ನವೆ ಸ೦ಸೋಧ್, ನವಿ೦ ವ್ಯಾಖ್ಯಾನ೦
ಹ್ಯಾ ನೆಕೆತ್ರ್ ಶಾಸ್ತ್ರ್ಯಾ೦ಚಾ ಸಮ್ಮೇಳನಾ ಉಪ್ರಾ೦ತ್ ಸುರ್ಯಾಕ್ ಆನಿ ಆಸ್ಚೆ ಗ್ರಹ್ ಆಟ್ ಮಾತ್ರ್. ಕಿತ್ಯಾಕ್ ಮ್ಹುಳ್ಯಾರ್ ಹ್ಯಾ ನೆಕೆತ್ರ್‌ಶಾಸ್ತ್ರಿ೦ನಿ೦ ‘ಗ್ರಹ್’ ಮ್ಹುಳ್ಯಾ ಸಬ್ದಾಕ್ ಏಕ್ ನವೆ೦ಚ್ ವ್ಯಾಖ್ಯಾನ್ ದಿಲಾ೦. ಹ್ಯಾ ನವ್ಯಾ ವ್ಯಾಖ್ಯಾನಾ ಪರ್ಮಾಣೆ ಏಕ್ ಆ೦ತ್ರಾಳ್ ವಸ್ತ್ ಗ್ರಹ್ ಮ್ಹುಣ್ ಮಾನಿಜೆ ಜಾಲ್ಯಾರ್
1) ಏಕ್ ನಿರ್ದಿಷ್ಟ್ ಕಕ್ಷೆರ್ ಸುರ್ಯಾಕ್ ಬೊವಾರಿ೦ ಮಾರಿಜೆ.
2) ಅಪ್ಲ್ಯಾ ಗುರುತ್ವಾಕರ್ಷನ್ ಸಕ್ತೆ ದ್ವಾರಿ೦, ದುಸ್ರ್ಯಾ ಬಳ್‌ವಂತ್ ಆಂತ್ರಾಳ್ ವಸ್ತುಂಚಾ ಸಕ್ತೆ ಥಾವ್ನ್ ಭಯ್ರ್ ಯೇ೦ವ್ಕ್ ಗರ್ಜೆಪೂರಿತ್ ವಜನ್ ಆಸಾಜೆ ಆನಿ೦ ಸರಿಸುಮಾರ್ ಗೋಳಾಕಾರ್ ಜಾವ್ನ್ ಆಸಾಜೆ.
3) ಸೆಜಾರಿ ಗ್ರಹಾಚಾ ಕಕ್ಷೆ ವ್ಯಾಪ್ತಿರ್ ಆಪ್ಲಿ ಕಕ್ಷಾ ವಿಸ್ತರು೦ಕ್ ನಜೊ.
ವಯ್ಲಿ೦ ನಿಯಮಾ೦ ಪಾಳಿ೦ ಜಾಲ್ಯಾರ್ ಪ್ಲೂಟೊಕ್ ಆಮಿ ಖ೦ಡಿತ್ ಜಾವ್ನ್ ಗ್ರಹಾ೦ಚಾ ಪಟ್ಟೆ ಥಾವ್ನ್ ಭಯ್ರ್ ದವರಿಜೆ ಪಡ್ತಾ. ಕಿತ್ಯಾಕ್ ಮ್ಹುಳ್ಯ್ಯಾರ್ ಚಡಿತ್ ದೀರ್ಘ್ ವ್ರತ್ತೀಯ್ ಜಾವ್ನಾಸ್ಚಿ ಪ್ಲೂಟೊಚಿ ಕಕ್ಷೆಚೊ ಥೊಡೊ ವಾ೦ಟೊ ನೆಪ್ಚೂನ್ ಗ್ರಹಚಾ ಕಕ್ಷೆ ವ್ಯಾಪ್ತಿ೦ತ್ ಉತಾರ್ನ್ ಯೆತಾ. ಸುರ್ಯಾಕ್ ಏಕ್ ಪಾವ್ಟಿ೦ ಭ೦ವ್ಡಿ ಮಾರು೦ಕ್ 247.9 ವರ್ಸಾ೦ ಕಾಣ್ಘೆ೦ವ್ಚೆ ಪ್ಲೂಟೊ, ಹಾ೦ತ್ಲಿ೦ ಸರಿಸುಮಾರ್ 20 ವರ್ಸಾ೦ ನೆಪ್ಚೂನಾಚ್ಯಾಕೀ ಬಿತರ್ ಯೇವ್ನ್ ಸುರ್ಯಾಕ್ ಲಾಗ್ಗಿ೦ ಆಸ್ತಾ. ಆಶೆ೦ ವಯ್ಲ್ಯಾ ತಿಸ್ರ್ಯಾ ನಿಯಮಾ ಪ್ರಕಾರ್ ಪ್ಲೂಟೊಕ್ ಗ್ರಹಾ೦ಚಾ ಪಟ್ಟೆ ಥಾವ್ನ್ ಭಯ್ರ್ ವಚಜೆಸ್.
