೆಂ ಅಜೆನಾ(Ajena) ಮ್ಹುಳ್ಯಾ ಅಂತ್ರಾಳ್-ತಾರ್ವಾಕ್ ಸೂಮಾರ್ 298 ಕಿ.ಮೀ. ವಯ್ಲ್ಯಾ ಚಕ್ರೀಯ್ ಕಕ್ಷೆರ್ ಪಾವಯ್ಲೆಂ. ಉಪ್ರಾಂತ್ ಆರ್ಮ್‌ಸ್ಟ್ರಾಂಗ್ ಆನಿಂ ಸ್ಕಾಟ್ ಆಸ್‌ಲ್ಲೆಂ ಜೆಮಿನಿ ತಾರ್ವಾಕೀ ಕಕ್ಷೆರ್ ಪಾವಯ್ಲೆಂ. ಹ್ಯಾ ಜೆಮಿನಿ ತಾರ್ವಾನ್ , ಅಜೆನಾಕ್ ಸೊದುನ್ ಕಾಡ್ನ್ , ತ್ಯಾ ತಾರ್ವಾಕ್ ಜೋಡನ್ ಜಾಯ್ಜೆ ಆಸ್‌ಲ್ಲೆಂ. ಉಪ್ರಾಂತ್ ಥೊಡಿಂ ಪ್ರಯೋಗಾಂ ಕರ್ನ್ ಅಜೆನಾ ಥಾವ್ನ್ ಸುಟೊನ್ ಭುಂಯ್ಕ್ ಪಾಟಿಂ ಯೆಜೆ ಆಸ್‌ಲ್ಲೆಂ. ಆರ್ಮ್‌ಸ್ಟ್ರಾಂಗಾನ್ ಜೆಮಿನಿಕ್ ಯಶಸ್ವಿ ರೀತಿನ್ ಜೋಡನ್ ಕರ್ನ್ ಪ್ರಯೋಗ್ ಸಫಲ್ ಕೆಲೊ. ಆಶೆಂ ಆಂತ್ರಾಳ್ ಇತಿಹಾಸಾಂತ್ ಏಕ್ ನವೊ ಧಾಕ್ಲೊಯೀ ರಚ್ಲೊ. ಪುಣ್ ಥೊಡ್ಯಾ ತಾಂತ್ರಿಕ್ ಕಾರಣಾ ನಿಮ್ತಿಂ ಚಡಿತ್ ಪ್ರಯೋಗ್ ಕರುಂಕ್ ಜಾಯ್ನಾಸ್ತಾನ ಅಜೆನಾ ಥಾವ್ನ್ ಸುಟೊನ್ ತುರಂತ್ ಭುಂಯ್ಕ್ ಯೆಜೆ ಪಡ್ಲೆಂ. ಉಪ್ರಾಂತ್ ಆರ್ಮ್‌ಸ್ಟ್ರಾಂಗಾನ್ ಜೆಮಿನಿ-11 ಆನಿಂ ಅಪೊಲ್ಲೊ -8 ಪ್ರಯೋಗಾಕ್ backup ಕಮಾಂಡರ್ ಜಾವ್ನ್ ವಾವ್ರ್ ಕೆಲೊ. ಹ್ಯಾ ಮಧೆಂ ನಾಸಾನ್ ಪಯ್ಲ್ಯಾ ಪಾವ್ಟಿಂ ಚಂದ್ರಾರ್ ಮನ್ಶ್ಯಾಕ್ ದೆವಂವ್ಚಾ ಅಪೊಲ್ಲೊ-11 ಪ್ರಯೋಗಾಕ್ ಆರ್ಮ್‌ಸ್ಟ್ರಾಂಗಾಕ್ ಮಿಷನ್ ಕಮಾಂಡರ್ ಜಾವ್ನ್ ನಿಯುಕ್ತ್ ಕರ್ಚೆಂ ಮಹತ್ವ್ ಘೊಷಣ್ ಕೆಲೆಂ. ಹ್ಯಾ ಖಾತಿರ್ ತಾಕಾ Lunar Landing Training Vehicle ಮ್ಹುಳ್ಳೆಂ ವಿಶೇಶ್ ವಾಹನ್ ವಿನ್ಯಾಸ್ ಕರ್ನ್ ತರ್ಭೇತ್ ದೀವ್ನ್ ಆಸ್ತಾನಾ ತೆಂ ವಿಫಲ್ ಜಾವ್ನ್ ತಾಣೆಂ ಭಯ್ರ್ ಉಡೊನ್ ಜೀವ್ ವಾಂಚವ್ಚೆಂ ಘಡಿತ್‌ಯೀ ಗಡ್ಲೆಂ. ತ್ಯಾ ದೀಸ್ ತೊ ಜೀವಂತ್ ಉರ್‍ಲೊಚ್ ದೆವಾಚಿ ವಿಶೇಶ್ ಮಾಂಡವಳ್..!!
