ಅಸಲ್ಲೆಂ ಏಕ್ ಚಿಂತಾಪ್ ಆಸ್‌ಲ್ಲೆಂ. ಸೂರ್ಯಕಿರಣ್, ಆಕ್ಸಿಜನ್ ಯಾ ದ್ರವ್ ಉದ್ಕಾವಿಣ್ ಕಸಲೊಚ್ ಜೀವ್ ಕಸಲ್ಯಾಯ್ ಗಿರಾಣ್ಯಾಂತ್ ಉತ್ಪನ್ನ್ ಜಾಂವ್ಕ್ ಸಾದ್ಯ್ ನಾ ಮ್ಹುಣ್. ಪುಣ್ ಆತಾಂಚಾ ಸಂಸೊಧಾನಿಂ ಆಕ್ಸಿಜನ್ ಯಾ ಸೂರ್ಯಕಿರಣ್‌ವಿಣೆಂ ಆಸ್ಚಾ ಜ್ವಾಲಾಮುಖಿ ರೊಸಾಂತ್ ತಾಪ್ ಆನಿಂ ಉಣ್ಸಾನಾಚೆ ಸಕ್ತೆಂತ್‌ಚ್ ಸೂಕ್ಷ್ಮಾಣು ಜೀವಿ ಆಸ್ಚೆಂ ಆಮ್ಚಾ ಭೂಂಯ್ಚ್ ದಾಕ್ಲೊ ಮೆಳ್ಳಾ. ಭುಂಯ್ತ್ ಅಸಲ್ಲ್ಯಾ ಪರಿಸ್ಥಿತೆಂತ್ ಜೀವ್ ಉತ್ಪನ್ನಾಚಿ ಸಕತ್ ಆಸ್ಲ್ಯಾರ್ ದುಸ್ರ್ಯಾ ಗ್ರಹಾಂತ್ ಕಿತ್ಯಾಕ್ ಜೀವ್ ಆಸೊಂಕ್ ನಜೊ ? ಆಶೆಂ ಚಿಂತಾನಾ ವಿಗ್ಯಾನಿಂಚಿ ಪಯ್ಲಿ ದೀಷ್ಟ್‌ಚ್ ಯೂರೋಪಾ ಗಿರಾಣ್ಯಾಚೆರ್ ...
ವ್ಹಯ್... ಹೆಂ ಯೂರೋಪಾ ಸೂರ್ಯ್-ಮಂಡಳಾಚಾ ವಡ್ಲೆಂ ಗಿರಾಣೆ ಗುರುಚೆಂ ಉಪಗ್ರಹ್. ತಾಚಾ ಡಜಾನಾ ವಯ್ರ್ ಉಪಗ್ರಹಾಂತ್ಲೆಂ ಏಕ್ಲೆಂ. ಆಮ್ಚಾ ಚಂದ್ರಾಚಾಕೀ ಗಾತ್ರಾಣ್ ಇಲ್ಲೆಶೆಂ ಲ್ಹಾನ್. ಹ್ಯಾ ಉಪಗ್ರಹಾಕ್ ಕ್ರಿ.ಶ. 1610 ಂಚ್ ಗೆಲೀಲಿಯೊನ್ ಸೊದೊನ್ ಕಾಡ್‌ಲ್ಲೆಂ. ಹ್ಯಾ ಯೂರೋಪಾ ವಿಶಿಂ ಆಮ್ಕಾಂ ಚಡಿತ್ ಸಮ್ಜಣಿ ಮೆಳ್ಚಿ ಗೆಲೀಲಿಯೊ ನಾವಾಚಾ ಅಂತ್ರಾಳ್-ತಾರ್ವಾ ದ್ವಾರಿಂ. ನಾಸಾನ್ ದಾಡ್‌ಲ್ಲೆಂ ಹೆಂ ತಾರುಂ 1995 ಥಾವ್ನ್ 2003 ಇಸ್ವೆ ಮ್ಹುಣಾಸರ್ ಗುರು ಗ್ರಹಾಕ್ ಬೊವಾರಿಂ ಮಾರ್ನ್ ಆಸ್‌ಲ್ಲೆಂ. ಹ್ಯಾ ತಾರ್ವಾಚಾ ನದರೆಕ್ ಯೂರೋಪಾಚಾ ವಾತಾವರಣಾಂತ್ ಆಕ್ಸಿಜನಾಚಿಂ ಕಣಾಂ ಆಸ್ಚಿಂ ದಿಸ್ಲೆಂ. ತಿತ್ಲೆಂಚ್ ನ್ಹಂಯ್, ಯೂರೋಪಾಚಾ ಚಡಾವತ್ ವಯ್ಲ್ಯಾ ಭಾಗಾಂತ್ ದಟ್ಟ್ ಏಕ್ ಬರ್ಫಾಚೆಂ ಏಕ್ ಥರ್‌ಯೀ ದಿಸೊನ್ ಆಯ್ಲೆಂ. ವಿಗ್ಯಾನಿಂ ಪ್ರಕಾರ್ ಹ್ಯಾ ಬರ್ಫಾಚಾ ಥೊಡ್ಯಾ ಕಿ.ಮೀ. ಬಿತರ್ ಉದಾಕ್ ಆಸ್ಚೆಂ ಸಾಧ್ಯ್ ಆಸಾ ಖಂಯ್. ತರ್ ಥಂಯ್ ಸೂಕ್ಷ್ಮಾಣು ಜೀವಿ ನಾಂತ್ ಕಶೆಂ ಸಾಂಗ್ಚೆಂ ? . ಪುಣ್ ಗೆಲೆತ್ಯಾ ಮಹಿನ್ಯಾಂತ್ ರಿಚ್ಚರ್ಡ್ ಗ್ರೀನ್ ಬರ್ಗ್ ಮ್ಹುಳ್ಯಾ ವಿಗ್ಯಾನಿಂನ್ ಆನ್ಯೇಕ್ ನವೆಂ ವಾದ್ ಹಾಡ್ಲಾಂ. ಸೂರ್ಯ ಕಿರ್‍ಣಾಂಚಾ ಪ್ರಭಾವನ್ , ಯುರೋಪಾಚೆಂ ವಯ್ಲೆಂ ಬರ್ಫಾ ಥರ್ ಒಕ್ಸಿಡೈಸರ್ ಜಾವ್ನ್ ಪರಿವರ್ತನ್ ಜಾವ್ನ್ ಭಿತರ್ಲ್ಯಾ ಉದ್ಕಾನ್ ವಡ್ಲ್ಯಾ ಪ್ರಮಾಣಾಂತ್ ದಾಸ್ತಾನ್ ಜಾಲಾಂ ಮ್ಹುಣ್.. ತಶೆಂ ಜಾಲ್ಲ್ಯಾರ್ ಹ್ಯಾ ಸಾಗೊರಾಂತ್ ನಾ ಬಗಾರ್ ಸೂಕ್ಷ್ಮಾಣು ಜೀವಿ , ಮಾಸ್ಳೆ ತಸಲ್ಲ್ಯೊ ಇತರ್ ವ್ಹಡ್ ಜೀವಿ ಆಸ್ಚೆಂ ಸಾಧ್ಯಾತ್ ಅಸಾ ಮ್ಹುಣ್ತಾತ್ ವಿಗ್ಯಾನಿಂ ...!!
ಪುಣ್ ಹೆಂ ಥಿರ್ ಕರಿಜೆ ಜಾಲ್ಯಾರ್ ಯುರೋಪಾಕ್ ಏಕ್ ಅಂತ್ರಾಳ್ ತಾರುಂ ದಾಡ್ನ್ ಸಂಸೋಧ್ ಕರಿಜೆ ಪಡ್ತಾ. ಸುಮಾರ್ ದೋನ್ ದಾಕ್ಡ್ಯಾ ಥಾವ್ನ್ ನಾಸಾನ್ ಹ್ಯಾ ವಿಶಿಂ ಚಿಂತ್ಲ್ಯಾರೀ ಥೊಡ್ಯಾ ಕಾರಾಣಾಂತ್ ಹೆಂ ರದ್ದ್ ಕರಿಜೆ ಪಡ್ಲಾಂ. ಪುಣ್ ಹ್ಯಾಚ್ ಫೆಬ್ರೆರಾಂತ್ ನಾಸಾನ್ ಆನಿಂ ಯೂರೋಪಿಯಾನ್ ಸ್ಪೇಸ್ ಎಜೆನ್ಸಿನ್ Europa Jupiter System Mission ಮ್ಹುಳ್ಯಾ ಕಾರ್ಯಕ್ರಮಾಕ್ ಸಮ್ಮತಿ ದಿಲ್ಲಿ. ಹ್ಯಾ ಪ್ರಕಾರ್ ಹೆಂ ತಾರುಂ 2020 ಇಸ್ವೆಂತ್ ಭೂಂಯ್ ಥಾವ್ನ್ ಯುರೋಪಾಕ್ ಉಬ್ತೆಲೆಂ. ಹ್ಯಾ ಕಾರ್ಯಕ್ರಮಾಂತ್ ದೋನ್ ಅಂತ್ರಾಳ್ ತಾರ್ವಾಂ ಆಸ್ತೆಲಿಂ. ನಾಸಾನ್ ಕರ್ಚೆಂ ಅಂತ್ರಾಳ್ ತಾರುಂ ಯುರೋಪಾಕ್ ದಾಡ್ಲ್ಯಾರ್, ಯೂರೋಪಿಯಾನ್ ಸ್ಪೇಸ್ ಎಜೆನ್ಸಿಚೆಂ ತಾರುಂ ಗುರು ಗ್ರಹಾಚೆಂ ಆನ್ಯೇಕ್ ಉಪಗ್ರಹ್ ಗ್ಯಾನಿಮೇಡಾಕ್ ಪಾವ್ತೆಲೆಂ. ತೆಂ ಪಾವೊಂಕ್ 9 ವರ್ಸಾಂ ಜಾಯ್. ಮ್ಹುಳ್ಯಾರ್ 2029 ..! ಪುಣ್ ಅತಾಂ ಯೂರೋಪಿಯಾನ್ ಸ್ಪೇಸ್ ಎಜೆನ್ಸಿ ಆರ್ಥೀಕ್ ಕಾರಾಣಾಂ ನಿಮ್ತಿಂ ಹೆಂ ಯೋಜಾನಾ ಥಾವ್ನ್ ಭಯ್ರ್ ವಚುಂಕ್ ಚಿಂತುನ್ ಆಸಾ ಖಂಯ್. ಪಳಯ್ಜೆ ಮುಕಾರ್ ಕಿತೆಂ ಜಾತಾ ಮ್ಹುಣ್...ಇತ್ಲೆಂ ಮಾತ್ರ್ ಅತಾಂ ಖಚಿತ್ .. ಭಾಯ್ಲ್ಯಾ ಗಿರಾಣ್ಯಾನಿಂ ಅಮ್ಚ್ಯಾ ದಾಯ್ಜಾಂಕ್ ಸೊದ್ನಾಂ ಕೆಲ್ಲ್ಯಾರ್ ತೆಂ ಪಯ್ಲೆಂ ಯೂರೋಪಾ ಥಾವ್ನ್ಂಚ್ ಆರಂಭ್ ಜಾಯ್ಜೆ ಮ್ಹುಣ್ ..!!
****************************************************************************************************
- ಪ್ರಮೋದ್ ರೊಡ್ರಿಗ್ಸ್, ಹೊಸ್ಪೆಟ್
****************************************************************************************************
- ಪ್ರಮೋದ್ ರೊಡ್ರಿಗ್ಸ್, ಹೊಸ್ಪೆಟ್