ಗ್ರಹ್ ನ್ಹ೦ಯ್ ಜಾಲ್ಯಾರ್ ಪ್ಲೂಟೊಕ್ ಖಂಚಾ ನಾ೦ವಾನ್ ಆಪಾಂವ್ಚೆಂ ? ನೆಕೆತ್ರ್‌ಶಾಸ್ತ್ರ್ಯಾನಿ೦ ಹಾಕಾ ಆನ್ಯೇಕ್ ಜವಾಬ್ ಸೊದೊನ್ ಕಾಡ್ನ್, ಪ್ಲೂಟೊಕ್ ‘ಕುಬ್ಜ್ ಗ್ರಹ್’ ಮ್ಹುಳ್ಳೆ೦ ಏಕ್ ನವೆ೦ ನಾ೦ವ್ ದೀವ್ನ್ ಸೊಡ್ಲಾ೦. ಹ್ಯಾ ಕುಬ್ಜ್ ಗ್ರಹಾ೦ಚಾ ಪಟ್ಟೆ೦ತ್ ಪ್ಲೂಟೊ ಸವೆ೦ ಮಾಗಿರ್ ದೋನ್ ಆ೦ತ್ರಾಳ್‌ಕಾಯ್ ಸೆರ್ವಲ್ಯಾತ್. ತಾ೦ತ್ಲೆ೦ ಏಕ್ ಸಿರೆಸ್. ಆಜ್ ಆಮಿ ಕ್ಷುದ್ರ್‌ಗಹಾ೦(Asteroids) ಮ್ಹುಣ್ ಆಪ೦ವ್ಚ್ಯಾ, ಮಂಗಳಾ ಆನಿ೦ ಗುರು ಗ್ರಹಾಚಾ ಮದೆ೦ ಆಸ್‌ಲ್ಯಾ ಹಜಾರೋ೦ ‘ಧೂಳಿ’೦ತ್ಲೊ ವಡ್ಲೊ ಕುಡ್ಕೊ ಜಾವ್ನಾಸ್ಚ್ಯಾ ಸಿರೆಸಾಕ್, ಸಬಾರ್ ವರ್ಸಾ೦ ಪಯ್ಲೆ೦ ಗ್ರಹಾಚೆ೦ ಸ್ಥಾನ್ ಆಸ್‌ಲ್ಲೆ೦. ಪೂಣ್ ಸೂಮಾರ್ ದೊನ್ಶ್ಯಿ ವರ್ಸಾ೦ ಆದಿ೦ ಹ್ಯಾಚ್ ನೆಕೆತ್ರ್‌ಶಾಸ್ತ್ರ್ಯಾ೦ನಿ ಪ್ಲೂಟೊ ಬರಿಚ್ ಸಿರೆಸಾಕೀ ಖೊಟ್ ಮಾರ್ನ್ ಭಯ್ರ್ ದವರ್ಲೆ೦. ಪುಣ್ ಆಜ್ ಸಿರೆಸಾಕ್ ಕುಬ್ಜ್ ಗ್ರಹ್ ಮ್ಹುಳ್ಳೆ೦ ಸ್ಥಾನ್ ಮೆಳ್ಯಾನ್ ಇಲ್ಲೆ೦ ಸಮಧಾನ್ ಜಾ೦ವ್ಕ್ ಪುರೊ !.ಕುಬ್ಜ್ ಗ್ರಹಾ೦ಚಾ ಪಟ್ಟೆ೦ತ್ ಆಸ್ಚೆ೦ ನಿಮಾಣೆ ನಾ೦ವ್‌ಚ್ ‘ಕ್ಸೆನಾ’. ಕ್ಸೆನಾಚೊ ಅವಿಷ್ಕಾರ್ ಜಾಲ್ಲೊಚ್ 2005 ಇಸ್ವೆ೦ತ್. ದಾವೆ೦ ಗ್ರಹ್ ಮ್ಹುಣೊನ್ ಗೆಲೆತ್ಯಾ ವರ್ಸಾ ಭಾರಿ ಖಬರ್ ಕೆಲ್ಯಾ ಕ್ಸೆನಾಕ್ ಕುಬ್ಜ್ ಗ್ರಹಾ೦ಚಾ ಪಟ್ಟೆ೦ತ್‌ಚ್ ಸಂತೊಸ್ ಪಾವಿಜೆ ಪಡ್ಲಾ. ಚರಿತ್ರೆ೦ತ್ ನಾ೦ವ್ ಕರು೦ಕ್ ಮ್ಹುಣ್ ಭಯ್ರ್ ಸರ್‌ಲ್ಲೊ, ಕ್ಸೆನಾಚೊ ಅವಿಷ್ಕಾರಿ ಬಾವ್ಡ್ಯಾ ಮೈಕೆಲ್ ಬ್ರೌನಾಕ್ ಅತಾ೦ ಇತಿಹಾಸಾ೦ತ್‌ಯೀ ಕುಬ್ಜ್ ಜಾಯ್ಜೆ ಪಡ್ಲಾ೦......!!!!
ಪ್ಲೂಟೊಚೆಂ ಏಕ್ ಇತಿಹಾಸ್
ಹಜಾರೋಂ ವರ್ಸಾಂ ಆದಿಂಚ್ ಮನ್ಶ್ಯಾಂಕ್ ಬುಧ,ಶುಕ್ರ್,ಮಂಗಳ್,ಗುರು ಆನಿಂ ಶನಿ ಗ್ರಹಾಂ ವಿಶ್ಯಾ೦ತ್ ಮಾಹೆತ್ ಆಸ್‌ಲ್ಲಿ. ಕಿತ್ಯಾಕ್ ಮ್ಹುಳ್ಯಾರ್ ತೆ ಉಗ್ತ್ಯಾ ದೊಳ್ಯಾಂಕ್ ದಿಸ್ತಾತ್. ಪುಣ್ ಕೆದಳಾ ಗೆಲಿಲಿಯೊನ್ ಟೆಲಿಸ್ಕೊಪಾಚೊ ಅವಿಷ್ಕಾರ್ ಕೆಲೊಗೀ, ಆಂತ್ರಾಳ್ ವಿಜ್ನಾನಾಂತ್‌ಯೀ ನವೆ ಅವಿಷ್ಕಾರ್ ಜಾಂವ್ಕ್ ಪಾವ್ಲೆ. 1780 ೦ತ್ ಪಯ್ಲೆ ಪಾವ್ಟಿಂ ವಿಲಿಯಂ ಹರ್ಷಲಾನ್ ಯುರೇನಸ್ ಗ್ರಹಾಕ್ ಸೊದುನ್ ಕಾಡ್ಲೆ೦. ಪುಣ್ ಯುರೇನಸ್ ಗ್ರಹಾಚಾ ಕಕ್ಷೆಂತ್ ಕಸಲೊಗೀ ಗೊಂದೊಳ್ ದಿಸೊನ್ ಯೆತಾಲೊ. ಹೊ ಗೊಂದೊಳ್ ಕಸಲೊ ಮ್ಹುಣ್ ವಿಜ್ನಾನಿ ಚಿ೦ತುನ್ ಆಸ್ತನಾ೦ಚ್ ಉಪ್ಯೋಗಾಕ್ ಆಯ್ಲೊ ನ್ಯೂಟನಾಚೊ ಗುರುತ್ವಾಕರ್ಷಣ್ ನಿಯಮ್. ಹ್ಯಾ ನಿಯಮ ಪ್ರಕಾರ್ ಭಯ್ಲೆ೦ ಕಸಲೇ೦ಗೀ ಏಕ್ ವಡ್ಲೆ೦ ಆ೦ತ್ರಾಳ್‌ಕಾಯ್ ಆಪ್ಲ್ಯಾ ಗುರುತ್ವಾಕರ್ಷಣ್ ಸಕ್ತೆ ವರ್ವಿ೦ ಯೂರೇನಸಚಾ ಕಕ್ಷೆ ವಯ್ರ್ ಪರಿಣಾಮ್ ಹಾಡ್ನ್ ಹ್ಯಾ ಗೊ೦ದೊಳಾಕ್ ಕಾರಣ್ ಜಾತಾ ಮ್ಹುಣ್ ವಿಜ್ನಾನಿ ಪಾತ್ಯೆಲೆ. ಸಬಾರ್ ಸೊದ್ನಾ೦ ಉಪ್ರಾ೦ತ್ 1841 ೦ತ್ ಹೆ೦ ಆ೦ತ್ರಾಳ್‌ಕಾಯ್ ಪತ್ತೊ ಕೆಲ್ಲಿ ಕೀರ್ತ್ ಚಲ್ತಾ ಜೋನಾನ್ ಗಾಲೆ ಮ್ಹುಳ್ಯಾ ನೆಕೆತ್ರ್‌ಶಾಸ್ರ್ಯಾಕ್. ಹೆ೦ ಆ೦ತ್ರಾಳ್‌ಕಾಯ್ ದುಸ್ರೆ೦ ಖ೦ಚಯೀ ನ್ಹ೦ಯ್, ಬಗಾರ್ ತೆ೦ ನೆಪ್ಚೂನ್ ಗ್ರಹ್.
ಪುಣ್ ನೆಪ್ಚೂನ್ ಗ್ರಹಾಚಾ ಕಕ್ಷೆ೦ತ್‌ಯೀ ತೊಚ್ ಗೊ೦ದೊಳ್ ದಿಸೊನ್ ಯೇವ್ನ್ ಆಸ್‌ಲ್ಲೊ. 1909 ೦ತ್ ಪರ್ಸಿವಲ್ ಲೊವೆಲ್ ಮ್ಹುಳ್ಯಾನ್ ನೆಪ್ಚೂನಾ ಭಯ್ರ್ ಆನ್ಯೇಕ್ ಗ್ರಹ್ ಆಸಾ ಆಶೆ೦ ಜಾವ್ನ್ ಹೊ ಗೊ೦ದೊಳ್ ಮ್ಹುಣ್ ಸಾ೦ಗ್ಲೆ೦. ತ್ಯಾ ಗ್ರಹಾಚೆ೦ ಮಸ್ತ್ ಸೊದ್ನಾ೦ ಕೆಲ್ಯಾರೀ ತಾಕಾ ತೆ೦ ಮೆಳೊಂಕ್ ನಾ. ಪೂಣ್ ಕ್ಲೈಡ್ ಟಾ೦ಬಾಗ್ ಮ್ಹುಳ್ಳೊ ಏಕ್ಲೊ ಹ್ಯಾ ಗ್ರಹಾ ಖಾತಿರ್ ಭಾರಿ ಸೊದ್ನಾ೦ ಕರ್ನ್ ಆಸ್‌ಲ್ಲೊ. ಸಬಾರ್ ವರ್ಸಾ೦ಚಾ ಪರಿಶ್ರಮಾ ಉಪ್ರಾ೦ತ್ 1930 ೦ತ್ ಕ್ಲೈಡಾಕ್ ತೊ ಗ್ರಹ್ ಆಖ್ರೆಕೀ ಮೆಳ್ಳೊ. ಆಶೆ೦ ಅರಿಜೊನಾಚಾ ಲೊವೆಲ್ ವಿಕ್ಷಣಾಲಾಯ್ ಥಾವ್ನ್ ತಾಣೆ ಸೊದುನ್ ಕಾಡ್ಲೊ ಗ್ರಹಾಚ್ ಪ್ಲೂಟೊ !!!!!!!.
ಪ್ಲೂಟೊ ಕಿತ್ಯಾಕ್ ಭಯ್ರ್ ?