 |
| ಚಂದ್ರಾಕ್ ಪಯ್ಲೆಂ ಪಾವ್ಟಿಂ ಗುಡ್ಡಾಯ್ಲ್ಯಾ ನೀಲ್ ಆರ್ಮ್ ಸ್ಟ್ರಾಂಗಾಚಾ ಮೊಚಾಚಿ ಅಚ್ಚಿ... |
ಅಬ್ಳೆ ಅತಾಂ ಅಪೊಲ್ಲೊ-11 ಉಬ್ಚೊ ದೀಸ್ ಆಯ್ಲೊ. 1969 ಚಾ ಜುಲೈ -16 ತಾರಿಕೆಚೊ ದೀಸ್ ತೊ. ಆರ್ಮ್‌ಸ್ಟ್ರಾಂಗಾ ಸವೆಂ ಅಪೊಲ್ಲೊ-11 ಂತ್ ಕಮಾಂಡ್ ಮೊಡ್ಯೂಲಾಚೊ ಪೈಲಟ್ ಮೈಕಲ್ ಕಾಲಿನ್ಸ್ ಆನಿಂ ಚಂದ್ರ್ ವಾಹನಾಚೊ ಪೈಲಟ್ ಆಲ್ಡ್ರೀನ್ ಆಸ್‌ಲ್ಲೆ. ಚಾರ್ ದಿಸಾಂಚಾ ಪಯ್ಣಾ ಉಪ್ರಾಂತ್ ತೆ ಚಂದ್ರಾಚ ಕಕ್ಷೆರ್ ಪಾವ್‌ಲ್ಲೆ. ಉಪ್ರಾಂತ್ ಆರ್ಮ್‌ಸ್ಟ್ರಾಂಗ್ ಆನಿಂ ಆಲ್ಡ್ರೀನ್ ಚಂದ್ರ್-ವಾಹನಾರ್ ರಿಗೊನ್ ಕಾಲಿನ್ಸ್ ಆಸ್‌ಲ್ಲ್ಯಾ ಕಮಾಂಡ್ ಮೊಡ್ಯೂಲಾ ಥಾವ್ನ್ ವಿಂಗಡ್ ಜಾಲೆ. ಜುಲೈಚಾ 21 ತಾರಿಕೆರ್ ಚಂದ್ರ್-ವಾಹನ್ ಚಂದ್ರಾರ್ ದೆವೊಂಕ್ ಭಯ್ರ್ ಸರ್ಲೆಂ. ಚಂದ್ರಾಚಾ ಏಕಾ ಸುರಕ್ಷಿತ್ ಜಾಗ್ಯಾರ್ ತೆಂ ಸ್ವಯಂಚಾಲಿತ್ ದೆಂವ್ಚಾ ಭರಿ ಪ್ರೊಗ್ರಾಮ್ ಕೆಲ್ಲೆಂ ತೆಂ. ಚಂದ್ರಾಚಾ ದರ್‍ಣೆಕ್ ಲಾಗ್ಗಿಂ ಪಾವ್ತಾನ ಆರ್ಮ್‌ಸ್ಟ್ರಾಂಗಾಕ್ ದಿಸ್ಲೆಂಕೀ ವಾಹನ್ ಸುರಕ್ಷಿತ್ ಜಾಗ್ಯಾ ಬದ್ಲಾ ಏಕ್ ವಡ್ಲೆ ವಡ್ಲೆ ಫಾತೊರ್ ಆಸ್‌ಲ್ಲ್ಯಾ ಗುಂಡ್ಯೆಕ್ ದೆಂವ್ತಾ ಮ್ಹುಣ್. ಆರ್ಮ್‌ಸ್ಟ್ರಾಂಗಾ ಕಡೆ ಚಿಂತುಂಕ್ ವೇಳ್ ನಾತ್‌ಲ್ಲೊ. ತಕ್ಷಣಾ ತಾಣೆಂ ಸಗ್ಳ್ಯಾ ವಾಹನಾಚೆಂ ನಿಯಂತ್ರಣ್ ಹಾತಿಂ ಘೆತುನ್ ದುಸ್ರೆ ಕಡೆ ಗುಂವ್ಡಾಯ್ಲೆಂ. ವಾಹನಾಚೆಂ ಇಂಧನ್ ಮುಗ್ದೊಂಕ್ 20 ಸೆಕುಂಡಾಂ ಆಸ್ತಾ ಮ್ಹುಣ್ತಾನಾ ತಾಣೆ ಎಕಾ ಜಾಗ್ಯಾರ್ ತೆಂ ದೆವಯ್ಲೆಂಚ್..! “Houston Tranquility base here, the Eagle has landed…” ಮ್ಹುಳ್ಳಿಂ ತಾಚಿಂ ಉತ್ರಾಂ ಚಂದ್ರಾ ಥಾವ್ನ್ ಪಯ್ಲೆ ಪಾವ್ಟಿಂ ಭುಂಯ್ಕ್ ಆಯ್ಕಾಲಿಂ. ಉಪ್ರಾಂತ್ ಜಾಲ್ಲೆಂ ಇತಿಹಾಸ್. ಚಂದ್ರಾರ್ ತಾಣೆ ಪಾಯ್ ದವರ್ಲೊ, ಆಲ್ಡ್ರೀನಾನ್ ತಾಕಾ ಸಾಂಗಾತ್ ದಿಲ್ಲೊ, ಅದ್ಯಕ್ಷ್ ನಿಕ್ಸನಾ ಕಡೆ ಥಂಯ್ ಥಾವ್ನ್ ಫೊನಾರ್ ಉಲಯ್ಲೊ,ಚಂದ್ರಾಚಿ ಮಾತಿ ಕಾಣ್ಘೆಲ್ಲಿ....!!!!
ಚಂದ್ರ ಥಾವ್ನ್ ಪಾಟಿಂ ಆಯ್ಲ್ಯಾ ದೋನ್ ವರ್ಸಾಂ ಉಪ್ರಾಂತ್ ಆರ್ಮ್‌ಸ್ಟ್ರಾಂಗ್ ನಾಸಾ ಥಾವ್ನ್ ನಿವ್ರತ್ತ್ ಜಾಲೊ. ಹಾಚಾ ಉಪ್ರಾಂತ್ ಥೊಡೆ ದೇಸ್ ಭವೊಂಕ್ ಗೆಲೊ ತೊ. ಥೊಡ್ಯಾ ಯುನಿವರ್ಸಿಟಿಂತ್ ಪ್ರಾಧ್ಯಪಕ್ ಜಾವ್ನ್ ವಾವ್ರ್‌ಯೀ ತಾಣೆಂ ಭೆಟಯ್ಲೊ. ನಾಸಾಚ ಥೊಡ್ಯಾ ವಿಚಾರಣ್ ಕಮಿಟಿಚೊ ಗುರ್ಕಾರ್ ಜಾವ್ನ್‌ಯೀ ಕಾಮ್ ಕೆಲೆಂ ತಾಣೆ. 1996 ಂತ್ ತಾಣೆ ಅಪ್ಲ್ಯಾ ಪತಿಣ್ ಜೆನೆಟಾಕ್ ವಿಚ್ಛೇಧನ್ ದೀವ್ನ್ ಕೆರೊಲಾ ಕಡೆ ಕಾಜಾರ್ ಜಾಲೊ. 