ಅ೦ತರಾಷ್ಟ್ರಿಯ್ ನೆಕೆತ್ರ್‌ಶಾಸ್ತ್ರ್ ಸ೦ಘಟನಾಕ್ ನವಿ೦ ನಿಯಮಾ೦ ಹಾಡ್ನ್ ಪ್ಲೂಟೊಕ್ ಗ್ರಹಾ೦ಚಾ ಪಟ್ಟೆ ಥಾವ್ನ್ ಭಯ್ರ್ ದವರು೦ಕ್ ಪ್ರಮುಖ್ ಕಾರಣ್೦ಚ್ ಆಧುನಿಕ್ ಅವಿಷ್ಕಾರಾ೦. 1930 ೦ತ್ ಪ್ಲೂಟೊಕ್ ಸೊದುನ್ ಕಾಡ್ಲ್ಯಾ ಉಪ್ರಾ೦ತ್ ತ್ಯಾ ಗ್ರಹಾಚೆ ಲಕ್ಷಣ್ ಸಮ್ಜಲೆ ಥೊಡೆ ವಿಜ್ನಾನಿನಿ೦ ಪ್ಲೂಟೊ ಭಯ್ರ್ ಆನಿಕೀ ಮಸ್ತ್ ಗ್ರಹಾ೦ ಆಸೊಂಕ್ ಪುರೊ ಮ್ಹುಣ್ ದುಬಾವ್ ಉಚಾರ್ಲೊ. 1951 ೦ತ್ ಡಚ್ ವಿಜ್ನಾನಿ ಗೆಹಾರ್ಡ್ ಕ್ಯೂಪರ್ ಮ್ಹುಳ್ಯಾನ್ ಪ್ಲೂಟೊ ಭಯ್ರ್ ಹಜಾರೋ೦ ದಾಕ್ಟ್ಯಾ -ದಾಕ್ಟ್ಯಾ ಗ್ರಹಾ೦ಚಿ ಏಕ್ ವಡ್ಲಿ ಪಟ್ಟಿಚ್ ಆಸಾ ಆನಿ೦ ಹಿ ಪಟ್ಟಿ ದಾಕ್ಟ್ಯಾ ಅವ್ದೆ೦ಚಾ ಸಬಾರ್ ಶಿಮ್ಟಿ ನೆಕೆತ್ರಾ೦ಕ್(Comets) ಜಲ್ಮ್ ದೀ೦ವ್ಕ್‌ಯೀ ಕಾರಣ್ ಮ್ಹುಣೊನ್ ಸಾ೦ಗಿಲಾಗ್ಲೊ. ಹಾಚಾ ಥೊಡ್ಯಾ ವರ್ಸಾ೦ ಉಪ್ರಾ೦ತ್ ಪ್ಲೂಟೊಕ್ ಚಾರೋನ್ ಮ್ಹುಳ್ಳೊ ಏಕ್ ವಡ್ಲೊ ಚ೦ದ್ರ್ ಆಸಾ ಮ್ಹುಣ್ ಖಳಿತ್ ಜಾಲೆ೦.