1994 ಉಪ್ರಾಂತ್ ತಾಣೆಂ ಖಂಚಾಯೀ ಅಟೊಗ್ರಾಪಕ್ ದಸ್ಕತ್ ಗಾಲ್ಚೆಂ ಬಂದ್ ಕೆಲೆಂ. ಕಿತ್ಯಾಕ್ ಮ್ಹುಳ್ಯಾರ್ ebay.com ತಸಲ್ಯಾ ಜಾಳಿ-ಜಾಗ್ಯಾರ್ ಹಾಚೆ ಅಟೊಗ್ರಾಫ್ ಹಜಾರ ಥಾವ್ನ್ ಪಾಂಚ್ ಹಜಾರ್ ಡೊಲಾರ್ ಮ್ಹುಣಾಸರ್ ವಿಕ್ರ್ಯಾಪಾಕ್ ದವರ್ಲೆ. 2005 ಇಸ್ವೆಂತ್ ಆರ್ಮ್‌ಸ್ಟ್ರಾಂಗಾನ್ ಆಪ್ಲೆ ಕೇಸ್ ತೀನ್ ಹಜಾರ್ ಡೊಲಾರಾಂಕ್ ವಿಕ್‌ಲ್ಲ್ಯಾ ಕೆಲ್ಶ್ಯಾ ವಿರೊಧ್ ಕೊಡ್ತಿಂತ್ ಫಿರ್ಯಾದ್ ಮಾಂಡುನ್ ತೆ ಪಯ್ಸೆ ಸಂಘ್ ಸಂಸ್ಥ್ಯಾಂಕ್ ದಾನ್ ಕೆಲೆ....!
ಆಜ್ ಸಂಸಾರ್ ಭರ್ ಆರ್ಮ್‌ಸ್ಟ್ರಾಂಗ್ ನಾವಾಚೆ ಸಬಾರ್ ಸಂಘ್ ಸಂಸ್ಥೆ, ಬಿಲ್ಡಿಂಗಾಂ, ಶಿಕ್ಷಣ್ ಸಂಸ್ಥೆ, ಮಾರೊಗ್ ಆಸಾತ್. ಹ್ಯಾ ಆರ್ಮ್‌ಸ್ಟ್ರಾಂಗಾಕ್ ಆತಾಂ 79ವರ್ಸಾಂ. ತೊ ಅತಾಂ ಒಹಿಹೊಚಾ Cincinnati ಮ್ಹುಳ್ಯಾ ಕಡೆ ವಸ್ತಿ ಕರ್ನ್ ಆಸಾ. ಚಂದ್ರಾರ್ ಪಯ್ಲೆ ಪಾವ್ಟಿಂ ಪಾಯ್ ತೆಂಕ್ತಾನಾ ತಾಣೆ ಮ್ಹುಳ್ಳಿಂ ಉತ್ರಾಂ “That’s one small step for [a] man, one giant leap for mankind” ಮನ್ಶ್ಯಾ ಇತಿಹಾಸಾಂತ್ ಕೆದಳಾಯೀ ಅಮರ್. ತ್ಯಾ ಲ್ಹಾನ್ ಮೆಟಾಕ್ ಅತಾಂ ಚಾಳಿಸ್ ವರ್ಸಾಂ..! ಹ್ಯಾಟ್ಸ್ ಆಫ್ ಆರ್ಮ್‌ಸ್ಟ್ರಾಂಗ್....!!!
-ಪ್ರಮೋದ್ ಜೆ. ರಾಡ್ರಿಗ್ಸ್, ಹೊಸ್ಫೆಟ್ (RAKNNO)