ಪೂಣ್ ವಡ್ಲಿ೦ ಅವಿಷ್ಕಾರಾ೦ ಜಾಲ್ಲಿ೦ 1992 ಉಪ್ರಾ೦ತ್‌ಚ್. ಸಾ೦ಗೊನ್ ಸಾ೦ಗೊನ್ ಹೊ ಕಾಳ್ ಹಬಲ್ ತಸಲ್ಯಾ ಆಧುನಿಕ್ ಟೆಲಿಸ್ಕೊಪಾಚೊ. ‘1992 QB1’ ಮ್ಹುಳ್ಳೆ೦ ಏಕ್ ಗ್ರಹ್ ಪಯ್ಲೆ ಪಾವ್ಟಿ ಕ್ಯೂಪರನ್ ಸಾ೦ಗ್‌ಲ್ಯಾ ಪಟ್ಟೆ೦ತ್ ಮೆಳ್ಳೆ೦. ಹಾಚಾ ಉಪ್ರಾ೦ತ್ ಹ್ಯಾ ಪಟ್ಟೆಕ್ ‘ಕ್ಯೂಪರ್ ಬೆಲ್ಟ್’ ಮ್ಹುಣ್ ನಾ೦ವ್ ಪಡ್ಲೆ೦. ಆಜ್ ಹ್ಯಾ ಕ್ಯೂಪರ್ ಪಟ್ಟೆ೦ತ್ ಯೆದೊಳ್ ಮ್ಹುಣಾಸರ್ ಸುಮಾರ್ 800 ಪ್ಲೂಟೊ ಬರಿಚ್ ಆಸ್‌ಲ್ಲಿ೦ ದಾಕ್ಟಿ೦ -ದಾಕ್ಟಿ೦ ಗ್ರಹಾ೦ ಮೆಳ್ಯಾ೦ತ್. ಹ್ಯಾ ಪಟ್ಟೆ೦ತ್ ಉಣ್ಯಾರ್ ಉಣೆ೦ ಮ್ಹುಳ್ಯಾರ್ 35,000 ಗ್ರಹಾ೦ ಮ್ಹುಣೀ ಆಸಾತ್ ಮ್ಹುಣ್ ನೆಕೆತ್ರ್‌ಶಾಸ್ತ್ರಿ ಪಾತ್ಯೆತಾತ್. ಯೆದೊಳ್ ಮೆಳ್ಯಾ೦ತ್ಲಿ೦ ಥೊಡಿ೦ ವಡ್ಲಿ೦ ನಾವಾ೦ ಮ್ಹುಳ್ಯಾರ್ 2000 ಇಸ್ವೆ೦ತ್ ಮೆಳ್‌ಲ್ಲೆ೦ ‘ವರುಣಾ’, 2002 ಇಸ್ವೆ೦ತ್ಲೆ೦ ‘ಕ್ವಾವೊರ್’, 2003 ಇಸ್ವೆ೦ತ್ಲೆ೦ ‘ಸೆಡ್ನಾ’ ಆನಿ೦ 2005 ಇಸ್ವೆ೦ತ್ ಮೆಳ್‌ಲ್ಲೆ೦ ‘ಕ್ಸೆನಾ’. ಹಿ೦ ಸಕ್ಕಡೀ ಪ್ಲೂಟೊಚಾಕೀ ಇಲ್ಲಿಶಿ೦ ದಾಕ್ಟಿ೦ ಆಸ್‌ಲ್ಲಿ೦. ಜಾಲ್ಯಾರೀ ಥೊಡ್ಯಾನಿ೦ ಪ್ಲೂಟೊಕ್ ಗ್ರಹಾಚಾ ಸ್ಥಾನ ಥಾವ್ನ್ ಭಯ್ರ್ ಕಾಡಿಜೆ ಮ್ಹುಣ್ ಸುಮಾರ್ ಧಾ-ಪ೦ದ್ರಾ ವರ್ಸಾ೦ ಆದಿ೦ಚ್ ಬೊಬಾಟ್ ಮಾರು೦ಕ್ ಸುರು ಕೆಲ್ಲೆ೦.
ಪುಣ್ ಹಾಕಾ ನಾಟಕೀಯ್ ಬದ್ಲಾವಣ್ ಜಾಲ್ಲಿ ಹ್ಯಾಚ್ 2006 ಎಪ್ರಿಲಾ೦ತ್. ಏಕಾ ವರ್ಸಾ ಆದಿ೦ ಸೊದೊನ್ ಕಾಡ್‌ಲ್ಲೆ೦ ಕ್ಸೆನಾ ಪ್ಲೂಟೊಚಾಕೀ ಇಲ್ಲೆಶೆ೦ ವ್ಹಡ್ ಆಸಾ ಮ್ಹುಣ್ ವಿಜ್ನಾನಿ೦ಕ್ ಕೆದಾಳಾ ಕಳಿತ್ ಜಾಲೆ೦ ಪಳೆ ತೆದಳಾ ದಾವೆ೦ ಗ್ರಹ್ ಮ್ಹುಳ್ಳೆ೦ ಸ್ಥಾನ್ ಕ್ಸೆನಾಕ್ ದಿಜೆ ನಾತ್ಲ್ಯಾರ್ ಪ್ಲೂಟೊಕ್ ಗ್ರಹ್ ಮ್ಹುಣ್ ದಿಲ್ಲೆ೦ ಸ್ಥಾನ್ ಪಾಟಿ೦ ಕಾಡಿಜೆ ಜಾಲ್ಲಿ ಅನಿರ್ವಾಯಾತ ಆಯ್ಲಿ. ದೆಕುನ್ ಹ್ಯಾಚ್ ಅಗಸ್ತಾಚಾ 16 ಥಾವ್ನ್ 24 ಮ್ಹುಣಾಸರ್ ಚೆಕ್ ರಿಪಬ್ಲಿಕಾಚಾ ಪ್ರಾಗಾ೦ತ್ ಸ೦ಸಾರಾ೦ತ್ಲ್ಯಾ ಸುಮಾರ್ 2,500 ನೆಕೆತ್ರ್‌ಶಾಸ್ತ್ರಿನಿ೦ ಸಾ೦ಗಾತಾ ಬಸವ್ನ್, ವಾದ್ ವಿವಾದ್ ಕರ್ನ್ ಕೆಲ್ಲೆ ನಿರ್ಣಯ್ ಅತಾ೦ ಇತಿಹಾಸ್. ಹ್ಯಾ ನೆಕೆತ್ರ್ ಶಾಸ್ತ್ರ್ಯಾ೦ಕ್ ಕ್ಸೆನಾಕ್ ಗ್ರಹಾಚೆ೦ ಸ್ಥಾನ್ ದೀ೦ವ್ಕ್ ಮನ್ ಯೆವ್ನಾ. ಕಿತ್ಯಾಕ್ ಮ್ಹುಳ್ಯಾರ್ ಪುಡ್ಲ್ಯಾ ದಿಸಾನಿ೦ ಡಜನ್- ಡಜನ್ ಕ್ಸೆನಾ೦ ತಸಲಿ೦ ಗ್ರಹಾ೦ ಯೇ೦ವ್ಕ್ ಪುರೊ. ಆಯ್ಚ್ಯಾ ಭುರ್ಗ್ಯಾ೦ಕ್ ನೋವ್ ಗ್ರಹಾ೦ಚಿ೦ ನಾವಾ೦ ಉಡಾಸ್ ದವರು೦ಕ್‌ಚ್ ಕಶ್ಟ್ ಜಾತಾತ್, ಮಾಗಿರ್ ಡಜನ್ ನಾವಾ೦ ಕಶಿ೦ ಉಡಾಸ್ ದವರು೦ಕ್ ಸಕ್ತಿತ್ ?. ಆಶೆ೦ ಹ್ಯಾ ಸಮ್ಮೇಳನಾ೦ತ್ ಖ೦ಚಿ ಗ್ರಹಾ೦ ಆನಿ೦ ಖ೦ಚಿ ಗ್ರಹಾ೦ ನ್ಹ೦ಯ್ ಮ್ಹುಣ್ ನಿಯಮಾ೦ ಕೆಲಿ೦ ಆನಿ೦ ಪ್ಲೂಟೊಕ್ ಸಕಯ್ಲ್ ದೆವಾಯ್ಲೆ೦.
ವಾದ್-ವಿವಾದ್
ಪ್ಲೂಟೊಕ್ ಗ್ರಹಾ೦ಚಾ ಪಟ್ಟೆ ಥಾವ್ನ್ ನಿಕ್ಳಾಯ್ಲ್ಯಾಕ್ ಸಬಾರಾನಿ೦ ಅಸಮಧಾನ್ ಆನಿ೦ ಬೇಸರ್ ವ್ಯಕ್ತ್ ಕೆಲಾ೦. ಹಾ೦ತು೦ ಪ್ರಮುಖ್ ಜಾವ್ನಾಸ್ಚೆ೦ ಅಮೆರಿಕಾಚೆ೦ ನಾಸಾ. ವಚುನ್ ವಚುನ್ ಹ್ಯಾ ನಾಸಾನ್ ಹ್ಯಾಚ್ ಜನೆರಾ೦ತ್ ‘ನ್ಯೂ ಹಾರಿಜಾನ್’ ಮ್ಹುಳ್ಳೆ೦ ಏಕ್ ಆ೦ತ್ರಾಳ್ ತಾರು೦ ಪ್ಲೂಟೊಕ್ ದಾಡ್ಲಾ೦. ತೆ೦ 2015 ಇಸ್ವೆ೦ತ್ ಪ್ಲೂಟೊ ಸರ್ಶಿ೦ ಪಾವ್ತಾ. ಹ್ಯಾ ಮಿಶನಾಚೊ ಮುಖೆಲಿ ಆಲೆನ್ ಸ್ಟರ್ನ್ ಪ್ಲೂಟೊಕ್ ಭಯ್ರ್ ಗಾಲ್ಲೆ೦ ಏಕ್ ದುರ್ಬಾಗ್ಯ್ ಘಡಿತ್ ಮುಣ್ತಾ. ಪುಣ್ ಚಡಿತ್ ದುಖ್ ಉಚಾರ್ಲೆ೦ 93 ವರ್ಸಾ೦ಚಿ ವಿಧವ್ ಪ್ಯಾಟ್ರಿಷಿಯಾ ಟಾ೦ಬಾಗಾನ್. ಪ್ಲೂಟೊ ಅವಿಷ್ಕಾರ್ ಕೆಲ್ಲ್ಯಾ ಕ್ಲೈಡ್ ಟಾ೦ಬಾಗಾಚಿ ಪತಿಣ್ ತಿ. “ಪ್ಲೂಟೊಕ್ ಗ್ರಹಾ೦ಚಾ ಪಟ್ಟೆ ಥಾವ್ನ್ ಭಯ್ರ್ ಗಾಲ್ಯಾಕ್ ಮ್ಹಕಾ ದುಖ್ ಬೊಗ್ತಾ. ಪುಣ್ ವಿಜ್ನಾನ್ ಮ್ಹುಳ್ಯಾರ್ ತಸೆ೦ಚ್. ತೆ೦ ಖ೦ಯ್ ಬಸನಾ, ಮುಖಾರುನ್೦ಚ್ ವೆತಾ. ಗ್ರಹ್ ಯಾ ಅನೀ ಕಸಲೇ೦ಯ್ ಜಾ೦ವ್ ಪ್ಲೂಟೊ ಥ೦ಯ್ಚ್ ಆಸಾ, ಆನಿ ಮುಖಾರ್‌ಯೀ ಥ೦ಯ್ಚ್ ಆಸ್ತೆಲೆ೦” ಆಶೆ೦ ದುಖಾ೦ತ್‌ಯೀ ಸಮಧಾನ್ ವ್ಯಕ್ತ್ ಕೆಲೆ೦ ತಿಣೆ.
ಪ್ಯಾಟ್ರಿಷಿಯಾನ್ ಸಾ೦ಗ್ಚೆ೦ಯೀ ಸಮಾ೦ಚ್. ರೈನ್‌ಕೋಟ್‌ಯೀ ಕೋಟ್‌ಚ್, ಮೊಬೈಲೆ ಫೊನ್‌ಯೀ ಫೊನ್೦ಚ್ ನ್ಹ೦ಯ್‌ವೇ ..!!??. ನೆಕೆತ್ರ್‌ಶಾಸ್ತ್ರ್ಯಾನಿ೦ ಸಾ೦ಗ್ಲೆ ಮ್ಹುಣ್ ಪ್ಲೂಟೊಚಿ ಕಕ್ಷಾ ಬದ್ಲನಾ, ವಾತವರಣ್ ಬದ್ಲನಾ, ವಜನ್‌ಯೀ ಬದ್ಲನಾ.....!!!. ‘ಬಾ೦ಬೆ’ ಕ್ ‘ಮು೦ಬಯ್’ ಕೆಲೆ೦ ಮ್ಹುಳ್ಯಾರ್ ತೆ ರೋಡ್, ತಾ೦ತ್ಲೆ ಪೊ೦ಡ್, ತೆ೦ ಟ್ರಾಫಿಕ್ ಜ್ಯಾಮ್ ಬದ್ಲವ್ತಾವೇ ?? ತಸೆ೦ಚ್ ಪ್ಲೂಟೊ.........!!!!!.
**************************
-ಪ್ರಮೋದ್ ಜೆ. ರಾಡ್ರಿಗ್ಸ್ , ಹೊಸ್ಫೆಟ್
